Nomvhura dononzi, yimbapiratjangwa yetu kwa fatwilire asi edina Gogo zaMagogo kwa tamba kwaSatana konyima zapa va mu zuguma mo meguru. Morwasininke? Morwa buke zEhororo kwa singonona Satana ngomupitisili gwava ngava homokera vantu vaKarunga. (Ehororo 12:1-17) Makura twa yi kwete egano asi Gogo kwa kere edina limwe lyaSatana.

Nye pwa kara udigu wongandi kefatururo eli. Gazara kuhamena eyi: Apa ava uyunga kuhamena ezonaguro lyaGogo, Jehova kwa tanta asi age nga ninka Gogo a “kare nondya doyidira nayinye noyikasama yomowiza.” (Hesekiyeli 39:4) Jehova kwa gweda ko asi: “Apa ngayi horoka eyi, ame ngani gava kwaGogo evhu lyokuvhumbika moIsraeli.” (Hesekiyeli 39:11) Nye ngapi omu Satana sisitwa sopampepo esi asi dili kumoneka ngayi si lya yidira noyikasama yomowiza? Ngapi omu ngava mu vhumbika pevhu? Bibeli za yi zeresa asi Satana ngava mu zugumina mosirongo sokonhi nga kare mo nomumvho 1 000. Age kapi ngayi mu lya yidira ndi va mu vhumbike.—Ehororo 20:1, 2.

Bibeli kutanta asi kehagero lyonomumvho eyovi, Satana ngava mu mangurura mo monomango, ntani “nga za a ka pukise yirongo eyi ya kara komaruha gane gouzuni, oGogo naMagogo. Satana ta ka va pongaikira yita.” (Ehororo 20:8) Nsene asi Satana yige Gogo, eyi kutanta asi Satana nga hepa kulipukisa mwene ndi? Yosili, “Gogo” va tumbura mobuke zaHesekiyeli ndi zEhororo kapi va tamba Satana.

Yilye Gogo zaMagogo? Mokugwana elimbururo, twa hepa kurugana epaparo moBibeli tu gwane ogu nga homona vantu vaKarunga. Bibeli kwa tumbura ehomono ‘lyaGogo gomosirongo saMagogo,’ nehomono lyahompa ‘gokoMuzogo,’ ntani neli ‘lyohompa vepevhu.’ (Hesekiyeli 38:2, 10-13; Ndaniyera 11:40, 44, 45; Ehororo 17:14; 19:19) Ogo kuna kara mahomono gokulisiga ndi? Hawe. Eyi kumoneka asi Bibeli kwa ruganesa madina gokulisiga mokusingonona ehomono lyokulifana. Morwasinke tuna kuuyungira ngoso? Morwa Bibeli kututantera asi nomuhoko nadinye depevhu ngadi lihameka mehomono eli lyokuhulilira eli ngali tameka poyita yaHarumagedoni.—Ehororo 16:14, 16.

Nsene tu hetakanesa maumbangi nagenye ogo  gomoBibeli kuhamena ehomono lyokuhulilira lyovantu vaKarunga, yina zere asi edina Gogo zaMagogo kapi va tamba Satana. Nye Gogo zaMagogo kwa tanta kombunga zonomuhoko. Ngoso hompa gokoMuzogo yige nga pitisira mbunga ezi ndi? Kapi tuna diva. Nye efatururo eli kumoneka asi kwa liza neyi ga uyunga Jehova kuhamena Gogo asi: “Ove ngo katuka o tunde kevega lyoge koure oko koMuzogo, o pitisire mbunga zonene zovakwayita wononkondo womonomuhoko dononzi, awo navenye kononkambe.”—Hesekiyeli 38:6, 14, 15.

Mokulifana, muporofete Ndaniyera, ogu ga parukire posiruwo simwe naHesekiyeli, kwa uyunga kuhamena hompa gokoMuzogo asi: “Mbudi ezi ngazi tunda koUpumezuva nokoMuzogo ngazi mu tjilisa makura ta ru unene, a dipage vantu wovanzi. Age nga tomeka notenta dendi dosiuhompa pokatji kefuta nondundu apa za kara ntembeli. Nye nga fa, apo pwa hana kukara gokumukwafa.” (Ndaniyera 11:44, 45) Eyi ya lifana neyi za uyunga buke zaHesekiyeli eyi nga rugana Gogo.—Hesekiyeli 38:8-12, 16.

Yisinke nga yi horoka konyima zehomono lyokuhulilira? Ndaniyera kutanta asi: “Posiruwo oso muengeli gomunene Mikayera [Jesus Kristusa], ogu a gamene vantu woge [kutundilira 1914] ta horoka [poHarumagedoni]. Makura tapa kara siruwo somaudigu [soudigu wounene], sosidona unene esi sa dira kukara po rumwe, hada tamekera kukara po nomuhoko. Apa nye ngasi wiza oso siruwo, makura vantu navenye womomuhoko goge womadina aga va tjangera mobuke zaKarunga, tava va parura.” (Ndaniyera 12:1) Ose kuresa esingonono lyokulifana kuhamena eyi nga rugana Jesus mEhororo 19:11-21.

Nye yilye ‘Gogo naMagogo’ va tumbura Ehororo 20:8? Edina eli kwa tamba kwanavenye ava ava rwanesa Jehova nokuhomokera vantu vendi posiruwo seheteko lyokuhulilira kehagero lyonomumvho 1 000. Awo ngava kara nonyengo ngwendi Gogo zaMagogo, nomuhoko edi ngadi homokera vantu vaKarunga kehagero lyoudigu wounene. Ntani ngwendi nomuhoko odo ngava zonagura poHarumagedoni, Gogo naMagogo nage ngava mu zonagura po. (Ehororo 19:20, 21; 20:9) Ayo kumoneka asi navenye ava ngava ka rwanesa kehagero lyonomumvho 1 000 ngava va tumbura asi ‘Gogo naMagogo.’

Ngovalirongi woBibeli, ose tuna hara kudiva ogu nga kara ‘hompa gokoMuzogo.’ Yi kare asi yilye ogu nga pitisira nomuhoko mokuhomona vantu vaKarunga, ose tuna kara nehuguvaro kuhamena yininke eyi yivali: (1) Gogo zaMagogo novakwayita vendi ngava va funda nokuvazonagura po. (2) Hompa gwetu, Jesus Kristusa, nga popera vantu vendi nokuvatwara mouzuni woupe wombili wompora.—Ehororo 7:14-17.