1, 2. Yisinke ga rugene Jesus ngurova Nisani 14 momvhura 33? (Tara efano.)

AGO masiku, kwedi kuna teramenene moJerusarema. Azo kwa kere ngurova Nisani 14 momvhura 33. Jesus novapositoli vendi ntani tupu vana kudana Paska mokudiworoka ezoworo lyoVaisraeli moupika woVaegipite nomvhura 1 500 da ka pita. Ngesi Jesus novapositoli vendi 11, ta tulisa po murarero gokulikarera, silika esi sa likidire nomfa edi ga ya fire kongurova ozo. *—Mat. 26:1, 2.

² Jesus ta pandura Guhwe nokupitisa mboroto za hana muhahu kovapositoli vendi nokutanta asi: “Guseni mu lye.” Ta gusa hena nkinda zovhinyu, ta pandura Guhwe nokutanta asi: “Nwaa-nweni mo namuvenye.” (Mat. 26:26, 27) Ngesi Jesus ana kara neyi yoyinzi yokutantera vasikuli vendi wovalimburukwi.

3. Mapuro musinke natu ka zogera mosirongwa esi?

 ³ Silika esi ga tulire po Jesus kusitumbura asi ‘Murarero gwaHompa,’ aso silika sonomfa dendi. (1 Kol. 11:20) Kuhamena silika esi, vamwe kuvhura va lipure asi: Morwasinke natu diworokera nomfa daJesus? Yisinke azi fanekesa mboroto novhinyu? Ngapi omu natu liwapaikira Murarero? Wolye wokulya nokunwa poMurarero? Ngapi omu Vakriste nava tara ehuguvaro lyawo?

4. Mpito musinke ga tu pa Jesus kupitira monomfa dendi?

⁴ Ngovana vaAdamu, ose kwa pinga nonzo nonomfa. (Rom. 5:12) Kwato muntu gokudira kusikilira mo na vhura kugava sizoweseso mokuliparura mwene ndi wopeke. (Epis. 49:6-9) Nye kupitira monomfa dendi, Jesus kwa gava sizoweseso, rutu rwendi rokusikilira mo nohonde zendi. Pokugava sizoweseso kwaKarunga, Jesus kwa tu pa mpito zokutuzowora kononzo nokonomfa yipo ngatu gwane uhwi womwenyo gwanarunye.—Rom. 6:23; 1 Kol. 15:21, 22.

5. (a) Ngapi tuna yi diva asi Karunga naJesus kwa hara vantu? (b) Morwasinke natu karera poMurarero?

⁵ Sizoweseso kulikida asi Karunga kwa hara vantu. (Joh. 3:16) Pokugava nzambo zendi, Jesus kwa likida asi nage ga tu hara. Apa ga kere Jesus konyonga zaKarunga “ngonkurungu,” age ‘nga hafa kumwe norudi rovantu.’ (Yis. 8:30, 31) Kukara norupandu kwaKarunga noku kwaJesus, ngano yi tu tumangede tu ka kare poMurarero, mokulimburukwa mpangera ezi asi: “Omu yi rugane mokudiworokera nge po.”—1 Kol. 11:23-25.

6. Yisinke azi fanekesa mboroto novhinyu?

⁶ Apa ga tulisire po Murarero, Jesus kapi ga situnukisire rutu rwendi ru kare mboroto, ano honde zendi zi kare vhinyu. Nye age kwa tente kuhamena mboroto asi: “Oru yiro rutu rwange.” Kuhamena vhinyu, age kwa tente asi: “Ezi yizo honde zange zEgwanekero lyepe, ezi ngazi tjikangera wovanzi.” (Mar. 14:22-24) Yipo nye, rutu nohonde zendi kwa kere yopasifanekeso.

7. Yisinke azi fanekesa mboroto ezi ava ruganesa poMurarero?

⁷ Posilika sina somomvhura 33, Jesus kwa ruganesere mboroto za hana muhahu ezi za hupire ko koPaska. (Ex. 12:8) MoMatjangwa, hingo pamwe kufanekesa ezonauko ndi nzo. (Mat. 16:6, 11, 12; Ruk. 12:1) Yipo nye Jesus ga ruganesere mboroto za hana muhahu mokufanekesa rutu rwendi rokudira nzo. (Heb. 7:26) Mboroto zangoso yizo ava ruganesa poMurarero.

8. Yisinke azi fanekesa nkinda zovhinyu poMurarero?

⁸ Vhinyu ezi ga ruganesere Jesus moNisan 14 momvhura 33, kwa fanekesa honde zendi ngamoomu atu ruganesa nkinda zovhinyu poMurarero naina. PoGorogata, evango lya kere ponze zaJerusarema, honde zendi kwa tjikangere ‘mokudongonona po nonzo.’ (Mat. 26:28; 27:33) Mboroto novhinyu kwa fanekesa nzambo zaJesus ezi ga geve kovantu wovalimburukwi, ano ose kulikida rupandu rwetu kewapaiko eli pokukara poMurarero nkenye mvhura.

9. (a) Morwasinke ya karera nomulyo kudiva ereso lyoBibeli lyoMurarero gwaHompa? (b) Ngapi omu o lizuvhu kuhamena sizoweseso?

⁹ Mokudiva ereso lyoBibeli lyoMurarero  gwaHompa twa hepa kutara mokabuke Konakona Matjangwa nkenye ezuva, yipo tu tede ko kweyi ga uyungire Jesus komeho a ka fe. Eyi ngayi tu vatera tu wapaikire mutjima gwetu Murarero gwaHompa. * Munazinyetukadi gumwe kwa tente asi: “Ose kuna kundindira nononkondo Murarero. Aso kuna kara silika sokulikarera nkenye mvhura. Tani diworoka apa va fire otate . . . tani va tara nokugazadara ko omu ya wapa kulikida rupandu kosizoweseso. . . . Ame na divire matjangwa nagenye ntani nomu nani ga faturura! Nye apa va fire otate ntani na kwete nawa egano mulyo gosizoweseso neyi ngasi ka sikisa mo.” Yosili pokuliwapaikira Murarero, ya wapa kugazadara ko omu nzambo zaJesus za tu zowora koyitundwamo yononzo nonomfa.

10. Ngapi kuliwapaikira Murarero nayi kundama sirugana setu sokuzuvhisa?

¹⁰ Kuliwapaikira Murarero kwa hamena mo kutura po mawapaiko gokutamununa sirugana setu sokuzuvhisa, ndi nampo kurugana uzuvhisi wokuvatera posiruwo soMurarero. Ngomu tuna kuzigida varongwa woBibeli ntani nava wopeke koMurarero gwaHompa, ose ngatu gwana ruhafo mokuuyunga nawo kuhamena Karunga naMunwendi, ntani nomatungiko aga gana kundindira ava va hara Jehova nokumuhamberera.—Epis. 148:12, 13.

11. Ngapi omu Vakolinte vamwe ngava li nokunwa poMurarero monkedi zondona?

¹¹ Ngomu ono kuliwapaikira Murarero, gazadara ko kweyi mupositoli Paurusa ga tjangerere mbungakriste zomoKolinte. (Resa 1 Vakolinte 11:27-34.) Paurusa kwa uyungire asi nkenye ogu a li komboroto nokunwa monkinda zaHompa “ponkedi zondona, age kutura nzo zokudipaga Hompa,” Jesus Kristusa. Yipo nye mugwavekwa ga hepera ‘kuhova kulikonakona mwene’ ntani ana kulya nokunwa kovhinyu. Ano nsene kapisi ngoso, age kuna ‘kulilira oku ta linwine epanguro.’ Morwa nkareso zawo zondona, Vakolinte wovanzi kwa ‘pilire nonkondo oku tayi va veresa-veresa, ano vamwe mo kwa fire [pampepo].’ Nampo vamwe ngava li nokunwa komeho ndi konyima zoMurarero morwa kwa fire pampepo. Kulya  komboroto nokunwa kovhinyu monkedi zangoso zondona kwa ninkisire Karunga a dire kuvahafera.

12. (a) Kosinke Paurusa ga hetakanesere Murarero, ntani erondoro musinke ga geve? (b) Yisinke ga hepa kurugana mugwavekwa nsene ana tura nzo zonene?

¹² Paurusa kwa hetakanesere Murarero gwaHompa konondya edi ava li vantu kumwe novakwawo, nokurondora ava ava li ko asi: “Nokuwapa si mu nwe monkinda zaHompa, makura mu nwe hena monkinda zonompepo donondona. Ndi asi mu kare pompanda zaHompa, makura mu kare hena pompanda zonompepo donondona.” (1 Kol. 10:16-21) Nsene mugwavekwa ogu a li komboroto nokunwa kovhinyu poMurarero a tura nzo zonene, ga hepa kupapara evatero lyopampepo. (Resa Jakopo 5:14-16.) Mugwavekwa gwangoso ga hepa ‘kurugana eyi yokumuhorora asi ana litezurura,’ yipo a dire kuswaukisa nzambo zaJesus pokulya nokunwa poMurarero.—Ruk. 3:8.

13. Morwasinke nayi wapera mokugazadara ko kehuguvaro lyetu eli ga tu pa Karunga?

¹³ Ngomu tuna kuliwapaikira Murarero, nsene tu gazadara ko kehuguvaro eli ga tu pa Karunga, ngatu gwanena mo uwa. Kwato mukareli gwaJehova ogu ga ligava na hara kuswaukisa nzambo zaJesus pokulya nokunwa poMurarero nsene ga yi diva asi age kapisi mugwavekwa. Nampili ngoso, ngapi muntu omu na diva asi kuvhura a lye nokunwa poMurarero ndi hawe?

14. Yisinke ava rugana poMurarero ava va hamena megwanekero lyepe?

¹⁴ Ava ava li nokunwa poMurarero va yi diva asi awo kwa hamena kegwanekero lyepe. Kuhamena vhinyu, Jesus kwa uyungire asi: ‘Nkinda ezi Egwanekero lyEpe lyomohonde zange.’ (1 Kol. 11:25) Kupitira momuporofete Jeremiya, Karunga kwa pumbire asi nga tulisa po egwanekero lyepe eli lya lisiga negwanekero lyoVeta eli ga tulisire po noVaisraeli. (Resa Jeremiya 31:31-34.) Karunga kwa tulisire po egwanekero lyepe ‘nomuhoko gwaKarunga’ ndi Vaisraeli wopampepo. (Gar. 6:15, 16) Nzambo zaKristusa yizo za ninkisa egwanekero eli li kare po, ano honde zendi yizo za li ninkisa li ze pasirugana. (Ruk. 22:20) Jesus yige mugwanekedesi gegwanekero lyepe, yipo vagwavekwa va ka tambure upingwa wawo meguru.—Heb. 8:6; 9:15.

15. Wolye va hamena megwanekero lyoUhompa, ntani yisinke yina kuvandindira nsene va limburukwa?

¹⁵ Ava va pulisira mokulya nokunwa poMurarero va yi diva asi awo kwa hamena megwanekero lyoUhompa. (Resa Rukasa 12:32.) Ava va ya kara vasikuli vaJesus wovagwavekwa nokumulimbukwa ntani nokunyanda kumwe nendi, ngava ka pangera nendi meguru. (Fil. 3:10) Morwa vagwavekwa kwa hamena megwanekero lyoUhompa, awo ngava ka pangera naKristusa ngovahompa meguru narunye nanarunye. (Ehor. 22:5) Awo kulya nokunwa poMurarero gwaHompa.

16. Faturura pausupi ezi azi tanta Varoma 8:15-17.

¹⁶ Morwa mpepo zawo kugava undipo asi awo vana vaKarunga, makura awo kulya nokunwa poMurarero. (Resa Varoma 8:15-17.) Koneka asi Paurusa kwa ruganesere nkango “Tate!” Munona kuvhura kuruganesa nkango “tate” mokulikida efumadeko ntani nelikwatakano eli ga kara nalyo noguhwe. Vagwavekwa kwa tambura ‘mpepo zokuvaninka va kare vana vaKarunga.’ Mpepo zaKarunga kulipakerera  nompepo zawo, zi gave undipo asi awo vana vaJehova ava va gwaveka. Kapisi morwa kapi va hara kuparukira pevhu, nye morwa va diva asi awo vapingi kumwe naJesus moUhompa wemeguru nsene va limburukwa dogoro konomfa. Naina, kuna kara po tupu yihupwa yovasikuli vaKristusa 144 000, ava va “poomwena mpepo” zaJehova. (1 Joh. 2:20; Ehor. 14:1) Kupitira mompepo zendi, awo kukuga asi: “Tate! tate!” Ee, elikwatakano musi lyewa va kara nalyo naKarunga!

17. Ehuguvaro musinke va kara nalyo vagwavekwa, ntani ngapi ava li tara?

¹⁷ Nsene ove mugwavekwa, ehuguvaro lyemeguru lya hepa kukara sininke somulyo esi no tura momakanderero goge. Apa Bibeli za uyunga asi “kwa mu vandekerera” mugara meguru, Jesus Kristusa, litura mo nyamoge nokundindira nononkondo mokukakara “mufuko” gwendi. (2 Kol. 11:2; Joh. 3:27-29; Ehor. 21:2, 9-14) Apa Bibeli azi faturura eharo lyaKarunga kovagwavekwa, yi tara asi: “Nyove yina tamba.” Ntani apa Jehova a gava mapukururo kovana vendi wovagwavekwa, mpepo zokupongoka kukutumangeda o limburukwe nokulizuvha asi: “Eyi nyame yina tamba.” Mpepo zaKarunga nompepo zoge kulipakerera kumwe mokugava umbangi asi ove wa kara nehuguvaro lyemeguru.

18. Ehuguvaro musinke da kara nalyo ‘nonzwi dapeke,’ ntani ngapi o lizuvhu?

¹⁸ Nsene ove ‘gemukurumbunga lyononzwi dapeke,’ Karunga ga ku pa ehuguvaro lyepevhu. (Ehor. 7:9; Joh. 10:16) Ove ono hara kuparuka narunye moParadisa, ntani kukuhafesa pokuteda ko kweyi za uyunga Bibeli kuhamena eparu lyokomeho. Ove kuna kundindira nononkondo mokukaparuka kumwe nekoro novakaume woge mouzuni wombili. Ntani nokukamona omu nzara noruhepo nomauvera nonomfa ngayi ka haga po. (Epis. 37:10, 11, 29; 67:6; 72:7, 16; Jes. 33:24) Ove kuna kundindira nononkondo mokukatambura ava ngava ka vhumbura koufe. (Joh. 5:28, 29) Ee, rupandu musi wa kara naro kwaJehova asi ga ku pa ehuguvaro lyepevhu! Nampili ngomu o dili kulya nokunwa poMurarero, ove kukara po morwa kulikida rupandu konzambo zaJesus Kristusa zosizoweseso.

19, 20. (a) Yisinke no rugana mokukaparuka narunye? (b) Morwasinke no ka karera poMurarero?

¹⁹ Yi kare asi ehuguvaro lyoge lyepevhu ndi lyemeguru, mokukaparuka narunye ntudi wa hepa kupura mwaJehova Karunga naJesus Kristusa ntani nomosizoweseso. Pokukakara poMurarero, ngo kara nompito zokuteda ko kehuguvaro lyoge ntani komulyo gonomfa daJesus. Ngano si kare sitambo soge sokukara gumwe govantu wovanzi ava ngava ka kara poMurarero gwaHompa moUtano konyima zokukatoka ezuva, 3 Kudumogona 2015, poSinyanga soUhompa ndi komavango gamwe mouzuni mudima.

²⁰ Kukara poMurarero kuvhura kunkondopeka rupandu roge konzambo zaJesus zosizoweseso. Kupurakena nawa kosiuyungwa ngayi ku tumangeda o likide eharo kovantu pokuvatantera ko eyi wa lironga kuhamena eharo lyaJehova ntani nositambo sendi kovantu. (Mat. 22:34-40) Eyi yiyo ya karera nomulyo asi o ture po mawapaiko ngesi yipo ngo ka kare poMurarero.