1, 2. (a) Sifanekeso musinke ga tanterere Jesus vakaume vendi? (Tara efano.) (b) Morwasinke natu divira sifanekeso sononzwi noyikombo?

JESUS kwa zogerere novakaume vendi wovanene, Peturusa naAndiliyasa naJakopo ntani Johanesa kuhamena yininke yomulyo. Konyima zokuvatantera sifanekeso somukareli gokulimburukwa gonondunge nesi sovakadona murongo ntani sonoranda, Jesus kwa tanterere vakaume vendi sifanekeso simwe hena. Mosifanekeso oso, age kwa uyungire kuhamena siruwo esi “MunwaMuntu” nga ya pangura “nomuhoko nadinye dovantu.” Age kwa tente asi “MunwaMuntu” nga va hangura monombunga mbali, ngwendi moomu a hangura musita nonzwi koyikombo. Ntani ga singwenene mbunga zautatu, ‘vamumbya’ vaHompa.—Resa Mateusa 25:31-46.

² Ngwendi vapositoli, vakareli vaJehova womosiruwo setu nawo va litura mo mokudiva sifanekeso esi morwa  kwa hamena mo eparu lyovantu. Jesus kwa tente asi vamwe ngava gwana mwenyo gwanarunye, ano vamwe ngava va zonagura po. Eyi yiyo ya karera nomulyo tu dive eyi asi tanta sifanekeso ntani neyi natu rugana tu ka gwane mwenyo gwanarunye. Mosirongwa esi, tatu ka limburura mapuro gana kukwama ko: Ngapi Jehova ga tu vatera tu kwate egano sifanekeso esi? Ngapi tuna yi diva asi sifanekeso esi kwa nkondopeka sirugana sokuzuvhisa? Wolye nava zuvhisa? Ntani morwasinke ya karera nomulyo kulimburukwa ‘kwaHompa novamumbya’ vendi?

3, 4. (a) Yisinke twa hepa kudiva mokukwata egano sifanekeso esi? (b) Momvhura 1881, ngapi Ruhungu rwa fatwilire sifanekeso esi?

³ Mokukwata egano eyi asi tanta sifanekeso sononzwi noyikombo, twa hepa kudiva asi (1) yilye “MunwaMuntu” ndi “Hompa,” wolye nonzwi ntani yikombo, ntani wolye ‘vamumbya’ vaHompa? (2) siruwoke “MunwaMuntu” nga ya hangura nonzwi koyikombo? ntani (3) morwasinke vamwe ava va tumbwire asi nonzwi ano vamwe yikombo?

⁴ Momvhura 1881, Ruhungu kwa tente asi “MunwaMuntu” ndi “Hompa,” kwa tamba Jesus. Ntani kwa fatwilire asi ‘vamumbya’ vaHompa kapisi vaava tupu ngava ka pangera nendi meguru nye hena vantu navenye ava ngava ka paruka pevhu apa ngava ka sikilira mo. Ruhungu kwa tente asi monoMumvho Eyovi dEpangero lyaKristusa yipo ngava hangura vantu ntani asi ava va rugana youhunga ngava va tumbura asi nonzwi.

5. Mo-1923, ngapi vantu vaKarunga va kwete egano sifanekeso?

⁵ Mwaza siruwo, Jehova kwa ya vatera vantu vendi va kwate nawa egano sifanekeso esi. Mo-1923, Ruhungu 15 Sikukutu, kwa tente asi “MunwaMuntu,” Jesus. Makura aro kwa ruganesere novelise mokufaturura asi vamumbya mosifanekeso kapi va tamba tupu kwava ngava ka pangera naJesus ntani asi awo ngava ka kara meguru monoMumvho Eyovi dEpangero lyendi. Aro kwa tente hena asi nonzwi kwa tamba kwava ngava parukira pevhu mepangero lyaJesus novamumbya vendi. Mokumona asi sifanekeso kwa tanta asi awo kuvatera vamumbya vaHompa, ehanguro ngano ngali horoka awo vamumbya vaJesus wovagwavekwa simpe pevhu, komeho noMumvho Eyovi dEpangero di tameke. Sirongwa oso kwa tente asi nonzwi vaava va pura mwaJesus ntani asi Uhompa ngau ka reta eparu lyewa.

6. Mo-1995, ngapi ekwatogano lyetu lyosifanekeso lya rundurukire?

⁶ Monomvhura dononzi, ose kwa yi kwete egano asi vantu kuna kuvahangura kupitira mosirugana sokuzuvhisa momazuva aga gopouhura. Nsene va tambura mbudi zongwa, awo ngoso nonzwi ano nsene va zi nyoka awo ngoso yikombo. Nye 1995 ekwatogano lyetu lyosifanekeso kwa rundurukire. Ruhungu kwa hetakanesere Mateusa 24:29-31 (resa) kumwe naMateusa 25:31, 32  (resa), ntani kwa fatwilire asi Jesus nga hangura vantu poudigu wounene apa MunwaMuntu nga “wiza mouyerere wendi.” *

7. Yisinke asi tanta sifanekeso?

⁷ Naina, ose kuna kukwata nawa egano sifanekeso sononzwi noyikombo. Twa yi diva asi “MunwaMuntu” ndi “Hompa,” kwa tamba Jesus. ‘Vamumbya’ vaHompa kuna kara vaava va gwaveka nompepo zokupongoka ngava ka pangera meguru naJesus. (Varoma 8:16, 17) “Nonzwi” ntani ‘yikombo’ kuna kara vantu wonomuhoko nadinye. Awo ngava va hangura komeho udigu wounene u ka hage ou ngau tameka ntaantani. Ntani twa yi diva asi Jesus nga hangura vantu kuliza nomu ava tekura vagwavekwa ava vana kara simpe pevhu. Ose tuna hafa kweyi Jehova ga tu vatera monomvhura dononzi tu kwate egano sifanekeso esi ntani noyifanekeso yimwe hena yomwaMateusa egaununo 24 ntani 25!

8, 9. Morwasinke Jesus ga tumbwilire “vahungami” asi nonzwi?

⁸ Jesus kapi ga ruganesere nkango “kuzuvhisa” ndi “sirugana sokuzuvhisa” mosifanekeso sononzwi noyikombo. Ngapi nye tuna yi diva asi sifanekeso kuturonga asi sirugana sokuzuvhisa mulyo?

⁹ Mokugwana elimbururo, pomuhowo twa hepa kudiworoka asi Jesus kwa rongere sirongwa kupitira mosifanekeso. Age kapi ga tembe nonzwi ndi yikombo yene-yene. Mokulifana, age kapi ga tembe asi nkenye muntu ogu ngava hangura ngonzwi ga hepa kugava nondya noyidwara kovagwavekwa ndi mokukavatarera po nsene tava vere ndi modorongo. Nye Jesus kwa singwenene “vahungami” ngononzwi morwa awo kutara vagwavekwa ngovamumbya vawo ntani nokuvalimburukwa momazuva aga gopouhura goudigu.—Mateusa 10:40-42; 25:40, 46; 2 Timoteusa 3:1-5.

10. Ngapi nonzwi nadi vatera vamumbya vaKristusa?

¹⁰ Apa Jesus ga geve sifanekeso sononzwi noyikombo, age kwa uyungire eyi ngayi horoka pomazuva gopouhura. (Mateusa 24:3) Pasihonena, age kwa tente asi: “Mbudi zoNgwa ezi zoUntungi waKarunga tanko ngava zi divisa mwa za uzuni mudima.” (Mateusa 24:14) Ano komeho tupu a gave sifanekeso sononzwi noyikombo, age kwa geve sifanekeso sonoranda. Jesus kwa simwitilire sifanekeso esi mokuronga vagwavekwa  asi va hepa kurugana unene mokuzuvhisa. Nye awo vasesu vana hupu po pevhu, ntani yirugana yinzi! Vagwavekwa kwa va pangera va zuvhisire ‘nomuhoko nadinye’ komeho u wize uhura. Ngomu tuna lirongo mosifanekeso sononzwi noyikombo, nonzwi kuvatera vagwavekwa. Nkedi zongwa zokuvavatera kuna kara pokuzuvhisa. Ayo ya gwanena po tupu yokugava yimaliwa ndi yokuvakorangeda va rugane sirugana sokuzuvhisa ndi?

11. Epuro musinke nava vhura kulipura vamwe, ntani morwasinke?

¹¹ Naina, pana kara varongwa vaJesus wokusika komamiliyona ntantatu, nye sinzi sawo kapisi vagwavekwa. Jesus kapi ga va pere noranda. Age kwa geve noranda kovamumbya vendi wovagwavekwa. (Mateusa 25:14-18) Vamwe kuvhura va lipure asi: ‘Nsene asi Jesus kapi ga va pere noranda, morwasinke nava zuvhisira?’ Tu tareni elimbururo.

12. Yisinke natu lirongera ko kononkango daJesus domwaMateusa 28:19, 20?

¹² Jesus kwa pangerere varongwa vendi va zuvhise. Konyima zevhumbuko lyendi, Jesus kwa tantere vasikuli vendi va ka tulise po “varongwa” ntani va ka va ronge nayinye eyi ga va pangerere. Varongwa owo va hepere kulimburukwa mpangera zaJesus zokuzuvhisa. (Resa Mateusa 28:19, 20.) Eyi kulikida asi natuvenye twa hepa kuzuvhisa, yi kare asi kwa kara nehuguvaro lyokukaparukira meguru ndi pevhu.—Yirugana 10:42.

13. Yisinke natu lirongera ko kemoneko eli ga mwene Johanesa?

¹³ Mobuke zEhororo, tatu lirongere mo asi sirugana sokuzuvhisa ngava si rugana vagwavekwa nava wopeke. Jesus kwa pere mupositoli Johanesa emoneko ‘lyomufuko’ ogu ana kuzigida vantu va wize nokuyanwa mema aga aga gava eparu. Mufuko kwa tamba kovagwavekwa 144 000 ava ngava ka pangera kumwe naJesus meguru. (Ehororo 14:1, 3; 22:17) Mema kwa tamba konzambo zosizoweseso ezi ngazi vatera vantu va ka manguruke kononzo nokonomfa. (Mateusa 20:28; Johanesa 3:16; 1 Johanesa 4:9, 10) Vagwavekwa kuronga vantu nomupampi kuhamena sizoweseso ntani nomu nava gwanena mo uwa. (1 Vakolinte 1:23) Nye memoneko kwa tumbura mo hena mbunga zimwe ezi za kara nehuguvaro lyokukaparukira pevhu. Nazo kwa zi pangera zi tantere vantu asi: “Wiza!” Azo kulimburukwa mpangera ozo pokuronga wopeke mbudi zongwa. Emoneko eli kulikida asi navenye ava ava tambura mbudi zongwa va hepa kuzuvhisira ko wopeke.

14. Ngapi natu limburukwa “Veta zaKristusa”?

 ¹⁴ Navenye ava ava limburukwa “Veta zaKristusa” va hepa kuzuvhisa. (Vagarata 6:2) Jehova kwa harera navenye ava ava mu karere va limburukwe veta ozo. Pwanare, age kwa harerere Vaisraeli novanayirongo va limburukwe noveta dendi. (Exodus 12:49; Levitikus 24:22) Ose naina kapi twa hepa kulimburukwa noveta nadinye edi va pere Vaisraeli. Nye yi kare asi tu vagwavekwa ndi hawe, natuvenye twa hepa kulimburukwa “Veta zaKristusa.” Sininke simwe somulyo ga tu ronga Jesus kuna kara eharo. (Johanesa 13:35; Jakopo 2:8) Twa hepa kuhara Jehova naJesus ntani novantu. Ano nkedi zongwa po natu likida eharo olyo pokutantera ko wopeke mbudi zongwa zoUhompa.—Johanesa 15:10; Yirugana 1:8.

15. Morwasinke natu uyungira asi Jesus kwa pangerere varongwa vendi navenye va zuvhise?

¹⁵ Eyi ga tanterere Jesus varongwa vendi wovasesu pamwe kwa tamba kovarongwa wovanzi. Pasihonena, Jesus kwa tulire po egwanekero novarongwa vendi 11 nokuvatumbwidira asi ngava ka pangera kumwe moUhompa. Nye ava ngava ka pangera kumwe nendi 144 000. (Rukasa 22:29, 30; Ehororo 5:10; 7:4-8) Konyima zapa ga vhumbukire Jesus, varongwa wovasesu tupu va zuvhire mpangera zendi zokuzuvhisa. (Yirugana 10:40-42; 1 Vakolinte 15:6) Nye varongwa navenye, va limburukwire  mpangera ozo. (Yirugana 8:4; 1 Peturusa 1:8) Naina, nose twa yi diva asi twa hepa kuzuvhisa, nampili ngomu twa dira kuzuvha ezwi lyaJesus lina kututantera tu rugane sirugana esi. Pana kara vantu mamiliyona ntantatu vana kuzuvhisa. Twa yi diva asi pokuzuvhisa, ose kuna kulikida epuro mwaJesus.—Jakopo 2:18.

16-18. Ngapi natu vatera vamumbya vaKristusa, ntani morwasinke natu yi ruganena ngesi?

¹⁶ Satana kuna kurwanesa unene vagwavekwa ava simpe vana kara pevhu, ntani ana diva asi siruwo sina mu hupire ko “sisupi.” (Ehororo 12:9, 12, 17) Nampili ngoso, vagwavekwa kuna kutwikira kuzuvhisa ntani vantu wovanzi kuna kuzuvha mbudi zongwa. Jesus kuna kuvatera vagwavekwa nokuvapitisira.—Matthew 28:20.

¹⁷ Ose kulizuvha mfumwa mokuvatera vamumbya vaKristusa pokuzuvhisa. Ntani kuvatera pokugava yimaliwa yokutungisa Yinyanga yoUhompa neyi yoYigongi ntani noBeteli. Apa atu limburukwa vakuronambunga ntani nava ga horowora “mukareli gokulimburukwa gonondunge,” ose kulikida asi tuna hara kuvatera vamumbya vaKristusa.—Mateusa 24:45-47; Vahebeli 13:17.

¹⁸ Vagwavekwa ava vana hupu po ntaantani ngava va ture sinongweneso sokuhulilira. Vaengeli ngava siga “nompepo ne depevhu” makura udigu wounene ngau tameka. (Ehororo 7:1-3) Komeho zi tameke Harumagedoni, Jesus nga twara vagwavekwa meguru. (Mateusa 13:41-43) Ngesi twa hepa kulikida ulimburukwi kovamumbya vaKristusa wovagwavekwa yipo ngava tu hangwire kononzwi apa nga wiza Jesus.