Aro kwa fatwilire asi muntu ndi sihorokwa ngayi fanekesa yininke yokomeho. Ano yihorokwa yantani kuna kara esikiliromo lyoyininke eyi ya horokere nare. Ntani yihorokwa yanare kwa kere ngomundunduma, ano eyi yantani ngesikiliromo.

Pwanare, yimbapiratjangwa yetu kwa uyungire asi vagara novakadi wovalimburukwi ngwendi Debora naElihu naJefuta naJoba naRahabu naRebeka ntani navamwe wovanzi kwa fanekesere vagwavekwa ndi “emukurumbunga.” (Ehororo 7:9) Pasihonena, ayo kwa tente asi Jefuta naJoba naRebeka kwa fanekesere vagwavekwa, ano Debora naRahabu kwa fanekesere “emukurumbunga.” Nye, monomvhura edi dantani kapi atu hetakanesa yininke monkedi zangoso. Morwasinke?

Matjangwa kuronga asi vamwe ava va tumbura moBibeli kwa fanekesa yininke yoyinene eyi ngayi ka horoka komeho. Pasihonena, moVagarata 4:21-31, mupositoli Paurusa kwa uyungire kuhamena “sifanekeso” omu mwa hamena vakadi vavali. Mukadi gokuhova Hagara, mupika gwaAbirahamu. Paurusa kwa ya yi fatwilire asi Hagara kwa fanekesere muhoko goVaisraeli ogu gwa heme kwaJehova kupitira moVeta ezi ga geve kwaMosesa. Gwauvali mukadi “ogu ga manguruka,” Sara, mukadaAbirahamu. Age kwa fanekesere ruha rwemeguru rombunga zaKarunga. Paurusa kwa tumbwire hena malifano pokatji kaJesus naMerekisedeki ogu ga kere hompa ntani mupristeli. (Vahebeli 6:20; 7:1-3)  Ntani kwa hetakanesere hena muporofete Jesaya novana vendi kwaJesus nokoVakriste wovagwavekwa. (Vahebeli 2:13, 14) Jehova kwa ruganesere Paurusa mokutjanga mahetakaneso nagenye aga a likide asi yihorokwa yanare ntani nesikiliromo lyayo kwa vyuka.

Nampili ngomu Bibeli za ruganesa yifanekeso, nye kapisi nkenye eyi ngayi horokere vantu kwa fanekesere yininke yokomeho. Pasihonena, Paurusa kwa fatwilire asi Merekisedeki kwa fanekesere Jesus. Nye kapi ga tumbura siruwo esi Merekisedeki ga retere mboroto novhinyu kwaAbirahamu konyima zokukafunda vahompa vane. Eyi kapi yina kutanta asi nkenye eyi ya kara moMatjangwa kwa fanekesa yininke yongandi.—Genesis 14:1, 18.

Konyima zonomfa daJesus, vatjangi vamwe kwa rugene epuko lyenene. Awo kwa tjenge nkenye sihorokwa somoBibeli si kare ngwendi kwa fanekesa yuma. Buke zimwe ezi za singonona erongo lyaOrigen naAmbrose ntani Jerome, kwa faturura asi: “Awo ngava papara etanto kwankenye sininke ndi sihorokwa esi va tjanga moMatjangwa, nampili koyininke yoyinunu. Nampili sininke soureru awo ngava si gazarere asi sa kara netanto eli lya [horama] . . . , nampili sivaro sonomfi edi va kwete varongwa mesiku eli ga va monekerere Jesus, awo kwa hetekera ko kungungunyikira sivaro sado asi kwa kere 153!”—The International Standard Bible Encyclopaedia.

Mutjangi gumwe Augustine gomoHippo, kwa fatwilire asi sihorokwa somoBibeli omu Jesus ga kutikire vantu 5 000 nonomboroto ntano ntani nonomfi mbali kwa fanekesa yuma. Age kwa tente asi nomboroto dorukokotwa kwa fanekesa nobuke ntano dokuhova domoBibeli. Ano morwa yilya mulyo kupitakana rukokotwa, age kwa yi tere asi “Etestamende Lyepe” mulyo kupitakana “Etestamende Lyekurukuru.” Ntani age kwa fatwilire asi nomfi mbali kwa fanekesere hompa nomupristeli. Mulirongi gumwe kwa fatwilire asi Jakopo pokuranda umbeli waEsau norupuhwira romakunde kwa fanekesa omu Jesus ga randera vantu ehuguvaro lyemeguru nohonde zendi!

Mafatururo ogo kapisi usili. Vantu kapi va diva yihorokwa yomoBibeli eyi ya fanekesa yuma neyi ya dira kufanekesa yuma. Yisinke nye natu hepa kurugana? Apa Matjangwa aga tumbura muntu ndi sihorokwa ndi sininke asi kwa fanekesa yininke yokomeho, ose kutambura mafatururo gangoso. Nye nsene asi Matjangwa kapi ga yi tumbura, twa ha gazarera.

Ngapi natu gwanena mo uwa moyihorokwa eyi atu resa moBibeli? Mupositoli Paurusa kwa tjenge asi: “Nkenye eyi va tjangera momatjangwa, kwa yi tjangera asi yi tu ronge. Kwa yi tjangera asi tu kare nehuguvaro eli ali tundu medidimiko nehengagwido.” (Varoma 15:4) Paurusa kwa tjangerere Vakriste wovagwavekwa pokuvatantera omu nava gwanena mo uwa moyihorokwa yomoBibeli. Nye kutunda posiruwo sina, Vakriste navenye, kukwatera mo ‘nonzwi dapeke’ kwa gwanena mo uwa moyirongwa yomoMatjangwa.—Johanesa 10:16; 2 Timoteusa 3:1.

Yihorokwa yoyinzi yomoBibeli kapi ya tamba kovagwavekwa velike ndi ‘kononzwi dapeke,’ ndi koVakriste ava va parukire posiruwo songandi. Nye ayo kuretera uwa vakareli vaKarunga navenye. Pasihonena, ruhepo rwaJoba kapi tupu rwa fanekesa komahepeko aga va ligwanekerere nago vagwavekwa moYita yoPomuhowo yoUzuni. Vantu vaKarunga navenye, vagwavekwa “nononzwi dapeke” nawo kwa hepere ngwendi Joba ntani va gwanena mo uwa mosihorokwa sendi. Awo va limonena omu ‘ga ya va rugene Hompa. Yeeyi Hompa mufenkenda, age munambili.’—Jakopo 5:11.

Monombungakriste detu, ose twa kara novakurukadi wovalimburukwi ava va fana ngwendi Debora ntani vakuronambunga wovadinkantu wonondunge ngwendi Elihu. Ntani twa kara novazuvhisi wokukarerera ava va kara noupampi nouradi ngwendi Jefuta ntani vagara novakadi velididimiko ngwendi Joba. Ose kupandura Jehova kweyi twa kara nanayinye ‘eyi va tjanga momatjangwa,’ yipo tu ‘kare nehuguvaro eli ali tundu mehengagwido’!

Morwa nokonda edi, kapi atu hetekere ko kupapara etanto ndi esikiliromo kwankenye sihorokwa somoBibeli. Nye yimbapiratjangwa yetu ngesi kudemenena kokuronga yininke yomulyo yomoMatjangwa.