1, 2. Morwasinke sinzi sovantu va dilire kukwata egano nonkango daJesus?

MUNTU kuvhura a zuvhe ezwi lyogu ana kumuuyungisa. Age kuvhura a dimburure ezwi lyogu ana kuuyunga. Nye mokuyikwata egano ntudi ga hepa kudiva eyi ana tamba. (1 Kol. 14:9) Monkedi zokulifana, vantu wovanzi va zuvhire eyi ga uyungire Jesus. Nampili ngomu ga uyungire nawo meraka lyawo, nye kapisi navenye va kwete egano nonkango dendi. Morwa konda zeyi, Jesus yiyo ga tanterere vapurakeni vendi asi: “Purakeneni nge namuvenye oku tomu zuvhu nawa.”—Mar. 7:14.

² Morwasinke sinzi sovantu va dilire kukwata egano nonkango daJesus? Morwa vamwe kwa kere negano ndi nositambo sepuko. Jesus kwa uyungire kuhamena vantu vangoso asi: “Mwa yi diva nawa-nawa yokutulira Veta zaKarunga rumpengwa, mu kwame nompo deni!” (Mar. 7:9) Awo kapi va hetekerere ko kukwata egano nonkango daJesus. Kapi va here kurundurura nompo nomagano gawo. Vantu owo va yi zuvhire nomatwi gawo nye kapi va yi kwete egano. (Resa  Mateusa 13:13-15.) Yisinke natu rugana yipo tu gwanene mo uwa merongo lyaJesus?

3. Morwasinke varongwa va kwaterere egano nonkango daJesus?

³ Twa hepa kukwama sihonena sovarongwa vaJesus wokulinunupika. Age kwa va tanterere asi: “Meho geni kwa ragopa morwa taga mono, ano ga kare matwi geni, nago kwa ragopa, morwa taga zuvhu.” (Mat. 13:16) Morwasinke varongwa va yi kwaterere egano, ano wopeke va dire kuyikwata egano? Pana kara yininke yitatu. Sokuhova, awo ngava pura mapuro ntani nokuhetekera ko kukwata egano nonkango daJesus. (Mat. 13:36; Mar. 7:17) Sauvali, ngava tambura erongo lyepe nokuligwederera kweyi va divire nare. (Resa Mateusa 13:11, 12.) Sautatu, awo kwa tulire pasirugana eyi va lirongere ntani nokuvateresa ko wopeke.—Mat. 13:51, 52.

4. Yininke musinke yitatu ya hamena mo mokukwata egano yifanekeso yaJesus?

⁴ Nsene tuna hara kukwata egano yifanekeso yaJesus, twa hepa kukwama sihonena sovarongwa vendi wovalimburukwi. Ayo kwa hamena mo yininke yitatu. Sokuhova, twa hepa kulitulira po siruwo sokulironga nokuteda ko kweyi nga rongo Jesus nokurugana mapaparo ntani nokupura mapuro gokuwapera. Eyi kutuninkisa tu kare nediwo. (Yis. 2:4, 5) Sauvali, twa hepa kudimburura omu ediwo olyo lya liza neyi twa diva nare, nomu natu vhura kugwanena mo uwa. Eyi tayi tu ninkisa tu yi kwate egano. (Yis. 2:2, 3) Sautatu, twa hepa kutura pasirugana eyi twa lironga. Eyi kulikida asi twa kara nounongo.—Yis. 2:6, 7.

5. Fanekesa elisigo lya kara pokatji kediwo nokukwata egano ntani unongo.

⁵ Elisigo musinke lya kara pokatji kediwo nokukwata egano ntani unongo? Kuvhura kuyifanekesa monkedi ezi: Gazara asi ove kuna sikama mokatji kositaura makura mbesa zina vyuka moge. Sokuhova, to dimburura asi azo mbesa, olyo ngoso ediwo. Sauvali, to dimburura asi nsene no sikama ngorooro, mbesa tazi ya kumbwanda, ngoso ono yi kwata egano! Sautatu, to duka mo mositaura, owo ngoso unongo! Eyi yiyo Bibeli azi tu korangedere asi tu ‘kwaterere kounongo.’ Awo ngau tu parura.—Yis. 3:21, 22; 1 Tim. 4:16.

6. Mapuro musinke gane natu zogera apa natu ka konakona yifanekeso ntambali yaJesus? (Tara  kakende pepenuno 8.)

⁶ Mosirongwa esi nesi sokukwama ko, tatu ka konakona yifanekeso ntambali eyi ga ruganesere Jesus. Ntani mwankenye sifanekeso tatu ka konakona mapuro aga gana kukwama ko: Yisinke asi tanta sifanekeso esi? (Eli yilyo ediwo.) Morwasinke Jesus ga ruganesere sifanekeso esi? (Eyi nayi ka tu vatera tu yi kwate egano.) Yisinke natu lirongera ko ntani ngapi natu gwanena mo uwa? (Owo yiwo unongo.) Yisinke ayi tu rongo eyi kuhamena Jehova ntani Jesus?

7. Yisinke asi tanta sifanekeso sohuma zomositareta?

⁷ Resa Mateusa 13:31, 32. Yisinke asi tanta sifanekeso saJesus sohuma zomositareta? Huma kufanekesa mbudi zoUhompa noyitundwamo yeudiso lyombudi ntani mbungakriste. Apa mbungakriste za tamekere momvhura 33 kwa kere zonunu tupu, ngwendi moomu huma za “nunupa po unene ponombuto nadinye.”  Nampili ngoso, konyima zonomvhura dongandi, mbungakriste za ya kulire. Azo kwa ya kulire unene kupitakana omu va yi ndindilire. (Koros. 1:23) Ekuro eli kwa retere mauwa gomanzi morwa Jesus kwa tente asi “yidira tayi wiza, yi ya tunge yikorogo monomutayi daso.” Yidira kwa fanekesa vantu wonomutjima donongwa ava ava gwana nondya dopampepo nepopero nouvando mombungakriste.—Hetakanesa Hesekiyeli 17:23.

8. Morwasinke Jesus ga ruganesere sifanekeso sohuma zomositareta?

⁸ Morwasinke Jesus ga ruganesere sifanekeso esi? Age kwa ruganesere ekuro lyokutetukisa lyohuma zomositareta mokulikida omu Uhompa waKarunga au kuru nokupopera nokufunda po yilimbikiso nayinye. Kutundilira 1914 mbunga zaKarunga kwa ligwederera monkedi zokutetukisa. (Jes. 60:22) Ava va kara mombunga ozo kwa va vatera va nkondopeke elikwatakano lyawo naJehova. (Yis. 2:7; Jes. 32:1, 2) Ntani kwato marwaneso aga ga vhura kuhagekesa po ekuro lyombunga ezi.—Jes. 54:17.

9. (a) Yisinke natu vhura kulirongera ko kosifanekeso sohuma zomositareta? (b) Yisinke ayi tu rongo eyi kuhamena Jehova ntani Jesus?

⁹ Yisinke natu vhura kulirongera ko kosifanekeso sohuma zomositareta? Nampo ose kwa tunga momukunda omu mwa kara Nombangi dononsesu ndi kapi atu mono yitundwamo yosirugana setu sokuzuvhisa. Nampili ngoso, tu diworokeni asi Uhompa kuvhura kufunda po yilimbikiso nayinye. Pasihonena apa munazinyetugara Edwin Skinner ga ka sikire mosirongo saIndia 1926, age kwa ka gwene mo Nombangi dongandi tupu. Ntani sirugana sokuzuvhisa kapi ngasi gendi po nawa. Nye age kwa twikilire kuzuvhisa ntani ga mwene omu mbudi zoUhompa zina kufunda po yilimbikiso. Ngesi moIndia kuna kara mo Nombangi dokupitakana 37 000 ntani vantu wokupitakana 108 000 kwa kere poMurarero 2013. Momvhura ezi munazinyetugara F. E. Skinner ga ka sikire moIndia, yipo sirugana sokuzuvhisa va si tamekere moZambia. Ngesi amo kuna kara mo vazuvhisi wokupitakana 170 000 ntani vantu wokupitakana  763 915 kwa kere poMurarero 2013. Eyi kutanta asi mwankenye vantu 18, gumwe kwa ka kere poMurarero. Ekuro eli kutetukisa sili!

10. Yisinke asi tanta sifanekeso sohingo?

¹⁰ Resa Mateusa 13:33. Yisinke asi tanta sifanekeso sohingo? Sifanekeso esi naso kwa tamba kombudi zoUhompa neyi azi sikisa mo. “Usura mudima” kufanekesa nomuhoko, ano yihaheso kufanekesa elihano lyombudi zongwa kupitira mosirugana sokuzuvhisa. Nampili ngomu ekuro lyohuma zomositareta ali moneka, elihano lyohingo pomuhowo kapi ali moneka. Nye konyima zosiruwo ose kumona yitundwamo.

11. Morwasinke Jesus ga ruganesere sifanekeso sohingo?

¹¹ Morwasinke Jesus ga ruganesere sifanekeso esi? Age kwa likidire asi mbudi zoUhompa za kara nononkondo dokulihana nokureta marunduruko. Mbudi zoUhompa kwa lihanena “dogoro nokooku wa ka twa uzuni.” (Yirug. 1:8) Marunduruko aga azi retesa po mbudi rorunzi kapi ava ga nongonona. Vantu wovanzi kuna kutambura mbudi zoUhompa ntani nokupulisira nonkondo dazo di rundurure nkareso zawo.—Rom. 12:2; Efe. 4:22, 23.

12, 13. Gava yihonena omu mbudi zoUhompa za lihana ngwendi hingo zomosifanekeso saJesus.

¹² Yitundwamo yosirugana sokuzuvhisa rorunzi kuyimona konyima zonomvhura dongandi. Pasihonena, Franz naMargit valikwali ava vana kurugana ngesi koBeteli zapeke, awo kwa kere moBeteli zomoBrasilia momvhura 1982 ntani ngava zuvhisire modoropagona. Varongwa vawo vamwe kwa kere zinya novana vendi vane. Mbeli zendi gomumati ogu ga kere nonomvhura 12 posiruwo sina, kwa kere nonomuga unene ntani nga hetekere ko kuvanda komeho elirongo li tameke. Morwa valikwali ava kwa va tumine kwapeke, elirongo yipo lya hege. Nye konyima zonomvhura 25 kwa ya dingwire doropa ezi. Yisinke va ya gwene? Mbungakriste zovazuvhisi 69 ava ngava pongere moSinyanga sosipe, ano 13 kwa kere vazuvhisi wokukarerera. Nye ngapi kuhamena mumati gonomuga? Age ngesi muwapaiki gombunga zovakuronambunga. Ngwendi hingo zomosifanekeso saJesus, mbudi zoUhompa kwa lihana nokureta marunduruko meparu lyovantu, ano eyi kwa hafesere valikwali vena.

¹³ Nampili moyirongo omu vanavazinyetu ava va silike kuzuvhisa, nonkondo dombudi zoUhompa simpe kuna kurundurura eparu lyovantu. Ayo kututetukisa apa atu mono omu mbudi zoUhompa za lihanena moyirongo oyo. Pasihonena, mosirongo saKuba mbudi zoUhompa kwa ka sikire mo momvhura 1910, ano munazinyetu Russell kwa ka dingwire Kuba 1913. Pomuhowo, mbudi kapi za lihene. Yisinke yina kuhoroka ngesi moKuba? Amo kuna kara mo vazuvhisi wokupitakana 96 000, ano vantu wokupitakana 229 726 kwa kere poMurarero 2013. Eyi kutanta asi mwankenye vantu 48, gumwe kwa ka kere poMurarero. Nampili moyirongo omu va dira kusilika mbudi zoUhompa, mbudi kuna kulihanena konomukunda dokoure. *—Muud. 8:7; 11:5.

14, 15. (a) Ngapi natu gwanena mo uwa mosifanekeso sohingo? (b) Yisinke ayi tu rongo eyi kuhamena Jehova ntani Jesus?

¹⁴ Ngapi natu gwanena mo uwa  mosifanekeso saJesus sohingo? Apa atu teda ko kweyi asi tanta sifanekeso esi, ose kudimburura asi kapi twa hepa kukara nosinka omu mbudi zoUhompa ngazi ka sika kovantu wovanzi ava simpe va dira kuzizuvha. Jehova yige a gendesa nayinye. Nye ose yisinke natu rugana ko? Nonkango daKarunga kwa tanta asi: “O kune ngurangura nongurova hena. Nye kapi wa diva asi nayinye ngayi kura nawa ndi yimwe po yiyo ngayi kura hasa, kupitakana yikwawo.” (Muud. 11:6) Ntani twa hepa kudiworoka mokuhundira Jehova a tungike sirugana sokuzuvhisa, unene po moyirongo omu va si silika.—Efe. 6:18-20.

¹⁵ Ntani hena, twa ha dompa mutjima nsene kapi tuna kumona usimbu yitundwamo yosirugana setu sokuzuvhisa. Twa ha guva ‘morwa kapi yina kutugenda po nawa.’ (Sak. 4:10) Konyima, yitundwamo kuvhura ngayi kare yokutetukisa kupitakana omu twa yi ndindilire.—Epis. 40:5; Sak. 4:7.

16. Yisinke asi tanta sifanekeso somurandi ntani nesi sougawo ou wa horama?

¹⁶ Resa Mateusa 13:44-46. Yisinke asi tanta sifanekeso somurandi ntani nesi sougawo ou wa horama? Mosiruwo saJesus, varandi vamwe ngava zi ure mokukapapara nombamba donongwa nokukadiranda. Murandi kufanekesa vantu wonomutjima donongwa ava ava zi ure mokukapapara usili. “Mbamba zimwe zomulyo gomunene” kufanekesa omu mbudi zoUhompa za kara nomulyo. Apa ga dimbwilire mulyo gombamba ozo, murandi “ta zi” ta ka randesa emona lyendi nalinye, ta ya zi randa po. Jesus kwa uyungire hena kuhamena mugara ogu nga rugana mepya ntani ga gwene ugawo ou wa “horama.” Mugara ogu kapi ga paparere ugawo moomu a u papara murandi. Nye ngwendi murandi, age kwa ka randesere “nayinye” eyi ga wekere nokuyaranda ugawo owo.

17. Morwasinke Jesus ga ruganesere sifanekeso somurandi ntani nesi sougawo ou wa horama?

¹⁷ Morwasinke Jesus ga ruganesere yifanekeso eyi yivali? Age kwa likidire asi usili kuugwana mononkedi dokulisiga-siga. Vantu vamwe kuupapara ntani va hepa kukondja mokuugwana. Ano vamwe nampili ngomu ava dili kuuparara, awo kuugwana pokuuvaretera. Yi kare asi monkedi musinke vana u gwana, awo kuyadimburura mulyo gwawo nokutura po malizambero gomanene mokudira kuuzumbanesa.

18. (a) Ngapi natu gwanena mo uwa moyifanekeso eyi yivali? (b) Yisinke ayi tu rongo eyi kuhamena Jehova ntani Jesus?

¹⁸ Ngapi natu gwanena mo uwa moyifanekeso eyi yivali? (Mat. 6:19-21) Lipura asi: ‘Ame na kara nonkareso ngwendi zovagara ava womosifanekeso ndi? Ame kutara usili asi ugawo ndi? Ame kutura po malizambero mokudira kuuzumbanesa ndi ame kupulisira yininke yapeke ngwendi yinka yeparu yi donganese nge?’ (Mat. 6:22-24, 33; Ruk. 5:27, 28; Fil. 3:8) Nsene twa hara usili, ngatu kondja paapa twa hulira mokuutura muhowo meparu lyetu.

19. Yisinke ngatu ka konakona mosirongwa sokukwama ko?

¹⁹ Ose tuna purakene ntani nokukwata egano eyi ayi tanta yifanekeso eyi yoUhompa. Diworoka asi kapi ya gwanena po tupu mokuyikwata egano nye twa hepa kutura pasirugana eyi tuna lirongere ko. Mosirongwa sokukwama ko, ngatu ka konakona yifanekeso yitatu ntani neyi ngatu vhura kukalirongera ko.