KUTUNDILIRA mo-1992, Mbungagendesi kwa horowora vakuronambunga wokukura pampepo va va vatere va sikise mo sirugana sawo. * Vavateli owo, ava va hamena ‘kononzwi dapeke,’ kuvatera Mbungagendesi. (Johanesa 10:16) Awo kukara mepongo lyankenye sivike kosirugana esi va va pa. Situmbukira sawo sokugava nombudi edi dina hepa po nokugava magano. Mbungagendesi yizo azi tura po matokoro, ano vavateli vawo kuvakwafa yipo va sikise mo matokoro ogo. Awo vanavazinyetu ava va lizambera kurugana nkenye sirugana vana va pe. Awo kuza novahameni womoMbungagendesi koyigongi yoyinunu neyi yoyinene. Ntani pamwe kuvatuma va ka dingure Nobeteli ngovakarelipo womberewa zonene.

Munazinyetu gumwe ogu ga kara muvateli kutundilira 1992 kwa tanta asi: “Apa ani sikisa mo yirugana yange, Mbungagendesi kudemenena momunene konondya dopampepo.” Munazinyetu gumwe hena ogu ga vatera nomvhura 20 kwa tanta asi: “Aso kuna kara situmbukira sosinene po esi na dilire kundindira.”

Mbungagendesi kwa gava yirugana yoyinzi kovavateli vazo ntani azo kuyihafera eyi ava rugana vanavazinyetu owo wovalimburukwi. Ngano natuvenye tu fumadeke “vantu wokufana ngoso.”—Vafilipi 2:29.