KUZUVHISA mbudi zongwa kuna kara sirugana somulyo unene vana kurugana naina pevhu. Azo mfumwa mokulihameka mosirugana sokutura po varongwa. Nove no yi kwatesa ko asi vazuvhisi navenye poyiruwo yimwe kuligwanekera noudigu wokukwaterera koupampi wawo mosirugana sokuzuvhisa.

Vazuvhisi vamwe kuvadigopera mokuzogera nomuntu mosirugana sa tunda embo zende embo morwa sinzi sovantu kapi ava kara pomambo. Ava atu gwana pomambo, kuvhura va dire kutambura mbudi zoUhompa ntani pamwe kutuhandukira. Vazuvhisi vamwe kuzuvhisira nomukunda dononene makura kukara nosinka asi kapi ngava vhura kuzuvhisira navenye. Ntani vazuvhisi vamwe womombungakriste kwa zuvhisa nomvhura dononzi kupitakana omu va yi ndindilire ano eyi pamwe kuvadompesa.

Mosirugana sokuzuvhisa mwa kara maudigu aga naga vhura kusesupika upampi wetu. Mouzuni ou ana kupangera Satana ‘Muzonaguli,’ kapisi ureru kwetu mokuudisa mbudi zaKarunga zeparu.—1 Johanesa 5:19.

Yi kare asi maudigu musinke ono kuligwanekera nago mokuzuvhisa mbudi zongwa, kara nehuguvaro asi Jehova kuvhura a ku vatere o ga funde po. Nye yisinke wa hepa kurugana mokunkondopeka upampi woge mosirugana sokuzuvhisa? Tu konakoneni magano gamwe.

Nkenye mvhura, wovanzi kuna kugwana ekuho ngoNombangi daJehova. Nsene ntani tupu ko ligeve kwaKarunga pokugwana ekuho, kuvhura o lirongere ko yoyinzi kwava va zuvhisa nomvhura dononzi. Ano nsene ove kwa zuvhisa nomvhura dononzi, kuvhura o vatere mokudeura wovape ndi? Kurugana ngoso, ngo gwanena mo ruhafo.

Jesus ga yi divire asi varongwa vendi va hepere mavyukiso yipo va kare vazuvhisi wokuwapera,  ntani ga va likidire omu ava yi rugana. (Rukasa 8:1) Naina, pana kara hepero zokudeura wovape va kare vazuvhisi wokuwapera.

Twa ha gazara asi vazuvhisi wovape ngava gwana ediwo lyokuronga kupitira tupu mokulihameka mosirugana sokuzuvhisa. Awo va hepa mavyukiso kupitira medeuro lyewa. Vazuvhisi wovape va hepa kuvalikida omu (1) nava liwapaikira eyi nava ka uyunga, (2) nava zogera nomuntu ogu vana kuzuvhisira, (3) nava hanesa yipambiratjangwa, (4) nava rugana matengwiropo, ntani (5) nava tameka elirongo lyoBibeli. Yitundwamo ngayi lilikida nsene asi muzuvhisi gomupe kuna kunomena nokuhonena nkedi ezi ana kuruganesa ogu ana kumuvatera. (Rukasa 6:40) Muzuvhisi gomupe ngayi hafera mokukara nagumwe ogu na vhura kumupurakena nokumuvatera apa pana kara hepero. Kugava epandadeko nomagano omu na yi rugana kuvhura kuvatera muzuvhisi gomupe.—Muudisi 4:9, 10.

Kugusa ko elituromo lyoge lyokuzogera nogu ono kuzuvhisira, mazuva gamwe ya wapa kuzogera moyirugana yokuzuvhisa kumwe nogu ono kuzuvhisa nage. Diworoka asi Jesus kwa tumine varongwa vendi “vavali-vavali” va ka zuvhise. (Rukasa 10:1) Ngomu ngava rugana kumwe, awo ngava likorangeda nokulinkondopeka. Yipo nye, siruwo esi atu rugana novapuli vakwetu mokuzuvhisa, kutupa mpito zongwa ‘zokulikwafa-kwafa.’—Varoma 1:12.

Yininke musinke yimwe eyi nomu vhura kuzogera? Wa limonena sihorokwa sekorangedo ndi? Wa gwana ko magano gomawa melirongo lyoge ndi lyepata ndi? Wa zuvhire yimwe eyi ya kukorangedere kepongo ndi? Pamwe kuvhura o zuvhise nogu wa dira kudiva nawa. Wa diva omu ga wiza mousili ndi? Yisinke ya mu ninkisire a pure asi ezi mbunga zaJehova? Yihorokwa musinke ga limonena? Kuvhura mu zogere eyi wa limonena. Yi kare asi yisinke yina kuhoroka mokuzuvhisa, kurugana nomuntu mokuzuvhisa kugava mpito zongwa ‘zokulikwafa-kwafa.’—1 Vatesaronika 5:11.

Mokukwaterera koupampi mosirugana sokuzuvhisa mulyo mokuwapukurura nkareso zetu zokulironga. “Mukareli gokulimburukwa gonondunge” kupwagesa yirongwa yokulisiga-siga eyi natu vhura kulironga. (Mateusa 24:45) Tu zogereni sirongwa sosiwa sokuvhura kulironga: Morwasinke sirugana sokuzuvhisa Uhompa sa karera nomulyo unene? Kakende “ Morwasinke no kwatererera koupampi woge mosirugana sokuzuvhisa?” kwa zogera eyi sa karera nomulyo.

 Kukonakona nokonda edi domokakende kuvhura kukutumangeda o twikire kuzuvhisa noupampi. Ngomu ono kulironga, hetekera ko kudidilika nokonda dimwe deyi no zuvhisira noupampi. Makura teda ko konokonda odo ntani nomatjangwa aga ga di kwatesa ko. Yosili kurugana ngoso ngayi nkondopeka upampi woge wokuzuvhisa.

Mbunga zaJehova nkenye apa kugava magano aga aga tu vatere tu wapukurure ezuvhiso lyetu. Pasihonena, mokugwederera ko kosirugana sa tunda embo zende embo, twa hepa kuzuvhisa kupitira mombilive nomoterefona nomoyitarata ntani nampili kapisi mokuzuvhisa tuna kara ntani komavango gonongesefa. Ntani kuvhura tu ture po mawapaiko mokukazuvhisira konomukunda oku kwa dira kukara Nombangi.

Wa hetekera ko kutura magano ogo gamwe pasirugana ndi? Wovanzi ava va yi rugana oyo, kwa gwanena mo ruhafo. Tu konakonene yihonena yitatu.

Sihonena sokuhova kwa hamena mo yininke va tumbura mosirongwa simwe somoYirugana yetu yoUhompa kuhamena kutameka malirongo goBibeli. Ayo kwa tumangedere munazinyetukadi gedina April a tameke elirongo novarugani vakwawo vatatu. Ayo kwa mu tetukisire nokumuhafesa apa va tambwire elirongo nokutameka kuza komapongo.

Ose kutukorangesa tu papare vantu ava nava tambura yirongwa yimwe yomoyifo yetu. Mutareli gonombunga gomoAmerika kwa tanta asi age kwa hanesere sirongwa sokuhamena kuruganena kumwe somoAwake! kovagendesi navenye woyitora eyi ayi ruganene kumwe momukunda ogo.  Nage namukadendi kwa hanesere sirongwa “Kukwata egano ndokotora goge” kovandokotora wokupitakana 100 womomukunda ogo. Age kwa tanta asi madinguro gangoso kwa vatera vantu va dive sirugana setu sokuzuvhisa noyimbapiratjangwa yetu. Konyima zapa va liyikire novantu owo, nage namukadendi kwa va tompokere mokurugana matengwiropo.

Munazinyetukadi gedina Judy kwa tjangerere komberewa zonene mokupwagesa rupandu rwendi komakorangedo gokuzuvhisa kupitira koterefona. Age kwa tanta asi ozina wokukurupa wonomvhura 86, ava ava vera-vera, kuzuvhisa kupitira koterefona ntani wa gwanena mo ruhafo rorunene mokulironga Bibeli nomukurupe gonomvhura 92 koterefona!

Magano gokuzuvhisa ga kara moyimbapiratjangwa yetu kurugana sili. Ga ruganesa! Ago kuvhura ga ku vatere o kwaterere koruhafo nokoupampi woge mosirugana sokuzuvhisa.

Etompo lyetu mosirugana sokuzuvhisa kapi lya korera asi yimbapiratjangwa yokuhura kupi atu hanesa, novarongwa wokuhura kupi atu lirongo nawo Bibeli ndi omu atu vatere vantu va ya kare vakareli vaJehova. Gazara Nowa. Kugusa ko vepata lyendi, vantu vangapi ga vaterere Nowa ava va ya kere vakareli vaJehova? Age kwa kere muzuvhisi ogu ya tompokere. Ayo kwa korera omu atu karere Jehova noulimburukwi.—1 Vakolinte 4:2.

Vazuvhisi wovanzi woUhompa kwa yi mona asi mokukara noupampi mokuzuvhisa, va hepa kulitulira po yitambo eyi nava sikisa mo. Yitambo musinke oyo yimwe? Magano gamwe kuvhura kugagwana mokakende “ Litulira po yitambo eyi no sikisa mo.”

Hundira Jehova a ku vatere yipo o hafere sirugana soge sokuzuvhisa. Pokusikisa mo yitambo yoge, ngo hafa pokudiva asi kuna kurugana paapa wa hulira mokuzuvhisa mbudi zongwa.

Yimo, kuzuvhisa mbudi zongwa kuvhura kukara udigu. Nye pwa kara yininke eyi no rugana yipo o kare noupampi mokuzuvhisa Uhompa. Hafera nonzogera dekorangedo kumwe nogu ono kuzuvhisa nage, kara nelirongo lyanyamooge nkenye apa, tambura magano gomukareli gokulimburukwa gonondunge, ntani litulira po yitambo eyi no sikisa mo. Yomulyo po, diworoka asi Jehova Karunga ga ku pa situmbukira sokuzuvhisa mbudi zongwa ngagumwe goNombangi dendi. (Jesaya 43:10) Ngomu ono kukwaterera koupampi woge mosirugana sokuzuvhisa, ove ngo limonena ruhafo rorunene!