1. Evhuliko musinke nali tu vatera tu honene Jehova?

JEHOVA kwa tu sita nevhuliko lyokukwata egano omu ava lizuvhu wopeke, nampili kapi tuna kara moukaro wawo. (Resa Vaefeso 5:1, 2.) Ngapi omu evhuliko eli nali tu vatera tu honene Jehova? Morwasinke twa hepera kutakamesa omu atu ruganesa evhuliko eli?

2. Ngapi ali zuvhu Jehova apa atu hepa?

² Jehova kwa tu tumbwidira meho zongwa za hana maudigu. Vagwavekwa “nononzwi dapeke” kuna kundindira eparu lyanarunye yi kare asi meguru ndi pevhu. (Johanesa 10:16; 17:3; 1 Vakolinte 15:53) Nye Jehova kukwata egano kukora oku atu lizuvhu apa ayi tu horokere yininke yoyidona. Pwanare, Jehova kwa lizuvhire kukora apa vantu vendi va hepere moEgipite. Age kwa ‘mu zuvhisire ruhodi rorunene.’ (Jesaya 63:9, 10) Konyima, apa vantu vendi va tungwilire ntembeli ntani nokutjira nonkore dawo, Jehova ga kwete egano omu va lizuvhire. Age kwa va tanterere  asi: “Nkenye ogu ana kumuguma, ta gumu eyi yondiro po zonene kwange.” (Sakaliya 2:8) Ngomu tupu zinya a dili kudivara mukeke gwendi, Jehova nage kapi a divara vakareli vendi ntani kwa hara kuvavatera. (Jesaya 49:15) Apa atu hetekere ko kukwata egano omu vana kulizuvha wopeke, ose ngoso kuna kuhonena eharo lyaJehova.—Episarome 103:13, 14.

3. Ngapi Jesus ga lizuvhire kuhamena vantu apa ga va mwene kuna kuhepa?

³ Jesus ga kwete egano omu ava lizuvhu vantu nsene kuna kuhepa, nampili ngomu ga dilire kukara moukaro wawo. Pasihonena, age ga divire asi wovanzi kuparuka noudigu. Vampitisili womaukarelikarunga ngava kumbangere vantu nokutulisa po noveta davene. Vantu kwa tjilire vampitisili owo. (Mateusa 23:4; Marukusa 7:1-5; Johanesa 7:13) Nampili ngomu Jesus ga dilire kuvatjira ntani nokupura yimpempa yawo, age ga kwete egano omu ngava lizuvhu vantu. Ayo kwa koresere unene Jesus pokumona omu ngava va tekura momudona. Awo kwa hepere va lifane ‘nononzwi da hana musita.’ (Mateusa 9:36) Jesus kwa lirongerere koGuhwe kuhara vantu ‘nokuvafira nkenda.’—Episarome 103:8.

4. Yisinke ga rugene Jesus morwa kukwata egano omu va lizuvhire vantu?

⁴ Apa Jesus ga mwene asi vantu kuna kuhepa, ga va vaterere morwa kwa va hara. Age kwa fana ngwendi oGuhwe. Pasihonena, sikando simwe konyima zapa va zuvhisire siruwo sosire nage novapositoli vendi, awo kwa rorokere ntani va hepere kupwizumuka. Nye Jesus kwa mwene vantu wovanzi kuna kumundindira. Age ga va kwete egano asi va hepere evatero, makura “ta tameke kuvaronga yoyinzi” nampili ngomu ga rorokere.—Marukusa 6:30, 31, 34.

5, 6. Yisinke twa hepa kurugana nsene tuna hara kukara neharo ngwendi Jehova? Gava sihonena. (Tara efano pepenuno 21.)

⁵ Nsene tuna hara kukara neharo ngwendi Jehova, yisinke twa hepa kurugana? Gazara kuhamena ukaro ou. Munazinyetu gedina Alan, ta gazara kuhamena munazinyetugara gokukurupa ogu ga kara noudigu wokugenda ntani kapi a mono nawa. Alan ta gazara nonkango daJesus edi: “Eyi wa hara asi yiyo nava ku ruganena vantu, nove o yi va ruganene.” (Rukasa 6:31) Alan ta lipura asi: ‘Yisinke na hara va ruganene nge wopeke?’ Ta lilimburura asi: ‘Na hara va dane name mbara!’ Nye munazinyetugara ogu gokukurupa kapi ta vhuru kudana mbara. Eyi ga hepa kulipura Alan yeeyi asi: ‘Ngano nyame munazinyetu ogu, ngano yisinke nina hara wopeke va ruganene nge?’

⁶ Nampili ngomu Alan simpe mudinkantu, age kuhetekera ko kukwata egano omu na lizuvha ngano yige mukurupe. Age kukara kumwe namunazinyetugara ogo nokumupurakena apa a uyunga. Makura ta kwata egano asi udigu kwamunazinyetu mokuresa Bibeli nokuzuvhisa tunda embo zende embo. Alan ta papara nkedi omu na vatera  mukurupe ogo. Apa atu kwata egano omu wopeke ava lizuvhu nokuvalikida eharo, ose kuhonena Jehova.—1 Vakolinte 12:26.

7. Ngapi natu kwata egano vanavazinyetu vana kuhepa?

⁷ Kapisi ureru nkenye apa kukwata egano omu vantu vana kulizuvha, unene po nsene kapi wa ligwanekera noukaro ou vana kara. Pasihonena, vanavazinyetu wovanzi kuzuvha kukora morwa uvera ndi kwa remana ndi ukurupe. Vamwe kuna kuhepa morwa uvera wokuguva-guva ndi sinka unene ndi morwa kwa va rugene yoyidona. Vamwe kurera vanona velike ndi kwa kara nava vemepata ava ava dili kukarera Jehova. Nkenye ogu kwa kara nomaudigu, nye sinzi somaudigu ogo kwa lisiga naga getu. Nye tuna hara kulikida eharo kovakwetu nokuvavatera. Yisinke natu rugana? Nkenye gumwe kuvhura a hepe evatero lyokulisiga. Yipo nye, nsene tu purakena nawa nokuhetekera ko kukwata egano malizuvho gomuntu, ose ngatu diva nkedi zongwa zokumuvatera. Kuvhura tu mu diworokese omu Jehova a lizuvhu kuhamena maudigu gendi. Ndi kuvhura tu mu vatere mononkedi dapeke. Pokurugana ngoso, ose tatu honene Jehova.—Resa Varoma 12:15; 1 Peturusa 3:8.

8. Yisinke ya vaterere Jesus a kare nonkenda?

⁸ Jehova kufira nkenda vantu navenye. (Rukasa 6:35) Jesus kwa kara ngwendi oGuhwe. Yisinke ya vaterere Jesus a kare nonkenda kovantu navenye apa ga kere pevhu? Age nga gazadara ko omu nava lizuvha kweyi na uyunga ndi na rugana. Pasihonena, mukadi ogu ga rugene yininke yoyidona kwa wizire kwaJesus. Age kwa lilire unene dogoro mahodi gendi taga woreke nompadi daJesus. Jesus ga kwete egano asi mukadi kwa liverere koudona ou ga rugene ntani ga litezwilire. Ga yi dimbwilire asi nsene a dira kumufira nkenda, mukadi ta lizuvhu udona unene. Age kwa mu pandadekere kouwa ou ga rugene nokumugusira po. Jesus ga uyungire hena nonkenda noMufalisayi ogu ga dilire kukwatesa ko eyi ga rugene mukadi gwina.—Rukasa 7:36-48.

9. Yisinke nayi tu vatera tu kare nonkenda ngwendi Jehova? Gava sihonena.

⁹ Ngapi natu kara nonkenda ngwendi Jehova? Twa hepa kugazara komeho  zokuuyunga ndi zokurugana yininke yipo tu dire kukoresa malizuvho gava wopeke. Paurusa kwa tjenge asi Mukriste ‘kapisi a kare nonompata. A kare nombili kovantu navenye.’ (2 Timoteusa 2:24) Pasihonena, gazara omu no likida nkenda momaukaro aga: Nsene asi murugani goge kapi ana kurugana sirugana sendi nawa, yisinke no rugana? Nsene asi munazinyetu nare ga hura koSinyanga soUhompa ta wiza kepongo, yisinke no uyunga? Nsene asi kuna kuzuvhisira muntu makura a uyunge asi ana kara noyirugana yoyinzi, ngapi no likida nkenda? Nsene mukadoge ta ku pura eyi ko dilire kumutantera ko matokoro gamwe aga ko tulire po, ngapi no uyunga nendi nonkenda? Twa hepa kugazara omu vana kulizuvha wopeke ntani nomu nonkango detu nadi va kundama. Makura ngatu diva eyi natu rugana ntani nokuuyunga nonkenda ngwendi Jehova.—Resa Yisewe 15:28.

10, 11. Yisinke natu lirongera ko kwaJehova nokukara nonondunge? Gava sihonena.

¹⁰ Jehova nondunge unene, ntani ga diva eyi ngayi horoka komeho. Nampili ngomu twa dira kudiva yokomeho, kuvhura tu kare nonondunge. Monkedi musinke? Komeho zokutura po etokoro, twa hepa kugazadara ko omu nali tu kundama ntani wopeke. Twa ha kara ngwendi Vaisraeli. Awo kapi va gazarere eyi ngayi va horokera nsene va dira kulimburukwa Jehova. Ntani kapi va gazarere kuhamena elikwatakano lyawo nendi nanayinye eyi ga va ruganenene. Morwa Mosesa ga yi dimbwilire eyi, age ga divire asi Vaisraeli ngava rugana udona. Age kwa tente asi: “Israeli muhoko gwa pira nondunge, kapi gwa paka ukonentu nampili kanunu. Kapi va koneka asi yisinke va va fundilire, kapi va kwata egano, eyi ya va horokerere.”—Deuteronomium 31:29, 30; 32:28, 29.

¹¹ Pasihonena, nsene kuna kulivandekera, wa hepa kudiworoka asi morwa eharo lyokuhara ogo muntu, ayo kudigopa mokupangera malizuvho goge nedowo lyokuligwanekera nage panyama. Yipo nye, wa ha rugana nkenye eyi nayi zonagwisa po elikwatakano lyoge lyewa naJehova! Kara nonondunge o nyokere po siponga. Purakena kepukururo lyewa lyaJehova eli asi: “Vantu wonondunge kumona udigu tau wiza, makura tava u henduka, nye ava va hana kugazara kuvyukilira mo, makura konyima ntani vana kulivera.”—Yisewe 22:3.

12. Ngapi eyi atu gazara ayi tu kundama?

¹² Muntu gonondunge kupangera magazaro gendi. Magazaro getu kuvhura kutuvatera ndi kuturetera siponga,  ngwendi moomu tupu mundiro agu tu vatere ndi kuturetera siponga. Nsene tu takamesa mundiro, kuvhura tu gu ruganese mokutereka. Nye nsene kapisi ngoso, kuvhura gu hwike embo lyetu nokutudipaga. Ya lifana nomagazaro getu. Ntani ya wapa kugazara kuhamena yininke eyi natu lirongera ko kwaJehova. Nye nsene tu gazadara nkenye apa ruhonda nokurugana yininke yoyidona, ose ngatu dowokera unene yininke oyo nokuyirugana. Oyo kuvhura kuzonagwisa po elikwatakano lyetu naJehova.—Resa Jakopo 1:14, 15.

13. Yisinke ga gazarere Eva kuhamena eparu lyendi?

¹³ Kuvhura tu lirongere ko komukadi gokuhova, Eva. Jehova kwa pangerere Adamu naEva asi va ha lya kositji esi asi gava “ediwo lyeyi yoyiwa neyi yoyidona.” (Genesis 2:16, 17) Nye Satana kwa tanterere Eva asi: “Ndangako asi ngomu fe one. Karunga kwa yi tantera eyi morwa ga diva asi nsene ngomu lya ko, neisi ngomu gwana nondunge, ngomu mu fane mokudiva yoyiwa neyi yoyidona.” Eva kwa gazarere omu ngali wapa eparu lyendi nsene a vhura kutokora mwene yoyiwa neyi yoyidona. Ta twikire kuyigazara makura “ta tara oso sitji omu sa fuura nomu ya wapa yiyimwa yaso.” Yisinke ya horokere? “Makura ta gusa ko siyimwa simwe, ta li. Ga ninka ta pe ko yendi, makura nage ta li.” (Genesis 3:1-6) Ngoyitundwamo, ‘nzo ta zi lihanene mouzuni. Ano nzo kwa reta mo nomfa.’ (Varoma 5:12) Ngano ya wepe kwaEva mokudira kugazara kurugana yoyidona!

14. Marondoro musinke za gava Bibeli kuhamena kuhondera?

¹⁴ Nzo zaEva kapi mwa hamenene ruhonda. Nye Bibeli kuturondora mokudira kukara nomagazaro gokuhara kuligwanekera panyama. Jesus kwa tente asi: “Nkenye ogu a tara mukadi, nye a mu dovaukire, nare ana mu honderere momutjima.” (Mateusa 5:28) Ntani Paurusa kwa rondwere asi: “Walye omu twara seke marutu geni asi madowo gago ga ga pwe.”—Varoma 13:14.

15. Emona musinke natu lipongaikira, ntani morwasinke?

¹⁵ Bibeli kutanta hena asi twa hepa kudemenena kweyi ayi hafesa Jehova nokunyokera po kugazara kungawopa. Nampili muntu a ngawope, yimaliwa yendi kapi ngayi mu popera. (Yisewe 18:11) Jesus kwa tente asi muntu ogu a lipongaikire emona nye a dire kutura Jehova muhowo meparu lyendi, ogo egova. Age kapi ga ‘ngawopa mwaKarunga.’ (Rukasa 12:16-21) Apa atu “lipongaikire emona meguru” nokurugana eyi ayi hafesa Jehova, age ta hafa ntani nose tatu hafa. (Mateusa 6:20; Yisewe 27:11) Elikwatakano lyewa naJehova mulyo unene kupitakana nkenye eyi.

16. Yisinke nayi tu vatera nsene tuna kara nosinka?

¹⁶ Nsene tu hetekera ko kungawopa mouzuni ou, ngayi tu retera yinka yoyinzi. (Mateusa 6:19) Jesus kwa tente asi ava ava kara nosinka nkenye apa kuhamena yimaliwa ngayi va digopera kutura muhowo Uhompa waKarunga meparu lyawo. (Mateusa 13:18, 19, 22) Vantu  vamwe kukara nosinka nkenye apa kuhamena yininke yoyidona eyi ya va horokera. Nsene tu twikira kukara nosinka, kuvhura yi tu verese ndi tu tameke kuzumbanesa epuro mwaJehova. Twa hepa kuhuguvara asi Jehova nga tu vatera. Bibeli kutanta asi sinka ndi “esivano ngali ku hakana erago, nye nonkango donongwa tadi ku hafesa.” (Yisewe 12:25) Yipo nye, nsene ono kara nosinka, tantera ko gumwe ogu a karere Jehova ntani ga ku diva nawa. Vakurona woge ndi mugara goge ndi mukadoge ndi kaume koge kuvhura a ku korangede o huguvare mwaJehova nokukuvatera o dire kukara nosinka sosinene.

17. Ngapi Jehova a tu vatere apa atu kara nosinka?

¹⁷ Jehova kukwata egano omu atu lizuvhu kupitakana nkenye ogu ntani kuvhura kutuvatera tu guse po sinka. Paurusa kwa tjenge asi: “Walye omu kara nosinka soyuma. Nye momakanderero geni omu hundire nkenye eyi muna hepa kwaKarunga. Omu yi hundire nkenye apa nonomutjima dompandu. Ano mbili zaKarunga, ezi za pitakana unene nondunge nadinye, ngazi kungira nomwenyo deni nomagazaro geni mwaJesus Kristusa.” (Vafilipi 4:6, 7) Yipo nye nsene ono kara nosinka, gazara evatero eli a ku pe Jehova mokutwikira kunkondopeka ukaume woge nendi, ngwendi evatero lyokutunda kovanavazinyetu wovagara nava wovakadi, kovakuronambunga, komukareli gokulimburukwa, kovaengeli ntani kwaJesus.

18. Ngapi evhuliko lyetu lyokugazara ali tu vatere?

¹⁸ Ngomu tuna lirongo, ose kuhonena Jehova apa atu ruganesa evhuliko lyetu lyokukwata egano malizuvho gava wopeke. (1 Timoteusa 1:11; 1 Johanesa 4:8) Ose ngatu hafa nsene tu likida eharo nonkenda kwava wopeke, nsene tu gazara kuhamena yitundwamo yoyirugana eyi atu rugana, ntani nsene tu nyokera po sinka. Tu gazareni omu ngali ka kara eparu mepangero lyoUhompa ntani nokukondja tu honene Jehova.—Varoma 12:12.