1, 2. Yisinke ayi ninkisa vantu va lisige noyikorama?

URUVI womuntu kwa likarera sili. Pasihonena, vantu va kara nevhuliko lyokulironga eraka. Eraka kutuvatera tu rese nokutjanga nokuuyunga ntani nokukwata egano eyi atu zuvhu. Alyo kutupa evhuliko lyokukanderera nokuhamberera Jehova. Nayinye eyi kutuninkisa tu lisige noyikorama. Vadiviunsitwe kapi va yi kwata egano omu uruvi wetu au rugana.

² Evhuliko lyetu lyokulironga eraka kuna kara uhwi wokutunda kwaJehova. (Episarome 139:14; Ehororo 4:11) Age kwa tu pa hena uhwi umwe ou au tu ninkisa tu lisige noyikorama. Vantu kwa va unga ‘va fane Karunga.’ Ose twa kara nemanguruko lyokutura po matokoro. Ntani kuvhura tu lironge eraka mokukarera Jehova ntani nokumuhamberera.—Genesis 1:27.

3. Yisinke ga tu pa Jehova ayi tu ninkisa tu kare nonondunge?

³ Pokutupa Bibeli, Jehova kwa tu likida omu natu mu karera ntani nomu natu mu hamberera. Bibeli nazinye ndi  maruha gazo kuna kara momaraka gokupitakana 2 800. Apa atu teda ko kweyi azi uyunga Bibeli, ose kutameka kugazara monkedi omu a gazara Karunga. (Episarome 40:5; 92:5; 139:17) Ntani magazaro gaJehova kutuninkisa tu kare nonondunge nokututwaredesa komwenyo gwanarunye.—Resa 2 Timoteusa 3:14-17.

4. Yisinke aku tanta kuteda, ntani mapuro musinke natu ka zogera?

⁴ Kuteda kutanta asi kudemenena kosininke nokugazadara ko unene ntani nokusikwata egano. (Episarome 77:12; Yisewe 24:1, 2) Ose kugwanena mo uwa apa atu teda ko kweyi atu lirongo kuhamena Jehova naJesus. (Johanesa 17:3) Mosirongwa esi tatu ka limburura mapuro gana kukwama ko: Ngapi omu natu resa monkedi omu nayi tu rerupira kuteda? Yisinke natu vhura kuteda? Yisinke nayi tu vatera tu tede ko nkenye apa ntani nokuyihafera?

5, 6. Yisinke nayi ku vatera o diworoke nokukwata nawa egano eyi ono kuresa?

⁵ Wa yi dimburura asi koyili yininke yimwe o rugana wa hana kugazadara ko, ngwendi kuhesera nokugenda ntani nokusinga mbasikora? Poyiruwo yimwe kuvhura kuresa wa hana kugazadara ko. Nampo kuvhura o tameke kugazara yininke yapeke posiruwo esi ono kuresa. Yisinke no rugana mokuyikandana po oyo? Ayo ya kara nomulyo kudemenena kweyi ono kuresa ntani neyi yina kutanta. Makura apa no mana kuresa paragarafu ndi siparatjangwagona mosimbapiratjangwa, pwizumuka nokuteda ko kweyi ono resa. Gazadara eyi ono lirongo, nokudivilisa asi ono yi kwata nawa egano.

⁶ Vadiviunsitwe va yi dimburura asi ureru kudiworoka sininke apa atu si resa kuziguruka. Musiti gwetu ga yi diva eyi ntani yiyo ga tantererere Josuwa mokuresa buke zoVeta ‘nokuziteda.’ (Resa Josuwa 1:8.) Kuresa Bibeli kuzigurura nayo ngayi ku vatera o gazadare ko nawa ntani nokuyidiworoka.

7. Siruwo musinke sosiwa kuteda ko koBibeli? (Tara efano pepenuno 21.)

⁷ Ayo kuhepa elituromo lyenene mokuteda ntani nokudemenena kweyi tuna kulironga. Eyi yiyo ya wapera kuteda posiruwo esi ono dili kuroroka ntani nekevango lyokulimwenenena, oku kuna dili madonganeso nkenye. Ndafita nga teda apa nga rara pouro masiku. (Episarome 63:6) Jesus, ogu ga sikilire mo, kwa horowere evango lyokulimwenenena mokuteda ntani kukanderera.—Rukasa 6:12.

8. (a) Yisinke natu vhura kuteda? (b) Ngapi Jehova a lizuvhu apa atu tantere ko wopeke kumuhamena?

⁸ Kugusa ko kweyi o resa moBibeli, pwa kara yininke yimwe eyi no vhura kuteda.  Pasihonena, nsene to mono sisitwa saJehova sokutetukisa, pwizumuka nokulipura asi: ‘Yisinke yina kuronga nge eyi kuhamena Jehova?’ Magazaro gangoso ngaga ku tumangeda o pandure Jehova mekanderero. Ntani nsene novakweni ono kara, ngo hara kuvatantera ko malizuvho goge. (Episarome 104:24; Yirugana 14:17) Jehova kupurakena ntani kuyihafera apa atu teda nokukanderera ntani nokutantera ko wopeke kumuhamena. Bibeli kututantera asi: “Komeho zendi yiko va tjangerere mobuke elikwamo lyava ava tjira HOMPA” oku tava teda ko kedina lyendi.—Marakiya 3:16.

9. (a) Yisinke Paurusa ga tanterere Timoteusa a tede ko? (b) Yisinke twa hepa kuteda nsene kuna kuliwapaikira kuzuvhisa?

⁹ Mupositoli Paurusa kwa tanterere Timoteusa a tede ko kombuuyungiso nokonkareso nekerongo lyendi omu nayi kundama wopeke. (Resa 1 Timoteusa 4:12-16.) Nove kuvhura o gazadare ko koyininke oyo. Pasihonena, wa hepa siruwo mokuteda nsene to liwapaikire elirongo lyoBibeli. Gazara murongwa goge ntani nokuhetekera ko kupapara mapuro ndi yifanekeso eyi ngayi mu vatera a ture po ezokomeho. Nsene o liwapaikira malirongo goge goBibeli monkedi zangesi, epuro  lyoge ngali nkondopara ntani ngo kara murongi gomuwa goBibeli. Ngo gwanena mo uwa nsene o gazadara ko komeho o ze mokuzuvhisa. (Resa Esira 7:10.) Nampo kuvhura o rese egaununo mobuke zoYirugana mokukuvatera o kare nomupampi mokuzuvhisa. Kuvhura o tede ko konovelise domoBibeli edi ono kugazara kuruganesa mezuva olyo ntani noyimbapiratjangwa ono kugazara kukahanesa. (2 Timoteusa 1:6) Gazara vantu womomukunda ntani neyi no vhura kuuyunga eyi nava hafera. Nsene o liwapaikira monkedi zangesi, ove ngo ruganesa nawa Bibeli pokuzuvhisira wopeke.—1 Vakolinte 2:4.

10. Yininke musinke yoyiwa natu vhura kuteda ko?

¹⁰ Yisinke hena yimwe eyi no teda ko? Nsene o didilika magano goyiuyungwa yomoSondaha neyi yopoyigongi, li tulira po siruwo sokugarugurura. Ngomu ono kuyirugana, lipura asi: ‘Yisinke nina lirongere ko koNonkango daKarunga ntani kombunga zendi? Kuvhura hena o tede ko konombudi domoRuhungu ntani domoAwake! nkenye kwedi neyi ava pwagesa poyigongi. Nsene to resa Yearbook, pwizumuka konyima zokuresa sihorokwa nokugazadara ko ntani litura mo nyamoge. Nsene to resa yimbapiratjangwa, tenda yitwa yoyinene ndi yi tjanga konontere. Eyi ngayi ku vatera nsene kuna kuliwapaikira etengwiropo ndi edinguro lyokugava ekorangedo ndi siuyungwa. Yomulyo po, nsene to hageke kuresa nokuteda ko kweyi ono resa, ove ngoso kuna kupulisira eyi ono resa yi gume mutjima goge, makura pandura Jehova koyininke yoyiwa eyi ono lirongo.

11. Simbapiratjangwa musinke somulyo unene twa hepa kuteda ko, ntani ngapi ngayi tu vatera eyi? (Tara nonkango dokonhi.)

¹¹ Yosili, Bibeli kuna kara simbapiratjangwa somulyo unene esi twa hepa kuteda. Nye ngapi nsene ezuva limwe kapi ngava ku pulisira o kare noBibeli? * Kwato gokuvhura kukukondera mokuteda koyininke eyi wa kwata momutwe, ngwendi matjangwa aga wa hara ndi nonsumo doUhompa. (Yirugana 16:25) Ntani mpepo zaKarunga ngazi ku vatera o diworoke yininke eyi wa lironga, eyi ngayi ku vatera o kare mulimburukwi.—Johanesa 14:26.

12. Nkedi musinke zimwe ono kugazara kuresa Bibeli nkenye ezuva?

¹² Nkedi musinke zimwe ono kugazara kuresa Bibeli nkenye ezuva? Momazuva gamwe gomosivike, nampo kuvhura o rese nokuteda kereso lyoBibeli lyomosivike lyoSikora zoUkareli. Mazuva gamwe kuvhura o rese Evangeli lyaMateusa neli lyaMarukusa  neli lyaRukasa ntani lyaJohanesa nokuteda ko kononkango daJesus noyirugana yendi. (Varoma 10:17; Vahebeli 12:2; 1 Peturusa 2:21) Ntani twa kara nosimbapiratjangwa sa singonona yihorokwa yaJesus yemeparu moomu ya horokere. Aso kuvhura si ku vatere o gwanene mo uwa mereso lyoge lyoMavangeli.—Johanesa 14:6.

13, 14. Morwasinke ya karera nomulyo kuteda kuhamena Jehova naJesus, ntani yisinke ngayi tu tumangeda tu rugane?

¹³ Kuteda kuhamena Jehova naJesus kuvhura kuvatera muntu a kure pampepo ntani a nkondopeke epuro lyendi. (Vahebeli 5:14; 6:1) Muntu ogu a ruganesa siruwo sosisesu mokugazadara kuhamena Jehova Karunga, kanunu-kanunu nga zumbanesa elikwatakano nendi. (Vahebeli 2:1; 3:12) Jesus kwa rondwere asi nsene tu dira kuzuvha ndi kutambura Nonkango daKarunga ‘nomutjima gomuwa gokulimburukwa,’ kapi ngatu di ‘pungura.’ Makura ureru ‘sinka souzuni ou neyivayiwo lyemona yi dipage nonkango daKarunga.’—Rukasa 8:14, 15.

¹⁴ Yipo nye, tu twikireni kuteda ko koBibeli ntani nokudiva nawa Jehova. Eyi ngayi tu tumangeda tu honene yikara yendi momunene. (2 Vakolinte 3:18) Ose kuvhura kutwikira kulironga yoyinzi kuhamena Guhyetu gemeguru ntani nokumuhonena dogoro narunye. Ee, eyererepeko musi kounene!—Muudisi 3:11.

15, 16. (a) Ngapi wa gwanena mo uwa mokuteda kuhamena Jehova naJesus? (b) Morwasinke poyiruwo yimwe ayi karere udigu kuteda, nye morwasinke natu twikilira?

¹⁵ Kuteda kuhamena Jehova naJesus ngaku kuvatera o twikire kukara mousili. Upampi woge ngau korangeda vanavazinyetu ntani novantu ava o gwana mokuzuvhisa. Ntani nsene o teda kweyi ga ku ruganena Jehova pokukupa nzambo zaJesus zosizoweseso, ngo twikira kutara elikwatakano lyoge nendi asi mulyo. (Varoma 3:24; Jakopo 4:8) Mark, munazinyetu gomoAfrika Mbindakano ogu ga kere modorongo nomvhura ntatu morwa epuro lyendi, kwa tanta asi: “Kuteda kuvhura kukuhetakanesa norugendo rokuhafesa. Moomu tuna kuteda ko koyininke yopampepo, yimo ngatu diva yininke yoyipe kuhamena Karunga gwetu, Jehova. Apa ani lizuvhu edompeso ndi sinka kuhamena meho, ame kugusa Bibeli nokuteda Matjangwa. Ame kulizuvha asi ayo kupa nge rufuwo.”

¹⁶ Eparu mouzuni ou kwa zura madonganeso aga aga tu ninkisa yi tu digopere kugwana siruwo sokuteda ko koBibeli. Patrick, munazinyetu gomoAfrika kwa tanta asi: “Magano gange ngwendi simbangu  sina zura nombudi dokulisiga-siga edi na hara nedi na dira kuhara, edi na hepa kuwapaika nkenye ezuva. Ngomu ani konakona eyi ya kara momagano gange, ame kudimburura ‘yinka’ eyi na hepa kutantera Jehova komeho ni tameke kuteda. Nampili ngomu ayi gusa siruwo komeho ni ka tameke kuteda yininke yopampepo, ame kulizuvha asi pepi naJehova nina kara. Eyi kumahura nondunge dange ni kwate nawa egano usili.” (Episarome 94:19) Yosili, ose kugwanena mo uwa mononkedi dokulisiga-siga apa atu resa Bibeli nokuteda ko nkenye ezuva.—Yirugana 17:11.

17. Ngapi no gwana siruwo sokuteda?

¹⁷ Vamwe kupinduka ngurangura va rese nokuteda ntani kukanderera. Vamwe kuyirugana pometaha. Nampo siruwo sosiwa kuresa Bibeli koge kuna kara masiku ndi komeho o ka rare. Vamwe kwa hara kuresa Bibeli ngurangura ntani hena komeho va ka rare. (Josuwa 1:8) Yomulyo po, kuruganesa nawa ‘nkenye karuwo ono gwana,’ kutanta asi kugusa siruwo esi o ruganesa koyininke ya hana mulyo yipo o tede ko koNonkango daKarunga nkenye ezuva.—Vaefeso 5:15, 16.

18. Yisinke Bibeli za tumbwidira kwava ava tede Nonkango daKarunga nkenye ezuva nokusikisa mo eyi vana kulironga?

¹⁸ Bibeli kwa tumbwidira asi Jehova nga tungika navenye ava ava tede Nonkango dendi ntani nokukondja mokusikisa mo eyi ava lirongo. (Resa Episarome 1:1-3.) Jesus kwa tente asi: “Ava ava zuvhu nonkango daKarunga nye tava di pungura, yiwo po verago.” (Rukasa 11:28) Nye yomulyo po, kuteda koNonkango daJehova nkenye ezuva ngayi tu vatera tu paruke monkedi ezi azi mu retere efumano. Nsene tu yi rugana, Jehova nga tu tungika tu gwane ruhafo ngesi, ano mouzuni woupe mwenyo gwanarunye.—Jakopo 1:25; Ehororo 1:3.