1. (a) Yisinke vantu vaKarunga va diva kuhamena edeuro, ntani ngapi yina lifana nanaina? (b) Yisinke natu ka zogera mosirongwa esi?

VANTU vaKarunga va yi diva asi edeuro kureta uwa. Pasihonena, Abirahamu kwa wapaikire ‘vagara vendi ava va yombera’ ndi va deura va ka zowore Roto. (Genesis 14:14-16) Vadimbi womomazuva gaNdafita ‘kwa kere nonkurungu’ ndi va deura kudimba nonsumo dokuhamberera Jehova. (1 Histoli 25:7) Naina, twa hepa kurwanesa Satana nouzuni wendi. (Vaefeso 6:11-13) Ntani hena twa hepa kulitura mo kuhamberera Jehova pokutantera ko wopeke edina lyendi. (Vahebeli 13:15, 16) Ngwendi vakareli vaKarunga vanare, mokututompoka, twa hepa edeuro. Mombungakriste, Jehova kwa gava kovakuronambunga situmbukira sokudeura wopeke. (2 Timoteusa 2:2) Ngapi vakuronambunga vamwe va deura vanavazinyetugara yipo va pakere mbili vantu vaJehova?

2. Yisinke na rugana mukuronambunga komeho a deure munazinyetugara, ntani morwasinke?

² Mosirongwa sa ka pita, twa lirongere omu mukuronambunga va mu hetakanesa komunasikunino. Komeho  zokukuna nombuto, munasikunino kuvhura a gwede mboresa kevhu yipo yimeno ngayi kure nawa nokupama. Mokulifana, komeho mukuronambunga a deure munazinyetugara, kuvhura a zogere nendi nompango domoBibeli edi nadi mu vatera a kare neharo lyokusikisa mo eyi ana kulironga.—1 Timoteusa 4:6.

3. (a) Ngapi nonkango daJesus domwaMarukusa 12:29, 30 no di ruganesa mokuzogera nogu ono kudeura? (b) Ngapi ekanderero lyoge nali mu kundama?

³ Ayo ya kara nomulyo kukwata egano omu usili wa kundama magazaro nomalizuvho gogu ono kudeura. Mokuyirugana oyo, kuvhura kumupura omu eligawo lyendi kwaJehova lya kundama matokoro gendi meparu. Epuro olyo kuvhura kutwaredesa konzogera omu natu karera Jehova nomutjima nagunye. (Resa Marukusa 12:29, 30.) Kuvhura hena o kanderere nogu ono kudeura pokuhundira Jehova a mu pe mpepo zokupongoka mokumuvatera kedeuro lyendi. Nsene ogu ono kudeura a zuvha omu ono kumukanderera po, ngayi mu korangeda a liture mo unene.

4. (a) Gava yihonena yomoBibeli eyi nayi vatera ogu ono kudeura a ture po ezokomeho. (b) Sitambo musinke va hepa kukara naso vakuronambunga pokudeura wopeke?

⁴ Komeho o tameke kugava edeuro, ya wapa kuzogera nage yihorokwa yomoBibeli eyi nayi mu vatera a dimburure mulyo gokukara neharo lyokuvatera nokukara gokuhuguvara ntani gokulinunupika. (1 Vahompa 19:19-21; Nehemiya 7:2; 13:13; Yirugana 18:24-26) Yikara eyi mulyo unene ngwendi mboresa kevhu. Ngayi vatera ogu ono kudeura a ture po ezokomeho. Jean-Claude, mukuronambunga gomoFransa kwa tanta asi sitambo sendi kuna kara sokuvatera ogu ana kudeura a ture po matokoro kuliza nonompango doBibeli. Age kwa tanta asi: “Ame kupapara nompito dokuresa kumwe nendi etjangwa ni ‘mahure meho’ gendi a kwate egano ‘yitetu ndi uwa’ womoNonkango daKarunga.” (Episarome 119:18) Nonkedi musinke dimwe nadi nkondopeka ogu ono kudeura?

5. (a) Morwasinke ya karera nomulyo kuzogera nogu ono kudeura kuhamena yitambo yendi mosirugana saJehova? (b) Morwasinke vakuronambunga nava dewira vanona? (Tara nonkango dokonhi.)

⁵ Pura ogu ono kudeura yitambo yendi mosirugana saJehova. Nsene kapi ga kara noyitambo, mu vatera a litulire po yimwe eyi na vhura kusikisa mo. Mu tantera noruhafo  sitambo esi wa kere naso ntani nomu wa lizuvhire apa wa si sikisire mo. Nkedi ezi nderu nye kutompoka. Victor, mukuronambunga ntani muzuvhisi gokukarerera gomoAfrika, kwa tanta asi: “Apa na kere munona, mukuronambunga kwa pulire nge mapuro gongandi kuhamena yitambo yange. Mapuro ogo kwa vaterere nge ni tameke kugazadara ko unene kosirugana sange sokuzuvhisa.” Vakuronambunga va kara noudivi kwa tanta asi mulyo kudeura vanavazinyetugara awo simpe vadinkantu ndi vanona. Kuvhura kuvapa yirugana yimwe mombungakriste kuliza nonomvhura dawo. Nsene va gwana edeuro awo simpe vanona, ngayi va vatera va demenene koyitambo yawo nampili va ya kure nokukara nomadonganeso gomanzi.—Resa Episarome 71:5, 17. *

6. Nkedi musinke ga ruganesere Jesus mokudeura wopeke?

⁶ Mokukorangeda ogu ono kudeura a liture mo, kapi ya gwanena po tupu kumutantera eyi na rugana. Wa hepa hena kumufatwilira eyi ya karera nomulyo kuyirugana. Murongi goMunene, Jesus kwa tanterere vapositoli vendi va zuvhise. Nye pomuhowo kwa geve konda zeyi nava yi  ruganena. Age kwa tente asi: “Nonkondo nadinye demeguru, nedi depevhu nyame va di pa. Yipo nye nomu zira konomuhoko nadinye, mu ka di ninke di kare varongwa vange.” (Mateusa 28:18, 19) Ngapi omu no honena nkedi zaJesus zokudeura?

7, 8. (a) Ngapi vakuronambunga ava honene nkedi zaJesus zokudeura? (b) Morwasinke ya karera nomulyo kupandadeka muntu? (c) Magano musinke naga vatera vakuronambunga mokudeura wopeke? (Tara kakende “ Omu no deura wopeke.”)

⁷ Nsene to pura munazinyetugara a rugane yininke yimwe, mu fatwilira kutundilira moBibeli eyi sirugana oso sa karera nomulyo. Pokurugana ngoso, ngo mu ronga a rugane yininke morwa nompango doBibeli kapisi noveta tupu. Pasihonena, nsene o pura munazinyetugara a zerese nokuwapeka nawa pevero lyoSinyanga soUhompa, kuvhura o mu likide Titusa 2:10. Mu fatwilira omu sirugana oso nasi ninkisa mbudi zoUhompa va zi tambure. Nzogera zangesi ngazi mu vatera a gazare unene kuhamena vantu kupitakana noveta. Nsene a mona omu vanavazinyetu vana kugwanena mo uwa mosirugana sendi, ngayi mu hafesa morwa kuna kuruganena vakwawo.

⁸ Ntani, mu pandadeka kokusikisa mo sirugana esi ono mu pe. Morwasinke ya karera nomulyo? Ngomu tupu mema aga vatere simeno si kure nokukanguka, epandadeko kuvatera muntu a ture po ezokomeho mosirugana sendi kwaJehova.—Hetakanesa Mateusa 3:17.

9. (a) Morwasinke ayi digopere vakuronambunga womoyirongo youngawo mokudeura wopeke? (b) Morwasinke kukarera Karunga kwa dilire kukara muhowo meparu lyovadinkantu vamwe?

⁹ Vakuronambunga womoyirongo youngawo kuvhura yi va digopere kukorangeda vanavazinyetugara wonomvhura dokoyiha 20 ndi 30 ngoso, va rugane unene mombungakriste. Vakuronambunga vamwe womoyirongo yokusika konyara 20 kwa uyungire eyi vadinkantu vamwe ava dilire kurugana unene mombungakriste. Sinzi sawo kwa tanta asi vadinkantu owo apa va kere vanona, vakurona vawo kapi va va korangedere mokulitulira po yitambo mosirugana saJehova. Ntani apa vadinkantu vamwe va here kurugana unene mombungakriste, vakurona vawo kwa va korangedere va litulire po yitambo yokuza komalirongo gokuzeruka ndi va gwane mfumwa mouzuni. Yipo nye kukarera Karunga kapi kwa kere muhowo meparu lyawo.—Mateusa 10:24.

10, 11. (a) Ngapi mukuronambunga na vatera kanunu-kanunu munazinyetu a rundurure magazaro gendi? (b) Matjangwa musinke na ruganesa a gume mutjima, ntani morwasinke? (Tara nonkango dokonhi.)

¹⁰ Nsene munazinyetugara kwato eharo lyokurugana unene mombungakrisste, ayo kugusa siruwo ntani nelididimiko mokurundurura magazaro gendi, nye kuvhura yi tompoke. Munasikunino kuvhura a vatere simeno si kure kuvyukilira pokusivyukisa kanunu-kanunu. Mokulifana, kuvhura o vatere kanunu-kanunu munazinyetugara a dimburure asi ga hepa kurundurura magazaro gendi kuhamena kukara noyitumbukira mombungakriste. Monkedi musinke?

¹¹ Tulisa po ukaume kumwe nage. Mu vatera a dimburure asi mbungakriste za mu hepa. Mwaza siruwo, zogera nage nokonda domomatjangwa edi nadi mu vatera a gazadare ko keligawo lyendi kwaJehova. (Muudisi 5:4; Jesaya 6:8; Mateusa 6:24, 33; Rukasa 9:57-62; 1 Vakolinte 15:58;  2 Vakolinte 5:15; 13:5) Hetekera ko kuguma mutjima gwendi pokumupura mapuro ngwendi asi: ‘Yisinke wa tumbwilire Jehova apa wa ligeve kwendi? Ngapi ono kugazara ga lizuvhire Jehova apa wa gwene ekuho?’ (Yisewe 27:11) ‘Ngapi omu ga lizuvhire Satana?’ (1 Peturusa 5:8) Matjangwa gangoso, kuvhura ngaga gume mutjima gwendi.—Resa Vahebeli 4:12. *

12, 13. (a) Nkareso musinke ga likidire Elisa? (b) Ngapi Jehova ga mu tungikire morwa ulimburukwi wendi?

¹² Vadinkantu wovagara, evatero lyeni kuna lihepa mombungakriste! Nkareso musinke ngazi ku vatera yi ku tompoke mosirugana soge kwaJehova? Mokugwana elimbururo, tatu ka zogera yihorokwa yimwe yemeparu lyaElisa.

¹³ Konyara nomvhura 3 000 da ka pita, muporofete Eliya kwa zigidire mudinkantu Elisa a kare mukwafi gwendi. Elisa kwa tambwire ezigido olyo poopo nokurugana sirugana sokukwafa muporofete noulimburukwi. (2 Vahompa 3:11) Eliya kwa dewire Elisa konyara nomvhura ntazimwe. Makura apa sirugana saEliya moIsraeli sa kere pepi nokuhaga, age kwa tanterere mukwafi gwendi a hageke kumukwafa. Nye yikando yitatu Elisa kwa tente asi: “Kapisi nyame nani ku siga.” Age kwa tokomenene kukara kumwe nomudeuli gwendi. Ano Jehova ga tungikire Elisa morwa ulimburukwi wendi pokumupulisira a mone omu Eliya lina kumutwara ekundungu.—2 Vahompa 2:1-12.

14. (a) Ngapi ogu vana kudeura na honena Elisa? (b) Morwasinke ya karera nomulyo kogu vana kudeura a limburukwe?

¹⁴ Ngomu vana kukudeura, ngapi no honena Elisa? Genderera kutambura yirugana, nampili eyi ayi moneka ngwendi kwato mulyo. Dirowoka asi mudeuli goge yige kaume koge. Mu pandura kweyi ana kukuvatera, ntani mu likida asi ono hara kutwikira kulirongera ko kwendi. Unene po, kara mulimburukwi mokusikisa mo sirugana soge. Morwasinke? Nsene o yi likida asi o mulimburukwi ntani kukuhuguvara tupu, vakuronambunga ngava kara nehuguvaro asi Jehova ana hara kukupa yitumbukira yoyinzi mombunga.—Episarome 101:6; resa 2 Timoteusa 2:2.

15, 16. (a) Mononkedi musinke Elisa ga likidire efumadeko komudeuli gwendi? (Tara efano pepenuno 9.) (b) Morwasinke vaporofete vakwawo va huguvarere Elisa?

¹⁵ Sihorokwa saElisa kulikida hena asi mulyo kovanavazinyetu mokufumadeka vakuronambunga. Konyima zapa Eliya naElisa va ka dingwire mbunga zovaporofete moJeliko, vagara ava vavali kwa wizire komukuro gwaJorodana. “Eliya makura erwakani lyendi, ta li gonyo, makura ta li toona pomema. Mema makura taga litavagana.” Makura tava vindakana Jorodana va gende poukukutu, “oku tava uyunga.” Elisa kwa purakenene nawa kweyi ga uyungire Eliya ntani nokutwikira kulirongera ko kwendi. Elisa kapi ga lizuvhire asi ga divire nayinye. Eliya yipo lya mu twere ekundungu, ano Elisa ta tengura komukuro gwaJorodana. Elisa ta gusa erwakani lyaEliya ta li toona pomema, ta tanta asi:  “HOMPA Karunga gwaEliya gupi?” Makura mema gomomukuro taga litavagana.—2 Vahompa 2:8-14.

¹⁶ Ono koneke asi sitetu sokuhova saElisa kwa lifana nositetu saEliya sokuhulilira ndi? Yisinke yina kuturonga eyi? Elisa kapi ga lizuvhire asi morwa ngesi ana kara nononkondo, makura ga hepere kurugana yininke monkedi zokulisiga nezi zaEliya. Nye pokuhonena nkedi zaEliya, Elisa kwa likidire asi ga fumadekere mudeuli gwendi, ano eyi kwa vaterere vaporofete vakwawo va mu huguvare. (2 Vahompa 2:15) Elisa kwa kere muporofete nomvhura 60, ntani Jehova ga mu pere nonkondo dokurugana yitetu yoyinzi kupitakana eyi ga rugene Eliya. Yisinke nava lirongera ko ava vana kudeura naina?

17. (a) Ngapi ava vana kudeura nava honena nkareso zaElisa? (b) Mwaza siruwo, ngapi Jehova nga ruganesa valimburukwi ava vana kudeura?

¹⁷ Nsene o gwana yitumbukira yoyinzi mombungakriste, wa ha lizuvha asi wa hepa kurugana yininke monkedi zokulisiga nezi ngava yi rugana nare. Diworoka asi konda zomarunduruko kuna kara morwa mbungakriste za ga hepa ndi morwa evyukiso lyokombunga zaJehova. Wa ha tura po marunduruko morwa yimo ono yi harere. Pokuruganesa nkedi zaEliya, Elisa kwa vaterere vaporofete vakwawo va mu huguvare ntani va likide efumadeko komudeuli gwendi. Mokulifana, nsene o ruganesa ngendeseso zomoBibeli zomudeuli goge, ove ngo likida efumadeko kovakuronambunga, ntani vanavazinyetu navenye ngava ku huguvara. (Resa 1 Vakolinte 4:17.) Ngomu ngo kara noudivi, ove ngo sikisa mo marunduruko aga ngaga vatera mbungakriste zi kwame mbunga zaJehova, ezi zina kugenderera kuza komeho. Mwaza siruwo, Jehova nga ku vatera o rugane yirugana yoyinene kupitakana mudeuli goge, ngwendi Elisa.—Johanesa 14:12.

18. Morwasinke yina karere nomulyo kudeura vanavazinyetugara mombungakriste?

¹⁸ Tuna si huguvara asi magano gomosirongwa esi nesi sa ka pita, ngaga tumangeda vakuronambunga wovanzi va litulire po siruwo sokudeura wopeke. Ntani vanavazinyetugara wovanzi vana kara neharo lyokuvadeura nokuruganesa eyi vana kulironga yipo va pakere mbili vantu vaJehova. Edeuro eli ngali nkondopeka nombungakriste mouzuni mudima ntani ngali tu vatera tu kare valimburukwi posiruwo soudigu esi sina kuwiza.