APA Anita ga ya kere gumwe goNombangi daJehova, mugara gwendi kwa handukire unene. * Nga mu nyokesa kuza komapongo ndi a tumbure edina lyaKarunga. Nkenye apa Anita nga tumbura edina Jehova, mugara gwendi nga handuka unene.

Anita, mugara gwendi nga mu silike kuronga vana vawo kuhamena Jehova ndi a va tware komapongo. Nga yi mu digopere kuronga vana vendi morwa ga hepere kuyirugana mehoramo.

Sihorokwa saAnita kulikida asi vamwe vemekoro kuvhura va ku nyokese kukarera Jehova. Ano pamwe kuvhura o ligwanekere nomaudigu gapeke ngwendi kuvera siruwo sosire ndi pamwe munoge ta fu ndi mugara goge ndi mukadoge. Ndi pamwe gemepata lyeni ta hageke kukarera Jehova. Momaukaro gangoso, yisinke no rugana yipo o twikire kukarera Jehova noulimburukwi?

Mupositoli Paurusa kwa tente asi: “One nyone kulididimika.” (Vahebeli 10:36) Yisinke nayi ku vatera o lididimike?

Nsene kuna kupita momaudigu, huguvara mwaJehova a ku vatere o lididimike. Kanderera kwendi. Oyo yiyo ga rugene Ana apa mugara gwendi ga fire hararasi. Awo kwa likwere nomvhura 30. Ana kwa tanta asi: “Apa mugara gwange ga zire koyirugana kapi ga ka tengwire. Nomvhura dendi kwa kere 52.”

Nampili ngomu Ana ga kere noyirugana yoyinzi, kapi ya gusire po ruguwo rwendi. Yisinke ga rugene? Age kwa tanta asi: “Ame kwa likwamberere kwaJehova a kwafe nge.” Ga yi divire asi Jehova ga mu vaterere morwa nkenye apa nga kanderere ga lizuvhire mbili momutjima. Ta tanta hena asi: “Na yi diva asi Jehova nga ka vhumbura mugara gwange.”—Vafilipi 4:6, 7.

Jehova kwa tumbwidira asi nga zuvha makanderero govakareli vendi. (Episarome 65:2) Age nga va vatera mwankenye eyi yipo va twikire kumukarera. Jehova nga ku vatera o mu limburukwe nampili momaudigu.

Pwa kara nkedi zimwe omu Jehova a tu vatere tu lididimike. Ga tu pa vapuli vakwetetu mombungakriste. Kuvhura tu lirongere ko kovapuli womoTesaronika omu va livaterere apa va va hepekere momudona. Awo ngava likorangeda-korangeda. (1 Vatesaronika 2:14; 5:11) Awo kwa vaterere vapuli vakwaawo va karere Jehova noulimburukwi pokuponga kumwe nokutulisa po ukaume nawo. Yisinke natu rugana yipo tu kare noulimburukwi ngwendi Vatesaronika?

Twa hepa kutulisa po ukame novapuli vakwetu nokulikorangeda-korangeda, unene po momaudigu. (Varoma 14:19) Mupositoli Paurusa kwa mu hepekere ntani kwa pitire momaudigu, nye Jehova ga mu pere nonkondo a lididimike. Jehova kwa ruganesere vapuli vakwawo va mu korangede. Paurusa kwa uyungire kuhamena vapuli owo asi: “Awo ngava kwafa nge unene.” (Vakorosi 4:10, 11) Awo kwa here Paurusa. Apa ga hepere ekwafo, awo kwa mu hengagwidire nokumukorangeda. Nove diworoka sikando simwe nampo vapuli  vakweni va uyungire ndi va rugene yuma eyi ya ku korangedere.

Jehova kwa tu pa vakuronambunga. Awo kuvhura va ku korangede nokukupa mapukururo gomawa gomoBibeli. Awo “ngwendi utjiliro wompepo ndi ngwendi uvando womvhura, ngwendi nomukuro domema mosirongo somburundu, ngwendi mundwire gemanya lyenene lyosirongo senota.” (Jesaya 32:2) Ayo kuhengagwida pokudiva asi vakuronambunga va liwapaikira kutuvatera. Nsene ono kara nomaudigu, hedera vakuronambunga. Awo ngava ku vatera o twikire kukarera Jehova.

Vakuronambunga kapi tava vhuru kukohonona po maudigu goge nagenye. Ntani nawo kapi va sikilira mo. (Yirugana 14:15) Nye ngo lizuvha mbili momutjima nsene o hedera mukuronambunga a ku kanderere po kwaJehova. (Jakopo 5:14, 15) Pasihonena, vakuronambunga kwa korangedere munazinyetugara moItalia ogu ga verere siruwo sosire. Age kwa tente asi: “Eharo nedinguro lyovakuronambunga kwa vaterere nge unene.” Nsene kuna kupita momaudigu, Jehova kuna hara o hedere vakuronambunga va ku vatere.

Nsene tu demenena kukarera Jehova, nga tu vatera. Yiyo ga rugene John, apa va mu kwatekere kankera age nomvhura dendi 39. Age kwa lizuvhire asi age munona simpe kapi una mu fire owo uvera. Ntani kwa kere nosinka samukadendi namunwendi ogu ga kere nonomvhura ntatu. Age kwa tanta asi: “Mukadange ga hepere kupakera mbili munwetu ntani name pokutwara nge kosipangero kouhaku wange.” Morwa nomutji edi nga nu, age nga lizuvhu eroroko lyenene nokukora-kora mezimo. Kapisi yooyo yelike. Oguhwe vaJohn nawo kwa verere unene va hepere muntu gokuvaveda.

Yisinke ya vaterere John nepata lyendi posiruwo oso somaudigu? Nampili ngomu John nga lizuvhu eroroko, ga vaterere epata lyendi li demenene kukarera Jehova. Age kwa tanta asi: “Nampili ngomu ya kere udigu, ose nga tu zi komapongo nagenye nokuza mokuzuvhisa ntani nokurugana nkenye apa ukareli wepata.” John ga lirongere mulyo gokunkondopeka elikwatakano lyendi naJehova. Nampili ngomu pomuhowo ga tukukire nokukara nosinka, konyima ga ya litulire. Ga yi divire asi Jehova ga mu here ntani ga mu pere nonkondo edi ga hepere. Jehova nove nga ku vatera nsene ono kara nosinka ndi nowoma. John kwa tanta asi: “Jehova nga ku pa nonkondo, ngwendi moomu ga di pere nge ame.”

Nsene kuna kupita momaudigu, diworoka nonkango daPaurusa asi: “One nyone kulididimika.” Huguvara mwaJehova pokukanderera kwendi. Likwatakana novapuli vakweni nokuhedera vakuronambunga ntani nokudemenena kukarera Jehova. Age nga ku vatera momaudigu aga ono kupita ngesi ntani naga gokomeho.