Uhwi wokutetukisa koVayapani
PEPONGO lyokulikarera lya karerere moNagoya, mosirongo saYapani 28 Kudumogona 2013, Anthony Morris gomoMbungagendesi kwa tetukisire vapurakeni nediviso lyokuhafesa, epwageso lyosimbapiratjangwa sosipe moRuyapani sosiparatjangwa Evangeli lyaMateusa [The Bible—The Gospel According to Matthew]. Vakalipo navenye wokupitakana 210 000 kwa si haferere kumwe nokuswakerera unene.
Etjangururo eli lyomapenuno 128 lyEvangeli lyaMateusa kwa ligusire koBibeli zoNew World Translation zomoRuyapani, ntani alyo kwa likarera. Munazinyetu Morris kwa fatwilire asi alyo kwa li wapaikira “mokusikisa mo yihepwa yoVayapani.” Yirongwa musinke ya kara mo mobuke ezi? Morwasinke va zi wapaikira? Ngapi omu va zi tambwire?
YIRONGWA MUSINKE YA KARA MO MOBUKE EZI?
Monkedi omu buke zaMateusa va zi tjanga kwa tetukisire varesi wovanzi. Nonkango domoRuyapani kuvhura kuditjanga monaure ndi monausupi wobuke. Nye simbapiratjangwa sosipe kwa si tjanga monaure pokuruganesa ntjangeso ezi va diva kuresa Vayapani monosaitunga nomoyimbapiratjangwa yawo yimwe. Vayapani wovanzi ntjangeso zangesi kuvarerupira kuresa. Ntani hena yiparatjangwa kwa yi tura mokatji ngwendi yiparatjangwagona yipo varesi va mone usimbu magano gomulyo.
Vanavazinyetu womoYapani kwa ruganesa yirongwa yobuke zaMateusa. Munazinyetukadi gonomvhura dokoyiha 80, kwa tanta asi: “Ame kwa resa buke zaMateusa yikando yoyinzi, nye ntjangeseso zomonaure ntani noyiparatjangwagona kwa vatera nge ni kwate nawa egano Eudiso lyopoNdundu.” Munazinyetukadi gomudinkantu gumwe kwa tjenge asi: “Ame kwa mene kuresa Mateusa posikando simwe tupu. Ame kwa yika ntjangeseso zomonausupi, nye sinzi soVayapani kwa hara ntjangeseso zomonaure.”
KWA ZI WAPAIKIRA VAYAPANI
Morwasinke buke ezi zaMateusa nazi sikisira mo yihepwa yoVayapani? Nampili ngomu sinzi soVayapani va dira kudiva Bibeli, awo vana kara neharo lyokuziresa. Evangeli eli lyaMateusa ngali gava mpito kowo va dira kumona Bibeli va kare noruha robuke ezi ntani nokuziresa.
Morwasinke va horowera buke zaMateusa? Sinzi soVayapani, nkango “Bibeli” kuvadiworokesa Jesus Kristusa. Eyi yiyo va horowera buke zaMateusa morwa kwa tjanga mo elikwamo lyezimo lyaJesus nehampuruko lyendi, nEudiso lyendi lyopoNdundu, ntani nouporofete wendi kuhamena mazuva gopouhura, ano eyi kuna kara yirongwa va hara sinzi soVayapani.
Vazuvhisi woUhompa womoYapani kwa tameka kuhanesa simbapiratjangwa esi sosipe tunda embo zende embo ntani nokomatengwiropo gawo.
Munazinyetukadi gumwe kwa tjanga asi: “Ame ngesi nina kara nompito zompe zokuhanesa Nonkango daKarunga kovantu womomukunda. Konyima zepongo lyokulikarera ya tompokere nge kuhanesa etjangururo lyobuke zaMateusa!”NGAPI OMU VA ZI TAMBWIRE?
Ngapi omu vazuvhisi ayi va rerupire kuhanesa buke ezi? Sinzi soVayapani va diva nonkango edi ‘evero lyenunu,’ ‘kuzugumina makwarara yinguru,’ ntani ‘kudira kulipakera sinka kweyi yomungura.’ (Mateusa 6:34; 7:6, 13) Awo kwa va tetukisa pokulironga asi odo kuna kara nonkango daJesus Kristusa. Mokumona nonkango odo mEvangeli lyaMateusa, sinzi sawo kwa tanta asi: “Ame kwa here kuresa Bibeli nampili rumwe tupu.”
Apa vazuvhisi ava tengwire ko kovantu ava va tambwire buke zaMateusa, vantu owo kutanta asi awo kwa resere yirongwa yimwe tupu va zi gwene. Mugara gonomvhura dokoyiha 60, kwa tanterere muzuvhisi gumwe asi: “Na zi resa yikando yoyinzi ntani kwa hengagwida nge. Na kanderere, ronga nge ko yoyinzi kuhamena Bibeli.”
Buke zaMateusa kwa zi wapaikira mokuzihanesa kovantu navenye. Apa gumwe goNombangi ga lihamekere mokuzuvhisa, age kwa geve e-mail zendi komudinkantu gomukadi ogu ga tambwire buke zaMateusa. Konyima zovili zimwe, mukadi ta tjangere munazinyetu, pokutanta asi ana resa ruha robuke zoBibeli ntani ana hara kudiva ko yoyinzi. Konyima zosivike simwe, ta tameke nelirongo lyoBibeli, ntani ga tameka kuwiza komapongo.
Matjangururo gokupitakana 1 600 000 gEvangeli lyaMateusa kwa ga tuma konombungakriste domoYapani, ano nkenye kwedi Nombangi kwa kuhanesa matjangururo gomanzi gokupitakana pomayovi. Nonkango detwaromo lyobuke ezi kwa pwagesa malizuvho govatjangi vazo pokutanta asi: “Tuna si huguvara asi pokuresa buke ezi ngayi nkondopeka eharo lyoge koBibeli.”