APA na kere nonomvhura ntane yipo na hagekere kukura. Naina ame nomvhura dange 43, nye musika gwange meta zimwe tupu. Apa vakurona vange va dimbwilire asi kapi ngani kura hena, yipo va korangedere nge ni rugane unene ni dire kukara nosinka somusika gwange. Mokulitura mo moyirugana, ngani tura sitafura kembo lyetu ni randese yikwenyango nokuwapeka evango. Eyi ngayi koko varandi wovanzi.

Kurugana unene kapi kwa rundwilire ukaro wange. Simpe ni musupi, ano nampili yininke yoyinunu ngayi digopere nge ngwendi kusika posifatura sovarandi. Nayinye kwa monekere ngwendi kwa yi pangerera vantu wovare. Ngani lizuvhu udona, nye ya ya rundurukire apa na kere nonomvhura 14.

Ezuva limwe, vakadi vavali woNombangi daJehova kwa ya rende enyango makura tava tameke elirongo lyoBibeli name. Konyima yipo na ya yi dimbwilire asi kudiva Jehova nositambo sendi mulyo kupitakana musika gwange. Oyo kwa vaterere nge unene. Episarome 73:28 kwa ya kere etjangwa eli na here. Ruha rokuhova rovelise ozo kwa tanta asi: “Yoyiwa po kwange ame, yokukara pepi naKarunga.”

Konyima epata lyetu tali ya diruka li tunde koCôte d’Ivoire li ze koBurkina Faso, ano eparu lyange kwa rundurukire unene. Oku twa hovere kukara, vantu ngava mono nge kositafura soyikwenyango. Nye oku vantu kwa ya va tetukisire musika gwange nokutarurura nge unene. Morwa oyo, yipo na tokwere kudira kupwaga ponze yivike yongandi. Makura yipo na diworokere omu ya wapa kwange kukara pepi naJehova. Ame kwa tjangerere komberewa zomutayi zoNombangi daJehova, yipo va tuminine nge muntu gouhunga. Nani, mutumwa, nga wiza nomoto mokuyadingura nge.

Moyitaura yetu nkenye apa kwa kere musenete netata. Nani, rorunzi nga liganda nomoto zendi pokuwiza a ya lironge name nye kapi ga hagekere. Ezuva limwe, yipo ga pitwire nge kepongo. Na yi divire asi ngesi vantu tava ka tarurura nge. Ntani asi pokuronda komoto tani gwederere komukumo gomoto ezi za kere nare udigu kupirura. Nye nampili ngoso nayi tambwire, pokudiworoka  ruha rwauvali rwetjangwa eli na here asi: “HOMPA Karunga yige a popere nge.”

Name naNani, poyiruwo yimwe ngatu liganderere metata, nye kapi ya tu dompesere mutjima morwa twa here mapongo. Eharo eli ngava likida nge moSinyanga nokulihetakanesa si netarururo eli ngani gwana ponze. Konyima zomakwedi ntane yipo na gwene ekuho.

Ruha rwautatu rwetjangwa eli na here kuna kara “ni udise nayinye eyi ga rugana.” Na yi divire asi ngayi digopera nge kuzuvhisa. Tani diworoka sikando sange sokuhova kuzuvhisa tunda embo zende embo. Vanona novakondi kwa tarwilire nge nokukwama nge ntani nokuhonena rugendeso rwange. Eyi kwa handukisire nge nye apa na diworokere asi nawo va hepa Paradisa moomu na zi hepa, eyi kwa vaterere nge ni lididimike.

Mokurerupika yininke, yipo na gwene ko moto zomakoso gatatu zokusingira komawoko. Mukwetu nga sindike nge konondundu ano posikunkumuko nage nga rondo. Nampili ngomu sirugana sokuzuvhisa sa digopere muhowo, konyima na ya si haferere unene, ano mo-1998 yipo na ya kere muzuvhisi gokukarerera.

Ame ngani lirongo Bibeli novantu wovanzi ano vane kwa gwene ekuho. Ntani, mumbyange gumwe nage ga tambura usili. Mokuzuvha omu wopeke vana kutura po ezokomeho, ayo kukorangeda nge. Ezuva limwe apa na verere maralia, tani gwana mbilive zokutunda koCôte d’Ivoire. Ame kwa tamekere kulironga nomurongwa gokounivesiti moBurkina Faso yipo na mu geve kwamunazinyetugara. Konyima murongwa ogo kwa dirukilire koCôte d’Ivoire. Ame na hefe mokuzuvha asi ana kara muzuvhisi gokudira kugwana ekuho.

Ngapi omu ani lirere nyamwange? Mbunga ezi azi vatere yirema kwa here kuronga nge kuhonza. Murongi gumwe ga dimbwilire ukaro wange nokutanta asi: “Twa hepa kukuronga kurugana nomfewa.” Va rongere nge. Ngesi ame kukuhwa nokurugana nomfewa membo. Vantu kwa hara nomfewa dange nokutantera ko wopeke. Ame ngani ruganesa moto zange mokutwarera varandi nomfewa.

Mo-2004, na hepere kuhageka uzuvhisi wokukarerera morwa kukora kokunene komugongo gwange. Nye ame simpe kuza mokuzuvhisa nkenye apa.

Vantu kutanta asi ame kwa divikwira kemenyamenyo lyange. Na kara nokonda zokuhafa morwa yoyiwa po kwange ame, yokukara pepi naKarunga.—Eyi ga simwitira Sarah Maiga.