Honena uradi nounongo waJesus
“One kwa hara Karunga, nampili ngomu mwa dira kumunona. One kwa mu pura, nampili ngomu muna kudira kumumona ntaantani.”—1 PETURUSA 1:8.
1, 2. (a) Ngapi omu ngatu gwana eparu? (b) Yisinke nayi tu vatera tu twikire rugendo rokutwara keparu?
APA atu ya kara varongwa vaKristusa, ose kutameka rugendo. Rugendo oro kuvhura kututwara keparu, li kare asi lyemeguru ndi lyepevhu. Jesus kwa tanta asi: “Ogu nga didimika dogoro kouhura, yige nga yoworoka.” (Mateusa 24:13) Mokukasika oku tuna tamba morugendo rwetu, twa hepa kukara valimburukwi dogoro kouhura weparu lyetu ndi kouhura wouzuni ou woudona. Nye twa hepa kutakamesa asi uzuni ou wa ha tu pukisa. (1 Johanesa 2:15-17) Ngapi natu twikira morugendo rwetu?
2 Jesus ga tu tulira po sihonena sosiwa. Sihonena sendi kwa si tjanga moBibeli. Pokulironga kuhamena Jesus, ose ngatu diva omu ga kara. Ngatu mu hara nokutura epuro mwendi. (Resa 1 Peturusa 1:8, 9.) Mupositoli Peturusa kwa uyungire asi Jesus kwa tu sigira sihonena tu rugane moomu nga rugana. (1 Peturusa 2:21) Nsene tu kwama nawa sihonena saJesus, ose ngatu vhura kulididimika dogoro kouhura. * Mosirongwa sa ka pita, twa lirongere omu natu honena elinunupiko nonkenda zaJesus. Mosirongwa esi, tatu ka lironga omu natu honena uradi ntani nounongo wendi.
JESUS KWA KARA NOURADI
3. Yisinke uradi, ntani ngapi omu natu u gwana?
3 Uradi kuna kara malizuvho aga aga vhuru kutunkondopeka nokutuvatera tu lididimikire maudigu. Uradi kutuvatera hena tu kwaterere kweyi youhunga ntani tu kare ngorooro valimburukwi nampili tu ligwanekere nomaudigu. Uradi kwa likwatakana nokutjira nehuguvaro ntani neharo. Monkedi musinke? Apa atu tjira kuguvisa Karunga, ose kapi ngatu pulisira kutjira vantu kutukundame. (1 Samwere 11:7; Yisewe 29:25) Kuhuguvara mwaJehova kutuvatera tu demenene kweyi yokomeho kapisi komaudigu getu. (Episarome 27:14) Eharo lyosili kututumangeda tu likide uradi nampili momahepeko. (Johanesa 15:13) Ose kugwana uradi pokuhuguvara mwaKarunga nokukwama sihonena saMunwendi.—Episarome 28:7.
4. Ngapi Jesus ga likidire uradi “mokatji kovarongi” montembeli? (Tara efano pepenuno 9.)
4 Apa ga kere nonomvhura 12, Jesus kwa likidire uradi apa ga kere “montembeli, age kuna hingire mokatji kovarongi.” (Resa Rukasa 2:41-47.) Varongi owo va divire unene Veta zaMosesa ntani nompo doVajuda. Nompo odo kwa ninkisire vantu yi va digopere kulimburukwa veta. Nye eyi kapi ya ninkisire Jesus a dire kuuyunga. Age kapi ga va tjilire. Age kwa twikilire ‘kuvapuragera.’ Yimo, Jesus kapi ga pulire mapuro aga va hwa vanona kupura. Gazara tupu mapuro gomadigu aga ga ninkisire varongi va purakene nokugazadara ko. Varongi vena kapi hena va vhulire kupura Jesus mapuro gamwe aga ngano ga mu digoperere kulimburura. Navenye ava va mu purakenene “kwa va tetwire nondunge dendi,” kukwatera mo varongi. Nouradi, Jesus kwa poperere Nonkango daKarunga!
5. Mononkedi musinke Jesus ga likidire uradi mokuzuvhisa?
5 Apa nga zuvhisa, Jesus kwa nga likida uradi mononkedi dokulisiga-siga. Pasihonena, age kwa likidire vantu asi awo kwa va pukisa vampitisili womaukarelikarunga nomarongo goyimpempa. (Mateusa 23:13-36) Age kwa nyokerere po makondjeso gomadona gouzuni ou. (Johanesa 16:33) Age kwa twikilire kuzuvhisa nampili momahepeko. (Johanesa 5:15-18; 7:14) Yikando yivali, nouradi age kwa zeresere ntembeli pokutjida mo ava ngava zi nyateke.—Mateusa 21:12, 13; Johanesa 2:14-17.
Jesus nouradi kwa tanterere Vajuda asi age yige Kristusa ntani MunwaKarunga
6. Ngapi Jesus ga likidire uradi mezuva lyendi lyokuhulilira apa pevhu?
6 Ayo kunkondopeka epuro pokukwama sihonena saJesus souradi pokuligwanekera nomaudigu. Gazadara ko kouradi ou ga likidire mezuva lyendi lyokuhulilira apa pevhu. Age ga divire yihorokwa omu ya likweme dogoro Johanesa 13:21-27) Mosikunino saGesemani, Jesus nouradi kwa lihorwere mwene kombunga zovakwayita ezi za wizire zi ya mu kwate. Nampili ngomu eparu lyendi lya kere mosiponga, age kwa poperere varongwa vendi pokutantera vakwayita asi: “Sigeni ava va ze.” (Johanesa 18:1-8) Apa va mu puragerere komeho sosigongi, age nouradi kwa va tanterere asi age yige Kristusa ntani MunwaKarunga, nampili ngomu ga yi divire asi mupristeli gomunene kuna kupapara mpito zokumudipagesa. (Marukusa 14:60-65) Jesus kwa limburukwire kwaKarunga dogoro konomfa. Nomunku gokuhulilira, age kwa zigilire asi: “Yina siki mo.”—Johanesa 19:28-30.
posiruwo somuhoroli gwendi. PoPaska, Jesus kwa tanterere Judasa asi: “Eyi ono hara kurugana, yi rugana usimbu.” (HONENA URADI WAJESUS
7. Vadinkantu, ngapi omu lizuvhu pokumutumbwisa kedina lyaKarunga, ntani ngapi nomu likida uradi?
7 Ngapi natu honena Jesus pokulikida uradi? Kosure. Vadinkantu, kareni nouradi nsene tomu tantere vanasure vakweneni ndi wopeke asi one vamwe woNombangi daJehova. Monkedi zangesi, ngomu likida asi kulizuvha mfumwa mokumutumbwisa kedina lyaKarunga, nampili wopeke va mu zore. (Resa Episarome 86:12.) Vamwe vana hara mu pure melisinto. Nye kareni nehuguvaro asi eyi za uyunga Bibeli kuhamena unsitwe usili. Kuvhura mu ruganese sifo The Origin of Life—Five Questions Worth Asking mokulimburura ava vana hara kudiva “ehuguvaro eli lya kara mweni.” (1 Peturusa 3:15) Makura ayo ngayi mu hafesa mokudiva asi muna popere usili woBibeli nouradi.
8. Morwasinke natu zuvhisira nouradi?
8 Mokuzuvhisa. NgoVakriste wousili, twa hepa kutwikira ‘kuuyunga nouradi’ wokutunda kwaJehova. (Yirugana 14:3) Morwasinke natu zuvhisira nouradi? Konda zokuhova, twa diva asi eyi atu zuvhisa usili wokutunda moBibeli. (Johanesa 17:17) Zauvali, “ose varugani kumwe naKarunga,” ntani age kwa tu pa mpepo zendi zokupongoka zi tu vatere. (1 Vakolinte 3:9; Yirugana 4:31) Zautatu, pokuzuvhisa nouradi, ose ngoso kuna kulikida asi twa hara Jehova novantu. (Mateusa 22:37-39) Morwa twa kara nouradi, kapi ngatu hageka kuzuvhisa. Ntani ose tuna tokomene mokuronga usili vantu ava va “zonagura” nondunge ndi va pukisa vampitisili womaukarelikarunga. (2 Vakolinte 4:4) Ose ngatu twikira kuzuvhisa mbudi zongwa nampili wopeke va zi nyoke ndi va tu hepeke nokutuswaura.—1 Vatesaronika 2:1, 2.
9. Ngapi natu likida uradi posiruwo somaudigu?
9 Posiruwo somaudigu. Kuhuguvara mwaKarunga, ngaku nkondopeka epuro lyetu tu kare nouradi yipo tu lididimikire maudigu. Nampili gumwe gekoro lyetu a fe, ose ngatu guva nye kapi ngatu zumbanesa ehuguvaro. Ose twa kara nehuguvaro asi “Karunga ogu a kwafa nkenye apa” nga tu nkondopeka. (2 Vakolinte 1:3, 4; 1 Vatesaronika 4:13) Nsene tatu vere ndi tuna remana kuzuvha kukora, nye ose kunyokera po nkenye uhaku ou nau guvisa Karunga. (Yirugana 15:28, 29) Nsene tuna guwu, ‘nomutjima detu kuvhura kutupa usima,’ nye morwa twa huguvara mwaKarunga ogu a kara “pepi nava vana dombo nomutjima,” ose kapi atu hageke kumukarera. *—1 Johanesa 3:19, 20; Episarome 34:18.
JESUS KWA KARA NOUNONGO
10. Yisinke unongo, ntani ngapi omu Mukriste gomunongo a uyunga ntani a rugana?
10 Unongo kuna kara udivi wokukwata egano pokatji keyi youhunga neyi yepuko, ntani nokuhorowora kurugana youhunga. (Vahebeli 5:14) Mukriste gomunongo kutura po matokoro aga naga nkondopeka elikwakatano lyendi naKarunga. Age kapi a koresa wopeke mombuuyungiso zendi, nye age kuruganesa nonkango edi nadi vatera wopeke yipo a hafese Karunga. (Yisewe 11:12, 13) Age kapi a ‘handuka usimbu.’ (Yisewe 14:29) Age “kurugana eyi ya hungama,” pokutura po matokoro gomawa meparu lyendi nalinye. (Yisewe 15:21) Ngapi omu natu gwana unongo? Twa hepa kulironga Nonkango daKarunga nokutura pasirugana eyi tuna kulironga. (Yisewe 2:1-5, 10, 11) Ntani kuvhura tu tede ko kosihonena saJesus sounongo nokusikwama.
11. Ngapi Jesus nga likida unongo mombuuyungiso zendi?
11 Jesus kwa likidire unongo mwanayinye eyi nga uyunga neyi nga rugana. Mombuuyungiso zendi. Apa nga zuvhisa mbudi zongwa, Jesus nga ruganesa “nonkango donongwa” edi da tetukisire vapurakeni. (Mateusa 7:28; Rukasa 4:22) Age nga resa nokutemwinina Matjangwa ntani ga divire matjangwa gouhunga kwankenye ukaro. (Mateusa 4:4, 7, 10; 12:1-5; Rukasa 4:16-21) Jesus hena nga faturura Matjangwa monkedi zokuguma nomutjima dovapurakeni vendi. Konyima zevhumbuko lyendi, apa ga uyungire novarongwa vendi monzira zokuza koEmausi, kwa va fatwililire “momatjangwa nagenye yininke eyi ya mu hamena.” Konyima, varongwa kwa tente asi: “Ngapi tupu omu kadi hwama nomutjima detu apa ka uyunga . . . , a tu fwatwire matjangwa?”—Rukasa 24:27, 32.
12, 13. Yihonena musinke ayi likida asi Jesus kapi nga handuka ntani ga kere nougomoki?
12 Monkareso nomomalizuvho gendi. Unongo kwa vaterere Jesus a pangere nkareso zendi, ‘pokulididimikira.’ (Yisewe 16:32) Age kwa kere ‘mugomoki.’ (Mateusa 11:29) Age nkenye apa nga lididimikire mapuko govarongwa vendi. (Marukusa. 14:34-38; Rukasa 22:24-27) Age kapi nga handuka nampili apa ngava mu tekura momudona.—1 Peturusa 2:23.
Marukusa 5:25-34.) Age kwa penene mombunga nokukwata sikoverero saJesus, makura ta veruka. Age kapi ga kuhukire kuliza noVeta, ntani ngano kapi ga kwete nkenye ogu. (Levitikus 15:25-27) Nye Jesus kapi ga uyungisire mukadi gwina monkedi zondona. Morwasinke? Morwa ga divire asi ‘ufenkenda noulimburukwi’ yiyo ya nenepa po moVeta zaKarunga. (Mateusa 23:23) Nye, age kwa tente asi: “Munwange, epuro lyoge lina ku parura, zende nombili, ove hena o veruke koudigu woge.” Omu tupu ayi nkondopeke asi unongo waJesus kwa mu tumangedere a likide nkenda!
13 Unongo wa vaterere hena Jesus a kare nougomoki. Monkedi omu nga tekura vantu kulikida asi age ga kwete egano Veta zaMosesa. Pasihonena, gazadara kosihorokwa ‘somukadi goruhonde.’ (Resa14. Sirugana musinke ga tulire muhowo Jesus, ntani ngapi ga demenenene ko?
14 Momparukiso zendi. Jesus kwa likidire unongo monkedi omu nga paruka. Age kwa tulire muhowo sirugana sokuzuvhisa mbudi zongwa meparu lyendi. (Rukasa 4:43) Ntani ga tulisire po matokoro aga ga mu vaterere a demenene kosirugana sendi nokusimana. Age kwa rerupikire eparu lyendi yipo a ruganese siruwo nononkondo dendi mokuzuvhisa. (Rukasa 9:58) Age ga divire mulyo gokudeura wopeke yipo ngava twikire sirugana esi konyima zonomfa dendi. (Rukasa 10:1-12; Johanesa 14:12) Ntani ga tumbwidilire vasikuli vendi asi ngava vatera “dogoro nokouhura wouzuni.”—Mateusa 28:19, 20.
HONENA UNONGO WAJESUS
Unongo kutuvatera tu kwate egano eyi va hepa vantu makura tatu horowora nawa nonkango (Tara paragarafu 15)
15. Ngapi natu honena unongo mombuuyungiso zetu?
15 Ngapi omu natu honena unongo waJesus? Mombuuyungiso zetu. Pokuuyunga novapuli vakwetu, ngano tu ruganese nonkango donongwa dokutunga nye kapisi dokuvakoresa. (Vaefeso 4:29) Nsene tatu zogere nava wopeke kuhamena Uhompa waKarunga, tu ruganeseni nonkango “donontovara domungwa.” (Vakorosi 4:6) Ose kuhetekera ko kukwata egano eyi va hepa vantu neyi va hara makura tatu horowora nawa nonkango. Nsene tu ruganesa nonkango donongwa, vantu ngava hara kutupurakena ntani mbudi zetu ngazi va guma komutjima. Ntani, apa atu faturura eyi twa pura, ose kuruganesa Bibeli morwa azo nonkondo. Twa yi diva asi mbudi zomoBibeli za kara nononkondo unene kupitakana nonkango edi atu uyunga.—Vahebeli 4:12.
16, 17. (a) Ngapi natu yi likida asi ose kuliwora kuhanduka ntani tu vagomoki? (b) Yisinke nayi tu vatera tu demenene kosirugana sokuzuvhisa?
16 Monkareso nomomalizuvho getu. Unongo kutuvatera tu pangere malizuvho getu apa atu ligwanekere nomakondjeso ntani ‘tu liwore kuhanduka.’ (Jakopo 1:19) Apa vantu ava tu handukisa, ose kuhetekera ko kukwata egano eyi vana uyungire ndi vana ruganene ngoso. Yangoso kutuninkisa tu va ‘dongwenene po’ ndi tu dire kuhanduka. (Yisewe 19:11) Unongo hena kutuvatera tu kare nougomoki. Ose kapi atu ndindire vanavazinyetu va kare wokusikilira mo. Nye twa hepa kudiworoka asi awo kuvhura va kare noudigu ou tuna dili kudiva. Ya wapa kupurakena komagano gawo ntani nokugatambura nsene hepero.—Vafilipi 4:5.
17 Momparukiso zetu. Ngovasikuli vaJesus, ose twa yi diva asi kuzuvhisa mbudi zongwa kuna kara situmbukira sosinene esi twa gwana. Twa hepa kutura po matokoro aga naga tu vatera tu demenene kosirugana setu. Pokutura Jehova muhowo ntani nokurerupika eparu lyetu, ngayi tu vatera tu ruganese siruwo nononkondo detu mokuzuvhisa mbudi zongwa komeho u wize uhura.—Mateusa 6:33; 24:14.
18. Ngapi natu twikira rugendo rwetu rokutwara komwenyo gwanarunye, ntani yisinke ono tokomene kurugana?
18 Ee, ruhafo musi mokulironga kuhamena yikara yimwe yaJesus yoyiwa! Gazara tupu omu natu gwanena mo uwa mokukonakona yikara yendi yapeke ntani nokulironga kumuhamena. Ngano tu tokomene kukwama sihonena sendi. Pokurugana ngoso, ose ngatu twikira rugendo rwetu rokutwara komwenyo gwanarunye ntani ngatu hedera pepi naJehova.
^ para. 2 Mbilive 1 Peturusa 1:8, 9 kwa zi tjangerere Vakriste ava va kara nehuguvaro lyemeguru. Nampili ngoso, nonkango daPeturusa kuvhura kutamba hena koVakriste ava va kara nehuguvaro lyepevhu.
^ para. 9 Koyihonena youradi posiruwo somaudigu, tara Ruhungu, 1 Sindimba 2000, epenuno 24-28; Awake! 22 Kudumogona 2003, epenuno 18-21; ntani 22 Murongagona 1995, epenuno 11-15, moRuingilisa.