1. Apa atu zuvhisa, ngapi atu ruganesa nonkango demekanderero lya kara mwaMateusa 6:9-13?

VANTU wovanzi va diva nonkango demekanderero eli lya kara mwaMateusa 6:9-13. Apa atu zuvhisa, ose kuruganesa nonkango demekanderero eli mokuronga vantu asi Uhompa kuna kara epangero lyaKarunga eli ngali ninka evhu li kare paradisa. Ose hena kuruganesa nonkango “edina lyoge ava li pongore” mokulikida asi Karunga ga kara nedina ntani ana hara nose tu li pongore.—Mateusa 6:9.

2. Ngapi twa yi diva asi Jesus kapi ana tu harere tu rugurure nonkango dokulifana momakanderero getu?

² Jesus kuna tu harere tu rugurure nonkango odo mekanderero ngomu ava yi rugana wovanzi ndi? Hawe. Jesus kwa uyungire asi: ‘Nsenesi tomu kanderere, walye omu rugurura-rugurura nonkango.’ (Mateusa 6:7) Posiruwo simwe, apa ga rongere varongwa vendi omu nava kanderera, age kwa rugwilire ekanderero nye kapi ga ruganesere nonkango dokulifana. (Rukasa 11:1-4) Jesus kwa tu pa sihonena sekanderero mokuturonga eyi twa hepa kutumbura momakanderero getu.

3. Mapuro musinke natu lipura ngomu tuna kukonakona ekanderero lyosihonena?

 ³ Mosirongwa esi nesi sokukwama ko, natu ka konakona ekanderero lyosihonena. Ngomu natu ka yi rugana, lipura asi: ‘Ngapi ekanderero eli nali vatera nge ni kanderere nawa? Ame kuna kuparuka kuliza nekanderero olyo ndi?’

4. Yisinke azi tu diworokesa nkango “Guhyetu,” ntani ngapi Jehova ga kara Guhyetu?

⁴ Jesus kwa tamekere ekanderero pokuuyunga asi “Guhyetu.” Eyi kutudiworokesa asi Jehova guhya govanavazinyetu navenye mouzuni mudima. (1 Peturusa 2:17) Ava ga horowora Jehova va ka parukire meguru, age kwa va tambura ngovana vendi, Guhyawo monkedi zokulikarera. (Varoma 8:15-17) Ava ngava parukira pevhu nawo kuvhura kumutumbura asi “Tate.” Jehova kwa va pa mwenyo ntani kuvapakera mbili. Awo ngava va tumbura asi “vana vaKarunga” konyima zapa ngava sikilira mo ntani nokulimburukwa kwaJehova meheteko lyokuhulilira.—Varoma 8:21; Ehororo 20:7, 8.

5, 6. Uhwi musinke wouwa nava vhura vakurona kupa vana vawo, ntani yisinke nkenye munona ga hepa kurugana kouhwi ou? (Tara efano pepenuno 22.)

⁵ Apa vakurona ava va vatere vana vawo va kwate egano asi Jehova Guhyawo gemeguru nokuvaronga va kanderere kwendi, awo ngoso kuna kuvapa mauhwi. Mutareli gonombunga gomoAfrika Mbindakano kwa tanta asi: “Tupu vava hampurukire vana vetu wovakadona, ame ngani kanderere nawo nkenye masiku ntudi kapi nina kara pembo. Vana vetu kuuyunga asi kapi ava diworoka nonkango edi ngani tumbura momakanderero ogo. Nye awo kudiworoka nkareso zongwa neuyungokumwe lyewa naGuhyetu Jehova nomu ngava lizuvhu mbili nepopero. Tupu va tamekere kukura, ame kwa va korangedere va kanderere kuziguruka yipo ni zuvhe omu vana kupwagesa magano nomalizuvho gawo kwaJehova. Ezi kwa kere mpito zongwa zokuguma nomutjima dawo. Na vhulire kuvaronga va ture momakanderero gawo yininke yomulyo yemekanderero lyosihonena yipo ga tante yuma.”

⁶ Vana vendi kwa twikilire kuhedera Jehova pepi nampili apa va ya kulire. Awo ngesi va kwara ntani kuna kukarera Jehova mosirugana sosiruwo nasinye kumwe novagara vawo. Uhwi wouwa nava vhura vakurona kupa vana vawo pokuvaronga asi Jehova Muntu nawa-nawa ntani asi kuvhura va mu hedere pepi. Nye nkenye munona ga hepa kutulisa po mwene elikwatakano naJehova.—Episarome 5:11, 12; 91:14.

7. Mfumwa musinke twa kara nazo, nye yisinke twa hepa kurugana?

⁷ Twa kara nomfumwa zokudiva edina lyaKarunga ntani nokukara ‘vantu vedina lyendi.’ (Yirugana 15:14; Jesaya 43:10) Apa atu kanderere asi “edina lyoge ava li pongore,” ayo kutanta asi kudira kulinyatekesa. Ose kuhundira hena Jehova a tu vatere tu dire kurugana yininke yokumuswaukisa. Kapisi tu lifane navamwe womosiruwo saPaurusa ava va dilire kusikisa mo eyi ngava rongo. Paurusa kwa va tjangerere asi: “Mwarweni one Vajuda vana kuswawira edina  lyaKarunga, kuna kuliswaura mokatji kovapagani.”—Varoma 2:21-24.

8, 9. Gava sihonena omu Jehova a vatere ava va hara kupongora edina lyendi.

⁸ Ose kukondja mokuyererepeka edina lyaKarunga. Munazinyetukadi gomoNoroweyi ogu ga fisire mugara gwendi, age munwendi nomvhura dendi mbali kwa tanta asi: “Aso kwa kere siruwo sosidigu sili meparu lyange. Ame ngani kanderere nkenye apa, konyara nkenye vili, mokuhundira nonkondo dokupangera malizuvho gange yipo ni dire kupulisira Satana a swaure Jehova morwa matokoro gange gomadona ndi kudira kulimburukwa kwange. Ame kwa here kupongora edina Jehova, ntani na here munwange nga ka mone hena oguhwe moParadisa.”—Yisewe 27:11.

⁹ Jehova ga limbwilire makanderero gendi ndi? Nhi. Pokukara nkenye apa novanavazinyetu, age ga gwene ekorangedo. Konyima zonomvhura ntano, ga ya likwere nomukuronambunga. Munwendi, ogu ngesi ana kara nonomvhura 20, ga gwana ekuho. Age kwa tanta asi: “Ame nina hafa kweyi mugara gwange gomupe ga vatera nge ni rere munange.”

10. Ngapi edina lyaKarunga ngava ka lipongwerera?

¹⁰ Jehova nga ka pongwerera edina lyendi apa nga ka gusa po navenye wokumuswaukisa ntani wokunyoka upangeli wendi. (Resa Hesekiyeli 38:22, 23.) Posiruwo oso, vantu ngava ka sikilira mo, ano nkenye gumwe meguru nepevhu nga ka karera Jehova ntani nokukayererepeka edina lyendi lyokupongoka. Konyima zoyo, makura Guhyetu nga ka kara “gelike mupangeli goyininke nayinye.”—1 Vakolinte 15:28.

11, 12. Momvhura 1876, yisinke Jehova ga vaterere vantu vendi va kwate egano?

¹¹ Komeho Jesus a tengure meguru, varongwa vendi kwa mu pulire asi: “Hompa, ntaantani tupu ngesi o tengwidire Vaisraeli nonkondo dokupangera vene sirongo sawo ndi?” Jesus kwa limbwilire asi siruwo kapi sa sikire mo kwawo mokudiva apa ngau tameka kupangera Uhompa waKarunga. Age kwa tanterere varongwa vendi va demenene kosirugana somulyo sokuzuvhisa. (Resa Yirugana 1:6-8.) Age hena kwa va rongere va kanderere Uhompa waKarunga u wize nokundindira siruwo si sike mo. Eyi yiyo simpe atu kanderere asi Uhompa u wize.

¹² Apa siruwo saJesus sokupangera meguru sa sikire pepi, Jehova kwa vaterere vantu vendi va kwate egano mvhura ezi ngayi horoka. Mo-1876, Charles Taze Russell kwa tjenge sirongwa “Siruwoke ngasi haga siruwo sovapagani?” Age kwa fatwilire asi “nomvhura ntano-nambali” va tumbura mouporofete waNdaniyera kwa lifana ‘nosiruwo sovapagani’ esi va tumbura mouporofete waJesus. Sirongwa kwa fatwilire asi siruwo oso ngasi haga 1914. *—Ndaniyera 4:16; Rukasa 21:24.

13. Yisinke ya horokere 1914, ntani yisinke ayi likida yihorokwa youzuni kutunda 1914?

¹³ Momvhura 1914, yita kwa tamekere moEuropa ntani kwa lihanene mouzuni mudima. Morwa yita, nzara kwa didire.  Ano konyima zoyita, mo-1918, esakisa kwa dipagere wovanzi uzuni mudima kupitakana ava va fire koyita. Nayinye eyi kwa kere yimwe ‘yosidiviso’ esi ga geve Jesus. Sidiviso oso kwa likidire asi Jesus ana kara Hompa meguru 1914. (Mateusa 24:3-8; Rukasa 21:10, 11) Momvhura zoozo, age kwa ‘pwege ngwendi mufundi a ka funde.’ (Ehororo 6:2) Jesus kwa zuguminine Satana nonompepo dendi donondona pevhu. Konyima zoyo, uporofete ou yipo wa tamekere kusika mo: “Nye nane vakwetu ava mwa kara pevhu nemefuta, yeeyi Muzonaguli ana hegumukire kweni nehandu lyenene, morwa ana diva asi siruwo sendi esi sina hupu ko, sisupi!”—Ehororo 12:7-12.

14. (a) Morwasinke tuna kukandererera simpe asi Uhompa waKarunga u wize? (b) Sirugana musinke somulyo twa hepa kurugana ngesi?

¹⁴ Uporofete wemEhororo egaununo 12 kutuvatera tu kwate egano eyi yininke yoyidona ya tamekerere kuhoroka pevhu kutunda apa Jesus ga kere Hompa goUhompa waKarunga. Nampili ngomu Jesus ana kupangera meguru, Satana nage kuna kupangera pevhu. Nye ntaantani nga ka ‘fundilire’ pokukagusa po maudona nagenye pevhu. Nye posiruwo esi, ose simpe twa hepa kukanderera asi Uhompa woge au wize ntani nokutwikira kuzuvhisa kuhamena Uhompa. Sirugana setu kusikisa mo uporofete waJesus ou asi: “Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.”—Mateusa 24:14.

15, 16. Ayo ya gwanena po tupu kukanderera asi mpango zaKarunga zi sike mo pevhu ndi? Faturura.

¹⁵ Nomvhura 6 000 da ka pita, mpango zaKarunga kwa zi sikisire mo pevhu. Eyi yiyo Jehova ga uyungire asi nayinye ‘kwa mu zire komutjima.’ (Genesis  1:31) Satana yipo ga rwanesere, ano kutunda opo, wovanzi kapi ava rugana mpango zaKarunga. Nye naina, vantu wokusika koyiha mamiliyona ntantatu kuna kukarera Jehova. Awo kukanderera asi mpango zaKarunga zi sike mo pevhu ntani awo kurugana mpango zendi. Awo kuparuka monkedi ezi azi hafesa Karunga nokuronga wopeke Uhompa wendi.

¹⁶ Pasihonena, mutumwa gonomvhura 80 gomoAfrika ogu ga gwene ekuho 1948, kwa tanta asi: “Ame kukanderera asi vantu wonomutjima donongwa va va zuvhisire nokuvavatera va dive Jehova komeho u wize uhura. Ntani apa ani hara kuzuvhisira muntu, ame kuhundira unongo yipo ni gume mutjima gwendi. Ame kuhundira hena Jehova a tungike elituromo lyetu lyokupakera mbili ava atu lirongo nawo.” Munazinyetukadi ogu kwa vatera wovanzi va dive Jehova. Kuvhura o diworoke ko vakurupe vamwe ava ava rugana mpango zaJehova nomupampi ndi?—Resa Vafilipi 2:17.

17. Ngapi ono kulizuvha kuhamena eyi nga ka ruganena Jehova vantu komeho?

¹⁷ Ose ngatu twikira ngorooro kukanderera asi mpango zaJehova zi sike mo dogoro paapa nga gusa po Jehova nonkore dendi pevhu. Makura evhu ngali kara paradisa, ano vantu wovanzi ngava va vhumbura. Jesus kwa tente asi “siruwo ngasi wiza, apa ngava zuvha ezwi lyendi navenye ava va kara monontoko, makura tava pwaga mo.” (Johanesa 5:28, 29) Gazara tupu omu ngatu hafa pokukatambura vahali vetu! Karunga “nga kokota mahodi nagenye” komeho getu. (Ehororo 21:4) Sinzi ‘sovadona’ ngava va vhumbura morwa kapi va divire usili kuhamena Jehova naJesus. Ose ngatu ka hafera kukavaronga mpango zaKarunga yipo ngava ka gwane “mwenyo gwanarunye.”—Yirugana 24:15; Johanesa 17:3.

18. Yisinke nga ka pa Karunga vantu?

¹⁸ Apa ngau wiza Uhompa waKarunga, ngau pongora edina lyendi, ano navenye ngava ka karera Jehova mouumwe. Apa Karunga nga limburura yihepwa yokuhova yemekanderero lyosihonena, age nga ka pa vantu yininke nayinye eyi va hepa. Mosirongwa sokukwama ko, ngatu ka zogera yihepwa yimwe yomulyo eyi ga tu rongere Jesus tu kanderere.