1. Morwasinke Jesus ga ‘haferere mompepo zokupongoka’? (Tara efano.)

GAZARA omu ya fene pokumona Jesus ana “hafa moMpepo zoKupongoka.” Nampo age kwa menyamenyene noruhafo. Morwasinke? Age kwa tumine varongwa vendi 70 va ka zuvhise mbudi zongwa zoUhompa waKarunga. Age kwa ndindilire mokuzuvha yitundwamo yezuvhiso lyovarongwa vendi, morwa pwa kere nonkore dononzi dombudi zongwa. Nonkore odo, kwa hamenene mo valirongi womatjangwa noVafalisayi, ava va kere vakonentu novanandunge. Awo kwa here vantu va tare Jesus ngomuhongi tupu goyikungu ntani varongwa vendi ‘ngovantuuntu tupu.’ (Yirugana 4:13; Marukusa 6:3) Nye apa varongwa va ka tengwire kosirugana sawo, awo kwa hefe unene. Awo kwa zuvhisire nampili momakwamakwamo gokutunda konompepo donondona! Morwasinke va karere noruhafo ntani nouradi?—Resa Rukasa 10:1, 17-21.

2. (a) Ngapi varongwa vaJesus va fene ngwendi vantuuntu tupu? (b) Yisinke ya va vaterere va kwate egano usili woBibeli?

² Jesus kwa tanterere Jehova asi: “Nyove nina kupanda,  Tate, HOMPA geguru nevhu, yeeyi wa horeka yininke eyi vakonentu novanandunge, yiyo wa yi horwera vantuuntu tupu. Nhi, Tate, ngesi yimo wa yi harera.” (Mateusa 11:25, 26) Morwasinke Jesus ga tumbwilire varongwa vendi asi vantuuntu tupu? Morwa awo kwa kere neharo lyokulironga ngwendi vanona, kapisi ngwendi valirongi womatjangwa noVafalisayi, ava va kere vakonentu ntani ava va gazarere asi vanandunge. Varongwa kwa lirongere elinunupiko, kapisi elinenepeko. (Mateusa 18:1-4) Morwa awo kwa linunupikire, Jehova kwa ruganesere mpepo zendi zokupongoka zi va vatere va kwate egano usili woBibeli. Nye vampitisili womaukarelikarunga goVajuda kwava pukisire Satana nelinenepeko lyawo.

3. Yisinke natu ka zogera mosirongwa esi?

³ Eyi yiyo ya hafesere Jesus. Age kwa hefe pokumona omu Jehova ga horwere usili woBibeli vantu wokulinunupika. Nkedi ezi yizo ga hara Karunga, ntani kapi ga runduruka. Ngapi a yi likida asi age kuhafera nkedi ezi? Mosirongwa esi, tatu ka zogera omu Jehova ga horora usili woBibeli kovantu wokulinunupika.

4. Monkedi musinke Ruhungu roureru runa kara uhwi?

⁴ Monomvhura edi dantani, mbunga zaKarunga kwa nkondopeka mulyo gokuronga monkedi zoureru ntani zokuzera. Ngesi tu zogereni yihonena yitatu. Sokuhova, Ruhungu roureru. * Aro kuna kara uhwi ou una kuvatera vantu wovanzi, kukwatera mo ava va kara noudigu wokuresa ndi weraka. Ntani mapata kwa yi dimburura asi morwa Ruhungu oro roureru, vana vawo kuna kukwata egano yirongwa yomoRuhungu. Vantu wovanzi kwa likida rupandu rwawo kupitira monombilive. Munazinyetukadi gumwe kwa tente asi age kwa kere nowoma mokulimburura mElirongo lyoRuhungu. Morwa kuruganesa Ruhungu roureru, age kwa tjanga asi: “Ame ngesi kuna kugava malimbururo, ntani kwato woma! Tani pandura Jehova ntani vatjangi woRuhungu roureru.”

5. Mauwa musinke no gwanena mo metoroko lyepe lyoBibeli New World Translation of the Holy Scriptures?

⁵ Sauvali, etoroko lyoureru lyoBibeli New World Translation of the Holy Scriptures, kwa li pwagesere moRuingilisa pepongo lyankenye mvhura eli lya kere 5 Sikukutu 2013. * Sinzi soMatjangwa kwa ruganesa nonkango dononsesu, nye etanto kapi lya runduruka ntani ureru kugakwata egano. Pasihonena, Joba 10:1 kwa kere nononkango 27 ngesi nononkango 19, ano Yisewe 8:6 kwa  kere nononkango 20 ngesi nononkango 13. Novelise nadinye da zera metoroko lyepe. Mugwavekwa gumwe ogu ga karera noulimburukwi Jehova nomvhura dononzi kwa tanta asi: “Ame kwa resa buke zaJoba metoroko lyepe, ano kwa lizuvhire ngwendi sikando sange sokuhova kuzikwata nawa egano!” Vantu wovanzi yimo va lizuvha ngoso.

6. Ngapi o lizuvhu kuhamena ekwatogano lyetu lyepe lyaMateusa 24:45-47?

⁶ Sautatu, gazadara ko kuhamena mawapukururo mekwatogano lyetu lyoMatjangwa gamwe. Pasihonena, ekwatogano lyepe kuhamena “mukareli gokulimburukwa gonondunge” kwa li pwagesere moRuhungu 15 Pembankuru 2013. (Mateusa 24:45-47) Sirongwa oso kwa fatwilire asi mukareli gokulimburukwa yige Mbungagendesi. Ntani ‘movantu’ kwa hamena mo vagwavekwa “nononzwi dapeke” ava ava gwana nondya komukareli gokulimburukwa. (Johanesa 10:16) Ose kuyihafera pokulironga mausili aga ntani nokugaronga wopeke. Mononkedi musinke hena dimwe Jehova ga likida asi ga hafera ndongeseso ezi zoureru ntani zokuzera?

7, 8. Yihorokwa musinke yimwe yomoBibeli eyi ya fanekesa yininke yokomeho?

⁷ Nsene ove kwa karera Jehova nomvhura dononzi, wa dimburura marunduruko monkedi omu yimbapiratjangwa yetu yina kufaturura Matjangwa. Pwanare, rorunzi ngava tanta asi yihorokwa yimwe yomoMatjangwa kwa fanekesa yininke yokomeho. Ayo kwa kere mundunduma. Ayo kwa fanekesere esikiliromo. Pwa kara konda zongwa zokufaturura yihorokwa yomoBibeli monkedi zangoso ndi? Nhi. Pasihonena, Jesus kwa tumbwire “sitetu somuporofete Jona.” (Resa Mateusa 12:39, 40.) Jesus kwa fatwilire asi siruwo esi Jona ga kere mezimo lyomfi kwa fanekesere siruwo esi Jesus mwene ga kere montoko.

⁸ Pwa kara yihorokwa yimwe yomoBibeli eyi ya fanekesa yininke yokomeho. Mupositoli Paurusa kwa singonona yimwe yayo. Pasihonena, elikwatakano lyaAbirahamu naHagara ntani naSara kwa fanekesere elikwatakano lyaJehova nomuhoko goVaisraeli, ntani noruha rwemeguru rombunga zaKarunga. (Vagarata 4:22-26) Mokulifana, nkongoronzugo nontembeli nEzuva lyEfironkenda nomupristeli gomunene ntani nayinye yomoVeta kwa kere “mundundumba tupu gouwa wokomeho.” (Vahebeli 9:23-25; 10:1) Apa atu lirongo yihorokwa oyo yomoBibeli ntani neyi ya fanekesa, ayo kunkondopeka epuro lyetu. Eyi kutanta asi nkenye muntu ndi sihorokwa ndi sininke va singonona moBibeli kwa fanekesa yuma ndi?

9. Pwanare, ngapi va fatwilire sihorokwa somoBibeli saNabota?

 ⁹ Pwanare, yimbapiratjangwa yetu kwa fatwilire asi muntu ndi sihorokwa ndi sininke momatjangwa gamwe kwa fanekesa yuma. Pasihonena, hompa gomukadi Jesebeli kwa dipagesere Nabota yipo mugara gwendi, Ahaba, a guse sikunino saNabota soyindjembere. (1 Vahompa 21:1-16) Mo-1932, Ruhungu kwa fatwilire asi Ahaba naJesebeli kwa fanekesere Satana nombunga zendi, Nabota kwa fanekesere Jesus, ano nomfa daNabota kwa fanekesere nomfa daJesus. Nye momvhura 1961, buke “Let Your Name Be Sanctified” kwa tente asi Nabota kwa fanekesere vagwavekwa, ano Jesebeli ukarelikarunga woyimpempa. Ntani ehepeko lyaNabota eli ga rugene Jesebeli kufanekesa ehepeko lyovagwavekwa momazuva aga gopouhura. Monomvhura dononzi, efatururo eli kwa nkondopeka epuro lyovantu vaKarunga. Morwasinke ngesi tuna kufatwilira yininke monkedi zapeke?

10. (a) Monkedi musinke mukareli gokulimburukwa ana vangarara kefatururo lyoyihorokwa yimwe yomoBibeli? (b) Kosinke yina kudemenena yimbapiratjangwa yetu naina?

¹⁰ Mwaza nomvhura, Jehova kwa vatera “mukareli gokulimburukwa gonondunge” a vangarare unene. Monkedi musinke? Ngesi kapi hena ana kuuyunga asi yihorokwa yomoBibeli kwa fanekesa  yininke yokomeho nsene asi Matjangwa kapi ga yi kwatesa ko. Mafatururo gamwe ganare kuhamena yininke eyi ya fanekesere yokomeho kwa kere udigu kugakwata egano. Apa ngava demenene unene kweyi ayi fanekesa yihorokwa yomoBibeli, kwato yirongwa eyi ngatu lirongere ko. Naina, yimbapiratjangwa yetu kudemenena kokugava efatururo lyoureru kuhamena epuro nelididimiko netjirokarunga ntani noyikara yimwe eyi natu lirongera ko koyihorokwa yomoBibeli. *

11. (a) Ngapi tuna kukwata egano sihorokwa saNabota, ntani ngapi sihonena sendi asi tu vatere? (b) Monomvhura edi dantani, morwasinke vana kudira kuruganesa yininke eyi ya fanekesa yokomeho? (Tara sirongwa “Mapuro gokutunda kovaresi” mosifo esi.)

¹¹ Ngesi tuna kwata nawa egano sihorokwa saNabota. Nomfa daNabota kapi da fanekesa Jesus ndi vagwavekwa. Age kwa fire morwa kulimburukwa Karunga. Nampili ngomu ga mu hepekere mupangeli gononkondo, age kwa limburukwire Veta zaJehova. (Numeri 36:7; 1 Vahompa 21:3) Aso kuna kara sihonena sosiwa kovakareli vaKarunga naina ava vana kulididimikira mahepeko gokulifana. (Resa 2 Timoteusa 3:12.) Vakriste kuvhura va si kwate egano nokusidiworoka nokusitura pasirugana ntani nokunkondopeka epuro lyawo.

12. (a) Yihorokwa yomoBibeli kuuyunga tupu eyi natu lirongera ko ndi? (b) Morwasinke yina kuturerupira kukwata egano nampili yininke yokonhiinhi? (Tara nonkango dokonhi.)

¹² Eyi kutanta nye asi yihorokwa yomoBibeli kuuyunga tupu eyi natu lirongera ko nye kapi ayi fanekesa yuma ndi? Hawe. Mevango lyokudemenena koyihorokwa eyi ya fanekesa yokomeho, yimbapiratjangwa yetu kuna kudemenena komu sihorokwa soBibeli sa likwatakana noyikwawo. Pasihonena, ulimburukwi waNabota momahepeko ntani nonomfa dendi, kutudiworokesa ulimburukwi waKristusa nou wovagwavekwa. Ntani hena nou ‘wononzwi dapeke.’ Eyi kulikida asi Jehova kuna kuturonga monkedi zoureru. *

13. Yihonena musinke yina kulikida asi yifanekeso yaJesus kwa yi faturura monkedi zoureru zokuzera?

¹³ Jesus kwa kere Murongi gomunene po ogu ga parukire pevhu. Age  nga ruganesa yifanekeso ndi yihonena, apa nga rongo. (Mateusa 13:34) Yifanekeso mulyo morwa kufaturura yininke youdigu monkedi zoureru ezi nazi tu vatera tu tede ko yipo yi kundame mutjima gwetu. Mwaza nomvhura, yimbapiratjangwa yetu kwa faturura yifanekeso yaJesus monkedi zoureru zokuzera. Pasihonena, Ruhungu 15 Pembankuru 2008, kutuvatera tu kwate egano sifanekeso saJesus sohingo nesi sohuma zomositareta ntani sekwe. Ngesi twa yi kwata egano asi yifanekeso eyi kwa tamba koUhompa waKarunga, ano ayo kwa vatera wovanzi va kare varongwa vaKristusa nokunyokera po uzuni ou woudona.

14. (a) Pwanare, ngapi ngatu faturura esimwititi lyoMusamaliya gonkenda? (b) Ngesi ngapi omu tuna li kwata egano?

¹⁴ Ngapi omu natu kwata nawa egano masimwititi aga nga simwitire Jesus? Masimwititi ogo gamwe kwa kere pasifanekeso ntani pauporofete. Gamwe ngaga rongo yirongwa yomulyo. Nye ngapi omu natu diva asi gopasifanekeso ndi hawe? Mwaza nomvhura, elimbururo lya zera. Pasihonena, gazara monkedi omu ngatu faturura esimwititi lyaJesus lyoMusamaliya gonkenda. (Rukasa 10:30-37) Mo-1924, Ruhungu kwa tente asi Musamaliya gonkenda kwa fanekesere Jesus ntani nzira zokutunda koJerusarema zize koJeliko kwa fanekesere nkareso zondona zovantu kutundilira pourwanesi womoEdeni. Ntani vanamahaka kwa fanekesere nombunga dononene novanangesefa woufuki, ano mupristeli noMurevhi kwa fanekesere maukarelikarunga goyimpempa. Nye ngesi, yimbapiratjangwa yetu kuruganesa esimwititi olyo mokudiworokesa Vakriste va dire kukara nelitondororo. Twa hepa kuvatera navenye vana hepa ekwafo, unene po pokuvavatera va dive usili kuhamena Karunga. Ayo kutuhafesa mokumona omu Jehova ana kufaturura usili monkedi zoureru.

15. Yisinke ngatu ka zogera mosirongwa sokukwama ko?

¹⁵ Mosirongwa sokukwama ko, ngatu ka zogera sifanekeso saJesus sovakadona murongo. (Mateusa 25:1-13) Ngapi Jesus ga harerere varongwa vendi wopomazuva gopouhura va kwate egano sifanekeso esi? Eyi va tumbura mosifanekeso oso kwa fanekesa yininke yokomeho ndi? Ndi age kwa here tu lirongere ko yirongwa eyi nayi tu vatera momazuva aga gopouhura? Ngatu ka yi zogera mosirongwa sokukwama ko.