Vakareli vamwe vaKarunga wovadike kwa uyunga nonkango dangoso. Awo va yi diva asi Jehova ana harere vakareli vendi ‘nonkwara dawo di kare doSikriste,’ kutanta asi kukwara tupu Vakriste wousili. (1 Vakolinte 7:39) Morwasinke Vakriste vamwe ava uyungire nonkango dangoso?

Vakriste ava ava uyunga nonkango dangoso, kuvhura va lizuvhe asi vadike wovakadi vanzi kupitakana wovagara. Moyirongo yoyinzi, yimo ya kara ngoso. Pasihonena, moKoreya vanavazinyetukadi wovadike noperesenda 57, ano vanavazinyetugara wovadike noperesenda 43. MoKolombiya noperesenda 66 wovakadi, ano wovagara noperesenda 34.

Komavango gamwe, vakurona wovahapuli kupura yigondwa yoyinzi ndi mauhwi gondiro pokukwara vana vawo. Ano vanavazinyetugara vamwe kapi ava vhuru kugwana mauhwi ogo. Eyi kuninkisa vanavazinyetukadi vamwe va kare nosinka sokugwana munazinyetugara ogu nava kwara. *

Nsene asi nove yimo o lizuvhu ngoso, diva asi Jehova kukwata egano ukaro woge ntani ga diva malizuvho goge.—2 Histoli 6:29, 30.

MoBibeli, Jehova kupangera vakareli vendi va kware tupu Vakriste vakwawo. Morwasinke? Morwa  age ga diva yoyiwa po kwetu ntani ana hara kutupopera. Kapi ana tu harere tu ture po matokoro gomadona aga ngaga tu koresa ndi ga tu guvise. Momazuva gaNehemiya, Vajuda wovanzi kwa kwere vakadi ava ngava dili kukarera Karunga. Eyi yiyo Nehemiya ga tumbwilire sihonena sosidona saSaromo. “Karunga kwa mu here, makura ta mu ninki a kare mupanguli goVaisraeli navenye.” Nye ‘vakadi wovanayirongo yiyo va mu zonesesere.’ (Nehemiya 13:23-26) Jehova ga diva asi madiworokeso gendi kuturetera uwa, eyi yiyo a tanterere Vakriste va kware tupu paSikriste. (Episarome 19:7-10; Jesaya 48:17, 18) Ose tuna hafa kweyi a tu pe mapukururo geharo ntani gokuhuguvara. Apa atu limburukwa Jehova ngoMupangeli gwetu, ose kuyilikida asi yige ga kara nononkondo dokututantera eyi natu rugana.—Yisewe 1:5.

Yosili, ayo kapi nayi wapa kukwara muntu ogu ga dira kuhara Jehova ndi ga dira “kupura.” Muntu gwangoso nga ku hagekesa kukarera Karunga. (2 Vakolinte 6:14) Mapukururo gaKarunga nkenye apa mawa, ntani Vakriste wovanzi naina kutokora kugalimburukwa. Ano vamwe kunyoka kugalimburukwa.

Munazinyetukadi gomoAustralia gedina Maggy kwa tamekere kulivandekera nomugara gomuhapuli. * Age kwa tanta asi: “Ngani faura unene komapongo yipo ni kare nendi. Na zumbanesere elikwatakano lyange naJehova.” Mudinkantukadi gomoIndia gedina Ratana, kwa livandekerere nomumati gokosure ogu ga tamekere kulironga Bibeli. Nye age kwa lirongerere Bibeli nositambo sokuvandekera mukadona ogo. Konyima, munazinyetukadi ogo ta ya hageke kukarera Jehova nokudirukira koukareli womumati yipo va likware.

Ndenguè gomoCameroon kwa kere nonomvhura 19 apa ga likwere nomugara ogu a dili kukarera Jehova. Komeho va ka likware, mugara kwa tumbwidilire Ndenguè asi nga twikira kukara Mbangi. Nye konyima zoyivike yivali zapa va likwere, mugara ogo kwa hagekesere munazinyetukadi kuza komapongo. Munazinyetukadi kwa tanta asi: “Na lizuvhire ruguwo ntani ngani lili. Na ya yi dimbwilire asi ame kwato nonkondo keparu lyange. Ame kwa ya liverere sili.”

Vakriste vamwe kwa kwara vantu ava ava dili kukarera Jehova nye simpe kuvatekura nombili nonkenda. Nye nampili mulikwali goge ogu a dili kukarera Jehova a kare nombili, ngapi ngayi kundama elikwatakano lyoge naJehova? Ngapi no lizuvha mokudiva asi ove kapi wa purakena kepukururo eli ga ku pere Jehova? Ntani unene po, ngapi Jehova na lizuvha kweyi wa rugana?—Yisewe 1:33.

Vanavazinyetu mouzuni mudima ava va limburukwa kepukururo lyaJehova lyokukwara ‘paSikriste’ va yi diva asi alyo etokoro lyewa. Vanavazinyetugara wovadike nava wovakadi va tokomena kuhafesa Jehova pokukwara Vakriste vakwawo. Michiko gokoYapani kwa tokomenene kulimburukwa Karunga nampili ngomu ekoro lyendi lya mu zedere a kware ogu a dili kukarera Jehova. Ayo kwa kere udigu kwendi morwa vakaume vendi va kwere Vakriste vakwawo. Age kwa tanta asi: “Ame nkenye apa ngani litantere nyamwange asi mokumona asi Jehova Karunga gehafo, ruhafo rwetu kapi rwa korera mokukwara ndi hawe. Ame hena na yi pulire asi yige ga tu pa madowo gokomutjima. Nsene tu dira kugwana mulikwali nampili ngomu tuna hara kukwara, ya wapa kwetu mokukara vadike posiruwo esi.” Konyima, Michiko ga ya mu kwere munazinyetugara gomuwa, ntani age ana hafa asi ga purakenene kepukururo lyaJehova.

Pwa kara hena vanavazinyetugara vamwe ava va ndindira mokugwana mulikwali gouhunga. Pasihonena, Bill gomoAustralia kwa tanta asi poyiruwo yimwe kwa here vakadi wovahapuli. Nye kapi ga tulisire po ukaume nawo morwa kapi ga here kutulisa po elivandekero kumwe ‘nava va hana kupura.’ Monomvhura dononzi, age kwa likidire elituromo movanavazinyetukadi wongandi, nye awo kapi va mu here. Bill kwa ndindilire nomvhura 30 dogoro ta ya gwana munazinyetukadi goyitambo ngwendi yendi. Age kwa tanta asi: “Ame kwato maliverero. Ame nina hafa morwa ose kuza  kumwe mokuzuvhisa nokulironga kumwe ntani nokukarera Jehova kumwe. Ayo kuhafesa nge mokudiva vakaume vamukadange nokukara kumwe nawo morwa awo vakareli vaJehova. Ose kuwapukurura nonkwara detu pokuruganesa nompango doBibeli.”

Yisinke no rugana ngomu ono kuhuguvara mepukururo lyaJehova ntani nokundindira o gwane mugara ndi mukadi ogu a mu karere? Gazara kweyi ono dilire kukwara. Nsene asi morwa ono hara kulimburukwa mpango zaJehova, kara nehuguvaro asi ayo kumuhafesa. (1 Samwere 15:22; Yisewe 27:11) Ntani twikira kukanderera kwaJehova nkenye apa nokumutantera malizuvho goge. (Episarome 62:8) Ngomu ono kukondja mokunyokera po maheteko nomadowo gomadona, elikwatakano lyoge naJehova ngali nkondopara. Kara nehuguvaro asi Jehova ga diva malizuvho goge ntani yihepwa yoge morwa ove mulyo kwendi. Age kapi a tumbwidire mugara ndi mukadi. Nye nsene nonkwara yido sili ono hepa, Jehova ga diva nkedi zongwa zokusikisa mo yihepwa yoge.—Episarome 145:16; Mateusa 6:32.

Poyiruwo yimwe kuvhura o lizuvhe ngwendi Ndafita, ogu ga tente asi: “Zuvha nge nye, HOMPA! Ame na roroka nye! Wa ha horama nge.” (Episarome 143:5-7, 10) Wa ha hageka. Pa Jehova siruwo a ku likide eyi ana ku harere o rugane. Purakena kwaJehova pokuresa Bibeli nokuteda ko unene kweyi ono resa. Eyi ngayi ku vatera o dive eyi ana hepa ko Jehova koge ntani nomu ga vatera vakareli vendi. Pokupurakena kwendi, ove ngoso kuna kuyilikida asi kumulimburukwa.

Yisinke hena no rugana yipo o kare ngorooro noruhafo ngomu ono kara simpe mudike? Kondja mokunkondopeka elikwatakano lyoge naJehova ntani tunga po nkareso zongwa. Lironga kukara nougavi nokurugana unene nokuruganena kumwe novakweni ntani nokulimburukwa Jehova. Yikara eyi mulyo mokukara nononkwara doruhafo. (Genesis 24:16-21; Rutu 1:16, 17; 2:6, 7, 11; Yisewe 31:10-27) Papara muhowo Uhompa pokulitura mo unene moyirugana yokuzuvhisa ntani yomombungakriste. Ayo ngayi ku popera komatokoro gepuko. Bill kwa uyunga kuhamena nomvhura dendi doudike asi: “Ado kwa genderere kupita! Ame kwa di ruganesere mokukarera Jehova ngomuzuvhisi gokukarerera.”

Mpango zaJehova zokukara ‘nononkwara doSikriste’ simpe mulyo. Pokukwara Mukriste gousili, ose kuyererepeka Jehova nokumuhafesa. Bibeli kutanta asi: “Gerago muntu ogu a tjira HOMPA, ogu ga hara kulimburukwa koyipango yendi. Epata lyendi ngali yigara, tali gawopa, age nga hungama narunye.” (Episarome 112:1, 3) Yipo nye, tokomena kulimburukwa mpango zaKarunga ‘zokukwara paSikriste.’