1-3. Morwasinke Lana ga lizuvhire asi Jehova ga diva eyi ga hepa?

LANA, muzuvhisi gokukarerera age simpe kudiworoka eyi ya mu horokerere apa ga ka dingwire Ndovesiranda 2012. Age kulizuvha asi Jehova kwa limbwilire makanderero gendi gavali. Apa ga kere momahina gorutenda a ze kokapare, age kwa pulire Jehova a mu vatere a gwane muntu ogu na zuvhisira. Apa ga ka sikire kokapare, ta ka dimburura asi ndira zawo vana zi rundwilire kezuva lyokukwama ko. Lana kwa pulire Jehova a mu vatere morwa ga ruganesere yimaliwa yendi nayinye ntani ga hepere mararo.

² Tupu ga mene Lana kukanderera, ta zuvhu ezwi kuna kuzigida asi: “Ngapi Lana, yisinke ono kurugana ko oku?” Alyo kwa kere ezwi lyomumati ogu ngava dimbi nendi sure. Age kwa kere nozina nozinakuru, ava va mu sindikilire a ze koAfrika Mbindakano. Apa Lana ga va tanterere ukaro wendi, ozina nozinakuru womumati ogo yipo va mu zigidire a ka rare kembo lyawo. Awo kwa mu pulire mapuro  gomanzi kuhamena epuliro lyendi ntani nosirugana sendi souzuvhisi wokukarerera.

³ Ngurangura zokukwama ko, Lana kwa limbwilire mapuro gawo gomanzi kuhamena Bibeli. Makura ta va pura mauzera omu gumwe na vhura kugwanekera nawo nokulimburura mapuro gawo. Lana ga tengwire kembo, ntani age simpe muzuvhisi gokukarerera. Age kwa lizuvhire asi Jehova ga limbwilire makanderero gendi, morwa ga divire eyi ga hepere.—Episarome 65:2.

4. Yihepwa musinke natu ka zogera?

⁴ Apa atu kara noudigu, ayo ureru kwetu kukanderera kwaJehova a tu vatere, ntani age kuhafera makanderero getu. (Episarome 34:15; Yisewe 15:8) Nye ekanderero lyaJesus lyosihonena kuturonga asi pwa kara yininke yomulyo eyi twa hepa kutura momakanderero getu. Mosirongwa esi tatu ka zogera yihepwa yine yokuhulilira yemekanderero lyosihonena eyi nayi tu vatera tu limburukwe kwaJehova.—Resa Mateusa 6:11-13.

5, 6. Morwasinke Jesus ga tu rongerere tu hundire “nondya detu” dankenye ezuva, nampili tuna kara nonondya dononzi?

⁵ Jesus kwa tu ronga tu hundire “nondya detu,” kapisi “nondya dange.” Victor, mutareli gonombunga gomoAfrika Mbindakano kwa tanta asi: “Ame nkenye apa kukanderera kwaJehova asi name namukadange tu dire kukara nosinka sokugwana nondya ndi sokufutira mararo. Vanavazinyetu kutupakera mbili nkenye ezuva. Ame kukanderera hena asi ava vana kutuvatera va vhure kulididimikira yinka yeparu.”

⁶ Kuvhura tu kare nonondya dononzi, nye vanavazinyetu wovanzi awo ruhepo, ano vamwe kuvakundama yimpagwa. Kapisi kuvakanderera po tupu nye hena kuvhura tu rugane ko yuma mokuvavatera. Pasihonena, kuvhura tu va pe ko eyi tuna kara nayo. Kuvhura hena tu gave yigava yokosirugana souzuni mudima. Twa yi diva asi yigava yetu kuvatera vanavazinyetu.—1 Johanesa 3:17.

7. Ngapi Jesus ga tu rongere kuhamena ‘kudira kulipakera sinka kweyi yomungura’?

⁷ Konyima zapa Jesus ga rongere ekanderero lyosihonena, age kwa tu rongere mokudira kudemenena koyininke yopanyama. Age kwa tente asi Jehova kupakera mbili nombya domosanzara, ‘ngapi nye omu na dira kumudwareka mu pitakane wayi, one vepurogona? Yipo nye nomu dilira kulipakera sinka unene sokuninka asi “yisinke eyi natu dwara”?’ Makura ta uyunga hena asi: “Yipo nye nomu dilira kulipakera sinka kweyi yomungura.” (Mateusa 6:30-34) Kapi twa hepa kukara nosinka seyi yokomeho. Nye ya hepa kutugwanena po eyi twa kara nayo. Pasihonena, kuvhura tu kanderere tu gwane oku natu kara, noyirugana yokureresa epata ntani nounongo mokutura po matokoro gomawa kuhamena ukanguki wetu. Nye pwa  kara sininke somulyo unene twa hepa kutura mekanderero.

8. Yisinke adi tu diworokesa nonkango daJesus kuhamena nondya detu dankenye ezuva? (Tara efano pepenuno 27.)

⁸ Nonkango daJesus kuhamena nondya detu dankenye ezuva kutudiworokesa sininke simwe esi ga uyungire asi: “Muntu kapi a paruka komboroto zelike, muntu kuparuka kwankenye nkango ezi azi tundu mokana kaKarunga.” (Mateusa 4:4) Yipo nye twa hepera kukanderera asi Jehova a twikire kuturonga nokutupa eyi twa hepa yipo tu kare pepi nendi.

9. Ngapi omu va di fanekesa nonzo?

⁹ Jesus kwa tente asi: “O tu dongwenene po nonzo detu.” (Mateusa 6:12; Rukasa 11:4) Mo-1951, Ruhungu kwa fatwilire asi apa atu zono kwa fana ngwendi kuna gusa makongo kwaJehova. Age ga fira kumuhara nokumulimburukwa. Apa atu zono kwaKarunga, ose ngoso kapi tuna kumupa eyi ya mu fira. Ruhungu kwa tanta asi nsene a hara, kuvhura a hagekese po ukaume wetu nendi. Aro kwa gweda ko asi: “Karunga kwa nyenga nonzo.”—1 Johanesa 5:3.

10. Ngapi Jehova ga tu dongwenena po nonzo detu, ntani ngapi twa hepa kulizuvha?

 ¹⁰ Ee ruhafo musi kweyi Jehova ga tu pa nzambo zaJesus zosizoweseso zi tu zowore kononzo detu! Twa hepa edongwenenopo lyaJehova nkenye ezuva. Jesus kwa tu fira konyara nomvhura 2 000 da ka pita, nye simpe kugwanena mo uwa. Twa hepa kupandura Jehova nkenye apa kouhwi ou womulyo po. Kwato gumwe ogu ga vhulire kufuta sizoweseso mokutumangurura kononzo nokonomfa. (Resa Episarome 49:7-9; 1 Peturusa 1:18, 19.) Nonkango “o tu dongwenene po nonzo detu” kutudiworokesa asi moomu twa hepa ose sizoweseso novanavazinyetu nawo yimo va si hepa. Jehova kuna tu harere tu gazadare ko vanavazinyetu ntani nelikwatakano lyawo nendi. Eyi kwa kwatera mo kuvadongwenena po nsene vana tu zonene. Apa atu dongwenene po vanavazinyetu, ose ngoso kuna kulikida asi twa va hara. Ntani kulikida hena asi tuna kara norupandu kweyi ga tu dongwenena po Jehova.—Vakorosi 3:13.

11. Morwasinke ya karera nomulyo kudongwenena po wopeke?

¹¹ Morwa kapi twa sikilira mo, poyiruwo yimwe kutudigopera kudongwenena po wopeke. (Levitikus 19:18) Nsene tu tameke kuuyunga eyi vana tu zonene, vamwe womombungakriste kuvhura va lihameke mo ano eyi kukundama uumwe womombungakriste. Nsene tu pulisira eyi yi twikire, ta yi likida asi kapi twa kara norupandu kouhwi wosizoweseso waKarunga, makura kapi ngatu gwanena mo uwa. (Mateusa 18:35) Nsene tu dira kudongwenena po wopeke, Jehova nage kapi tatu dongwenene po. (Resa Mateusa 6:14, 15.) Nsene tuna hara Jehova a tu dongwenene po, twa ha twikira kurugana eyi ga nyenga.—1 Johanesa 3:4, 6.

12, 13. (a) Yisinke ya horokerere Jesus konyima zekuho? (b) Morwasinke natu dira kupa wopeke usima nsene tu gwira meheteko? (c) Yisinke ga likidire Jesus pokulimburukwa dogoro konomfa?

¹² Nonkango edi “walye o tu twara momaheteko” kutudiworokesa eyi ya horokerere Jesus konyima zekuho lyendi. Mpepo zaKarunga kwa mu twere momburundu yipo “a ka mu heteke Muzonanguli.” (Mateusa 4:1; 6:13) Morwasinke Jehova ga mu pulisire va mu heteke? Jehova kwa tumine Jesus pevhu mokuyakohonona po udigu ou wa horokere apa Adamu naEva va nyokere upangeli wendi. Urwanesi wawo kwa retesere po mapuro aga ga hepere siruwo mokugalimburura. Pasihonena, koyili ya lilimbire po monkedi omu Jehova ga ungire vantu ndi? Muntu gokusikilira mo kuvhura a limburukwe Jehova nsene a mu heteka “Muzonaguli” ndi? Ntani ya wapa kovantu mokulipangera vene ndi? (Genesis 3:4, 5) Apa Jehova nga ka limburura mapuro ogo nagenye,  nkenye gumwe meguru ndi pevhu nga ka diva asi Jehova gelike ga fira kupangera.

¹³ Jehova kwa pongoka, ntani kapi a heteke muntu a rugane udona. Satana yige “Muheteki.” (Mateusa 4:3) Satana kutuheteka mononkedi dokulisiga-siga. Nye nyamwetu natu tokora. Nkenye gumwe gwetu ga hepa kutokora kumunyokera po ndi hawe. (Resa Jakopo 1:13-15.) Apa Satana ga hetekere Jesus, age kwa mu nyokerere po pokutemwinina Matjangwa. Jesus kwa limburukwire Karunga. Nye Satana kapi ga hagekere. Age kwa ndindilire “tanko” siruwo sokuwapera mokuheteka hena Jesus. (Rukasa 4:13) Nye Jesus kwa limburukwire Karunga ngoMupangeli gwendi. Age kwa likidire asi muntu gokusikilira mo kuvhura kulimburukwa Jehova nampili moukaro woudigu. Satana kuheteka vasikuli vaJesus va dire kulimburukwa Jehova, kukwatera mo nove.

14. Morwasinke twa hepera kunyokera po maheteko?

¹⁴ Mapuro aga va retesere po kuhamena upangeli waJehova simpe ga hepa elimbururo. Posiruwo esi, Jehova kwa pulisira tupu Satana a tu heteke. Jehova kapi a “tu twara momaheteko.” Age ga yi diva asi kuvhura yi tu tompoke kumulimburukwa ntani ana hara kutuvatera. Nye kapi a tu sininike tu rugane youhunga. Age kufumadeka emanguruko lyetu. Age kutupulisira tu tokore nsene tuna hara kumulimburukwa ndi hawe. Mokudira kugwira meheteko,  twa hepa kurugana yininke yivali: kukara pepi naJehova ntani kukanderera a tu vatere. Ngapi Jehova a limburura makanderero getu gokunyokera po eheteko?

15, 16. (a) Maheteko musinke twa hepa kunyokera po? (b) Yilye natu pa usima nsene tuna gwire meheteko?

¹⁵ Jehova kutupa mpepo zendi zokupongoka zi tu vatere tu rwanese po maheteko gaSatana. Age ga tu pa hena Bibeli ntani nombungakriste mokuturondora koyiponga. Pasihonena, age kuturondora mokudira kuruganesa siruwo noyimaliwa nononkondo detu nadinye koyininke eyi twa dira kuhepa. Espen naJanne kwa tunga mosirongo saEuropa. Nomvhura dononzi, awo kwa kere vazuvhisi wokukarerera momukunda omu mwa hepere vazuvhisi. Apa va kere nomukeke, awo kwa hagekere uzuvhisi wokukarerera ano ngesi vana kara novanona vavali. Espen kwa tanta asi: “Ose kukanderera kwaJehova tu dire kugwira meheteko yipo tu ruganese siruwo setu koyirugana yoUhompa. Ose kuhundira Jehova a tu vatere tu kare nomupampi mosirugana sokuzuvhisa.”

¹⁶ Eheteko limwe twa hepa kunyokera po kuna kara kutarera mafano goruhonda. Nsene tu gwira meheteko eli, twa ha pa usima Satana. Morwasinke? Morwa Satana nouzuni wendi kapi ta vhuru kutusininika tu rugane udona. Vamwe kutarera mafano goruhonda morwa kapi ava nyokere po magazaro gomadona. Nye sinzi sovanavazinyetu kwa nyokera po eheteko eli, nose kuvhura tu li nyokere po.—1 Vakolinte 10:12, 13.

17. (a) Ngapi natu likida asi tuna hara Jehova a “tu popere koudona”? (b) Ehengagwido musinke lina kara pepi?

¹⁷ Ngapi natu likida asi tuna hara Jehova a “tu popere koudona”? Pokudira “kuhamena kouzuni” ndi ‘tu hare uzuni, ndi asi tu pake nomutjima detu moyininke eyi ya kara mouzuni.’ (Johanesa 15:19; 1 Johanesa 2:15-17) Ee, ehengagwido musi pokudiva asi Jehova nga ka gusa po Satana nouzuni wendi woudona! Nye posiruwo esi, twa hepa kudiworoka asi Satana ana handuka unene, “morwa ana diva asi siruwo sendi esi sina hupu ko, sisupi!” Age kuna kukondja mokutuhagekesa kukarera Jehova. Yipo nye twa hepera kukanderera asi Jehova a tu popere kwaSatana.—Ehororo 12:12, 17.

18. Yisinke natu rugana mokukaparuka ezonaguro lyouzuni waSatana?

¹⁸ Ono hara kukaparuka mouzuni wokudira Satana ndi? Twikira ngorooro kukanderera asi Uhompa waKarunga u wize, edina lyendi va li pongore ntani mpango zendi zi sike mo pevhu. Huguvara mwaJehova a ku pakere mbili nokukuvatera o mu limburukwe. Kondja mokuparuka kuliza nekanderero lyosihonena.