1, 2. Yisinke za tamba nkango “ulyatero wonompadi” momatjangwa goRuhebeli?

JEHOVA KARUNGA kwa tanta asi: “Eguru yiso sipundi sange souhompa, ano evhu yilyo ulyatero wonompadi dange.” (Jesaya 66:1) Karunga kwa uyungire kuhamena “ulyatero wonompadi” dendi apa ga tente asi: ‘Ni ya yererepeke sitata sange.’ (Jesaya 60:13) Ngapi omu a yererepeke ulyatero wonompadi dendi ndi au fuwise? Yisinke ayi tanta eyi kwava vana kuparukira pevhu?

² Momatjangwa goRuhebeli nkango “ulyatero wonompadi” kwa zi ruganesere hena mokusingonona ntembeli zanare moIsraeli. (1 Histoli 28:2; Episarome 132:7) KwaJehova, ntembeli kwa fuwire unene morwa kwa kere evango lyoukareli wousili. Ntani ngava zi ruganesa mokuyererepeka Jehova apa pevhu.

3. Yisinke evango lyoukareli wousili mosiruwo setu, ntani siruwoke lya tamekere?

 ³ Mosiruwo setu, yisinke evango lyoukareli wousili? Kapisi etungo ngwendi ntembeli. Nye azo ntembeli zopampepo, ntani kuyererepeka Jehova kupitakana etungo. Yisinke ntembeli zopampepo? Alyo kuna kara ewapaiko lyaKarunga eli ali pulisire vantu va kare vakaume vendi ntani va mu karere. Ewapaiko eli kwa tompoka tupu morwa sizoweseso saJesus. Alyo kwa tamekere momvhura 29 apa Jesus va mu kuhwire ntani nokumugwaveka ngoMupristeli goMunene gontembeli zaJehova zopampepo.—Vahebeli 9:11, 12.

4, 5. (a) Yisinke vakareli vaJehova wousili vana hara kurugana kuliza nEpisarome 99? (b) Epuro musinke no lipura?

⁴ Ose twa kara norupandu kewapaiko lyaKarunga lyoukareli wousili. Twa hepa kulikida rupandu pokutantera ko wopeke kuhamena edina Jehova ntani nouhwi wendi wouwa wosizoweseso. Ose tuna hafa morwa Vakriste wousili wokupitakana pomamiliyona ntantatu kuyererepeka Jehova nkenye ezuva. Vantu wovanzi womomaukarelikarunga kugazara asi ngava ka yererepeka Karunga meguru konyima zapa ngava fa, nye vantu vaJehova va diva mulyo gokumuyererepeka pevhu ngesi.

⁵ Apa atu yererepeke Jehova, ose kutemwinina sihonena sovakareli wovalimburukwi vaKarunga ava va tumbura mEpisarome 99:1-3, 5 (Resa.) Vagara wovalimburukwi ngwendi Mosesa naArona ntani Samwere kwa kwatesere ko ewapaiko lyaKarunga lyoukareli wousili. (Episarome 99:6, 7) Naina, vagwavekwa apa pevhu kuna kukarera Jehova noulimburukwi moruha rwepevhu rontembeli zopampepo, komeho va ka kare vapristeli kumwe naJesus meguru. ‘Nonzwi dapeke’ dokusika komamiliyona kukwatesa ko vagwavekwa noulimburukwi. (Johanesa 10:16) Nombunga nadinye odo kukarera Jehova mouumwe. Nye lipura asi: ‘Ame kuna kukwatesa ko ewapaiko lyaJehova lyoukareli wousili ndi?’

6, 7. Udigu musinke wa tamekere mombungakriste zokuhova, ntani yisinke ya horokere ketamekero lyomvhura 1919?

⁶ Konyara nomvhura 100 da pitire po konyima zapa va tulisire po mbungakriste, varwanesi usili kwa tamekere ngamoomu va yi pumbire. (Yirugana 20:28-30; 2 Vatesaronika 2:3, 4) Mwaza siruwo, kwa ya digopere unene kudimburura vakareli wousili vaKarunga. Konyima zonomvhura mafere, Jehova kwa ruganesere Jesus mokudimburura ava ngava mu karere sili montembeli zendi zopampepo.

⁷ Ketamekero lyomvhura 1919, kwa ya dimbwilire ava ngava hafesa Karunga nokumukarera montembeli zendi zopampepo. Awo kwa tulire po marunduruko  yipo ukareli wawo a u tambure Jehova. (Jesaya 4:2, 3; Marakiya 3:1-4) Ano emoneko eli ga mwene mupositoli Paurusa kwa ya tamekere kusika mo.

8, 9. ‘Paradisa’ musinke ga mwene Paurusa memoneko?

⁸ Emoneko lyaPaurusa kwa li singonona mo-2 Vakolinte 12:1-4. (Resa.) Memoneko olyo, Jehova kwa likidire Paurusa sininke esi sa ya horokere. ‘Paradisa’ musinke ga mwene Paurusa? Muhowo, kuvhura kutamba koParadisa ezi ngazi ka kara pevhu. (Rukasa 23:43) Rwauvali, kuvhura kutamba koparadisa zokusikilira mo zopampepo mouzuni woupe. Rwautatu, kuvhura kutamba koukaro wemeguru wouwa ‘womosikunino saKarunga.’—Ehororo 2:7.

⁹ Morwasinke Paurusa ga tanterere asi “ga zuvha nonkango dokudira kuvhura kutanta, muntu kapi va mu pa evega lyokudiuyunga”? Morwa siruwo sokufaturura yininke yokutetukisa eyi ga mwene memoneko kapi simpe sa sikire mo. Naina, Jehova kutupulisira tu tantere ko wopeke kuhamena mauwa aga vana kuhafera ngesi vantu vendi.

10. Morwasinke paradisa zopampepo ntani ntembeli zopampepo ya dilira kulifana?

¹⁰ Ose kuuyunga kuhamena paradisa zopampepo, nye yisinke azi tanta? Azo ukaro wombili ou a gava Karunga kovantu vendi. Yipo nye, paradisa zopampepo ntani ntembeli zopampepo kapi ya lifana. Ntembeli zopampepo kuna kara ewapaiko lyaKarunga lyoukareli wousili. Paradisa zopampepo kuna kara vantu ava a hafere Karunga nokumukarera montembeli zendi zopampepo.—Marakiya 3:18.

11. Situmbukira musinke twa kara naso naina?

¹¹ Ayo kuhafesa pokudiva asi kutundilira mo-1919, Jehova kwa pulisira vantu wokudira kusikilira mo va tunge po paradisa zopampepo nokuzinkondopeka ntani nokuzikulika. Ove kuna kuvatera mosirugana esi sosiwa ndi? Ove kulikida rupandu kositumbukira sokurugana kumwe naJehova mokumuyererepeka apa pevhu ndi?

12. Ngapi twa yi diva asi Jesaya 60:17 kuna kusikilira mo? (Tara efano pepenuno 3.)

¹² Muporofete Jesaya kwa pumbire asi marunduruko nomawapukururo gomanzi ngaga horoka moruha rwepevhu rombunga zaJehova. (Resa Jesaya 60:17.) Vadinkantu ndi Vakriste wovape kwa resa ndi kwa zuvha tupu marunduruko aga. Nye pwa kara vanavazinyetu wovanzi ava va limonena marunduruko aga. Vakareli ava wovalimburukwi va yi pura asi Karunga kuruganesa Hompa gwetu, Jesus, a gendese nokuvyukisa mbunga zendi. Apa atu zuvhu yihorokwa yoVakriste vakwetu, epuro nehuguvaro lyetu mwaJehova kunkondopara.

13. Yisinke twa hepa kurugana kuliza nEpisarome 48:12-14?

 ¹³ Vakriste navenye va hepa kutantera ko wopeke kuhamena mbunga zaJehova. Ayo kutetukisa asi nampili ngomu twa kara mouzuni woudona waSatana, ose twa kara nombili nouumwe novanavazinyetu. Twa hepa kutantera ko ava “ngava ka kara ko” noruhafo kuhamena mbunga zaJehova ntani paradisa zopampepo.—Resa Episarome 48:12-14.

14, 15. Marunduruko musinke va tulire po konyima mo-1970, ntani ngapi ga kundama mbungakriste?

¹⁴ Vakurupe wovanzi womonombungakriste detu va limonena uwa womarunduruko aga rwa tura po ruha rwepevhu rombunga zaJehova. Awo kudiworoka apa nombungakriste da kere mepitisiro lyomukareli gombunga mevango lyombunga zovakuronambunga, ntani apa yirongo ya kere mepitisiro lyomukareli gomberewa zomutayi mevango lyoKomitiye zomberewa zomutayi ndi apa peresidente goWatch Tower Society nga gava mavyukiso mevango lyoMbungagendesi zoNombangi daJehova. Nampili ngomu vanavazinyetu owo va kere novavateli, nye muntu gumwe yige nga tokwere po mbungakriste ndi mberewa zomutayi ndi mberewa zonene. Konyima zomvhura 1970, marunduruko kwa ga tulire po yipo mbunga zovakuronambunga zi ture po matokoro mevango lyokugatura po muntu gumwe tupu.

 ¹⁵ Morwasinke marunduruko nagenye ogo ga retera uwa mbunga zaKarunga? Morwa kwa tundilira mekwatogano lyoMatjangwa. Mevango lyokuninka muntu gumwe a ture po matokoro, mbunga zaKarunga kwa gwanena mo uwa moyikara yoyiwa yovakuronambunga navenye, ndi vantu ava Jehova ga pa “mauhwi.”—Vaefeso 4:8; Yisewe 24:6.

16, 17. Marunduruko musinke ga kukundama, ntani morwasinke?

¹⁶ Gazadara ko komarunduruko gamwe gomoyimbapiratjangwa yetu yantani. Ose kuhanesa yimbapiratjangwa moyirugana yokuzuvhisa noruhafo. Gazadara ko omu atu ruganesa yikwakonentu mokuzuvhisa mbudi zongwa. Pasihonena, Intaneta jw.org kwa sika kovantu wovanzi yipo va gwane evatero eli va hepa. Marunduruko nagenye ogo, kulikida asi Jehova kwa hara unene vantu.

¹⁷ Nose kulikida rupandu kerunduruko eli va tura po komapongo getu yipo tu vhure kugwana siruwo soukareli wepata ndi selirongo lyanyamwetu. Ntani kuhafera marunduruko va tura po kuhamena yigongi yetu. Nkenye mvhura nayinye kuna kuwapa kupita pwanare! Ose kuhafera hena edeuro atu gwana konosikora dononzi doBibeli. Marunduruko nagenye ogo, kulikida asi Jehova kuna kugendesa mbunga zendi ntani nokufuwisa unene paradisa zopampepo!

18, 19. Ngapi natu vhura kugwederera kefuuro lyoparadisa zopampepo?

¹⁸ Jehova kwa tu pa situmbukira sokugwederera kefuuro lyoparadisa zopampepo. Ngapi natu vhura kuyirugana? Pokulihameka nomupampi mokuzuvhisa mbudi zongwa zoUhompa nokutulisa po varongwa wovanzi. Nkenye apa atu vatere muntu a kare mukareli gwaKarunga, ose ngoso kuna kuninka paradisa zopampepo zi ligwederere.—Jesaya 26:15; 54:2.

¹⁹ Ose hena kugwederera kefuuro lyoparadisa zopampepo apa atu kondjo mokuwapukurura yikara yetu yoSikriste. Eyi kuninkisa wopeke nawo va zi hafere. Ediwo lyetu lyoBibeli kapisi yilyo ali kokere vantu kombunga zaJehova noku kwaJesus, nye nkareso zetu zongwa.

20. Kuliza noYisewe 14:35, yisinke twa hepa kudiworoka?

²⁰ Jehova naJesus kuvahafesa pokumona paradisa zopampepo kuna kufuura unene. Ruhafo oru tuna kuhafera moparadisa zopampepo rununu kuruhetakanesa noru ngatu ka hafera moparadisa zokomeho. Twa hepa nkenye apa kudiworoka Yisewe 14:35, ezi za tanta asi: ‘Hompa kuhafera vakareli wonondunge.’ Tu kareni nonondunge ngomu tuna kukondja mokufuwisa paradisa zopampepo!