1, 2. (a) Elikwatakano musinke lya kara pokatji kokulimburukwa kwaJehova nokuhama konompata douzuni? (Tara efano.) (b) Kosinke ava limburukwa unene vantu wovanzi, nye yisinke ayi retesa po?

VAKARELI vaJehova kapi ava lihameke monompata edi adi gaununa vantu ngwendi muhoko ndi rudi ndi mpo. Morwasinke? Morwa va hara Jehova, nokumuhuguvara ntani kumulimburukwa. (1 Johanesa 5:3) Yi kare asi kupi twa tunga ndi twa tunda, ose kukwama nompango daKarunga. Kuhuguvara Jehova noUhompa wendi kuna kara sininke somulyo unene. (Mateusa 6:33) Eyi yiyo tuna kuuyungira asi ose “kapisi wouzuni.”—Resa Johanesa 17:11, 15, 16; Jesaya 2:4.

² Wovanzi naina, kulimburukwa unene kosirongo ndi korudi ndi konompo ndi kosipana sawo soudano. Eyi kuretesa po marumbasano mokatji kovantu nokulinyenya-nyenga ntani nokulidipaga. Nampili ngomu atu dili kulihameka monompata edi, ado kuvhura di tu kundame nomapata getu ndi kuvhura va tu ninkilire mo. Ayo ureru kuhama koruha rongandi nsene mapangero ga litulisa po etokoro lyokudira  kuhungama, morwa Karunga kwa tu sita nevhuliko lyokudiva youhunga neyi yepuko. (Genesis 1:27; Deuteronomium 32:4) Ngapi o lizuvhu nsene yi horoka yininke yokudira kuhungama? Ove kuhama koruha rongandi ndi hawe?

3, 4. (a) Morwasinke atu dilire kulihameka monompata? (b) Yisinke natu ka zogera mosirongwa esi?

³ Nsene nompata dina kara po, vantu wovanzi kuhama koruha rongandi morwa mapangero kuvatantera eyi va hepa kurugana vanamvharerwa. Nye ose kukwama Jesus. Ose kapi atu lihameke moupolitika ndi tu ze koyita. (Mateusa 26:52) Vakriste wousili kapi ava gazara asi ruha rumwe rouzuni waSatana ruwa kupita rukwawo. (2 Vakolinte 2:11) Kapi tuna hara kulihameka monompata douzuni ou.—Resa Johanesa 15:18, 19.

⁴ Morwa kapi twa sikilira mo, vamwe vetu kuvhura simpe tu kare nomalizuvho gomadona kuhamena vantu ava va hana asi worudi rwetu. (Jeremiya 17:9; Vaefeso 4:22-24) Mosirongwa esi, tatu ka zogera nompango edi nadi tu vatera tu nyokere po malizuvho aga aga gaununa vantu. Tatu ka zogera hena omu natu limburukwa koUhompa pokulideura nyamwetu tu gazare ngwendi moomu Jehova naJesus ava gazara.

5, 6. Apa ga kere Jesus pevhu, ngapi omu ga tere vantu womarudi gokulisiga, ntani morwasinke?

⁵ Nsene kuna kukudigopera kudira kuhama koruha rongandi, lipura asi: ‘Ngano Jesus, ngano yisinke na rugana?’ Apa ga kere Jesus pevhu, pwa kere nompata nomadiro kulizuvha pokatji koVajudeya noVagalireya ntani Vasamaliya. Gazara ko yihonena yimwe. Vajuda noVasamaliya kapi ngava uyunga kumwe. (Johanesa 4:9) Vafalisayi noVasadukayi kapi ngava ligwasana moyininke yoyinzi. (Yirugana 23:6-9) Vajuda ava va lirongere Veta ngava gazara asi awo mulyo kupita ava va dilire kulironga Veta. (Johanesa 7:49) Ano wovanzi kwa nyengere vafutisi womutero noVaroma. (Mateusa 9:11) Nye Jesus kapi ga lihamekere monompata edi. Nampili ngomu ga popere usili kuhamena Jehova ntani nokudiva asi Vaisraeli kwa kere muhoko gwaKarunga gokulikarera, kapi ga rongere varongwa vendi asi awo mulyo kupita wopeke. (Johanesa 4:22) Nye age kwa va rongere va hare vantu navenye.—Rukasa 10:27.

⁶ Morwasinke Jesus ga dilire kutara rudi rovantu wongandi asi rwa pita rukwawo? Morwa monkedi omu age noGuhwe ava lizuvhu kuhamena vantu. Jehova kwa sitire vantu yipo va zwide evhu nomarudi gokulisiga-siga. (Genesis 1:27, 28) Jehova naJesus kapi ava tara asi rudi ndi mvharerwa ndi eraka lyongandi lya pita makwawo. (Yirugana 10:34, 35;  Ehororo 7:9, 13, 14) Twa hepa kukwama sihonena sawo.—Mateusa 5:43-48.

7, 8. (a) Yilye natu kwatesa ko, ntani morwasinke? (b) Yisinke yokuvhura kukohonona po maudigu govantu?

⁷ Morwasinke atu dilire kukwatesa ko nkenye epangero lyovantu? Morwa ose kwa hama koupangeli waJehova. Age yige Mupangeli gwetu. MoEdeni, Satana kwa uyungire asi Jehova kapi a pangere nawa vantu. Satana kwa here vantu va pure asi nkedi zendi zokupangera ngwa kupita zaKarunga. Jehova ga tu pa emanguruko lyokutokora asi upangeli walye tuna hara. Ove ngapi? Ove kulimburukwa Jehova morwa wa pura asi upangeli wendi uwa ndi? Ove wa yi pura asi Uhompa wendi yiwo tupu welike wokukohonona po maudigu ndi? Ndi ove kugazara asi vantu kuvhura yi va tompoke mokulipangera vene pwa hana Karunga?—Genesis 3:4, 5.

⁸ Pasihonena, nsene gumwe a ku pura omu o gazara kuhamena mbunga zongandi, ngapi no limburura? Nombunga dimwe kuvhura di kare nelituromo ntani nokuvatera vantu. Nye ose twa yi diva asi Uhompa waKarunga yiwo welike ngau kohonona po maudigu govantu ntani nokugusa po udona. Ose hena kukwama mavyukiso gaJehova gomombungakriste mevango lyokuninka asi nkenye ogu a rugane yininke kuliza nomu ana kulizuvha. Eyi yiyo mbungakriste za karera mouumwe.

9. Maudigu musinke va kere nago Vakriste vamwe, ntani yisinke va hepere kurugana?

⁹ Posiruwo soVakriste wokuhova, Vakriste vamwe womoKolinte kwa litangwisire nokutanta asi: “Ame gwaPaurusa,” ogu gumwe asi, “Ame gwaKristusa.” Apa ga yi dimbwilire Paurusa kwa mu tukukisire. Ou kwa kere udigu wounene, ou wa donganesere mbili zomombungakriste. Makura tava pura asi: “Nani Kristusa kwa mu gaununa?” Yipo ga va vyukisire pokutanta asi: “Vakwetu, tani mu korangeda medina lyaHompa gwetu Jesus Kristusa, asi namuvenye mu lize mutjima gumwe mwanayinye eyi muna kuuyunga, kapisi mu lizira-zire; nye lipakerereni kumwe monondunge nomoyigazaro.” Ayo ya lifana nanaina. Mombungakriste mwa ha kara maligaunuko.—1 Vakolinte 1:10-13; resa Varoma 16:17, 18.

10. Yisinke Paurusa ga diworokesere Vakriste, ntani yisinke natu lirongera ko?

¹⁰ Paurusa kwa diworokesere Vakriste wovagwavekwa asi awo vanaUntungi weguru ntani asi va ha gazara “yininke yepevhu.” (Vafilipi 3:17-20) * Vagwavekwa awo vakarelipo vaKarunga naKristusa. Apa muntu a ka karera po sirongo sawo mosirongo sapeke, age kapi a lihameke momaudigu nomomaupolitika  gosirongo oso. Mokulifana, kapi nayi wapa kovagwavekwa mokulihameka momaudigu nomomaupolitika gouzuni ou. (2 Vakolinte 5:20) Ava vana hara kukaparuka pevhu nawo va hepa kulimburukwa Uhompa ntani nokudira kulihameka monompata douzuni ou.

11, 12. (a) Nkareso musinke twa hepa kunyokera po nsene tuna hara kulimburukwa koUhompa waKarunga? (b) Ngapi munazinyetukadi ga lizuvhire kuhamena vantu vamwe, ntani yisinke ya mu vaterere a litjindje?

¹¹ Sinzi sovantu mouzuni kulizuvha uwaawa pokukara novantu ava va kara nompo ntani nokuuyunga eraka lyokulifana. Awo kulizuvha mfumwa kuhamena kosirongo oku va tunda. Nye twa ha pulisira nkareso ezi zi tu kundame. Ose twa hepa kurundurura magazaro getu nokudeura ezwi lyetu lyokomutjima yipo tu dire kulihameka moyita ndi moupolitika. Ngapi natu yi rugana eyi?

¹² Pasihonena, Mirjeta * kwa mu hampurukira mosirongo esi ngava tumbura asi Yugoslavia. Momukunda ogu ga kulira, vantu kwa nyengere Vaseribiyani. Apa ga lirongere kuhamena Jehova, ta ya dimburura asi epuko kuhara rudi rumwe o nyenge rukwawo ntani asi Satana kuna hara vantu va linyenga-nyenge. Yipo ga tjindjire malizuvho gendi. Nye apa ya tamekere yita yomarudi momukunda, Mirjeta kwa tamekere kukara nomalizuvho gomadona kuhamena Vaseribiyani. Kapi ga here kuvazuvhisira. Age ga yi divire asi eyi kwa kere epuko, makura ta likwambere Jehova a mu vatere. Yipo ga mu hundilire hena a mu vatere a kare muzuvhisi gosiruwo nasinye. Mirjeta kwa tanta asi: “Kudemenena kosirugana sokuzuvhisa kuna kara sininke somulyo unene. Mokuzuvhisa, ame kuhetekera ko kuhonena eharo lyaJehova, ntani nokunyokera po magazaro gomadona.”

13. (a) Yisinke ya horokerere Zoila, ntani ngapi ga lizuvhire? (b) Yisinke natu lirongera ko kosihorokwa sendi?

¹³ Zoila munazinyetukadi gomoMeksiko kwa dirukilire koEuropa. Mombungakriste zawo kwa kara mo vanavazinyetu ava va tunda koruha rwapeke rwaLatina Amerika. Zoila kwa tanta asi vamwe kwa zogerere sirongo esi ga tunda nonompo ntani nonomusika daso. Kapi ya mu hafesere makura yipo ga kanderere kwaJehova a mu vatere a dire kulizuvha udona. Ngapi ngano twa lizuvhire ngano nyose twa kere moukaro owo? Vanavazinyetu vamwe simpe kukondja mokupangera malizuvho gawo apa vantu ava uyunga momudona oku va tunda. Kapi ya wapa kuuyunga ndi kurugana eyi nayi likida ngwendi asi vantu wongandi mulyo kupita wopeke. Kapi tuna hara kureta eligaunuko mombungakriste ndi kovantu wopeke.—Varoma 14:19; 2 Vakolinte 6:3.

14. Yisinke nayi ku vatera o lizuvhe ngwendi moomu a lizuvhu Jehova kuhamena vantu?

¹⁴ Natuvenye twa yi diva asi vantu vaJehova kwa kara mouumwe, yipo nye, twa ha lizuvha asi evango ndi sirongo simwe mulyo kupitakana sikwawo. Nye vekoro ndi vakaume woge kuvhura va ku ninkise o lizuvhe asi oku wa  tunda mulyo unene. Nampo poyiruwo yimwe kuvhura o gazarere vantu worudi rwapeke nonompo dapeke ndi veraka lyapeke momudona. Yisinke nayi ku vatera o tjindje magazaro goge? Teda ko omu Jehova a lizuvhu kuhamena vantu ava ava likangangere sirongo sawo ndi ava ava gazara asi awo mulyo kupita wopeke. Rugana epaparo kuhamena sirongwa esi melirongo lyanyamoge ndi moukareli wepata. Makura pura Jehova a ku vatere o lizuvhe ngwendi moomu a lizuvhu age kuhamena vantu.—Resa Varoma 12:2.

15, 16. (a) Ngapi vamwe nava lizuvha morwa twa lisiga nawo? (b) Ngapi vakurona nava vatera vana vawo va limburukwe Jehova?

¹⁵ Tuna hara kukarera Jehova nezwi lyewa lyokomutjima, eyi kutanta asi twa ha lihameka moyininke eyi ava lihameke varugani vakwetu ndi vanasure vakwetu ndi vanekoro ndi vamusinda, eyi ayi dili kuhafesa Jehova. (1 Peturusa 2:19) Jesus ga tu rondwere asi wopeke ngava tu nyenga morwa twa lisiga nawo. Diworoka asi sinzi sava ava tu rwanesa kapi va diva Uhompa waKarunga. Awo kapi ava kwata egano mulyo gokulimburukwa Uhompa.

¹⁶ Twa hepa kulimburukwa Jehova, yi kare asi yisinke nava rugana ndi nava uyunga wopeke. (Ndaniyera 3:16-18) Unene po, vadinkantu kuvadigopera mokulisiga novantu wopeke. Vakurona, vatereni vana veni va kare nouradi wokupopera epuro lyawo kosure. Vana veni  kuvhura va kare nowoma wokunyoka kukarerera erembe ndi kulihameka moyilika yosirongo. Posiruwo soukareli wepata, kuvhura mu lironge omu Jehova a lizuvhu kuhamena yininke eyi. Ronga vana woge omu nava faturura epuliro lyawo ntani monkedi zefumadeko. (Varoma 1:16) Ntani hena, vatera vana woge pokuza kovarongi vawo o ka va fatwilire epuliro lyetu.

17. Magazaro musinke twa hepa kunyokera po, ntani morwasinke?

¹⁷ Ose kuhafera nondya neraka nonompo ntani nevango lyetu. Ose kulizuvha asi eyi twa hara yiwa unene kupitakana eyi va hara wopeke ndi? Jehova kuna tu harere tu haferere yininke yokulisiga-siga eyi ga sita. (Episarome 104:24; Ehororo 4:11) Yipo nye, kapi nayi wapa kugazara asi vantu navenye va hare yininke yokulifana.

18. Morwasinke ya karera nomulyo tu tare wopeke moomu ava tara Jehova?

¹⁸ Jehova kuna harere vantu navenye va mu dive nokumukarera yipo va ka paruke narunye. (Johanesa 3:16; 1 Timoteusa 2:3, 4) Nsene vanavazinyetu va kara nomagano gokulisiga naga getu, twa hepa kukara neharo lyokupurakena komagano ogo nsene kapi gana kulilimba nompango zaJehova. Nsene tu yi rugana, ngatu hafera unene eparu ntani ngatu kara mouumwe novanavazinyetu. Ngomu tuna yi zogere, ose kapi atu lihameke monompata douzuni ou morwa kulimburukwa Jehova nokoUhompa wendi. Kapi atu linenepeke nokurumbasana mouzuni ou waSatana. Ee, rupandu musi twa kara naro asi Jehova ga tu ronga tu hare mbili nelinunupiko! Ose kulizuvha ngwendi muepisarome ogu ga tente asi: “Ee, yireru omu ya wapa ayo ya tovara yokukara vantu vaKarunga kumwe ngwendi vantu namumbyendi!”—Episarome 133:1.