1. Morwasinke Jehova ya mu fira yokumupandura?

JEHOVA, Mugavi ‘gwankenye uhwi wouwa nosigava esi sa sikilira mo,’ ya mu fira kumupandura. (Jak. 1:17) NgoMusita gwetu geharo, age kutupakera mbili panyama nopampepo. (Epis. 23:1-3) Age “egameno lyetu nononkondo detu,” unene po moyiruwo yomaudigu! (Epis. 46:1) Yosili, yinzi ga tu ruganena yokumupandwira, ngomu ga uyungire muepisarome asi: “Pandureni Jehova, yeeyi age muwa; eharo lyendi lyanarunye.”—Epis. 106:1, NW.

2, 3. (a) Morwasinke ya dilira kuwapa mokutara matungiko wa gwana asi kwato mulyo? (b) Mapuro musinke natu ka konakona mosirongwa esi?

² Morwasinke yina karere nomulyo asi tu konakone kuhamena kugava rupandu? Bibeli kwa pumba asi pomazuva gopouhura vantu kapi ngava paka mpandu. (2 Tim. 3:2) Wovanzi kapi ava tara matungiko aga va gwana asi mulyo. Mevango lyokuvagwanena po eyi va kara nayo, awo kukondjera kukara noyininke yoyinzi morwa kwa va pukisa matjingiso gonongesefa domouzuni ou. Nose kuvhura kutupukisa nkareso ezi zokudira  rupandu. Ngwendi Vaisraeli, kuvhura tu dire kukara norupandu kelikwatakano lyetu naJehova ntani komatungiko aga twa gwana kwendi.—Epis. 106:7, 11-13.

³ Koneka eyi nayi vhura kuhoroka nsene tatu ligwanekere nomaudigu. Poyiruwo yangoso, kuvhura tu kare nosinka unene nokudivara matungiko aga twa gwana. (Epis. 116:3) Ngapi omu natu tunga po nkareso zorupandu nokutwikira kukara nazo? Ntani yisinke ngayi tu vatera tu kare nonkareso zongwa nampili momaudigu? Ngesi tatu ka konakona mapuro aga.

4. Ngapi omu natu kara nonkareso zorupandu?

⁴ Mokutunga po nkareso zorupandu nokutwikira kukara nazo, twa hepa kuteda ko komatungiko ga tu pa Jehova ntani neyi ga tu ruganena. Apa muepisarome ga tedere ko kweyi ga mu ruganena Jehova, ayo kwa mu kundamene unene.—Resa Episarome 40:5; 107:43.

5. Yisinke natu lirongera ko kwaPaurusa kuhamena kutunga po nkareso zorupandu?

⁵ Kuvhura tu lirongere ko yoyinzi komupositoli Paurusa kuhamena kutunga po nkareso zorupandu. Age ga tedere ko komatungiko aga ga gwene morwa nkenye apa nga gava rupandu. Paurusa ga yi divire asi age ‘nga uyunga momudona, nokuhepeka ntani nokuswaura’ Vakriste. Nye ga kere norupandu kweyi Karunga naKristusa va mu fililire nkenda pokumupa sirugana sokuzuvhisa, nampili ngomu ga kere nare nonkareso zondona. (Resa 1 Timoteusa 1:12-14.) Paurusa ga kere norupandu koVakriste vakwawo ntani nga pandura Jehova koyikara nokoyirugana yawo yoyiwa. (Fil. 1:3-5, 7; 1 Tes. 1:2, 3) Apa Paurusa ga ligwanekerere nomaudigu, age kwa pandwire Jehova kevatero eli ga gwene kovapuli vakwawo. (Yirug. 28:15; 2 Kol. 7:5-7) Eyi yiyo Paurusa ga korangedere Vakriste asi: “Omu pandure Karunga nkenye apa. . . . Omu dimbe mapisarome nononsumo depando noyidimba yokupongoka. Dimbireni Karunga nonomutjima dompandu.”—Koros. 3:15-17.

6. Yininke musinke o gavere rupandu kwaJehova?

⁶ Ngapi natu temwinina sihonena saPaurusa sosiwa kuhamena kutunga po nkareso zorupandu? Ngwendi Paurusa, twa hepa kuteda ko kweyi ga tu ruganena Jehova. (Epis. 116:12) Nsene va ku pura asi: ‘Matungiko musinke gokutunda kwaJehova o gavere rupandu,’ ngapi omu no limburura? No tumbura elikwatakano lyoge lyewa naJehova ndi? Ndi egusiropo eli wa gwana morwa kupura monzambo zaKristusa zosizoweseso? Ndi no tumbura vapuli vakweni ava va ku vatera moyiruwo yoge yomaudigu? Yosili, ove kapi no divara kutumbura ko mulikwali goge gomuwa ndi vana woge. Kulitulira po siruwo mokuteda komatungiko gangoso aga wa gwana kwaGuhyetu, Jehova, ngayi ku ninkisa o kare noruhafo nokukutumangeda o gave rupandu nkenye apa.—Resa Episarome 92:1, 2.

7. (a) Morwasinke natu kandererera kwaJehova mokumupandura? (b) Mauwa musinke ngo gwanena mo pokupandura Jehova?

⁷ Apa atu gazadara nkenye apa matungiko aga twa gwana kwaJehova, ngayi tu tumangeda tu kanderere kwendi nokumupandura. (Epis. 95:2; 100:4, 5) Wovanzi kutara ekanderero ngonkedi tupu zokuhundira yininke kwaKarunga. Nye ose twa yi diva asi Jehova kumuhafesa apa atu mu pandura kweyi ga tu pa. MoBibeli kwa kara  mo yihonena yoyinzi yomakanderero gorupandu, kukwatera mo lyaHana naHisikiya. (1 Sam. 2:1-10; Jes. 38:9-20) Yipo nye, honena vakareli wovalimburukwi ava va kere nonkareso zorupandu. Pandura Jehova komatungiko aga wa gwana. (1 Tes. 5:17, 18) Pokurugana ngoso, ngo gwanena mo mauwa gomanzi. Ayo ngayi ku korangeda o nkondopeke eharo lyoge kwaJehova ntani nokumuhedera pepi.—Jak. 4:8.

8. Yisinke nayi vhura kutuninkisa tu dire kukara norupandu kweyi ga tu ruganena Jehova?

⁸ Morwasinke natu vangararera konkareso zokudira kukara norupandu kouwa waJehova? Morwa twa pinga nkareso ozo. Koneka: Vakurona vetu, Adamu naEva kwa va tulire moparadisa. Awo va kere nanayinye va hepere ntani va kere nompito zokuparuka narunye mombili. (Gen. 1:28) Nye kapi va kere norupandu komatungiko ogo. Awo kwa nyenenene yoyinzi. Ano eyi kwa va ninkisire va zumbanese nayinye. (Gen. 3:6, 7, 17-19) Morwa kukara mouzuni ou wokudira rupandu, nose kuvhura tu tameke kudira kukara norupandu kweyi ga tu ruganena Jehova. Kuvhura tu tare elikwatakano lyetu nendi asi kwato mulyo. Kuvhura tu dire kukara norupandu kweyi twa kara ruha rovanavazinyetu mouzuni mudima. Kuvhura tu tameke kuhara unene yininke yomouzuni eyi ya kuza yi ka hage. (1 Joh. 2:15-17) Mokuyinyokera po eyi, twa hepa kuteda ko komatungiko aga twa gwana nokupandura Jehova kweyi ga tu horowora tu kare vantu vendi.—Resa Episarome 27:4.

9. Apa atu ligwanekera nomaudigu, morwasinke natu tedera ko komatungiko aga twa gwana?

⁹ Kukara nonkareso zorupandu kuvhura kutuvatera tu lididimikire maudigu. Kuvhura tu dompe mutjima nsene tu ligwanekera nomaudigu gohararasi, pasihonena, nsene mulikwali gwetu a hondera ndi uvera wokutwaredesa konomfa ndi nomfa domuhali ndi simpagwa. Poyiruwo yangoso, nsene tu teda ko komatungiko aga twa gwana ngayi tu korangeda nokutunkondopeka. Tu konakoneni yihorokwa yina kukwama ko.

10. Ngapi Irina ga gwanena mo uwa pokugazadara ko kweyi ga mu ruganena Jehova?

¹⁰ Irina, * muzuvhisi gokukarerera gokoMuzogo gwaAmerika, kwa mu kwere mukuronambunga  ogu konyima ga ya honderere nokumusiga novana vendi. Yisinke ya vaterere Irina a twikire kukarera Jehova noulimburukwi? Age kwa tanta asi: “Ame na kara norupandu kwaJehova kweyi a pakere nge mbili. Pokugazadara ko kweyi a ruganene nge Jehova nkenye ezuva, ame na dimburura asi aso sininke somulyo mokukudiva nokukuhara Guhyetu gemeguru. Na yi diva asi kapi nga siga nge.” Nampili ngomu ga ligwanekerere nomaudigu gomanene meparu, ruhafo rwendi kumuninkisa a twikire ngorooro kukarera Jehova ntani kukorangeda vakwawo.

11. Yisinke ya vaterere Kyung-sook a lididimikire uvera wokankera?

¹¹ Kyung-sook gomoAsia, kwa rugene uzuvhisi wokukarerera namugara gwendi nomvhura 20. Hararasi yipo va mu kwatekere kankera zomapunga ntani kwa mu tanterere asi kuna mu hupire ko makwedi gatatu ndi ntazimwe gokuparuka. Nampili ngomu nage namugara gwendi va ligwanekera nomaudigu gomanzi, ga kare asi gomanene ndi gomanunu, kapi ngayi va dompesa. Age kwa tente asi: “Uvera ou wokankera kwa kundamene nge unene. Ame kwa lizuvhire ngwendi kuna zumbanesa nayinye ntani na kere noutjirwe.” Yisinke ya vaterere Kyung-sook a lididimikire? Age kwa tente asi: “Nkenye masiku komeho zokurara, ame ngani zi keguru lyonzugo zetu nokukakanderera kuziguruka kuhamena yininke yitano eyi nina hafere mezuva olyo. Makura ngani lizuvhu ehengagwido, ntani ngayi tumangeda nge ni hare Jehova.” Ngapi Kyung-sook ga gwanenene mo uwa momakanderero gendi? Age kwa tente asi: “Ame na dimburura asi Jehova kupakera nge mbili nampili momaudigu ntani matungiko manzi atu gwana meparu kupitakana maudigu.”

12. Yisinke ya vaterere Jason a lididimikire nomfa damukadendi?

¹² Jason gomoBeteli zimwe zomoAfrika, kwa kere muzuvhisi gosiruwo nasinye kupitakana nomvhura 30. Age kwa simwitira asi: “Ame kwa fisa mukadange nomvhura ntambali da ka pita, nye simpe kumurongora. Pokugazadara ko omu ga hepere kouvera wokankera, kukoresa unene komutjima.” Yisinke ya vaterere Jason a lididimikire? Age kwa tanta asi: “Ame kudiworoka yiruwo yoyiwa eyi ngatu hafere namukadange ntani ame kuyipandwira Jehova. Konyima zokupandura Jehova kokudiworoka yiruwo yangoso yoyiwa, ame kulizuvha ehengagwido. Eyi kwa vatera nge ni kare noruhafo meparu. Ame simpe kuzuvha kukora, nye pokupandura Jehova kweyi ga pere nge mulikwali gomuwa ogu ga kere neharo lyokukarera Jehova kumwe name, kwa vatera nge unene.”

13. Yisinke ya vaterere Sheryl a lididimikire nomfa dovakurona novamumbya vendi?

¹³ Apa ekundungu lyenene unene lya kundungire moPhilippines kehagero lyomvhura 2013, Sheryl, ogu ga kere nonomvhura 13 posiruwo oso, kwa zumbanesere nayinye. Age kwa tente asi: “Ame kwa zumbanesere embo lyetu ntani nava vemepata lyetu.” Oguhwe nozina ntani novamumbya vendi vatatu kwa fire mekundungu olyo. Yisinke ya vaterere Sheryl a lididimikire maudigu ogo? Age kwa kere nonkareso zorupandu ntani nokukara noruhafo komatungiko aga simpe ga kere nago. Age kwa gweda ko asi: “Ame kwa mwene eyi vanavazinyetu va rugene mokuhengagwida nokukorangeda owo va hepere ekwafo. Na yi divire asi vanavazinyetu mouzuni mudima kwa kanderere nge po. Ame kupandura kweyi Jehova ga kara Karunga gwange. Age nkenye apa kutupa  nayinye eyi twa hepa.” Kukara norupandu komatungiko aga twa gwana kuna kara nkedi zongwa zokugusa po ruguwo. Nkareso zorupandu kutuvatera tu lididimikire nkenye maudigu aga natu vhura kuligwanekera nago.—Efe. 5:20; resa Vafilipi 4:6, 7.

14. Meho musinke tuna kundindira? (Tara efano pepenuno 8.)

¹⁴ Kutunda kwanare, vantu vaJehova kwa hafera matungiko aga va gwana. Pasihonena, konyima zapa Vaisraeli va va zowere kwaFarawo novakwayita vendi pEfuta lyEgeha, awo kwa likidire ruhafo rwawo pokudimba nokupandura Jehova. (Ex. 15:1-21) Naina, etungiko lyetu lyenene kuna kara ehuguvaro lyokukatuzowora kokukora nokomaudigu nagenye. (Epis. 37:9-11; Jes. 25:8; 33:24) Gazara omu ngatu ka lizuvha apa Jehova nga ka zonagura po nonkore dendi nadinye nokukatutambura mouzuni woupe wouhungami. Ee, rupandu musi ngatu ka kara naro ezuva olyo!—Ehor. 20:1-3; 21:3, 4.

15. Yisinke ono tokomene kurugana mvhura ezi 2015?

¹⁵ Momvhura ezi 2015, ose kuna kundindira nononkondo mokugwana matungiko gaJehova. Nye simpe kuvhura tu ligwanekere nomaudigu. Yi kare asi maudigu musinke, tuna yi diva asi Jehova kapi nga tu siga. (Deut. 31:8; Epis. 9:9, 10) Age nga twikira kutupa nayinye eyi twa hepa mokumukarera noulimburukwi. Ngano tu tokomene kukara nonkareso ngwendi zomuporofete Habakuku, ogu ga tente asi: “Nampili ngomu ga pira maukuzu enyango, yindjembere kutupu mandjembere, nampiili ngomu guna pili muzangu gononzwe momapya mutupu mahangu, nampili ngomu dina fu nonzwi nadinye nohambo donongombe mawoko-woko, Yimo ngorooro ngani hafa tani pembura, morwa HOMPA Karunga yige muparuli gwange.” (Hab. 3:17, 18) Mvhura ezi, ngano tu gazadare ko komatungiko aga twa gwana yipo yi tu tumangede tu kwame epukururo lyemetjangwa lyetu lyomvhura 2015: “Pandureni Jehova, yeeyi age muwa.”—Epis. 106:1, NW.