1. Morwasinke kuhonena Jesus ayi tu hedesere pepi naJehova?

OSE kwa hwa kuhonena vantu ava twa hara. Movantu navenye ava va parukire, Jesus Kristusa yige muntu gomuwa po kuhonena. Morwasinke? Jesus mwene kwa tente asi: “Ogu ga mona nge, ga mona hena Tate.” (Johanesa 14:9) Morwa Jesus kwa honenene nawa-nawa yikara yoGuhwe. Apa atu lirongo kuhamena Jesus, ose ngoso kuna kulironga kuhamena Jehova. Ntani apa atu honene Jesus, ose ngoso kuna kuhedera Jehova pepi, Muntu goMunene po mouzuni. Ee, situmbukira musi kounene!

2, 3. (a) Morwasinke Jehova ga tu pera mauzera kuhamena eparu lyaJesus, ntani yisinke Jehova ana kundindira ko kwetu? (b) Yisinke natu ka zogera mosirongwa esi nesi sokukwama ko?

² MoBibeli, Jehova kwa tu pa mauzera kuhamena eparu lyaJesus. Morwasinke? Morwa Karunga gwetu kuna tu harere tu dive Munwendi nokumuhonena. (Resa 1 Peturusa 2:21.) MoBibeli, “sihonena” esi ga tu sigira Jesus kwa si  hetakanesa kokusikura muntu monompadi dendi. Yisinke ayi tanta eyi? Jehova kuna hara tu honene Munwendi mwankenye eyi ga rugene. Yosili, Jesus kwa kere gokusikilira mo, nye Jehova kapi ana kutundindira tu honene Munwendi monkedi zokusikilira mo. Nye, Jehova kuna tu harere tu kondje mokuhonena Munwendi.

³ Tu konakoneni yikara yimwe yoyiwa yaJesus. Mosirongwa esi, tatu ka zogera elinunupiko nonkenda zendi. Ano mosirongwa sokukwama ko, ngatu ka zogera uradi ntani unongo wendi. Tatu ka limburura mapuro gatatu kuhamena nkenye sikara: Yisinke a si tanta? Ngapi omu Jesus ga si likidire? Ngapi omu natu mu honena?

4. Yisinke ali tanta elinunupiko?

⁴ Yisinke elinunupiko? Vantu wovanzi wokulinenepeka kugazara asi elinunupiko kuna kara kudira nonkondo ndi kudira kulihuguvara. Eyi kapisi usili. Morwa kulinunupika, kwa kwatera mo kukara nouradi ntani nononkondo. ‘Elinunupiko’ kuna kara elilimbo lyelinenepeko nelitumbo. (Vafilipi 2:3) Mokulinunupika, twa hepa kukara nomutaro gouhunga kwanyamwetu. Pasihonena, bukenkango zimwe zoBibeli kwa tanta asi: “Elinunupiko kuna kara kudimburura asi Karunga ga tu pita mekuto.” Nsene twa linunupika, kapi ngatu ligazara asi twa pitakana wopeke. (Varoma 12:3) Kapisi ureru kovantu wokudira kusikilira mo kutunga po elinunupiko. Nye kuvhura tu lironge elinunupiko nsene tu teda ko kounene waJehova ntani nokukwama sihonena saJesus.

5, 6. (a) Yilye Mikayera muengeli gomunene? (b) Ngapi Mikayera ga likidire elinunupiko?

⁵ Ngapi Jesus ga likidire elinunupiko? Age kwa linunupikire, apa ga kere meguru ngomuengeli gononkondo ntani apa ga kere pevhu ngomuntu gokusikilira mo. Tu konakoneni yihonena yimwe

⁶ Monkareso zendi. MoBibeli mobuke zaJuda, tatu resa kuhamena eparu lyaJesus komeho a wize pevhu. (Resa Juda 9.) NgaMikayera muengeli gomunene, Jesus kwa ‘litatanene noMuzonaguli’ kuhamena simpu saMosesa. Konyima zapa ga fire Mosesa, Jehova kwa mu horokere kevango oku va dilire kudiva vantu. (Deuteronomium 34:5, 6) Nampo Muzonaguli kwa here kuzeda Vaisraeli va karere simpu saMosesa. Yi kare asi sitambo musinke ga kere naso Muzonaguli, Mikayera kwa kere nouradi mokumunyokera. Buke zimwe kwa tanta asi “kulitatana” kutamba hena “kokulitatana moveta ndi mompanguro,” ntani asi “Mikayera kwa nyokerere po Muzonaguli mokuruganesa simpu saMosesa” mokusikarera. Jesus, Muengeli goMunene, ga yi divire asi kapi ga  kara nononkondo dokupangura Muzonaguli, yipo ga yi sigilire oGuhwe Jehova, Mupanguli goMunene. Ee, sikara musi selinunupiko ga likidire!

7. Ngapi Jesus ga likidire elinunupiko mombuuyungiso nomoyirugana yendi?

⁷ Apa ga kere Jesus pevhu, ga likidire elinunupiko mombuuyungiso nomoyirugana yendi. Mombuuyungiso zendi. Jesus kapi ga here eyererepeko lyokutunda kovantu. Nye age kwa geve eyererepeko nalinye koGuhwe. (Marukusa 10:17, 18; Johanesa 7:16) Age kapi nga swaura varongwa vendi ndi a va tare asi kwato mulyo. Nye age ngava fumadeke nokuvapandadeka koyikara yawo yoyiwa ntani nokuvalikida asi ga va huguvara. (Rukasa 22:31, 32; Johanesa 1:47) Moyirugana yendi. Jesus kwa parukire eparu lyoureru pokudira kulipongaikira emona. (Mateusa 8:20) Age ga kere neharo lyokurugana sirugana esi va tere vantu asi kwato mulyo. (Johanesa 13:3-15) Age kwa likidire elinunupiko kupitira moulimburukwi wendi. (Resa Vafilipi 2:5-8.) Nelinunupiko, Jesus kwa limburukwire nayinye eyi ga mu tantere Karunga “dogoro konomfa,” kapisi ngwendi vantu wokulinenepeka ava va dilire kuhara kulimburukwa. Eyi kulikida asi Jesus, MunwaMuntu, kwa “linunupika momutjima.”—Mateusa 11:29.

8, 9. Ngapi natu likida nkareso zelinunupiko?

⁸ Ngapi natu honena elinunupiko lyaJesus? Monkareso zetu. Elinunupiko kutuninkisa tu dimburure asi kapi twa kara nononkondo kwanayinye. Nsene tu dimburura asi kapi twa kara nononkondo dokupangura, kapi ngatu genderera kupangura wopeke komapuko gawo ndi kweyi ava ruganene yininke yongandi. (Rukasa 6:37; Jakopo 4:12) Elinunupiko kutuvatera tu dire ‘kupitakanesa mokuligazara nyamwetu’ pokutara ava va dira kukara nediwo ndi noyitumbukira eyi twa kara nayo asi kwato mulyo. (Varoma 12:3) Vakuronambunga wokulinunupika kapi ava litara vene asi va pitakana vapuli vakwawo. Nye awo kutara vakwawo asi ‘va va pita mekuto,’ ntani asi awo vanunu po pwanavenye.—Vafilipi 2:3; Rukasa 9:48.

⁹ Koneka sihonena saW. J. Thorn ogu ga kere mupioniri ndi mutareli gokudingura, kutamekera momvhura 1894. Konyima zonomvhura dononzi mosirugana oso, kwa mu zigidire a ka takamese yinhunhwa koFarama zokomberewa zonene moNew York. Age kwa tente asi: “Nkenye apa ngani hara kulinenepeka nyamwange kweyi ngani tompora, ngani litantere nyamwange asi: ‘Ove kambumburugona, yisinke nye wa kara nayo eyi no linenepekera?’”  (Resa Jesaya 40:12-15.) Age kwa kere nonkareso zelinunupiko.

10. Ngapi natu likida elinunupiko mombuuyungiso nomoyirugana yetu?

¹⁰ Mombuuyungiso zetu: Nsene twa linunupika momutjima, ngatu yi likida mombuuyungiso zetu. (Rukasa 6:45) Pokuzogera novakwetu, ngatu nyokera po kulifumadeka nyamwetu kweyi twa tompora. (Yisewe 27:2) Nye, ose ngatu pandadeka vanavazinyetu koyikara yawo yoyiwa ntani kweyi va tompora. (Yisewe 15:23) Moyirugana yetu. Vakriste wokulinunupika kapi ava papara mfumwa mouzuni ou. Awo kurerupika eparu lyawo yipo va karere Jehova momunene pokurugana yirugana eyi ava tara vantu womouzuni asi kwato mulyo. (1 Timoteusa 6:6, 8) Nye ose ngatu likida elinunupiko pokulimburukwa. Ayo kuhepa elinunupiko ‘mokulimburukwa oku tatu zuvhu vapitisili vetu’ ntani nokukwama mavyukiso gombunga zaJehova.—Vahebeli 13:17.

11. Yisinke nkenda?

¹¹ Yisinke nkenda? Nkango “nkenda” kwa zi singonona asi ugomoki ntani kulikida malizuvho gepakerombili. Nkenda kuna kara ruha rosiyimwa seharo. MoBibeli kwa tumbura mo ‘kufira nkenda,’ kwa “zura nkenda” ntani ‘rutjima.’ (Rukasa 1:78; 2 Vakolinte 1:3; Vafilipi 1:8) Kuhamena nkenda Bibeli zimwe kwa tanta asi kapi tupu ya kwatera mo kufira nkenda muntu ogu ana hepa ekwafo. Nye “kurugana ko yuma mokumuvatera.” Nkenda kuna kara sikara esi nasi tumangeda muntu a ruganene mukwawo uwa ou nau rundurura eparu lyendi.

12. Yisinke ayi likida asi Jesus kwa fililire wopeke nkenda, ntani yisinke za mu tumangedere a rugane?

¹² Ngapi omu Jesus ga likidire nkenda? Malizuvho gonkenda noyirugana yendi. Jesus kwa fililire nkenda wopeke. Apa ga mwene kaume kendi Mariya ntani nowo va lilire nomfa dampanzendi Rasarusa, Jesus “makura ta lili.” (Resa Johanesa 11:32-35.) Nkenda ezi za mu tumangedere a pindure muna gomufisayendi koufe yizo hena za mu tumangedere a pindure Rasarusa koufe. (Rukasa 7:11-15; Johanesa 11:38-44) Morwa nkenda, Jesus ga pere mpito Rasarusa zokukaparukira meguru. Sikando simwe Jesus tazi mu ‘gwire nkenda,’ apa ga mwene vantu ava va mu wizilire, “makura ta tameke kuvaronga yoyinzi.” (Marukusa 6:34) Sihorokwa esi kwa rundwilire eparu lyowo va tambwire erongo lyendi. Jesus kapi tupu ga fililire vantu nkenda nye ga rugene ko yuma mokuvavatera.—Mateusa 15:32-38; 20:29-34; Marukusa 1:40-42.

13. Monkedi musinke Jesus ga uyungire nonkenda novantu? (Tara efano pepenuno 3.)

¹³ Nonkango dendi donkenda. Nkenda zaJesus za mu tumangedere a uyunge nonkenda kwava wopeke, unene po kwava va dompere mutjima. Pokutemwinina nonkango daJesaya kuhamena Jesus, mupositoli Mateusa kwa tente asi: “Ruu rokutauka kapi nga ru tezagura, ano kage koramba, kapi nga ka dimisa.” (Jesaya 42:3; Mateusa 12:20) Jesus kwa uyungire monkedi ezi za korangedere  ava va dompere nomutjima ava va fene ngwendi ruu rokutauka ndi kage koramba kana hara kudima. Age kwa zuvhisire mbudi zehuguvaro kwava va kere ‘nomutjima gwanyanyauka.’ (Jesaya 61:1) Ntani kwa zigidire vantu “ava wa rorora udigu” va wize kwendi, yipo va ya “gwane rufuwo.” (Mateusa 11:28-30) Age kwa tumbwidilire vasikuli vendi asi Karunga ga kara nonkenda kwankenye mukareli gwendi, kukwatera mo ‘tunona’ ndi ava au tara uzuni asi kwato mulyo.—Mateusa 18:12-14; Rukasa 12:6, 7.

14. Ngapi natu likida malizuvho gonkenda kwava wopeke?

¹⁴ Ngapi natu honena Jesus mokulikida nkenda? Malizuvho getu gonkenda. Bibeli kutukorangeda tu tunge po malizuvho ogo, morwa kapi aga wiza po pwagene. ‘Nkenda’ kuna kara sikara esi va hepa kutunga po Vakriste navenye. (Resa Vakorosi 3:9, 10, 12.) Ngapi omu no likida malizuvho gonkenda kwava wopeke? Kara neharo lyenene kovantu. (2 Vakolinte 6:11-13) Purakena nawa nsene gumwe kuna kukutantera omu ana kulizuvha ntani nosinka sendi. (Jakopo 1:19) Lipura asi: ‘Ngano nyame nina kara moukaro ou, ngapi ngano nani lizuvha? Ngapi omu nina hara va tekure nge?’—1 Peturusa 3:8.

15. Yisinke natu vhura kurugana tu vatere ava vana guwu ndi vana kuhepa?

¹⁵ Yirugana yetu yonkenda. Nkenda kututumangeda tu ruganene wopeke uwa, unene po nsene vana guwu ndi kuna kuhepa. Ngapi natu vhura kuvavatera? Varoma 12:15 kwa tanta asi: “Tomu lilisa ko ava vana kulira.” Poyiruwo yoyinzi, vantu kuhepa ehengagwido kupitakana tupu kukohonona po udigu. Awo kuhepa kaume ogu ga litura mo mwawo nokuvapurakena. Munazinyetukadi gumwe ogu ga gwene ehengagwido kovapuli vakwawo konyima zapa ga fire munwendi, kwa tanta asi: “Ame na yi haferere apa vakaume va wizire nokuyalilisa nge ko.” Nose kuvhura kulikida nkenda kwava wopeke pokuvaruganena uwa. Wa diva ko mufisayendi ogu ana hepa evatero lyokuwapukurura  embo lyendi ndi? Ndi Mukriste gomukurupe ogu ana hepa ugendero mokuza komapongo ndi mokuzuvhisa ndi kwandokotora? Pokuvaruganena nampili yoyinunu, kuvhura kukundama eparu lyawo momunene. (1 Johanesa 3:17, 18) Ntani, ose kulikida nkenda kwava wopeke pokukondja kuzuvhisa mbudi zongwa. Eyi kukundama eparu lyovantu wonomutjima donongwa!

16. Yisinke twa hepa kuuyunga mokukorangeda ava vana guwu?

¹⁶ Nonkango detu donkenda. Malizuvho getu gonkenda kwava wopeke kututumangeda tu ‘korangede wompwagetjima.’ (1 Vatesaronika 5:14) Yisinke twa hepa kuuyunga mokukorangeda vantu vangoso? Kuvhura tu va tantere omu twa va hara nokuvapandadeka ntani nokuvavatera va dimburure yikara yawo yoyiwa. Kuvhura hena tu va diworokese asi Jehova kwa va kokera kwaMunwendi morwa age kuvatara asi mulyo. (Johanesa 6:44) Ntani nokuvatantera asi Jehova kupakera mbili vakareli vendi ava vana ‘dompo nomutjima’ ntani nava “lina pu ehuguvaro.” (Johanesa 6:44) Nonkango detu donkenda kukundama ava vana hepa ehengagwido.—Yisewe 16:24.

17, 18. (a) Monkedi musinke Jehova ana harere vakuronambunga va takamese nonzwi? (b) Yisinke ngatu ka zogera mosirongwa sokukwama ko?

¹⁷ Vakuronambunga, Jehova kuna mu harere mu takamese nonzwi dendi nonkenda. (Yirugana 20:28, 29) Diworokeni asi aso situmbukira seni sokulisa nokukorangeda nokupwizumukisa nonzwi dendi. (Jesaya 32:1, 2; 1 Peturusa 5:2-4) Yipo nye, mukuronambunga gonkenda kapi a hetekere ko kupangera vapuli vakwawo pokutulisa po noveta ndi pokuvaninka va lizuvhe usima nsene kapi vana kurugana unene. Nye age nga kondja mokuvavatera va kare noruhafo ntani nokuhuguvara asi eharo lyawo lyokuhara Jehova ngali va tumangeda va mu karere kuliza noukaro wawo.—Mateusa 22:37.

¹⁸ Ngomu tuna kuteda ko kelinunupiko nokonkenda zaJesus, ayo ngayi tu tumangeda tu mu honene. Mosirongwa sokukwama ko, ngatu ka zogera omu natu honena uradi nounongo waJesus.