1. Morwasinke twa hepera kunkondopeka elikwatakano lyetu naJehova?

NSENE wa gwana ekuho ngagumwe goNombangi daJehova, ngoso wa kara nougawo womulyo. Ove wa kara nelikwatakano naJehova. Nye Satana kudonganesa elikwatakano olyo ntani kudira kusikilira mo kwetu nako kuvhura kuninkisa elikwatakano olyo li dire kupama. Eyi yiyo twa hepera kukondja mokunkondopeka elikwatakano lyetu naJehova.

2. (a) Yisinke elikwatakano? (Tara nonkango dokonhi.) (b) Ngapi natu nkondopeka elikwatakano lyetu naJehova?

² Ove kutara Jehova ngoMuntu ndi? Ove kulizuvha asi age Kaume koge ndi? Ono hara elikwatakano lyoge nendi li nkondopare ndi? Jakopo 4:8 kwa tanta asi: “Hedeni Karunga pepi, nage a mu hede pepi.” Elikwatakano lyoge  naJehova kwa hamena mo nyaamoge ntani nage. * Nsene o rugana ko yuma mokuhedera Jehova pepi, nage nga ku hedera pepi. Ngomu ngo twikira kuyirugana eyi, yimo nga kara ngomuntu koge ntani elikwatakano lyoge nendi ngali nkondopara makura ngo lizuvha moomu ga lizuvhire Jesus ogu ga tente asi: “Ogu ga tuma nge, yige munasili,” ntani “ame na mu diva.” (Johanesa 7:28, 29) Nye yininke musinke yimwe wa hepa kurugana mokuhedera Jehova pepi?

3. Ngapi no uyunga kumwe naJehova?

³ Nsene ono hara kuhedera Jehova pepi, ya kara nomulyo asi nove naJehova mu uyunge nkenye apa kumwe. Monkedi musinke? Gazara omu nove nakaume koge gokoure nomu vhura kuuyunga kumwe. Kuvhura mu litjangere nkenye apa nokuuyunga koterefona. Ove kuuyunga naJehova apa o kanderere kwendi nkenye apa. (Resa Episarome 142:2.) Nye ngapi no pulisira Jehova a uyunge nove? Eyi kuyirugana apa o resa nonkango dendi, Bibeli, ntani nokuteda ko nkenye apa. (Resa Jesaya 30:20, 21.) Ngesi tatu ka zogera omu euyungokumwe pokatji koge naJehova na li nkondopeka elikwatakano lyoge nendi ntani a kare sili Kaume koge.

4, 5. Pokulironga Bibeli, ngapi omu Jehova a uyunga nove? Gava sihonena.

⁴ Ose twa diva asi Bibeli kuna kara mbudi zaKarunga kwanavenye. Nye kuvhura Bibeli zi ku vatere o hedere Jehova pepi ndi? Kuvhura. Ngomu ono kuresa Bibeli nokuzilironga, hetekera ko kukwata egano omu ono kulizuvha kweyi ono kuresa. Ntani gazadara ko omu no sikisa mo eyi ono kulironga. Pokurugana ngoso, to pulisire Jehova a uyunge nove. Age nga kara Kaume koge gomunene ogu nga ku vatera, ntani nokumuhedera pepi.—Vahebeli 4:12; Jakopo 1:23-25.

⁵ Pasihonena, ngapi o lizuvhu apa o resa nonkango daJesus edi asi: “Walye omu lipongaikire emona pevhu”? Nsene asi ove kukondja mokutura muhowo Jehova  meparu lyoge, ngo lizuvha asi age ana ku hafere. Ntani hena pokuresa nonkango edi ngo dimburura asi wa hepa kurerupika eparu lyoge mokukarera Karunga. Monkedi zangoso, Jehova kuna kukuvatera o kwate egano eyi no rugana mokumuhedera pepi.—Mateusa 6:19, 20.

6, 7. (a) Pokulironga Bibeli, yisinke ayi horokere eharo lyetu kwaJehova ntani eharo lyendi kwetu? (b) Yisinke sitambo setu sosinene seyi atu lirongere Bibeli?

⁶ Apa atu lirongo Bibeli, ose kudimburura marunduruko aga twa hepa kutura po mokukarera nawa Jehova. Ntani hena kulironga yininke yoyiwa eyi a rugana noyikara yendi yoyiwa, ano eyi kutuninkisa tu mu hare unene. Ngomu tuna kumuhara unene, nage nga tu hara unene makura elikwatakano lyetu nendi nga li pama.—Resa 1 Vakolinte 8:3.

⁷ Nsene tuna hara kuhedera Jehova pepi, ya kara nomulyo kulironga Bibeli nositambo souhunga. Jesus kwa tente asi: “Mwenyo gwanarunye yigo ogu asi va ku dive asi nyovelike Karunga gosili, nogu wa tuma, Jesus Kristusa.” (Johanesa 17:3) Kuvhura tu dive yininke yoyinzi yoyipe pokulironga Bibeli, nye sitambo setu sosinene sa hepa kukara sokudiva nawa Jehova ngoMuntu.—Resa Exodus 33:13; Episarome 25:4.

8. (a) Ngapi ono kulizuvha kuhamena eyi ga rugene Jehova kwaAsaliya? (b) Nsene asi wa diva Jehova, ngapi ngo lizuvha kweyi a rugana?

⁸ Apa atu diva asi Jehova Kaume gomunene, ose kapi atu kara nomasinganyeko nampili Bibeli kapi za faturura eyi a ruganene yininke monkedi zongandi. Pasihonena, apa Asaliya ga kere hompa gwaJuda, vantu ngava karere vakarunga woyimpempa. Asaliya kapi ga lipakerere nawo. “Age kwa kwamene sihonena soguhwe, ta rugana yokuhafesa HOMPA.” (2 Vahompa 15:1-5) Nye Jehova kwa zugumine Asaliya yingondwe. Morwasinke? Kapi va yi faturura asi morwasinke. Ngapi omu o lizuvhu kuhamena kweyi ga rugene Jehova? Ayo kukuninkisa o lipure asi Jehova kapi ga hungikire pokutengeka Asaliya pwa hana konda zongwa ndi? Hawe. Nsene asi wa diva nawa Jehova, ove wa diva asi episuro lyendi kwa hungama. Age nkenye apa kupisura “mouhunga.” (Jeremiya 30:11) Nampili ngomu no dira kudiva eyi Jehova ga tengekerere Asaliya, nye wa yi diva asi eyi ga rugene Jehova uhunga.

9. Yisinke nayi tu vatera tu kwate egano eyi Jehova ga zuguminine Asaliya yingondwe?

⁹ Bibeli kutupa mauzera gamwe gomanzi kuhamena eparu lyahompa Asaliya, ogu ga divikwire asi hompa Usiya. (2 Vahompa 15:7, 32) Esanseko lyomo-2 Histoli 26:3-5, 16-21 kwa tanta asi age kwa rugene “eyi ngayi hafesa HOMPA.” Nye kwa tanta hena asi konyima ‘ga ya litumbire.’ Hompa kwa rugene eyi ya tumbukilire vapristeli. Vapristeli nomurongo ntantatu nagumwe kwa mu keve asi eyi ana kurugana epuko nye kapi ga va purakenene. Ngapi ga lizuvhire? Morwa elinenepeko, age kwa va handukilire. Mauzera aga kutuvatera tu kwate egano eyi Jehova ga zuguminine Asaliya yingondwe.

10. Morwasinke natu dilira kuhepa kudiva nokonda kwanayinye eyi a rugana Jehova? Yisinke nayi tu ninkisa tu huguvare asi nkenye eyi a rugana Jehova uhunga?

¹⁰ Yisinke natu lirongera ko?  Mesanseko lyahompa Asaliya, tuna gwana mo mauzera gokugwanena po aga naga tu vatera tu kwate egano eyi Jehova ga mu tengekerere. Nye ngapi nsene asi Bibeli kapi za gava mauzera nagenye, ngapi ngo lizuvha? Ngo kara nomasinyeko nsene asi Jehova ga rugene youhunga ndi? Ndi ngo lizuvha asi Bibeli za kupa mauzera gokugwanena po mokuhuguvara asi Karunga nkenye apa kurugana youhunga? (Deuteronomium 32:4) Moomu ono kudiva nawa Jehova ngoMuntu, yimo ngo mu hara nokumuhuguvara. Ntani kapi ngo hepa kudiva nokonda kwanayinye eyi a rugana. Moomu ono kulironga Bibeli, yimo Jehova nga kara ngomuntu koge ntani ngo mu hedera pepi.—Episarome 77:12, 13.

11-13. Ngapi ono yi diva asi Jehova kupurakena makanderero? (Tara efano pepenuno 15.)

¹¹ Apa atu kanderere, ose kuhedera Jehova pepi. Ose kumuhamberera nokumupandura ntani nokumuhundira evatero. (Episarome 32:8) Nye mokuninka asi o kare kaume gomunene gwaJehova, wa hepa kuyipura asi age kuzuvha makanderero.

¹² Vantu vamwe kuuyunga asi Karunga kapi a purakene komakanderero ntani asi ekanderero kuna kara tupu sininke esi nasi ku ninkisa o lizuvhe ko hansa. Awo kwa yi pura asi makanderero kukuvatera o gazadare ko nawa komaudigu goge ntani o gwane ekohononopo. Yimo, ekanderero kuvhura li ku vatere mononkedi odo.  Nye apa o uyunga naJehova mekanderero, age kukupurakena. Ngapi omu ono yi diva?

¹³ Gazadara ko: Komeho Jesus a wize pevhu, age kwa mwene Jehova kuna kulimburura makanderero govakareli vendi vepevhu. Apa ga kere pevhu, Jesus kwa kanderere koGuhwe vemeguru kuhamena magazaro nomalizuvho gendi. Sikando simwe, age kwa kanderere masiku mudima. (Rukasa 6:12; 22:40-46) Jesus ngano ga yi rugene oyo nsene ga divire asi Jehova kapi a purakene makanderero ndi? Jesus ga rongere hena vasikuli vendi omu nava kanderera kwaJehova. Ngano Jesus ga yi rugene oyo nsene ga divire asi Jehova kapi a purakene makanderero ndi? Jesus ga divire asi Jehova kupurakena makanderero. Age kwa tente asi: “Tate, tani ku pandura, morwa yeeyi ono zuvhu nge. Na yi diva asi, ove kuzuvha nge nkenya apa.” Nose kuvhura tu kare nehuguvaro asi Jehova kupurakena makanderero getu.—Johanesa 11:41, 42; Episarome 65:2.

14, 15. (a) Ngapi natu gwanena mo uwa pokuvyukilira kutumbura yininke mekanderero? (b) Ngapi makanderero ga vatera Kathy a hedere Jehova pepi?

¹⁴ Pamwe kuvhura o dire kudimburura asi makanderero goge vana ga limburura. Nye nsene o vyukilira kutumbura yininke momakanderero goge, ngo dimburura malimbururo gaJehova komakanderero goge, ntani nga kara ngoMuntu koge. Nsene o tantera Jehova nayinye eyi ono kara nayo nosinka, age nga hedera pepi nove.

¹⁵ Pasihonena, Kathy rorunzi nga zi mokuzuvhisa nye kapi nga yi hafere. *  Age kwa tente asi: “Ame kapi ngani hafere kuzuvhisa. Yosili, kapi ngani hafere kuzuvhisa.” Apa ga hagekere yirugana yendi, mukuronambunga kwa mu korangedere a kare muzuvhisi gokukarerera. Age kwa tente asi: “Age kwa pere nge foroma zehundiro. Makura yipo na tokwere kurugana uzuvhisi wokukarerera, nokukanderera kwaJehova a vatere nge ni hafere sirugana sokuzuvhisa.” Jehova ga limbwilire ekanderero lyendi ndi? Konyima zokurugana uzuvhisi wokukarerera nomvhura ntatu, age kwa tanta asi: “Morwa kukara siruwo sosire mokuzuvhisa nokulirongera ko kovanavazinyetu vamwe, ame kwa wapurukurura nkedi zange zokuzuvhisa. Nampili ngomu na dira kuhafera kuzuvhisa nye na hara kuzuvhisa. Elikwatakano lyange naJehova lina nkondopara kupita pwanare.” Makanderero gaKathy kwa mu vaterere a hedere Jehova pepi.

16, 17. (a) Yisinke natu rugana mokunkondopeka elikwatakano lyetu naJehova? (b) Yisinke ngatu ka zogera mosirongwa sokukwama ko?

¹⁶ Kuvhura tu twikire kuhedera Jehova pepi dogoro narunye. Tu twikire kupurakena kwendi pokulironga Bibeli nkenye ezuva nokuuyunga nendi mekanderero. Nsene tu yi rugana, elikwatakano lyetu naJehova nga linkondopara ntani ngatu lididimikira maudigu.

¹⁷ Nye poyiruwo yimwe ose kukondja nomaudigu, nampili ngomu a tu twikire kukanderera kwaJehova. Poyiruwo yangoso, kuvhura tu zumbanese ehuguvaro lyetu mwaJehova. Kuvhura tu lizuvhe asi kapi ana kuzuvha makanderero getu ntani nokukara nomasinganyeko nsene asi ose sili vakaume vendi. Nsene no tameka kulizuvha ngoso, yisinke no rugana? Sirongwa sokukwama ko ngasi ku vatera.