1, 2. (a) Morwasinke Vaisraeli 24 000 va zumbanesere matungiko? (b) Morwasinke sihorokwa sina sa karera nomulyo kwetu?

KOMEHO tupu muhoko goVaisraeli gu hwilire moSirongo sEtumbwidiro, vagara mayovi murongo ‘kwa lirere novakadi woVamowaba.’ Ngoyitundwamo, Vaisraeli 24 000 kwa fire. Gazara asi Vaisraeli kwa kere pepi nokuhwilira mosirongo setumbwidiro esi va ndindilire siruwo sosire, nye va zumbanesere matungiko gena morwa kugwira meheteko lyoruhonda.—Num. 25:1-5, 9.

² Sihorokwa sina sosidona kwa si tjangera ‘si kare erondoro lyetu, ose tuna ya karere pouhura wouzuni ou.’ (1 Kol. 10:6-11) Ose kuna kuparuka “pomazuva gopouhura” ntani pepi nokuhwilira mouzuni woupe. (2 Tim. 3:1; 2 Pet. 3:13) Nye vakareli vamwe vaJehova kwa pulisira madowo gawo ga va pukise nokugwira moruhonda. Awo ngesi kuna kuhepa koyitundwamo yoyirugana yawo ntani nsene kapi vana kulitezurura ngava zumbanesa mpito zokukaparuka narunye moParadisa.

3. Morwasinke valikwali va hepera mavyukiso nepopero lyaJehova? (Tara efano pepenuno 23.)

 ³ Valikwali va hepa kupapara evyukiso nepopero lyaJehova yipo va nyokere po eheteko lyoruhonda. (Resa Episarome 127:1.) Mosirongwa esi tatu ka zogera omu valikwali nava nkondopeka nonkwara dawo pokupopera nomutjima dawo nopokuhedera Karunga pepi nopokugusa muntu gomupe nopokukara neuyungokumwe lyewa ntani nopokusikisa mo yihepwa yomononkwara.

4. Yisinke ya ninkisa Vakriste vamwe va gwire moruhonda?

⁴ Yisinke ya ninkisa Vakriste vamwe va gwire moruhonda? Ayo kutameka neyi atu tara. Jesus kwa fatwilire asi: “Nkenyogu a tara mukadi, nye a mu dovaukire, nare ana mu honderere momutjima.” (Mat. 5:27, 28; 2 Pet. 2:14) Vakriste wovanzi ava va gwira moruhonda kwa tamekere pokutarera mafano goruhonda nokuresa yimbapiratjangwa yokupindura madowo geligwanekero panyama ndi pokutarera yininke yokunyata koIntaneta. Ano vamwe morwa kutarera nomuvi dokuligwanekera panyama nomalikwamo gamwe gokotivi. Vamwe kuza konombaha ntani komavango oku vantu ava lihutura va kare muhere-here.

5. Morwasinke natu poperera mutjima gwetu?

⁵ Vamwe kugwira momaheteko morwa kuliharesa muntu ga hana asi mulikwali gwawo. Ose kuna kuparuka mouzuni omu vantu vana kudira kupangera madowo gawo nokuhafera yirugana yokunyata. Ntani hena morwa mutjima gwetu gokudira kusikilira mo gwa zura yimpempa, ureru kutunga po malizuvho gokuligwanekera panyama nomuntu ga hana asi mulikwali gwetu. (Resa Jeremiya 17:9, 10.) Jesus kwa tente asi: “Momutjima yimo amu tundu magazaro gomadona nedipago noruhonda.”—Mat. 15:19.

6, 7. (a) Yisinke mutjima gwa zura yimpempa nagu vhura kutwaredesa muntu a rugane? (b) Ngapi natu nyokera po kugwira mosiraha soruhonda?

⁶ Nsene tupu madowo gomadona ga kura momutjima, vantu vavali va hana asi muntu nomulikwali gwendi kuvhura kutameka kuzogera yininke eyi tupu ya fira kuyizogera nomulikwali gwawo. Makura tava papara nompito dokukara kumwe nkenye apa, nokulininkisa asi kuna ligwana tupu va hana kuyidivira. Ngomu malizuvho naga nkondopara kwankenye gumwe gwawo makura tayi va karere udigu kurugana youhunga. Moomu lina kunkondopara elikwatakano lyawo, yimo nayi va digopera kulihagekesa po, nampili va yi dimburure asi eyi vana kurugana epuko.—Yis. 7:21, 22.

⁷ Awo kudivara nompango daJehova ngomu madowo gomadona gana kukura ntani nonzogera dawo kuvaninkisa va tameke kulikwata komawoko nokulincumita nokulikwatagura komarutu ntani koyilyo yonomuga nayimwe hena eyi ya fira tupu valikwali. Awo ‘kuvazeda edowo lyawo lyedona.’ Nsene edowo lyawo lyedona lina kuru, makura ‘tali va tulisa nzo’ zokuhondera. (Jak. 1:14, 15) Aso sininke sosidona sili! Ngano kwa pulisira Jehova a nkondopeke efumadeko lyawo kononkwara, ngano kapi va gwira mosihara soruhonda. Ngapi muntu na tunga po efumadeko lyangoso?

8. Ngapi omu elikwatakano naJehova ali popere kokuhondera?

⁸ Resa Episarome 97:10. Elikwatakano  naJehova kuvhura kukupopera kokuhondera. Ngomu tuna kulironga yikara yaJehova yoyiwa, ose ngatu hara kukara ‘vana vendi nokuheteka kukara moomu ga kara age ntani nokulihara-hara.’ Eyi ngayi tu vatera tu nyokere po ‘ruhonda nonyata nazinye nomawore gemona.’ (Efe. 5:1-4) Valikwali ava va diva asi “Karunga nga pangura vahondedi novatezi wononkwara,” awo ngava kondja mokufumadeka nonkwara dawo.—Heb. 13:4.

9. (a) Ngapi Josefa ga nyokerere po eheteko lyoruhonda? (b) Yisinke natu lirongera ko kosihonena saJosefa?

⁹ Vakareli vamwe vaKarunga kwa gwira meheteko morwa kukara unene kumwe novahapuli konyima zokudumbuka koyirugana. Nampili koyirugana simpe kuvhura kugwira meheteko. Mudinkantu gedina Josefa kwa yi dimbwilire asi mukadamuhona gwendi kwa mu liharesere. Nkenye ezuva, mukada muhona gwendi nga mu kondjesa asi va rare kumwe. Moruhura, “makura ta mu kwata kerwakani lyendi, ta tanta asi: ‘Tu rare.’” Nye Josefa ta duka. Yisinke ya vaterere Josefa a nyokere po eheteko lina? Morwa age kwa tokomenene kupopera elikwatakano lyendi naJehova. Morwa ulimburukwi wendi, Josefa ga zumbanesere yirugana yendi nokumutura modorongo, nye Jehova ga mu tungikire. (Gen. 39:1-12; 41:38-43) Yi kare asi koyirugana ndi kwapeke, twa hepa kunyokera po maukaro aga naga tu twaredera meheteko.

10. Ngapi kugusa muntu gomupe ayi popere kokuhondera?

¹⁰ Kugusa muntu gomupe ogu “va unga a kare sihwi saKarunga, ogu a lihorora moukaro ou wa hungama,” kupopera valikwali va dire kuhondera. (Efe. 4:24) Apa atu gusa ndi atu dwara muntu gomupe, ose ‘kudipaga’ madowo aga aga rugana mwetu ngwendi “ruhonda, nonyata noruho nomadowo gomadona nedowo lyokufukira yininke.” (Resa Vakorosi 3:5, 6.) Nkango ‘kudipaga’ kutanta asi twa hepa kurugana ko yuma mokunyokera po madowo goruhonda. Ose ngatu nyokera po nkenye eyi nayi pindura edowo lyokuligwanekera panyama nomuntu ga hana asi mulikwali gwetu. (Joba 31:1) Nsene tu paruka kuliza nonompango daKarunga, ose ngatu lironga ‘kunyenga udona nokuhama kouwa.’—Rom. 12:2, 9.

11. Ngapi kudwara muntu gomupe ayi nkondopeke nonkwara?

¹¹ Apa atu dwara muntu gomupe, ose kuhonena yikara ‘yoMuungi gwetu,’ Jehova. (Koros. 3:10) Apa valikwali ava kara ‘nonkenda nombili nomalinunupiko nekuruko nezaverero,’ nonkwara dawo ngadi nkondopara ntani Jehova nga va tungika. (Koros. 3:12) Awo hena kupulisira “mbili zaKristusa, zi pangere monomutjima” dawo. (Koros. 3:15) Ee, omu tupu ya wapa asi valikwali va ‘lihara-hare neharo lyosiumbya!’ Ayo kuvahafesa ‘mokugava sihonena’ “sokulifumadeka-fumadeka.”—Rom. 12:10.

12. Yikara musinke yomulyo mononkwara doruhafo?

¹² Apa valikwali vamwe va va pulire kuhamena yikara eyi ya va vatera va kare noruhafo mononkwara, Sid kwa tente asi: “Eharo kuna kara sikara esi atu kondjere kutunga po. Ntani twa yi dimburura asi ugomoki sikara somulyo sili.” Mukadendi, Sonja, kwa yi kwatesa ko, pokutanta asi: “Nkenda sikara somulyo. Ntani twa hetekera ko kulikida elinunupiko, nampili ngomu ya dira kukara ureru.”

13. Yisinke nayi ninkisa nonkwara di nkondopare, ntani morwasinke?

¹³ Mbuuyungiso zongwa kuna kara nkedi zimwe zongwa zokunkondopeka nonkwara. Ee, omu tupu ayi guvisa apa valikwali ava litekura monkedi zokudira efumadeko, nye va tekure vageni ndi yimuna yemembo monkedi zefumadeko! Apa valikwali ava liuyungisa ‘nonyanya noukenya nehandu lyenene nonomutangu nomatuka,’ awo kuzonagwisa po elikwatakano lyawo lyewa lyononkwara. (Efe. 4:31) Nkareso zondona zonyanya kuzonagura nonkwara, yipo nye valikwali va hepera kunkondopeka elikwatakano lyawo pokuliuyungisa monkedi zongwa zeharo ntani nonkenda.—Efe. 4:32.

14. Yisinke valikwali nava nyokera po kurugana?

¹⁴ Bibeli kuuyunga asi pwa kara “siruwo sokumwena.” (Muud. 3:7) Eyi kapi ayi tanta asi tu hageke kuuyunga nomulikwali gwetu, morwa kuuyunga kumwe mulyo mononkwara doruhafo. Mukadikwara gumwe gomoNdovesiranda kwa tanta asi: “Ayo kukoresa apa mulikwali a mwenenene mukwawo.” Age kwa gweda ko asi: “Nampili ngomu ya dira kukara ureru kupangera malizuvho gokukora, nye kapisi o mwenenene mukweni. Ntani hena nsene o genderera kuuyunga yininke eyi nayi koresa mukweni, ayo kudigopekesa unene yininke.” Valikwali kapi ava kohonona po maudigu gawo pokulitangwisa ndi pokunyoka kuliuyungisa. Nye awo kunkondopeka nonkwara dawo apa ava kohonona po usimbu madiro kulizuvha ntani nokudira kupulisira nomutangu di twikire.

15. Ngapi omu euyugokumwe lyewa ali nkondopeke nonkwara?

¹⁵ Valikwali kuvhura va nkondopeke  nonkwara dawo nsene va litulira po siruwo sokuzogera nokulipwagesera malizuvho gawo. Monkedi omu o uyunga ntani neyi o uyunga mulyo. Yipo nye, nampili moukaro woudigu, kondja mokuuyunga yoyiwa, ntani yi likida mezwi nomononkango doge. Pokurugana ngoso, ngayi ninkisa mulikwali goge a ku purakene. (Resa Vakorosi 4:6.) Valikwali kuvhura kunkondopeka nonkwara dawo pokuuyunga nonkango donongwa ‘dokuwapera, edi da fira kupurakena’ mulikwali gwawo.—Efe. 4:29.

16, 17. Morwasinke ya karera nomulyo kovalikwali mokulipa eyi ya fira mononkwara?

¹⁶ Valikwali kuvhura hena kunkondopeka nonkwara dawo nsene nkenye gumwe ta tura muhowo yihepwa yamukwawo. (Fil. 2:3, 4) Valikwali va hepa kukwataka egano malizuvho gawo ntani neyi ya fira kulipa.—Resa 1 Vakolinte 7:3, 4.

¹⁷ Nye ehudi, valikwali vamwe kapi ava lilikida eharo ndi va ligwanekere panyama. Vagara vamwe kugazara asi kulikida nkenda kovakadi vawo tayi va monekesa asi awo kwato nonkondo. Bibeli kutanta asi: “One vagara hetekereni ko kukwata egano vakadi veni.” (1 Pet. 3:7, Phillips Bible) Mugara ga hepa kukwata egano asi mononkwara kapi tupu mwa hamena eligwanekero panyama. Nye mugara ga hepa kukwatagura ko mukadendi mokumulikida eharo, ano monkedi zangoso, mukadendi nga hafera eligwanekero panyama. Nsene navenye va lilikida eharo, ayo ngayi va rerupira mokulipa mononkwara nkenye ogu yeeyi ya mu fira.

18. Ngapi omu valikwali nava nkondopeka elikwatakano lyawo lyomononkwara?

¹⁸ Kapi pwa kara konda zeyi mulikwali na ka honderera, nye pamwe eyi kuyiretesa po kudira kulilikida eharo monkedi ezi ava litekura. (Yis. 5:18; Muud. 9:9) Eyi yiyo Bibeli azi korangedere valikwali asi: “Walye omu linyoka-nyoka [mononkwara], ntudi kuna yi lizuvhu posiruwo simwe.” Morwasinke? “Neisi a mu heteka Satana morwakudira kulipangera kweni.” (1 Kol. 7:5) Ayo kapi ya wapa komulikwali mokupulisira Satana a ruganese ‘kudira kulipangera’ kwendi kumuninkise a hondere! Kuhamena eligwanekero panyama, nkenye gumwe ‘a kondjere uwa wamukwawo, kapisi wamwene.’ Va hepa kuyirugana eyi morwa eharo nye kapisi ngwendi situmbukira tupu. Kulilikida eharo omu mwa hamena kulincumita nokulikwata kunkondopeka elikwatakano lyomononkwara.—1 Kol. 10:24.

19. Yisinke tuna tokomene kurugana, ntani morwasinke?

¹⁹ Ose ngesi kuna kara pepi nokuhwilira mouzuni woupe. Aso siponga unene mokuligava meheteko ngwendi Vaisraeli 24 000 ava va fililire momuramba gwaMowaba. Konyima zokufaturura eyi ya horokere, Bibeli kurondora asi: “Ogu ana kugazara asi age kuna sikama nawa-nawa, a takamese ga ha liganda.” (1 Kol. 10:12) Ayo ya kara nomulyo asi tu nkondopeke nonkwara detu pokukara valimburukwi kwaGuhyetu gemeguru ntani nokomulikwali gwetu. (Mat. 19:5, 6) Ngesi twa hepa ‘kukondja unene tu zere twa hana sivadi kosipara saKarunga oku tatu kara nombili nendi.’—2 Pet. 3:13, 14.