1. Yisinke ya digopekesere sirugana sokuzuvhisa?

APA vantu vaJehova va tamekere kuzuvhisa mbudi zongwa nomvhura 130 da ka pita, awo kwa ligwanekerere noyilimbikiso yoyinzi. * Ngwendi Vakriste wokuhova, mbungagona ezi kwa zuvhisire mbudi ezi va dilire kuhara vantu wovanzi. Vantu kapi ngava va tara asi va lironga. Konyima, apa Satana va mu zugumine mo meguru, awo kwa va hepekere. (Ehororo 12:12) Kutundilira pena, awo kwa zuvhisa mbudi zongwa ‘momazuva aga gopouhura,’ ‘moyiruwo eyi yoyidigu.’—2 Timoteusa 3:1.

2. Yisinke ga rugana Jehova mokutuvatera tu zuvhise?

² Nye, Jehova kwa tumbwidira asi vantu vendi ngava zuvhisa mbudi zongwa evhu nalinye, ntani asi kwato eyi  ngayi va kondera mokusikisa mo sirugana esi. Ngwendi moomu ga mangwilire muhoko goVaisraeli moBabironi, Jehova kwa mangurura vakareli vendi vanaina moBabironi zonene, ndi moukarelikarunga woyimpempa. (Ehororo 18:1-4) Age kwa tu ronga morwa uwa wanyamwetu, nokutuvatera tu paruke mombili ntani nokutudeura tu ronge wopeke kumuhamena. (Resa Jesaya 48:16-18.) Nampili ngomu Jehova a gendesa sirugana setu, ayo kapi yina kutanta asi age kurundurura maukaro goyihorokwa yomouzuni mokutuvatera tu zuvhise. Yosili, maukaro aga ga horoka mouzuni kwa rerupika sirugana setu sokuzuvhisa, nye simpe kwa kutuhepeka nokuligwanekera nomaudigu aga aga tundu mouzuni ou waSatana, ano nevatero lyaJehova kututompoka mokuzuvhisa.—Jesaya 41:13; 1 Johanesa 5:19.

3. Ngapi uporofete waNdaniyera una kusikilira mo?

³ Jehova kwa gendesere muporofete Ndaniyera a porofete asi pomazuva gopouhura vantu wovanzi ngava ‘diva’ usili woBibeli. (Resa Ndaniyera 12:4.) Jehova kwa vaterere Valirongi woBibeli va kwate egano usili woBibeli ntani va nyokere po marongo goyimpempa gomaukarelikarunga. Age kuna kuruganesa vantu vendi va ronge vantu usili woBibeli uzuni mudima. Naina, ose kumona esikiliromo lyouporofete waNdaniyera. Konyara vantu wokusika komamiliyona ntantatu kwa lironga usili woBibeli ntani kuna kuudivisa uzuni mudima. Yininke musinke yimwe ya vatera vantu vaJehova va zuvhise uzuni mudima?

4. Momaraka gangapi va torokere Bibeli koyiha yomvhura 1900?

⁴ Naina, vantu wovanzi va kara noBibeli, ano eyi kutuvatera tu va ronge mbudi zongwa. Monomvhura dononzi, vampitisili womaukarelikarunga goyimpempa kwa nyokesa vantu kuresa Bibeli, ntani kwa hepekere ava ngava zi resa nokudipaga vamwe ava va torokere Bibeli. Nye momvhura 1800, nombunga dimwe kwa torokere Bibeli nazinye ndi ruha rwazo momaraka konyara 400. Momvhura 1900, vantu wovanzi kwa kere noNobibeli davene, nye kapi va kwete egano marongo gamo.

5. Yisinke da rugana Nombangi daJehova kuhamena Bibeli?

⁵ Vantu vaJehova va yi divire asi awo va hepere kuzuvhisa, ntani awo kwa twikilire kufaturura eyi azi rongo Bibeli. Ntani, awo kwa ruganesa matoroko gokulisiga-siga goBibeli nokugahanesa. Kutundilira 1950, awo kwa pwagesa Bibeli New World Translation of the Holy Scriptures, ndi maruha gazo momaraka gokupitakana 120. Momvhura 2013, awo kwa pwagesere ewapukururo lyoBibeli New World Translation moRuingilisa. Bibeli ezi ureru kuzikwata egano ntani kuzitoroka. Apa atu ruganesa Bibeli ezi vantu nava vhura kukwata egano, ayo ureru kuvaronga usili.

6, 7. (a) Yita musinke ya kere monomvhura 100 dina ka pita? (b) Ngapi siruwo sombili sa tu vatera tu zuvhise mbudi zongwa?

⁶ Monomvhura 100 da ka pita, kwa horoka mo yita yoyinzi, kukwatera mo yita youzuni yokuhova neyi yauvali, ano  vantu wovanzi kwa fire. Monkedi musinke nye mbili za vatera vantu vaJehova va zuvhise? PoYita yaUvali yoUzuni, Nathan Knorr ogu ga kere mupitisili mombunga zoNombangi daJehova, posigongi somomvhura 1942 kwa geve siuyungwa sosiparatjangwa “Mbili, kuvhura kukarerera ndi?” Munazinyetu ogo kwa fatwilire uporofete wemEhororo egaununo 17 nokuyilikida asi Harumagedoni simpe tazi wiza. Konyima zoyita ngapa kara siruwo sombili.—Ehororo 17:3, 11.

⁷ Eyi kapi yina kutanta asi apa ya hege Yita yaUvali yoUzuni mbili za kere po. Kutundilira poYita yaUvali yoUzuni, vantu wovanzi kwa fa moyita. Nye moyirongo yoyinzi, kwa hafera mbili ezi za vatera vantu vaJehova va zuvhise mbudi zongwa. Yitundwamo musinke? PoYita yaUvali yoUzuni, Nombangi daJehova mouzuni mudima kwa kere tupu 110 000. Ano naina, kuna kara mamiliyona ntantatu. (Resa Jesaya 60:22.) Mosiruwo esi sombili, ose kuvhura kuzuvhisa mbudi zongwa kovantu wovanzi.

8, 9. Marunduruko musinke ga horoka moyikwamaugendero, ntani ngapi ya kundama sirugana setu?

⁸ Apa vantu vaJehova va tamekere kuzuvhisa moAmerika, pwa kere udigu woyikwamaugendero. Momvhura 1900, apo pana piti nomvhura 21 konyima zapa va pwagesere Ruhungu rokuhova, mosirongo saAmerika kwa kere mo tupu matuwa 8 000 ntani noyitaura yoyisesu. Nye naina mouzuni kuna kara mo matuwa konyara mabiliyona gavali ntani pana kara yitaura yoyiwa komavango gomanzi. Matuwa noyitaura kutuvatera tu tware mbudi zongwa kovantu ava va tunga konomukunda dokoure. Nampili yi kare asi ose kwa tunga oku kwa dira kukara maugendero ntani kugenda sinano sosire, ose kukondja mokuzuvhisira vantu nkenye oku.—Mateusa 28:19, 20.

⁹ Pwa kara hena maugendero gamwe aga aga tu vatere mosirugana setu. Ose kutuma Nobibeli noyimbapiratjangwa pokuruganesa noroli noyikepa ntani nonomahina dorutenda konomukunda dokoure. Vatareli wonombunga novakomitiye woBeteli novatumwa navamwe hena kuruganesa nondira mokuza va ka gave yiuyungwa poyigongi ntani nokukavatera nombungakriste. Ntani vahameni womoMbungagendesi novanavazinyetu vamwe nawo kuruganesa nondira mokuza koyirongo va ka gave ekorangedo ntani edeuro kovapuli vakwawo. Nayinye eyi kuvatera vantu vaJehova va kare mouumwe.—Episarome 133:1-3.

10. Ngapi Ruingilisa vana kururuganesa mouzuni mudima?

¹⁰ Mosiruwo soVakriste wokuhova, vantu wovanzi ava va kere mepangero lyoVaroma ngava uyunga Rugereka. Naina, vantu wovanzi mouzuni mudima  kuuyunga Ruingilisa. Buke English as a Global Language kwa tanta asi ukahe wovantu mouzuni mudima kuuyunga ndi kuzuvha Ruingilisa. Vantu wovanzi kulironga Ruingilisa morwa aro kururuganesa mounangesefa nomoupolitika ntani moruha royikwakonentu noru rounsitwe.

11. Ngapi Ruingilisa rwa kundama sirugana sovantu vaJehova?

¹¹ Morwa Ruingilisa kururuganesa uzuni mudima, ayo kwa tu vatera mokuhanesa usili. Monomvhura dononzi, yimbapiratjangwa ngava yi pwagesa tupu meraka lyoRuingilisa. Alyo eraka ava ruganesa unene komberewa zonene zoNombangi daJehova. Ntani vanavazinyetu ava ava tundu koyirongo yokulisiga-siga ntani kuzuvha Ruingilisa kuvadeura konosikora moPatterson, moNew York mosirongo saAmerika.

12. Momaraka gangapi twa toroka yimbapiratjangwa yetu, ntani ngapi malikwamo gomokompiuta ngatu vatera?

¹² Ose twa kara nositumbukira sokuzuvhisa mbudi zongwa zoUhompa konomuhoko nadinye, eyi yiyo atu torokere yimbapiratjangwa yetu konyara momaraka 700. Ngapi omu eyi ayi tu tompoka? Nokompiuta ntani nomalikwamo gamwe aga va tura mo ava tumbura asi MEPS kurerupika sirugana setu setoroko. Eyi yiyo ya tu vatera tu zuvhise mbudi zoUhompa ntani nokunkondopeka uumwe wetu uzuni mudima. Nye unene po ose kwa kara mouumwe morwa kuuyunga “eraka lyokukuhuka,” usili woBibeli.—Resa Sefaniya 3:9, NW. *

13, 14. Ngapi noveta ntani nomatokoro gompanguro ga tu vatera?

¹³ Veta zemepangero lyoVaroma kwa vaterere Vakriste wokuhova va zuvhise. Mokulifana, naina nose noveta domoyirongo yokulisiga-siga kutuvatera tu zuvhise mbudi zongwa. Pasihonena, noveta domoAmerika kwa pulisira vantu va kare nononkondo dokuhorowora ukarelikarunga ou vana hara nokuuyunga  kuhamena epuliro lyawo ntani nokuponga kumwe. Eyi kwa pa umanguruki vanavazinyetu womoAmerika va kare nomapongo gawo ntani nokuronga vantu Bibeli. Nye poyiruwo yimwe va hepa kuza kompanguro mokukapopera umanguruki wawo wokuzuvhisa mbudi zongwa. (Vafilipi 1:7) Apa vapanguli monompanguro odo va here kuvasilika kuzuvhisa, yipo va zire kompanguro zonene oku va ka va pulisilire kuzuvhisa.

¹⁴ Nompanguro doyirongo yimwe nado kwa tu kwatesa ko pokutupa umanguruki wokurugana ukareli wetu nokuzuvhisa moyitarameho. Apa ya dilire kututompoka monompanguro dimwe, ose kwa zire koMpanguro zaEuropa zeyi yountu womuntu. Pasihonena, mwaPembagona 2014, ose kwa fundire nompanguro 57 mompanguro ozo zonene po, ntani matokoro gazo kugalimburukwa moyirongo yomoEuropa. Nampili ngomu ‘nkenye muhoko gwa tu nyenga,’ noveta domoyirongo yoyinzi kutupulisira tu karere Jehova noumanguruki.—Mateusa 24:9.

15. Mononkedi musinke nomahina dokunduruka va di wapukurura, ntani ngapi eyi ya tu vatera?

¹⁵ Nomahina donompe dokunduruka kwa tu vatera tu zuvhise mbudi zongwa kovantu wovanzi. Ure wonomvhura mafere, vantu kwa ruganesere mahina gokunduruka aga ga pangerere Johannes Gutenberg koyiha yomvhura 1450. Nye monomvhura 200 da ka pita, nomahina dokunduruka kwa di wapukurura. Konyima zosiruwo yipo va ya totere po nomahina dononene dokugenderera  kunduruka. Ntani kwa ya kara ureru kuteta yipepa nokuyininka yi kare monobuke. Ngapi marunduruko ogo ga kundama yimbapiratjangwa yetu? Momvhura 1879 mwaPembankuru, matjangururo gokusika 6 000 goRuhungu rokuhova kwa ga ndurukire tupu moRuingilisa aga ga dilire kukara nomafano. Naina, Ruhungu kurunduruka momaraka gokupitakana 200. Aro ruwa ntani rwa kara nomafano gomawa, ntani matjangururo gokupitakana 50 000 000 kuganduruka nkenye apa.

16. Yiruganeso musinke ya tu vatera tu zuvhise uzuni mudima? (Tara efano pepenuno 21.)

¹⁶ Yiruganeso yoyinzi monomvhura 200 da ka pita kwa vatera vantu vaKarunga va zuvhise mbudi zongwa. Tuna zogere nare kuhamena nomahina dorutenda nomatuwa nonondira. Nye kwa ruganesa hena nombasikora nomahina gokutopatopa naga gokunduruka yimbapiratjangwa yovatwiku, nonoteregarama nonoterefona nomafano nonomahina dokukwateka nonoradio nonotivi nonomuvi nonokompiuta ntani Intaneta. Nampili ngomu vantu vaJehova va dira kupangera yininke oyo, nye awo kuyiruganesa mokutoroka Bibeli noyimbapiratjangwa momaraka gomanzi ntani nokuzuvhisa mbudi zongwa mouzuni mudima. Monkedi ezi, ‘nomuhoko kututakamesa,’ ngamoomu va yi pumba moBibeli.—Resa Jesaya 60:16.

17. (a) Yilye ana kugendesa sirugana setu sokuzuvhisa? (b) Morwasinke Jehova ga tu pulisira tu kare varugani kumwe nendi?

¹⁷ Yosili, Jehova kuna kugendesa sirugana setu sokuzuvhisa. Jehova kapi ga korera mevatero lyetu mokusikisa mo sitambo sendi. Nye age kutupulisira tu kare varugani kumwe nendi, yipo tu likide eharo lyetu kwendi noku kwava wopeke. (1 Vakolinte 3:9; Marukusa 12:28-31) Tu pandureni Jehova kweyi a tu vatere tu rugane sirugana sokuronga uzuni mudima. Ntani tu ruganeseni nkenye mpito mokuzuvhisa kuhamena Jehova ntani Uhompa wendi!