1. Morwasinke Paurusa ga uyungilire asi ‘Kristusa yige nonkondo daKarunga’?

JEHOVA kwa likidire nonkondo dendi mononkedi dokulisiga-siga kupitira mwaJesus Kristusa. Jesus kwa rugene yitetu yoyinzi apa ga kere pevhu. Ayo kwa yi tjanga moBibeli ntani kuvhura kunkondopeka epuro lyetu. (Mateusa 9:35; Rukasa 9:11) Jehova kwa pere Jesus nonkondo dononene, yiyo mupostoli Paurusa ga uyungilire asi: ‘Kristusa yige nonkondo daKarunga.’ (1 Vakolinte 1:24) Ngapi ya tu kundama yitetu yaJesus?

2. Yisinke natu lirongera ko koyitetu yaJesus?

² Mupostoli Peturusa kwa uyungire asi Jesus nga rugana ‘yitetu’ noyidiviso. (Yirugana 2:22) Yisinke ayi tu rongo yitetu oyo? Kuturonga eyi nga ka rugana Jesus  mEpangero lyendi lyonoMumvho Eyovi. Age nga ka rugana yitetu yoyinene eyi ngayi ka retera mauwa vantu navenye vepevhu. Yitetu yendi kuturonga hena tu dive yikara yendi ntani neyi yoGuhwe. Mosirongwa esi tatu ka konakona yitetu yitatu yaJesus nomu nayi tu kundama ngesi ntani nokomeho.

3. (a) Morwasinke Jesus ga ruganenene sitetu sendi sokuhova? (b) Ngapi Jesus ga likidire ugavi moKana?

³ Sitetu sendi sokuhova Jesus kwa si ruganenene pekwareko moKana. Pekwareko olyo, vhinyu kwa pwire. Ayo ngano ya swaukisire valikwali morwa aso situmbukira sawo sokugava vhinyu kovagenda vawo. Mariya, zinyaJesus, nage yipo ga kere. Mariya kwa pulire evatero kwaJesus morwa ga divire asi ga kara nononkondo dokuninka vhinyu ndi? Age nampo nga teda mauporofete nagenye kuhamena munwendi ntani ga yi divire asi age ngava mu tumbura asi “MunwaKarunga gekeguru-guru.” (Rukasa 1:30-32; 2:52) Sihorokwa oso kulikida asi Mariya naJesus kwa here kuvatera valikwali vena. Makura Jesus yipo ga situnukisire mema gonolita 380 ga kare “vhinyu zongwa.” (Resa Johanesa 2:3, 6-11.) Ya kere hepero Jesus a rugane sitetu esi ndi? Hawe. Age kwa si rugene morwa ga hara vantu ntani kwa honenene ugavi woGuhwe.

4, 5. (a) Yisinke asi tu rongo sitetu sokuhova saJesus? (b) Yisinke asi tu rongo sitetu somoKana kuhamena meho?

⁴ Jesus kwa situnukisire mema ga kare vhinyu zokugwanena po kwanavenye ava va kere posipito. Yisinke asi tu rongo sitetu esi? Kuturonga asi Jehova naJesus kwa kara nougavi. Aso hena kuturonga asi awo kwa hara unene kuvatera vantu. Aso kulikida asi Jehova nga ka ruganesa nonkondo dendi mouzuni woupe mokukatupa nondya dononzi.—Resa Jesaya 25:6.

⁵ Gazara tupu, ntaantani Jehova nga ka tu pe nayinye eyi twa hepa. Nkenye muntu nga ka kara nembo lyewa nonondya donongwa. Ose kuhafa unene apa atu gazadara ko komauwa aga nga ka tu pa Jehova moParadisa.

6. Ngapi Jesus ga ruganesere nonkondo dendi, ntani ngapi natu mu honena?

⁶ Jesus kapi ga ruganesere nonkondo dendi mokulihafesa mwene. Apa Muzonaguli ga mu zedere a situnukise mamanya ga kare nomboroto, Jesus ga nyokere kuruganesa nonkondo dendi.  (Mateusa 4:2-4) Nye Jesus nga ruganesa nonkondo dendi mokuvatera vantu. Ngapi natu honena nkareso zendi? Jesus kwa tente asi “omu gave.” (Rukasa 6:38) Ose kuvhura tu kare nougavi pokuzigida wopeke momambo getu tu ya lye nawo. Ndi kuvhura tu ruganese siruwo setu mokupurakena munazinyetu omu ana kuliyomberesa siuyungwa sendi. Ndi kuvhura tu deure vanavazinyetu mokuzuvhisa. Apa atu vatere wopeke, ose ngoso kuna kuhonena ugavi waJesus.

7. Siruwo esi ana kupangera Satana, yisinke ngayi twikira kukara po?

⁷ Ruhepo nare rwa tameka. Jehova kwa tanterere Vaisraeli asi “mosirongo ngamu kara narunye Vaisraeli vamwe wovahepwe.” (Deuteronomium 15:11) Konyima, Jesus nage ga ya uyungire asi: “Owo vahepwe muna kuninka amesi kumwe nawo ngomu kara nkenye apa.” (Mateusa 26:11) Age kwa tembe nye asi ruhepo kapi ngaru pwa po pevhu ndi? Hawe, age kwa tembe asi siruwo esi ana kupangera Satana, ruhepo ngorooro ngaru kara. Nye mouzuni woupe, kapi ngamu ka kara ruhepo. Natuvenye ngatu ka gwana nondya dokugwanena po.

8, 9. (a) Morwasinke Jesus ga kutikilire vantu mayovi? (b) Ngapi ono kulizuvha kuhamena sitetu esi?

⁸ Muepisarome kwa uyungire kuhamena Jehova asi: “Ove kuyipa yoyinzi, to kutike nayinye moufenkenda woge.” (Episarome 145:16) Apa Jesus ga kere pevhu, age nga honene oGuhwe nokupakera mbili vantu. Kapi nga yi ruganene a likide asi age ga kara nononkondo. Nye morwa kwa here vantu. Tu konakoneni Mateusa 14:14-21. (Resa.) Nombunga domoyitata kwa sikwire Jesus. (Mateusa 14:13) Apa lya gombokere, varongwa vendi kwa kere nosinka morwa vantu kwa kere nonzara neroroko. Yipo va hundilire Jesus a sige vantu va ze va ka rande ko nondya. Yisinke ga rugene Jesus?

⁹ Jesus kwa kutikire vagara 5 000 novakadi ntani novanona kumwe nonomboroto ntano nonomfi mbali. Morwasinke Jesus ga ruganene sitetu oso? Morwa ga here sili vantu. Jesus kwa va pere nondya dononzi, yipo ‘va lire tava kuta.’ Nondya odo da va pere nonkondo dokugenda sinano sosire va tengure komambo gawo. (Rukasa 9:10-17) Apa vantu navenye va kutire, varongwa tava pongaike ruhupwa poyikumba 12 yokuzura.

10. Yisinke ngayi ka horokera ruhepo?

¹⁰ Vantu wovanzi nohepwe morwa vapangeli uruva ntani ufuki. Vanavazinyetu vamwe kapi va kara nonondya dokugwanena po. Nye, ava ava limburukwa Jehova, ntaantani tupu ngava ka paruke mouzuni wa hana  ufuki noruhepo. Jehova age Karunga munankondo nadinye, ntani ga kara neharo lyokukasikisa mo yihepwa yovantu. Age ga tumbwidira asi ntaantani nga ka hagekese po ruhepo.—Resa Episarome 72:16.

11. Morwasinke ono karere nehuguvaro asi Kristusa nga ka ruganesa nonkondo dendi, ntani yisinke ono hara kurugana?

¹¹ Apa Jesus ga kere pevhu, age kwa rugene yitetu yoyisesu monomvhura ntatu noukahe. (Mateusa 15:24) Nye ngaHompa, Jesus nga ka vatera vantu navenye mEpangero lyendi lyonoMumvho Eyovi. (Episarome 72:8) Yitetu yaJesus kutupa ehuguvaro asi ana hara kuruganesa nonkondo dendi tu gwanene mouwa. Ose kapi twa kara nononkondo dokurugana yitetu, nye yisinke natu vhura kurugana? Kuvhura tu ruganese siruwo nononkondo detu mokutantera ko vantu yininke yoyiwa eyi va tumbwidira moBibeli. Oso yiso situmbukira setu ose Nombangi daJehova. (Varoma 1:14, 15) Nsene tu teda ko kweyi nga ka rugana Kristusa, ngayi tu tumangeda tu tantere ko wopeke.—Episarome 45:1; 49:3.

12. Ngapi tuna yi diva asi Jesus ga diva mukarompepo?

¹² Apa Karunga ga sitire evhu nanayinye eyi ya kara po, Jesus kwa kere ‘ponyonga ngonkurungu.’ (Yisewe 8:22, 30, 31; Vakorosi 1:15-17) Jesus ga diva mukarompepo. Age ga diva omu na vhura kugupangera.

13, 14. Yisinke ayi likida asi Jesus ga kara nononkondo dokupangera mukarompepo?

¹³ Apa Jesus ga kere pevhu, ga yi likidire asi ga kere nononkondo daKarunga dokupangera mukarompepo. Pasihonena age ga pangerere emukurukundungu. (Resa Marukusa 4:37-39.) Mulirongi gumwe goBibeli kwa faturura asi nkango zoRugereka “emukurukundungu” va ruganesa mwaMarukusa kwa tamba kekundungu lyenene omu mwa hamena maremo gomasovagani nompepo zononkondo nomaruvadi ntani nomvhura zonene. Alyo kuzonagura nayinye. Mupostoli Mateusa kwa li tumbura asi “ekundungu lyenene.”—Mateusa 8:24.

¹⁴ Gazara tupu: Mankumpi kwa litoonene kowato makura tau zura mema. Mpepo kwa pepere nononkondo ano wato tau yerauka, nye Jesus kwa rere morwa eroroko. Varongwa vendi kwa kere nowoma makura tava mu pindura asi: “Tatu fu!” (Mateusa 8:25) Yisinke ga rugene ko Jesus? Ta pinduka nokutantera mpepo nefuta asi: “Mwena, mwena tee-te.” (Marukusa 4:39) Ano mpepo tazi litura, “tazi mwena  tee-tee-tee.” Yosili Jesus ga kara nononkondo dokupangera mukarompepo.

15. Ngapi twa yi diva asi Jehova kuvhura kupangera mukarompepo?

¹⁵ Nonkondo daKristusa kutunda kwaJehova, yipo nye twa yi diva asi Karunga Munankondo nadinye kuvhura kupangera mukarompepo. Pasihonena, komeho zEmukuruhanzo, Jehova kwa tente asi: “Napa pita mazuva-gatano nagavali, tani rokesa mvhura mazuva nomurongo-ne mutenya nomasiku.” (Genesis 7:4) Exodus 14:21 kwa tanta asi: “HOMPA makura ta pepesa emupepo lyenene lyokoUpumezuva.” Jona 1:4 kwa tanta asi: “HOMPA makura ta tumu mpepo zondigu mefuta, kakunguru kwa kere gomudigu, sikepa tasi kara mosimpagwa sokutekauka po.” Ayo kutuhafesa pokudiva asi mouzuni woupe Jehova nga ka pangera mukarompepo.

16. Morwasinke nayi tu hengagwidira pokudiva asi Jehova naJesus va kara nonkondo dokupangera mukarompepo?

¹⁶ Ayo kuhengagwida pokudiva asi Jehova naJesus va kara nononkondo dokupangera mukarompepo. MEpangero lyaKristusa lyonoMumvho Eyovi, navenye ngava ka paruka pevhu kapi ngava ka kara mosiponga songandi. Kwato ogu ngali ka dipaga  ekundungu lyenene ndi mvhura zonene ndi ekankamo lyevhu. Kapi ngatu ka kara nowoma morwa “nzugo zaKarunga” ngazi ka kara povantu. (Ehororo 21:3, 4) Kuvhura tu kare nehuguvaro asi Jehova nga ka pa Jesus nonkondo dokupangera mukarompepo mEpangero lyendi lyonoMumvho Eyovi.

17. Ngapi natu honena Karunga naKristusa?

¹⁷ Kapi twa kara nononkondo dokupangera mukarompepo. Ntudi Jehova naJesus. Nye koyili natu vhura kurugana. Kwa yi tumbura moYisewe 3:27. (Resa.) Nsene vanavazinyetu kuna kuhepa kuvhura tu va vatere nokuvahengagwida. (Yisewe 17:17) Pasihonena, nsene vana ligwanekere nosimpagwa kuvhura tu va vatere. Mufisayendi gumwe nzugo zendi kwa zonaukire kekundungu lyenene. Age kwa tente asi: “Ame na hafa unene mokuhama kombunga zaJehova, morwa za pa nge yihepwa yange yopanyama neyi yopampepo.” Munazinyetukadi gumwe gomudike kwa dompere mutjima apa ekundungu lya zonagwire nzugo zendi. Apa vanavazinyetu va mene kuwapukurura nzugo zendi age kwa tente asi: “Na hafa sili unene! Kapi na diva omu nani yi faturura.” Ta uyunga hena asi: “Mpandu Jehova!” Ayo kutuhafesa pokumona asi vanavazinyetu kupakera mbili yihepwa yovakwaawo. Nye unene po kutuhafesa pokudiva asi Jehova naJesus Kristusa kutupakera mbili.

18. Morwasinke Jesus ga ruganenene yitetu?

¹⁸ Apa ga kere Jesus pevhu ga yi likidire asi yige ‘nonkondo daKarunga.’ Kapi ga ruganesere nonkondo dendi mokulimonekesa ndi ali hafese. Nye kwa di ruganesere mokurugana yitetu morwa kwa here sili vantu. Ngatu ka yi zogera mosirongwa sokukwama ko.