1. Ngapi omu muengeli ga ya kara Satana?

POMUHOWO, age kwa kere nelikwatakano lyewa naJehova. Nye konyima, sisitwa esi sopampepo ndi asi muengeli ogu, kwa here vantu va mu karere. Mevango lyokunyokera po edowo eli lyedona, age kwa li pulisilire li mu tulise nzo. (Jakopo 1:14, 15) Kapi twa diva edina lyendi komeho va ya mu tumbure asi Satana. Age “kapi ga kara mousili.” Age kwa rwanesere Jehova nokuyakara ‘guhya yimpempa.’—Johanesa 8:44.

2, 3. Yisinke nkango “Satana,” “Muzonaguli,” “ezoka” ntani “emukorongoro” azi likida kuhamena nkore zonene zaJehova?

² Kutunda apa ga rwanesere, Satana kwa ya kara nkore zonene zaJehova ntani zovantu navenye. Ose kuvhura kukwata egano omu ga donapa Satana kuliza nomu za mu singonona Bibeli. Satana kutanta asi “Murwanesi,” eyi kulikida asi muengeli ogu gomudona kwa nyenga upangeli  waKarunga nokuurwanesa. Age kwa hara kuhagekesa po upangeli waJehova.

³ Ehororo 12:9, kutumbura hena Satana asi Muzonaguli kutanta asi “Muswauli.” Satana kwa swaukisa Karunga pokumutumbura asi munayimpempa. Nkango “ezoka lyanare” kutudiworokesa omu Satana ga ruganesere ezoka mokupukisa Eva. Satana kwa mu singonona hena asi “emukongoro lyenene.” Age kwa keregenya, nyanya ntani mudona. Age kuna hara sitambo saJehova si dire kusika mo ntani nokuzonagura vantu vaKarunga.

4. Yisinke natu ka zogera mosirongwa esi?

⁴ Yosili, Satana nkore zonene ezi azi tu rwanesa tu dire kulimburukwa. Eyi yiyo Bibeli azi tu rondwere asi: “Omu vangarare oku muna rungarara, yeeyi nkore zeni, Satana, kugendagura ngwendi nyime gokununga, a papare ogu na lipapagwira.” (1 Peturusa 5:8) Sirongwa esi tasi ka zogera yikara yitatu yaSatana eyi ayi likida eyi twa hepera kulipopera nyamwetu konkore ezi zondona zaJehova ntani zovantu vendi.

5, 6. (a) Gava yihonena yokulikida asi vaengeli “mapenda gononkondo.” (b) Monkedi musinke Satana ga kara “nepangero lyonomfa”?

⁵ Vaengeli “mapenda gononkondo.” (Episarome 103:20) Awo nondunge ntani nonkondo kupita vantu. Vaengeli wovalimburukwi kuruganesa nonkondo dawo monaruwa. Pasihonena, muengeli gumwe gwaJehova kwa dipagere vakwayita woVaasiliya 185 000. Eyi kapi ta vhuru kuyirugana muntu gumwe mokudipaga vakwayita wovanzi ngoso. (2 Vahompa 19:35) Siruwo simwe, muengeli kwa ruganesere nondunge nononkondo dendi mokumangurura vapostoli vaJesus modorongo. Nampili ngomu vanomeni va kere pepi, kapi va yi dimbwilire asi muengeli ana zegurura mavero nokupwagesa vapositoli, konyima ta pata mavero.—Yirugana 5:18-23.

⁶ Vaengeli wovalimburukwi kuruganesa nononkondo dawo monaruwa, nye Satana kudiruganesa momudona. Satana ga kara nonkondo dokupukisa. Bibeli kumutumbura asi “Mupangeli gouzuni ou” ndi asi ‘karunga gouzuni ou.’ (Johanesa 12:31; 2 Vakolinte 4:4) Satana yige ga kara “nepangero lyonomfa.” (Vahebeli 2:14) Eyi kapi yina kutanta asi age kudipaga vantu. Yisinke ayi tanta eyi? Sokuhova, Satana kwa pukisa vantu va kare nonyengo nonyanya. Sauvali, morwa Satana kwa pukisire Eva a dire kulimburukwa Karunga, vantu navenye vananzo ntani kufa. (Varoma 5:12) Satana age “mudipagi” ngomu ga mu tumbwire Jesus. (Johanesa 8:44) Age sili nkore zononkondo unene.

7. Ngapi nompepo donondona da yi likida asi ado nonkondo?

⁷ Apa atu nyokere po Satana, ose ngoso kuna kunyokera po hena vakwatesiko vendi ntani nava ava rwanesa upangeli waKarunga. Eyi kwa kwatera mo mbunga zonene zovaengeli wokurwanesa, ava ava tumbura asi nompepo donondona.  (Ehororo 12:3, 4) Rorunzi ado kwa yi likida asi ado nonkondo unene kupita vantu ntani kuretesa po maudigu. (Mateusa 8:28-32; Marukusa 5:1-5) Diworoka asi nompepo donondona nomupangeli gwado nonkondo. (Mateusa 9:34) Pwa hana evatero lyaJehova, kapi tatu vhuru kurwanesa Satana.

8. (a) Yisinke sitambo saSatana? (Tara efano pepenuno 3.) (b) Kuliza neyi ono kumona, ngapi ou uzuni wa kara nonyanya ngwendi Satana?

⁸ Mupostoli Peturusa kwa hetakanesere Satana ‘kwanyime gokununga.’ Buke zimwe kwa faturura asi nkango zoRugereka va toroka “kununga” kutanta asi “kuworoma kosikorama morwa nzara.” Esingonono eli kwa wapera Satana gonyanya gomudona! Age kupangera uzuni mudima nye simpe kapi ya mu gwanena po. Age kwa fana nyime gonzara gokuhara kukwata yikorama yoyinzi. (1 Johanesa 5:19) Age kwa di tapaparara po unene vagwavekwa ava simpe vana kara pevhu, ntani ‘nonzwi dapeke,’ edi adi va kwatesa ko. (Johanesa 10:16; Ehororo 12:17) Sitambo sendi sokuzonagura po vantu vaJehova. Mahepeko goVakriste wousili wosiruwo sanare nava vantaantani kulikida asi Satana nyanya.

9, 10. (a) Ngapi Satana ga homwene muhoko goVaisraeli? (Gava yihonena.) (b) Morwasinke Satana ga di tapararere Vaisraeli? (c) Ngapi ono kugazara a lizuvhu Muzonaguli nsene mukareli gwaJehova ana tura nzo zonene?

⁹ Satana kwa likida hena nyanya monkedi zimwe. Nyime gonzara kapi a  zuvhire nkenda yikorama komeho ndi konyima zokuyidipaga. Monkedi zokulifana, Satana kapi a zuvhire nkenda ava a homokere. Pasihonena, ngapi omu ono kugazara ga lizuvhire Satana nkenye apa ngava hondere Vaisraeli nokudowokera unene emona? Gazara omu Satana ga hefe ngomu Simuli va mu dipagere morwa ruhonda ntani ngomu Gehasi va mu zugumine yingondwe morwa kudowokera emona.—Numeri 25:6-8, 14, 15; 2 Vahompa 5:20-27.

¹⁰ Satana ga kere nokonda zokulikarera zeyi ga di tapararere Vaisraeli. Diworoka asi Mesiyasa kwa ya tundire momuhoko ogo, ntani yige nga ya myona Satana nokulikida asi Jehova yige ga fira kupangera. (Genesis 3:15) Satana kapi ga harerere Vaisraeli a va hafere Karunga, yipo ga va pukisire va zone. Satana kapi ga fililire nkenda Ndafita apa ga honderere. Ntani kapi ga fililire nkenda Mosesa apa ga zumbanesere mpito zokukahwilira moSirongo sEtumbwidiro. Satana kumuhafesa unene apa a mono mukareli gwaKarunga ana tura nzo zonene. Age kuruganesa nompito ngodo mokupa Jehova usima.—Yisewe 27:11.

11. Morwasinke Satana ga di tapararere Sara?

¹¹ Satana kwa nyengere ruvharo rwezimo omu ga ya tundire Mesiyasa. Pasihonena, gazara kuhamena eyi ya horokere konyima zapa Jehova ga tanterere Abirahamu asi ngo kara “muhoko gomunene.” (Genesis 12:1-3) Abirahamu naSara apa va kere moEgipite, Farawo kwa tulire Sara membo lyendi ntani kwa here a kare mukadendi. Nye Jehova kwa poperere Sara koukaro ou woudigu. (Resa Genesis 12:14-20.) Ukaro wokulifana wa horokere mositata saGerara komeho va hampuruke Isaka. (Genesis 20:1-7) Ngoso Satana yige ga retesere po maukaro aga ndi? Diworoka asi Sara kwa sigire sitata soungawo Uru nokukatunga monotenta. Ngoso Satana kwa here kumuzeda neparu lyewa lyomombara zaFarawo nezi zaAbimereki ndi? Satana ga gazarere asi Sara na kumbangera mugara gwendi ntani naJehova yipo a kware gumwe govahompa ndi? Bibeli kapi za yi uyunga, nye Muzonaguli ngano ga hefe nsene Sara ngano ga zumbanesere mpito zokukara ruha rwezimo omu ga ya tundire Mesiyasa. Ngano mukadi gwina gomuwa ga zumbanesere nkareso zendi zongwa nelikwatakano lyendi naJehova, Satana ngano kapi ga lizuvhire unzoni. Satana mudona ntani nyanya.

12, 13. (a) Ngapi Satana ga likidire nyanya konyima zapa va hampurukire Jesus? (b) Omu ono kugazara, ngapi Satana a lizuvhu kuhamena vanona ava va hara Jehova nokumukarera?

¹² Kutunda kwaAbirahamu kwa pitire po nomvhura mafere ntani vana kuyahampuruka Jesus. Satana kapi ga mwene Jesus ngomukeke gomuwa. Satana ga yi divire asi mukeke ogu nga kura nokuyakara Mesiyasa getumbwidiro. Jesus yige ruha rokuhova roruvharo rwaAbirahamu, ntani nga ka ‘haraganesa po yirugana yoMuzonaguli.’ (1 Johanesa 3:8) Satana  kwa gazarere asi kudipaga munona sininke sosidona ndi? Hawe. Age kwato sinka kweyi youhunga ndi yepuko. Age kwa here kudipaga munona Jesus. Monkedi musinke?

¹³ Apa hompa Herodesa ga zuvhire kovakonentu asi “hompa goVajuda” vana mu hampuruka, age kwa handukire ntani kwa here kudipaga mukeke ogo. (Mateusa 2:1-3, 13) Yipo ga pangerere va ka dipage vanona wovagara navenye womoBeterehema wonomvhura dokutundilira kwambali dogoro nokonhi zado ntani nava womonomukunda dazo. (Resa Mateusa 2:13-18.) Mukeke Jesus kapi va mu dipagere, nye yisinke yina kutanta kuhamena nkore zetu Satana? Muzonaguli kapi a tara eparu lyovantu asi mulyo. Ntani kapi ga kara nosinka kovanona. Satana sili “nyime gokununga.” Diworoka asi age nyanya sili!

14, 15. Ngapi Satana ga “zonagura nondunge dava va dira kupura”?

¹⁴ Nkedi zimwe tupu ezi Satana a ninkisa vantu va rwanese Jehova Karunga kuna kara pokuvapukisa. (1 Johanesa 4:8) Satana kupukisa vantu yipo va dire ‘kuzuvha nonkango daKarunga,’ eyi kutanta asi va dire kudimburura hepero zokukara nelikwatakano naKarunga. (Rukasa 11:28) Muzonaguli kwa “zonagura nondunge dava va dira kupura” yipo va dire kudiva usili kuhamena Jehova.—2 Vakolinte 4:4.

¹⁵ Nkedi zimwe Satana a kupukisa vantu kuna kara kupitira moukarelikarunga woyimpempa. Age ga yi diva asi Jehova Karunga “gesupa.” (Exodus 20:5) Gazara tupu omu na yi mu hafesa Satana nsene a mona vantu kuna kukarera vadimu ndi yisitwa ndi yikorama ndi nkenye eyi kupitakana Jehova. Nampili wovanzi ava ava gazara asi kukarera Karunga monkedi ezi a tambura, nawo kwa va pukisa mapuliro nonompo doyimpempa. Momazuva gaJesaya, Vaisraeli kwa kere moukaro wangoso. Jehova kwa va pulire asi: “Eyi muna kuhepekera kuranda yimaliva yeni eyi ayi dili kumukutika nani yinke? Neyi omu randere azo nzara haza mu kerera nani yinke? Purakeneni nawa kwange, one mu sikise mo eyi nina kumutantera, makura ngomu djobwane nondya nadinye donongwa.”—Jesaya 55:2.

16, 17. (a) Morwasinke Jesus ga tanterere Peturusa asi: “Tunda po pwange, Satana”? (b) Ngapi Satana na vhura kutupukisa yipo tu hageke kuvangarara?

¹⁶ Satana kuvhura a kumbagere nampili vakareli vaJehova womupampi. Pasihonena, gazara eyi ya horokere apa Jesus ga tanterere varongwa vendi asi ntaantani va mu dipage. Mupositoli Peturusa kwa tente asi: “Karunga ngano ta kwafa tupu yi ka fire mo Hompa, ya ha ku horekera ngano!” Makura Jesus ta tantere Peturusa asi: “Tunda po pwange,  Satana.” (Mateusa 16:22, 23) Morwasinke Jesus ga tumbwilire Peturusa asi “Satana”? Morwa Jesus ga divire eyi nayi horoka. Ga yi divire asi ntaantani a fe ngonzambo zosizoweseso nokulikida Muzonaguli asi munayimpempa. Esi kwa kere siruwo somulyo unene mehistoli lyovantu ntani kapisi sokuninka asi ‘ya ha mu horokera.’ Ngano Jesus kapi ga vangararere, ngano ya hafesere Satana.

¹⁷ Uhura wouzuni ou woudona pepi una kara, nose twa hepa kuvangarara. Satana kuna tu harere tu demenene unene kweyi youzuni ou. Age kuna tu harere tu divare asi kapisi pomazuva gopouhura tuna kuparuka ntani tu dire kuvangarara. Wa ha yi pulisira yi ku horokere oyo. Nye ‘rungarara.’ (Mateusa 24:42) Wa ha pura yimpempa yaSatana asi uhura simpe ure ndi asi kapi una kuwiza.

18, 19. (a) Ngapi Satana na vhura kuhetekera ko kutuzeda ntani tu gazare asi Jehova kapi ga tu hara? (b) Ngapi omu Jehova a tu vatere tu kare tuna vangarara?

¹⁸ Satana kuhetekera ko kutuzeda monkedi zimwe hena. Ana hara tu pure asi Jehova kapi ga tu hara ntani asi kapi nga tu gusira po nonzo detu. Nye eyi yineya yaSatana. Gazara tupu, yilye sili Jehova ga dira kuhara? Satana. Yilye Jehova ga dira kugusira po? Satana. Nye kwetu, Bibeli kutanta asi: “Karunga kapisi muhahungami, asi a divare yirugana yeni, neharo lyokufumadeka edina lyendi.” (Vahebeli 6:10) Jehova kwa hara nayinye eyi atu rugana mokumuhafesa, ntani ukareli wetu kwendi kapisi womawoko-woko. (Resa 1 Vakolinte 15:58.) Ya ha ku pukisa yineya yaSatana.

¹⁹ Ngomu tuna yi lirongo, Satana nonkondo, nyanya ntani yineya. Ngapi natu funda po nkore ezi? Jehova kutupa evatero. Nonkango dendi kuturonga nongendeseso daSatana morwa “magano gendi twa ga diva.” (2 Vakolinte 2:11) Nsene tu kwata egano nonkedi daSatana dokulisiga-siga edi a ruganesa mokutuhomokera, ngayi tu rerupira mokukara tuna vangarara. Nye kudiva nonkedi daSatana kapi ya gwanena po. Bibeli kutanta asi: ‘Nyokereni Muzonaguli, makura age ta mu suwurukwa.’ (Jakopo 4:7) Sirongwa sokukwama ko ngatu ka zogera maruha gatatu omu natu rwanesa Satana nokumufunda.