1. Morwasinke epuro lya karera nomulyo? (Tara efano.)

WA LIPURA asi: ‘Jehova nga parura nge posiruwo soudigu wounene ndi?’ Mupositoli Paurusa kwa tente asi sikara somulyo mokukaparuka kuna kara epuro. Age kwa tente asi: “Nsene o pira epuro, nokuza si Karunga komutjima.” (Vahebeli 11:6) Oyo kuvhura yi zuvhike ngwendi ureru, nye usili wou asi “epuro kapisi lyankara muntu.” (2 Vatesaronika 3:2) Matjangwa ogo gavali, kutuvatera tu kwate egano omu ya kara nomulyo kunkondopeka epuro lyetu.

2, 3. (a) Morwasinke epuro lya karera nomulyo? (b) Magano musinke natu ka zogera?

² Mupositoli Peturusa kwa uyungire kuhamena ‘kuheteka’ epuro. (Resa 1 Peturusa 1:7.) Udigu wounene pepi una kara, ntani tuna hara kukara nepuro yipo ‘nomwenyo detu ngadi paruke.’ (Vahebeli 10:39) Yipo nye twa hepera kunkondopeka epuro lyetu. Tuna hara kukara mowo ngava ka gwana mfeto apa Jesus Kristusa, Hompa gwetu, nga horoka. Ngwendi mugara gwina ga likwamberere Jesus a mu pe ko epuro, nose kuvhura tu uyunge asi: “Na pura, kwafa nge mouhapuli wange!” (Marukusa 9:24) Ndi ngwendi vapositoli,  nose kuvhura tu uyunge asi: “Tu gwederera ko kepuro lyetu.”—Rukasa 17:5.

³ Mosirongwa esi, tatu ka zogera magano aga: omu natu tunga epuro lyetu, nomu natu likida asi epuro lyetu lya pama, ntani neyi natu yi pulira asi Karunga nga limburura ehundiro lyetu lyokugwederera ko kepuro.

4. Yihonena yalye nayi tu tumangeda tu nkondopeke epuro lyetu?

⁴ Morwa epuro mulyo unene, eyi yiyo Jehova ga tu pera yihonena yoyinzi moBibeli yepuro. Eyi kwa “yi tjangera asi yi tu ronge.” (Varoma 15:4) Sihonena saAbirahamu naSara naIsaka naJakopo naMosesa naRahabu naNgidiyona naBaraka ntani vamwe, kuvhura kututumangeda tu nkondopeke epuro lyetu. (Vahebeli 11:32-35) Kugusa ko yihonena yanare, twa kara hena noyihonena yokutetukisa yepuro yovanavazinyetu naina. *

5. Ngapi Eliya ga likidire asi ga kere nepuro lyokupama?

⁵ Sihonena simwe somoBibeli kuna kara somuporofete Eliya. Ngomu ono kukonakona sihonena sendi, koneka maukaro gatano omu ga likidire ehuguvaro lyenene mwaJehova. (1) Apa Eliya ga tanterere hompa Ahaba asi Jehova nga reta ruteni, age kwa uyungire nehuguvaro asi: “Yosili HOMPA Karunga gwaIsraeli, ogu ani kerere, yige na kugana asi, kapi ngali kara ko eme ndi mvhura monomvhura edi mbali nantatu, ntudi nyame ngani uyunga ko ntani.” (1 Vahompa 17:1) (2) Eliya novakwawo kwa kere nehuguvaro asi Jehova nga va pakera mbili posiruwo soruteni. (1 Vahompa 17:4, 5, 13, 14) (3) Eliya ga yi divire hena asi Jehova kuvhura a vhumbure muna mufisayendi. (1 Vahompa 17:21) (4) Age ga kere nehuguvaro asi Jehova na hwika nzambo nomundiro pondundu zaKarumeli. (1 Vahompa 18:24, 37) (5) Komeho mvhura zi roke, Eliya kwa tanterere Ahaba asi: “Zende o ka lye oku to nu, yeeyi ame kuna kuzuvha sipupiro somvhura zina kuwiza.” (1 Vahompa 18:41) Konyima zokukonakona yihorokwa eyi, kuvhura tu lipure asi: ‘Epuro lyange lya pama ngwendi lyaEliya ndi?’

6. Yisinke twa hepa kwaJehova mokutunga po epuro?

⁶ Mokumona asi epuro kapi tatu li tungu po pwanyamwetu, twa hepa kuhundira Karunga mpepo zokupongoka. Morwasinke? Morwa epuro ruha royiyimwa yompepo zokupongoka. (Vagarata 5:22) Ayo ya kara nomulyo kukwama mavyukiso gaJesus mokuhundira mpepo zokupongoka. Jesus kwa tumbwidilire asi Jehova nga ‘gava mpepo  zokupongoka kwava vana kumuhundira.’—Rukasa 11:13.

7. Singonona omu natu pameka epuro lyetu.

⁷ Nsene tuna kara nepuro lyokupama mwaKarunga, twa ha li zumbanesa. Alyo kuvhura kulihetakanesa nomundiro. Apa atu hwameke mundiro, ago kudumuka. Nye nsene kapi tuna kutura po yitare, tagu dimi nokuhupa po tupu enoto. Nye nsene tu twikira kutura po yitare, mundiro tagu twikire kutwera. Ayo ya lifana nepuro lyetu. Nsene tu twikira kuresa nokulironga Nonkango daKarunga nkenye ezuva, eharo lyetu koBibeli nokwaJehova ngali kura. Ano epuro lyetu ngali pama.

8. Yisinke ngayi ku vatera o tunge po epuro nokulipameka?

⁸ Kapisi yi ku gwanene po tupu eyi wa lirongere komeho o gwane ekuho. (Vahebeli 6:1, 2) Pasihonena, kulironga mauporofete aga ga sikire mo nare ngayi ku vatera o tunge po epuro nokulipameka. Kuvhura hena o konakone epuro lyoge pokuruganesa Nonkango daKarunga.—Resa Jakopo 1:25; 2:24, 26.

9, 10. Ngapi epuro lyetu ali pama pokukara (a) novakaume wovawa? (b) komapongo? (c) mokuzuvhisa?

⁹ Mupositoli Paurusa kwa uyungire asi Vakriste kuvhura va ‘likwafa-kwafe mepuro lyawo.’ (Varoma 1:12) Yisinke ayi tanta oyo? Apa atu kara novanavazinyetu kuvhura tu lipameke mepuro. Eyi kuhoroka apa atu kara nava va ‘heteka’ epuro lyawo. (Jakopo 1:3) Vakaume wovadona kuvhura kuzonagura epuro lyetu nye wovawa kulitunga. (1 Vakolinte 15:33) Eyi yiyo ava tu korangedere tu kare nkenye apa komapongo. Komapongo, ose ‘kulikorangeda-korangeda.’ (Resa Vahebeli 10:24, 25.) Ntani hena, mapukururo aga atu gwana komapongo kupameka epuro lyetu. Bibeli kutanta asi “epuro kutunda mokuzuvha mbudi.” (Varoma 10:17) Lipura asi: ‘Mapongo kuna kara ruha rweparu lyange ndi?’

¹⁰ Ose hena kupameka epuro lyetu pokuzuvhisa nokuronga wopeke mbudi zongwa zomoBibeli. Ngwendi Vakriste wokuhova, nose kuvhura tu lironge kuhuguvara mwaJehova pokuuyunga nouradi mwankenye ukaro.—Yirugana 4:17-20; 13:46.

11. Ngapi Karebu naJosuwa va kere nepuro, ntani ngapi natu va honena?

¹¹ Epuro lyetu mwaJehova kukura apa atu mono omu ana kutuvatera nokulimburura makanderero getu. Eyi yiyo ya horokerere Karebu naJosuwa. Awo kwa likidire epuro mwaJehova apa va ka nengere Sirongo sEtumbwidiro. Mwaza siruwo, epuro lyawo kwa ya peme ngomu va mwene omu Jehova ga va vaterere. Josuwa kwa tanterere Vaisraeli nomukumo asi: “Matumbwidiro nagenye gana siki mo; nalimwe si lya hupa ko.” Ano konyima kwa ya tente asi:  “Ano omu tjire nye HOMPA, tomu mu ruganene mouhungami nomousili.” Ntani ga gwedere ko asi: “Ame ko nepata lyange, ose kuna hara kuruganena HOMPA.” (Josuwa 23:14; 24:14, 15) Nsene tu huguvara mwaJehova nokumona omu ana kutuvatera, epuro lyetu ngali pama.—Episarome 34:8.

12. Ngapi natu likida asi twa kara nepuro lyokupama?

¹² Ngapi natu likida asi twa kara nepuro lyokupama? Murongwa Jakopo kwa tente asi: “Name ni ku likidise epuro lyange koyirugana.” (Jakopo 2:18) Yirugana yetu kulikida asi twa kara nepuro lyokupama. Monkedi musinke?

13. Ngapi atu likida epuro?

¹³ Kuzuvhisa kuna kara nkedi zongwa zokulikida epuro lyetu. Morwasinke? Morwa apa atu zuvhisa, kulikida asi twa yi pura asi uhura pepi ntani asi kapi nau ‘liranga.’ (Habakuku 2:3) Mokudiva asi epuro lyetu lya pama, kuvhura tu lipure asi: ‘Ame kutara kuzuvhisa asi mulyo ndi? Ame kukondja ni tantere ko wopeke kuhamena Karunga ndi? Ame kupapara nonkedi omu nani tamununa sirugana sange kwaJehova ndi?’ (2 Vakolinte 13:5) Tu likideni omu lya pama epuro lyetu pokugava ‘undipo va tu parure,’ ndi kuzuvhisa mbudi zongwa.—Resa Varoma 10:10.

14, 15. (a) Ngapi natu likida epuro meparu lyetu? (b) Simwitira sihorokwa esi sa likidire epuro.

¹⁴ Ose hena kulikida epuro mwaJehova ngomu atu lididimikire maudigu gemeparu mouzuni ou. Nsene ose kuna kuvera ndi kuna dompo mutjima ndi kuna guwu ndi kuna kuhepa ndi kuna kara nomaudigu gamwe,  twa hepa kuyipura asi Jehova naJesus ngava tu pa ‘ekwafo paapa tuna li hepere.’ (Vahebeli 4:16) Ose kulikida epuro mwaJehova apa atu mu hundire ekwafo. Jesus kwa uyungire asi kuvhura tu hundire Jehova a tu pe “nondya edi twa hepa.” (Rukasa 11:3) Yihorokwa yomoBibeli kugava umbangi asi Jehova kuvhura kutupa nkenye eyi tuna hepa. Pasihonena, posiruwo soruteni moIsraeli, Jehova kwa pere Eliya nondya nomema. Bibeli kuuyunga asi: “Sinene ngurangura, makorova taga mu retere mboroto nonyama, ngurova hena ngosikwawo, age kunwa kwendi moomo mokamukuro.” (1 Vahompa 17:3-6) Twa kara nehuguvaro asi Jehova kuvhura a tu pe eyi twa hepa.

¹⁵ Ose twa kara nehuguvaro asi nsene tu sikisa mo nompango domoBibeli, ngayi tu tompoka kurera epata lyetu. Rebecca, munazinyetukadi gomoAsia gokukwara, kwa faturura omu nage nepata lyendi va sikisire mo nompango domwaMateusa 6:33 ntani Yisewe 10:4. Age kwa tente asi mugara gwendi nga lizuvhu asi yirugana yendi kuna kukundama elikwatakano lyawo naJehova. Makura yipo ga sigire yirugana yendi. Nye awo kwa kere novanona vane, yipo va tamekere kuwapaika nondya va randese. Ngoyitundwamo, awo va kere  noyimaliwa yokugwanena po yokureresa epata. Age kwa tente asi: “Ose kwa lizuvhire asi Jehova kapi ga tu sigilire. Kapi ngatu rara nonzara.” Wa limonena sihorokwa sokulifana esi sa nkondopeka epuro lyoge ndi?

16. Yisinke nayi horoka nsene tu huguvara Karunga?

¹⁶ Twa ha gazara asi nsene tu kwama mavyukiso gaJehova kapi nga tu vatera. Paurusa kwa temwinina nonkango daHabakuku pokutanta asi: “Muntu ogu ali hungameke epuro kosipara saKarunga, yige a kara nomwenyo.” (Vagarata 3:11; Habakuku 2:4) Eyi yiyo natu karera nepuro lyokupama mogu na vhura kutuvatera. Paurusa kwa tu diworokesa asi: “Karunga kuvhura kurugana yoyinzi-yoyinzi, kupita nayinye eyi atu hundire neyi atu gazara, nononkondo dendi edi adi rugana mwetu.” (Vaefeso 3:20) Vakareli vaJehova kukondja mokurugana mpango zendi, nye va yi diva asi upirankondo pamwe kuvakundama. Ose tuna hafa asi Karunga nose ga kara ntani kutungika elituromo lyetu.

17. (a) Ngapi Jesus ga limbwilire vapositoli? (b) Morwasinke natu huguvarera asi Jehova nga limburura ehundiro lyetu lyepuro?

¹⁷ Kweyi tuna lirongo, nose kuvhura tu lizuvhe ngwendi vapositoli ava va pulire Jesus asi: “Tu gwederera ko kepuro lyetu.” (Rukasa 17:5) Jesus kwa limbwilire vapositoli vendi monkedi zokulikarera poPentekoste 33, apa va gwene mpepo zokupongoka ezi za va vaterere va kwate nawa egano sitambo saKarunga. Eyi kwa nkondopekere epuro lyawo. Yitundwamo? Awo kwa tamekere ezuvhiso lyenene eli lina kutwikira dogoro naina. (Vakorosi 1:23) Kuvhura Jehova a tu limburure nsene tu mu hundira a tu gwederere ko epuro lyetu ndi? Nhi, kuvhura, “ntene tu mu hundira eyi yokuliza nompango zendi.”—1 Johanesa 5:14.

18. Ngapi Jehova a tungike ava ava tungu epuro lyawo?

¹⁸ Nsene tu kara nepuro mwaJehova, ngayi mu hafesa. Nga limburura ehundiro lyetu lyokutugwederera ko kepuro, ano epuro lyetu ngali pama ntani ngatu ‘wapera Uhompa waKarunga.’—2 Vatesaronika 1:3, 5.