1, 2. Yisinke vatareli wonombunga va dimburura monombungakriste dononzi?

MUTARELI gonombungakriste kwa kere pepi nokuhagesa epongo lyendi novakuronambunga. Ta tara vakuronambunga nokukwata egano eharo lyawo kombunga, vamwe vakondi kwendi. Nye koyili ga kere nayo nosinka. Ta va pura asi: “Vanavazinyetu, yisinke mwa rugana ko mokudeura wopeke va wapere yitumbukira yomombungakriste?” Awo va divire asi mutareli gonombunga medinguro lyendi kwa ya va korangedere va litulire po siruwo sokugwanena po mokudeura wopeke. Munazinyetu gumwe ta limburura asi: “Yisesu twa rugana ko.” Ano vakuronambunga vakwawo va mu kwatesere ko.

² Nsene asi ove mukuronambunga, nampo nove kuvhura o gave elimbururo lyokulifana. Vatareli wonombunga kwa dimburura asi vakuronambunga wovanzi va hepa kulitulira po  siruwo sokugwanena po mokudeura vadinkantugara nava wovakondi yipo va vatere mombungakriste. Nye eyi kapisi ureru kuyirugana. Morwasinke?

3. (a) Ngapi Bibeli za yi likida asi mulyo kudeura wopeke, ntani morwasinke natuvenye natu litulira mo? (Tara nonkango dokonhi.) (b) Morwasinke ayi digoperere vakuronambunga vamwe kudeura wopeke?

³ Ngomukuronambunga, wa yi diva asi mulyo kulitulira po siruwo mokudeura vanavazinyetugara. * Wa yi diva asi pana hepa vanavazinyetugara wovanzi mokuvatera nombungakriste di nkondopare ano komeho ngava ka kwatese ko nombungakriste donompe. (Resa Jesaya 60:22.) Bibeli kutanta asi wa hepa ‘kuronga wopeke.’ (Resa 2 Timoteusa 2:2.) Nye kapisi ureru kugwana siruwo sokuyirugana. Morwa wa hepa kupakera mbili epata lyoge nokurugana koyirugana yoge. Ntani wa hepa kuvatera mbungakriste nayimwe hena. Mokumona asi yinzi yirugana mwa kara nayo nare, tu zogereni eyi ya karera nomulyo kulitulira po siruwo mokudeura wopeke.

4. Morwasinke pamwe vakuronambunga ava dili kudeura usimbu vanavazinyetugara?

⁴ Morwasinke nayi karera udigu kudeura vanavazinyetugara mombungakriste? Vakuronambunga vamwe kugazara asi: ‘Yininke yimwe mombungakriste mulyo unene tanko na hepa kuyisikisa mo. Nampili kapi nani deura wopeke usimbu, kapi ngayi kundama mbungakriste.’ Egano olyo mouhunga ndi? Yininke yimwe kuvhura yi hepe asi o yi rugane usimbu. Nye kudira kudeura vanavanzinyetugara usimbu, kuvhura kukundama mbungakriste momudona.

5, 6. Yisinke natu lirongera ko kosihonena somusingi ntani neyi ya karera nomulyo kutura mawoli moindjini? Ngapi omu eyi ya lifana nedeuro mombungakriste?

⁵ Gazara ko kosihonena esi. Mokuninka asi etuwa li kare moukaro wouwa, musingi ga hepa kutjindja maholi gomoindjina nkenye apa. Nye pamwe kuvhura a lizuvhe asi kutura mawoli motenga mulyo unene morwa ngano etuwa kapi nali genda. Ntani hena kuvhura a lizuvhe asi kwato siruwo sokutjindja mawoli gomoindjina, nga yi rugana tupu konyima. Yimo, etuwa simpe kuvhura li duke. Nye eyi siponga unene. Nsene musingi a dira kutjindja usimbu mawoli gomoindjini, konyima zosiruwo etuwa ngali zonauka. Makura nga hepa siruwo noyimaliwa yoyinzi mokuliwapekesa. Yisinke natu lirongera ko?

⁶ Vakuronambunga va hepa kugenderera kurugana ko yuma koyininke yomulyo unene. Nsene va dira kuyirugana, mbungakriste ngazi kara moudigu. Ngwendi vasingi ava ava tura nkenye apa mawoli motenga, vakuronambunga ‘va hepa kuhorowora’ yomulyo po. (Vafilipi 1:10) Nye vakuronambunga vamwe kuvhura va liture unene mweyi yomulyo nokudira kukara nosiruwo sokudeura wopeke. Eyi ngayi fana ngwendi kuncenuna kutura mawoli moindjini. Nsene vakuronambunga va dira kudeura usimbu vanavazinyetugara, mwaza siruwo mbungakriste kapi ngazi kara novanavazinyetugara ava  va deura mokupakera mbili mbungakriste.

7. Ngapi natu tara vakuronambunga ava ava litulire po siruwo mokudeura wopeke?

⁷ Wa ha gazara asi kudeura kapisi mulyo unene. Vakuronambunga ava ava gazadara ko meho zombungakriste nokulitura mo mokudeura wopeke, awo vakareli wovawa ntani mulyo kovanavazinyetu navenye. (Resa 1 Peturusa 4:10.) Ngapi omu mbungakriste azi gwanene mo uwa?

8. (a) Morwasinke vakuronambunga nava dewira wopeke? (b) Situmbukira musinke va kara naso vakuronambunga ava ava zuvhisire oku kuna hepa evatero? (Tara kakende “ Sirugana somulyo.”)

⁸ Nampili vakuronambunga ava va kara nediwo va hepa kulinunupika nokuyitambura asi ngomu vana kukurupa, kapi ngava vhura hena kurugana unene ngamoomu vana kurugana ngesi. (Mika 6:8) Ntani vakuronambunga va hepa kudiva asi “ehudi kuhorokera nkenye ogu” eyi nayi va digopera mokusikisa mo yitumbukira yawo. (Muudisi 9:11, 12; Jakopo 4:13, 14) Morwa awo kwa hara vantu vaJehova nokuvapakera mbili, vakuronambunga kulitura mo unene mokuronga vadinkantugara eyi va lironga monomvhura dononzi.—Resa Episarome 71:17, 18.

9. Yihorokwa musinke yokomeho ayi ninkisa edeuro li kare nomulyo?

⁹ Vakuronambunga ava ava deura vakwawo mulyo morwa elituromo lyawo ngali nkondopeka mbungakriste. Edeuro olyo ngali ninkisa vanavazinyetugara va wapere mokuvatera mbungakriste zi kare mouumwe nokulimburukwa Karunga. Ayo mulyo unene momazuva aga gopouhura noposiruwo soudigu wounene ou una kuwiza. (Hesekiyeli 38:10-12; Mika 5:5, 6) Yipo nye vakuronambunga  wokuhara, litulireni po siruwo mokudeura wopeke kutamekera naina.

10. Yisinke nava rugana vakuronambunga yipo va kare nosiruwo sokudeura wopeke?

¹⁰ Twa yi diva asi mwa kara nare noyirugana yoyinzi, morwa one kupakera mbili mbungakriste. Yipo nye mwa hepera kugusa ko siruwo seni simwe esi omu ruganesa kombungakriste yipo mu deure wopeke. (Muudisi 3:1) Pokurugana ngesi, ngomu ruganesa nawa siruwo seni ntani mbungakriste ngazi gwanena mo uwa.

11. (a) Morwasinke mavyukiso govakuronambunga gana lifanene nampili ngomu maukaro gawo ga lisiga? (b) Kuliza noYisewe 15:22, morwasinke ya karera mulyo kuzogera magano gamwe govakurombunga?

¹¹ Vakuronambunga vamwe ava va deura vanavazinyetu va rugane unene mombungakriste kwa va pulire omu va yi rugene. * Vakuronambunga owo kwa geve mavyukiso gokulifana nampili ngomu maukaro gawo ga lisiga. Yisinke ayi likida eyi? Eyi kulikida asi edeuro eli ali tundu moBibeli mulyo kowo vana kuligwana “nkenye apa mwankenye mbungakriste.” (1 Vakolinte 4:17) Mosirongwa esi nesi sokukwama ko, tatu ka zogera magano aga va geve vakuronambunga. (Yisewe 15:22) Ava vana kugava edeuro vakuronambunga, ano ava vana kugwana edeuro vadinkantu wovagara.

12. Yisinke ga hepa kutunga po mukuronambunga, ntani morwasinke?

¹² Pomuhowo, mukuronambunga ga hepa kutunga po mutaro gouhunga. Morwasinke ya karera nomulyo? Moomu tupu munasikunino ga hepa kuwapaika evhu komeho a kune mbuto, mukuronambunga ga hepa kuwapaika mutjima gogu ana kudeura komeho a mu ronge udivi woupe. Ngapi mukuronambunga na tunga po mutaro gouhunga kokudeura? Age kuvhura kukwama sihonena somurongi gwanare gonondunge, muporofete Samwere.

13-15. (a) Yisinke Jehova ga tanterere Samwere a rugane? (b) Ngapi Samwere ga wapaikire mutjima gwaSauru kosirugana sendi sosipe? (Tara efano pepenuno 3.) (c) Morwasinke sihorokwa saSamwere sina karere nomulyo kovakuronambunga naina?

¹³ Nomvhura 3 000 da ka pita, Jehova kwa tanterere muporofete Samwere gokukurupa asi: “Mungura siruwo ngaseesi, ngani ku tumina mugara gemezimo lyaMbenyameni, ogu ngo gwaveka a kare mupangeli gombunga zaIsraeli.” (1 Samwere 9:15, 16) Samwere ga yi kwete egano asi age nokuvhura si hena kupangera muhoko gwaIsraeli ntani asi Jehova kwa mu harere a gwaveke ko mupitisili gomupe. Mokuwapaikira mugara gwina kositumbukira sosipe, Samwere kwa tulire po ewapaiko.

¹⁴ Ezuva lyokukwama ko, Samwere kwa ligwene naSauru ntani Jehova kwa tanterere muporofete asi: “Yige nye mugara ogu.” Poopo ngoso, Samwere ta rugana eyi ga liwapaikilire kurugana. Age kwa tulire po siruwo sokuzogera kumwe naSauru. Samwere kwa zigidire Sauru nomukareli gwendi va ka lye kumwe ntani ga mu pere sipundi sosiwa noruha rontumba zongwa po. Samwere kwa tente asi: “Lya, ezi kwa zi ku gusira ko asi o zi lye posiruwo seesi.” Konyima zokulya, Samwere kwa zigidire Sauru konzugo zendi.  Monzira zawo, awo kwa haferere nzogera kumwe. Apa va ka sikire konzugo zaSamwere, tava twikire kuzogera, makura Samwere ta “zarere Sauru kontara.” Ezuva lyokukwama ko, Samwere ta gwaveke Sauru, ta mu ncumwita nokumupa mavyukiso. Apa ga ka tengwire Sauru, age ana diva eyi na ka rugana.—1 Samwere 9:17-27; 10:1.

¹⁵ Samwere kwa gwavekere Sauru a kare mupitisili goVaisraeli. Yimo, eli kuna kara edeuro lya lisiga neli ava gwana vanavazinyetu mokuwapera vakuronambunga ndi vakwafimbunga. Nye vakuronambunga kuvhura va lirongere ko yininke yoyinzi monkedi omu Samwere ga wapaikire mutjima gwaSauru. Tu konakoneni nonkedi mbali.

16. (a) Ngapi Samwere ga lizuvhire apa Vaisraeli va mu pulire a va tulire mo hompa? (b) Yisinke Samwere ga rugene apa Jehova ga mu tanterere a gwaveke Sauru?

¹⁶ Kara neharo, wa ha likata-kata. Apa Samwere ga zuvhire asi Vaisraeli vana hara hompa gomuntu, age kwa lizuvhire asi vana mu nyoka ntani kwa guvire. (1 Samwere 8:4-8) Yikando yitatu Jehova ga tanterere Samwere asi ga hepa kupurakena kovantu morwa kapisi yige vana nyoka mouhompa. (1 Samwere 8:7, 9, 22) Nampili ngomu ga guvire, Samwere kapi ga fililire mfudu ndi a handukire mugara ogu ga mu pinganenene po mokupangera. Apa Jehova ga mu tanterere a gwaveke Sauru, Samwere kapi ga likata-katere. Age ga limburukwire, morwa kwa here Jehova.

17. Ngapi vakuronambunga naina ava honene Samwere, ntani ngapi omu ayi va kundama?

¹⁷ Naina, pana kara vakuronambunga wovanzi ava ava honene Samwere pokudeura wopeke monkedi zeharo. (1 Peturusa 5:2) Awo va kara neharo lyokuronga wopeke nokugava yitumbukira yawo yimwe yomombungakriste kowo vana kudeura. Awo kulizuvha asi vanavazinyetu owo ‘varugani kumwe nawo’ ava ngava va vatera kupakera mbili mbungakriste. (2 Vakolinte 1:24; Vahebeli 13:16) Ntani vakuronambunga owo kuhafa  pokumona owo vana kudeura kuna kuruganesa ediwo olyo mokuvatera vantu vaJehova.—Yirugana 20:35.

18, 19. Ngapi mukuronambunga na wapaika mutjima gogu ana kudeura, ntani morwasinke?

¹⁸ Kara kaume, kapisi murongi tupu. Apa Samwere ga ligwene naSauru, age ngano ga mu gwavekere poopo ngahompa pokumutjira magadi komutwe. Nye ngano kapi ga waperere kupitisira vantu vaKarunga. Samwere kwa gusire siruwo mokuwapaikira mutjima gwaSauru kositumbukira sendi sosipe. Komeho a ka gwaveke Sauru, awo kwa lire kumwe, nokugenda po kumwe, nokuzogera kumwe nokukamuzarera membo lyendi. Samwere kwa ndindilire siruwo souhunga mokugwaveka hompa gomupe.

¹⁹ Ayo ya lifana nanaina. Komeho zokutameka kudeura vanavazinyetugara, mukuronambunga ga hepa kutulisa po ukaume nawo. Eyi a rugana mukuronambunga mokuninka muntu ogo ana kudeura a lizuvhe emanguruko kwa lisiga komaukaro nonompo. Nye yi kare asi kupi wa tunga, nsene o gusa ko kosiruwo soge simwe esi o ruganesa koyininke yomulyo yipo o kare nogu ono kudeura, age ngayi dimburura asi wa mu hara. (Resa Varoma 12:10.) Yosili, owo ono kudeura ngava hafera eharo nepakero mbili eli ono kuvalikida.

20, 21. (a) Ngapi no singonona murongi gomuwa? (b) Yisinke ngatu ka zogera mosirongwa sokukwama ko?

²⁰ Murongi gomuwa kwa hara kudeura wopeke. Ntani ga hepa hena kuhara muntu ogu ana kudeura. (Hetakanesa Johanesa 5:20.) Morwasinke ya karera nomulyo? Morwa nsene ogu ono kudeura a dimburura asi wa mu hara, nga tambura edeuro lyoge. Vakuronambunga, kondjeni mokudira tupu kukara varongi nye hena vakaume wovawa.—Yisewe 17:17; Johanesa 15:15.

²¹ Konyima zokuwapaika mutjima gogu ana kudeura, mukuronambunga kuvhura a tameke kugava edeuro. Nonkedi musinke mukuronambunga na ruganesa? Ngava ka di zogera mosirongwa sokukwama ko.