1. Yisinke ava gazara vantu wovanzi asi kapi ya kara epuko?

OSE kuna kara mouzuni ou una zura ruhonda. Pasihonena, vantu wovanzi kugazara asi kapi ya kara epuko kuligwanekera panyama mugara nomugara ndi nomuntu ga hana asi mulikwali goge. Monomuvi nomonobuke nomononsumo ntani momatjingiso kwa zura mo yininke yoruhonda. (Episarome 12:8) Nye Jehova kuvhura a tu vatere tu paruke monkedi zongwa zokumuhafesa. Kuvhura tu kare tuna kuhuka mouzuni ou wokuzura ruhonda.—Resa 1 Vatesaronika 4:3-5.

2, 3. (a) Morwasinke natu nyokerera po madowo gomadona? (b) Yisinke natu ka zogera mosirongwa esi?

² Mokuhafesa Jehova, twa hepa kunyokera po nayinye eyi ga nyenga. Nye morwa kapi twa sikilira mo, kuvhura tu kare nomadowo goruhonda, ngwendi moomu mfi azi dowokere ndjo. Nsene tu tameka kukara nomagazaro goruhonda,  twa hepa kuganyokera po usimbu. Nsene tu dira kuyirugana, madowo goruhonda ngaga nkondopara makura nsene zi moneka mpito, tatu hondere. Eyi yiyo za uyungira Bibeli asi: “Edowo lyedona ntene lina kuru, tali tulisa muntu nzo.”—Resa Jakopo 1:14, 15.

³ Edowo lyedona kuvhura kukura momutjima gwetu. Eyi yiyo twa hepera kutakamesa magazaro getu. Nsene tu nyokera po edowo lyedona, ose ngatu nyokera po ruhonda ntani noyitundwamo yaro. (Vagarata 5:16) Mosirongwa esi, tatu ka zogera yininke yitatu eyi nayi tu vatera tu rwanese po madowo gomadona: elikwatakano lyetu naJehova, mavyukiso gomoNonkango dendi, ntani evatero lyokutunda koVakriste va kura pampepo.

4. Morwasinke ya karera nomulyo kuhedera Jehova pepi?

⁴ Bibeli kutantera ava vana hara ‘kuhedera Karunga pepi’ asi “kuhweni mawoko geni,” ntani asi “kuhureni nomutjima deni.” (Jakopo 4:8) Apa Jehova a kara Kaume ketu, ose kuhara yi mu hafese yirugana nomagazaro getu. Nsene ga kuhuka magazaro getu, mutjima gwetu nago ngagu kuhuka. (Episarome 24:3, 4; 51:6; Vafilipi 4:8) Jehova ga yi diva asi ose kapi twa sikilira mo ntani asi kuvhura tu tameke kugazara yininke yoruhonda. Nye morwa kapi tuna hara kuguvisa Jehova, twa hepa kukondja mokunyokera po magazaro gangoso. (Genesis 6:5, 6) Twa hepa kukondja mokuninka magazaro getu ga kare gana kuhuka.

5, 6. Ngapi kukanderera naku tu vatera tu rwanese po madowo goruhonda?

⁵ Nsene tu twikira kuhundira evatero kwaJehova, nga tu vatera tu rwanese po magazaro goruhonda. Age kutupa mpepo zendi zokupongoka yipo tu kare tuna kuhuka. Momakanderero getu, ose kuvhura kutantera Jehova asi tuna hara magazaro getu ga mu hafese. (Episarome 19:14) Nelinunupiko, ose kupura a tu konakone nsene tuna kara nomadowo goruhonda monomutjima detu aga naga tu tulisa nzo. (Episarome 139:23, 24) Twikira kuhundira Jehova a ku vatere yipo o nyokere po madowo goruhonda nokurugana youhunga nampili yi kare udigu.—Mateusa 6:13.

⁶ Komeho tu ya lironge kuhamena Jehova, ose nampo ngatu rugana yininke eyi ngayi dili kumuhafesa, ntani nampo kuna kutwikira kuyirwanesa po. Nye Jehova kuvhura a tu vatere tu rugane yokumuhafesa. Pasihonena, konyima zapa hompa Ndafita ga honderere naBateseba, age ga litezwilire nokulikwambera Jehova a mu pe “mutjima” gokukuhuka nokumuvatera a limburukwe. (Episarome 51:10, 12) Yipo nye, nsene simpe kuna kurwanesa madowo ganare goruhonda, Jehova kuvhura a tu vatere tu kare nonkareso zokumulimburukwa ntani nokurugana youhunga. Age kuvhura a tu vatere tu pangere magazaro getu gokudira kusikilira mo.—Episarome 119:133.

7. Ngapi Nonkango daKarunga nadi tu vatera tu nyokere po magazaro goruhonda?

⁷ Jehova kuvhura a limburure makanderero getu kupitira moNonkango  dendi, Bibeli. Mwazo, ose kugwana mo unongo wendi ou wa kuhuka. (Jakopo 3:17) Nsene tu resa Bibeli nkenye ezuva, magano nomagazaro getu ngayi kuhuka. (Episarome 19:7, 11; 119:9, 11) Ntani moBibeli, mwa kara yihonena nomarondoro eyi ngayi tu vatera tu nyokere po magazaro nomadowo goruhonda.

8, 9. (a) Morwasinke mumati gumwe ga honderere nomukadi gohondedi? (b) Maukaro musinke sihonena somoYisewe egaununo 7 nasi tu vatera?

⁸ MoYisewe 5:8, kwa tu rondora tu lipore ko koruhonda. MoYisewe egaununo 7, tatu resa esimwititi lyomumati gumwe ga gendere monzira ezi za likura kekovhu lyonzugo zomukadi goruhonda. Ogo mukadi kwa “dwere ngwendi hondedi.” Makura ta dingire mawoko gendi ogo mumati, ta mu ncumita, ta mu tantere nonkango dokupindura madowo. Mumati kapi ga nyokerere po madowo ogo, makura ta hondere nomukadi ogo. Nampili ngomu ga dilire kugazara kuzona, nye ga zonene. Ga ligwanekerere noyitundwamo yoyidona. Ngano ga dimbwilire siponga, ngano ga liporere ko komukadi gwina.—Yisewe 7:6-27.

⁹ Ngwendi mumati gwina, ose kuvhura kutura po matokoro gomadona morwa kudira kudimburura siponga. Pasihonena, masiku pamwe kotivi kukara ko malikwamo goruhonda, makura posiruwo sangoso siponga kupaturura tivi. Kuvhura kukara siponga kupaturura Intaneta wa hana kudiva oku nazi kutwara, ndi koruha rokulitumina nombudi ndi romatjingiso ndi romafano goruhonda. Momaukaro gangoso, eyi  natu tarera kuvhura yi pindure madowo goruhonda, ano eyi kuvhura kuguvisa Jehova.

10. Morwasinke kuliharesa kwa karera siponga? (Tara efano pepenuno 14.)

¹⁰ Bibeli hena kututantera omu vagara novakadi va fira kulitekura. (Resa 1 Timoteusa 5:2.) Vakriste va hepa tupu kulikida malizuvho geharo kovalikwali vawo ndi komuntu ogu vana kulivandekera nage. Awo kapisi va liharese. Vamwe kuvhura kugazara asi kuliharesa muntu wa hana kumukwatagura kapisi epuko. Nye apa vantu ava liharesa, awo kutameka kukara nomagazaro goruhonda, ano eyi kuvhura kuvatwaredesa va hondere. Eyi ya horoka, ntani kuvhura kuhoroka hena.

11. Yisinke natu lirongera ko kwaJosefa?

¹¹ Josefa kuna kara sihonena sosiwa. MukadaPotifara kwa hetekerere ko kuzeda Josefa asi va rare. Josefa ga nyokere, nye mukadaPotifara kapi ga hagekere kumuzeda. Nkenye ezuva nga mu kondjesa asi “va rare.” (Genesis 39:7, 8, 10) Mulirongi gumwe kwa fatwilire asi mukadaPotifara kwa gazarere asi nsene va kara velike, Josefa kuvhura a mu dowokere. Josefa kwa tokomenene kudira kumuliharesa. Kapi ga pulisilire madowo gomadona ga kure momutjima gwendi. Apa mukadaPotifara ga kwete erwakani lyaJosefa nokukondjesa asi va rare, makura olyo erwakani ta li mu ‘sigire momawoko gendi nokudukira ponze.’—Genesis 39:12.

12. Ngapi omu twa yi diva asi eyi atu tara kukundama mutjima gwetu?

¹² Jesus kwa rondwere asi eyi atu tara kukundama mutjima gwetu nokupindura madowo goruhonda mwetu. Age kwa tente asi: “Nkenyogu a tara mukadi, nye a mu dovaukire, nare ana mu honderere momutjima.” (Mateusa 5:28) Eyi yiyo ya horokerere hompa Ndafita. Apa ga kere keguru lyondunda zombara ta mono “mukadi ana kulikuhwa” ta mu tarurura nokumudowokera. (2 Samwere 11:2) Nampili ngomu ga kere mukada mukwawo, age kwa mu dowokerere makura ta ligwanekere nage panyama.

13. Morwasinke natu tulira po ‘mugano’ nomeho getu, ntani ngapi natu yi rugana?

¹³ Nsene tuna hara kunyokera po magazaro goruhonda, twa hepa kukwama sihonena saJoba. Age kwa tente asi: “Ame kwa ninka etumbwidiro lyomugano” nomeho gange. (Joba 31:1, 7, 9) Ngwendi Joba, twa ha tarurura muntu nokuhara kuhondera nendi. Ano nsene tu mona mafano goruhonda kokompiuta ndi mosifo ndi nkenye oku, twa hepa kuhageka usimbu kugatara.

14. Yisinke twa hepa kurugana mokukara tuna kuhuka?

¹⁴ Pokugazara eyi tuna zogere, ove ngo yi dimburura asi twa hepa kurugana ko yuma mokunyokera po madowo goruhonda. Nsene ono hepa kutura po marunduruko, ga tura po usimbu! Nsene o limburukwa eyi a uyunga Jehova, ove to nyokere po ruhonda nokukara ono kuhuka.—Resa Jakopo 1:21-25.

15. Nsene o yi dimburura asi udigu kurwanesa po madowo goruhonda, morwasinke ya karera mulyo kupura evatero?

¹⁵ Nsene o yi dimburura asi udigu kurwanesa po madowo goruhonda, uyunga nagumwe gomombunga ogu ga  karera Jehova siruwo sosire ntani na vhura kukupa mavyukiso gomoNonkango daKarunga. Kuvhura yi kudigopere kutantera ko wopeke udigu woge, nye mulyo kupura evatero. (Yisewe 18:1; Vahebeli 3:12, 13) Vakriste ava va kura pampepo kuvhura va ku vatere o dimburure marunduruko aga wa hepa kutura po. Makura tura po marunduruko ogo yipo Jehova a twikire kukara Kaume koge.

16, 17. (a) Ngapi vakuronambunga ava vatere ava ayi digopere kurwanesa po madowo goruhonda? Gava sihonena. (b) Morwasinke ya karera nomulyo kowo ava tarere mafano goruhonda va pure evatero?

¹⁶ Vakuronambunga va liwapaikira kukuvatera. (Resa Jakopo 5:13-15.) Monomvhura dononzi, mudinkantu gomoBrasilia nga kondjo kurwanesa po madowo goruhonda. Age kwa tanta asi: “Na yi divire asi magazaro gange kuguvisa Jehova, nye na lifire nomuga kutantera wopeke malizuvho gange.” Mukuronambunga gumwe ga yi dimbwilire asi mudinkantu gwina ga hepere evatero yipo ga mu korangedere a hedere vakuronambunga. Age kwa tanta hena asi: “Nkenda ezi va likidire nge vakuronambunga kwa tetukisire nge ntani va kwete egano malizuvho gange. Awo kwa purakenene nawa maudigu gange. Kwa ruganesere Bibeli mokudiworokesa nge omu ga hara nge Jehova nokukanderera kumwe name. Eyi yiyo ya vaterere nge ni tambure mavyukiso gomoBibeli aga va pere nge.” Konyima zokunkondopeka elikwatakano lyendi naJehova, age kwa tanta asi: “Ame ngesi na dimburura mulyo gokupapara evatero.”

¹⁷ Nsene wa kara nonkareso zokutarera mafano goruhonda, papara usimbu evatero. Moomu ono kudira kupura evatero, yimo ngo kara mosiponga sokuhondera. Makura ngo koresa wopeke ntani nokuninkisa vantu va uyunge momudona Jehova. Wovanzi kwa pura evatero kovakuronambunga ntani kwa tambura evyukiso yipo va hafese Jehova nokukara ngorooro mombungakriste.—Episarome 141:5; Vahebeli 12:5, 6; Jakopo 1:15.

18. Yisinke ono tokomene kurugana?

¹⁸ Mouzuni waSatana muna vhuka unene madowo goruhonda. Nye vakareli vaJehova kukondja mokukara nomagazaro gokukuhuka. Jehova kuvahafera unene. Tu kareni pepi naJehova nokukwama mavyukiso gomoNonkango dendi ntani gomombungakriste. Nsene tu yi rugana, ngatu hafa ntani ngatu kara nezwi lyewa lyokomutjima. (Episarome 119:5, 6) Ano komeho apa ngava ka gusa po Satana, ngatu ka kara mouzuni woupe waKarunga wokukuhuka.