1, 2. Ngapi Matjangwa aga likida mulyo gweharo?

EHARO, sikara sosinene saJehova Karunga. (1 Johanesa 4:16) Sisitwa sendi sopomuhowo, Jesus Kristusa, kwa kere meguru nomvhura dononzi noGuhwe ntani ga dimbwilire asi Jehova age Karunga geharo. (Vakorosi 1:15) Jesus kwa likidire eharo lyokulifana apa ga kere meguru nepevhu. Yipo nye twa karera nehuguvaro asi Jehova naJesus ngava pangera monkedi zeharo.

² Apa gumwe ga pulire Jesus kuhamena sipango sosinene po, Jesus kwa tente asi: “O hare Hompa Karunga goge nomutjima goge nagunye nomwenyo goge nagunye nonondunge doge nadinye. Esi yiso sipango po sosinene sokuhova. Ano sikwawo sauvali, esi sa hura pwesi, yiso esi asi, ‘Ano a kare mukweni, o mu hare moomu wa lihara nyamoge.’”—Mateusa 22:37-39.

3. Yilye ‘mukwetu’?

 ³ Ayo mulyo kulikida eharo kovakwetu. Jesus kwa tente asi twa hepa kuhara Jehova novakwetu. Nye yilye ‘mukwetu’? Nsene wa kwara, mukweni gomunene kuna kara mugara goge ndi mukadoge. Vanavazinyetu womombungakriste ntani novantu ava atu zuvhisire nawo kuna kara vakwetu. Mosirongwa esi, tatu ka lironga omu natu likida eharo kovakwetu.

4. Ngapi nonkwara nayi di tompoka naina?

⁴ Jehova kwa ungire Adam naEva nokuvatura kumwe. Awo kwa kere valikwali wokuhova. Karunga kwa va harere va hafere nonkwara dawo ntani va zwide evhu novana vawo. (Genesis 1:27, 28) Nye apa va dilire kulimburukwa kwaJehova, nonkwara dawo kwa zonaukire, ntani nzo nonomfa kwa ya lihanene movantu navenye. (Varoma 5:12) Nampili ngoso, naina nonkwara kuvhura kutompoka. MoBibeli, Jehova, Mutulisipo gononkwara, kwa gava mavyukiso gomawa kovalikwali.—Resa 2 Timoteusa 3:16, 17.

5. Ngapi lya kara eharo nomulyo mononkwara?

⁵ Bibeli kulikida asi eharo mulyo mokukara nelikwatakano lyewa. Eyi usili mononkwara. Mupositoli Paurusa kwa singonona eharo lyosili apa ga tente asi: “Eharo kwa kwata nedidimiko nounambili; eharo kapi lya paka mfudu, eharo kapi ali likanganga, kapi ali litumbu, kapi ali reta yoyidona, kapi ali papara yeeyi lya hara lyene, kapi ali nyegenya, kapi lya paka nkoko, kapi ali hafere udona, nye alyo kuhafa kumwe nousili. Eharo kwa kwata nayinye: kupura nayinye, kuhuguvara nayinye, kudidimika nayinye. Eharo kapi ali haga, nye uporofete ngau haga, ndi maraka nago ngaga haga, ndi ediwo nalyo ngali haga.” (1 Vakolinte 13:4-8) Apa atu gazara nonkango daPaurusa ntani nokuditura pasirugana, ose kuvhura kukara nononkwara doruhafo.

6, 7. (a) Yisinke azi uyunga ko Bibeli kuhamena mupangeli? (b) Ngapi mugara goMukriste na tekura mukadendi?

⁶ Jehova kwa tokwere ogu na kara mupangeli gemepata. Paurusa kwa faturura asi: “Nye ame kuna mu harere mu kwate egano lyeyi asi, Kristusa yige mupangeli gwankenye mugara, mugara mupangeli gomukadi, ano Karunga yige mupangeli gwaKristusa.” (1 Vakolinte 11:3) Nye Jehova kuna hara nturagumbo a kare mupangeli geharo, kapisi gonyanya. Jehova mwene age Mupangeli geharo gombili. Eyi yiyo Jesus ga fumadekerere upangeli waKarunga nokutanta asi: ‘Ame kwa hara Tate.’ (Johanesa 14:31) Jehova ngano kwa kere mupangeli gonyanya, Jesus ngano kapi ga uyungire nonkango odo.

⁷ Nampili ngomu mugara ga kara mupangeli gomukadi, Bibeli kumutantera a fumadeke mukadendi. (1 Peturusa 3:7) Ngapi nayi rugana oyo? Ga hepa kudiva yihepwa yamukadendi  nokufumadeka eyi ga hara. Bibeli kutanta asi: “Vagara, omu hare vakadi veni, moomu ga hara Kristusa ngereka, yiyo ga lizumbilira mwarwazo monomfa.” (Vaefeso 5:25) Jesus ga geve eparu lyendi morwa vasikuli vendi. Nsene mugara a kara mupangeli gomuwa ngwendi Jesus, mukadendi nga mu hara nokumufumadeka ntani nokutambura matokoro gendi.—Resa Titusa 2:3-5.

8. Ngapi atu lizuvhu kuhamena vanavazinyetu?

⁸ Naina, vantu mamiliyona mouzuni kukarera Jehova. Awo vanavazinyetu wovagara nava wovakadi. Ngapi atu lizuvhu kuvahamena? Bibeli kutanta asi: “Atu ruganeneni navenye uwa, unene po vapuli vakwetetu.” (Vagarata 6:10; resa Varoma 12:10.) Mupositoli Peturusa kwa tjenge asi ‘kulimburukwa kousili’ kwa hepa kutundilira ‘keharo lyosili lyokuhara vakwetetu.’ Peturusa kwa tanterere Vakriste asi: “Unene po kareni neharo lyenene lya hara mukweni a ku hare.”—1 Peturusa 1:22; 4:8.

9, 10. Morwasinke vantu vaKarunga va karera mouumwe?

⁹ Mbunga zetu za likarera. Morwasinke? Morwa twa kara neharo lyenene kovanavazinyetu. Unene po, morwa twa hara  Jehova nokulimburukwa konoveta dendi, age kutuvatera pokuruganesa mpepo zendi zokupongoka. Azo kutuvatera tu kare mouumwe novanavazinyetu.—Resa 1 Johanesa 4:20, 21.

¹⁰ Paurusa kwa nkondopekere mulyo gokukara neharo ngoVakriste pokutjanga asi: “Kareni nonkenda nombili nomalinunupiko nekuruko nezaverero. Omu lididimike-didimikire, tomu ligusa-gusire po, nsene muna lizono namukweni. Omu dongwenene po vakweneni moomu ga mu dongwenena po Hompa. Mwanayinye kareni neharo eli lya kwata nayinye kumwe, nomalikwata-kano gene-gene.” (Vakorosi 3:12-14) Ee, rupandu musi twa kara naro rokukara neharo eli “lya kwata nayinye kumwe,” yi kare asi kupi twa tunda!

11. Yisinke ayi dimbwilisa mbunga zaKarunga?

¹¹ Eharo lyosili nouumwe wovakareli vaJehova kuvadimbwilisa ngovantu ava ava rugana ukarelikarunga wousili. Jesus kwa tente asi: “Nsene mu lihara-hara, yipo ngava divira vantu asi one sili varongwa vange.” (Johanesa 13:34, 35) Ntani mupositoli Johanesa kwa tjenge asi: “Apa yipo nye ava va dimbwilire vana vaKarunga nava woMuzonaguli: ogu a dili kurugana youhunga nogu ga dira kuhara mukwawo, kapisi munwaKarunga. Ezi yizo mbudi mwa zuvha nakwanare asi, atu lihara-hareni.” (1 Johanesa 3:10, 11) Eharo nouumwe woNombangi daJehova kuvadimbwilisa ngovasikuli vaKristusa wousili, vantu ava ana kuruganesa Karunga va zuvhise mbudi zongwa zoUhompa mouzuni mudima.—Mateusa 24:14.

12, 13. Yisinke lina kurugana “emukurumbunga” naina, ntani yisinke ngali ka limonena?

¹² Vakareli vaJehova naina kwa hamena ‘mekurumbunga’ eli lya tundilira komaruha gokulisiga-siga mouzuni, ntani alyo kukwatesa ko Uhompa waKarunga. Awo “vaava va tunda momahepeko gomanene, yiyo va kuhwa yikoverero yawo va yi zeresa kohonde zoNzwigona” pokutura epuro monzambo zaJesus zosizoweseso. Ava va hamena ‘mekurumbunga’ kwa hara Jehova naMunwendi, ntani nokumukarera “mutenya nomasiku.”—Ehororo 7:9, 14, 15.

¹³ Jehova ntaantani nga ka zonagure po uzuni woudona ‘poudigu wounene.’ (Mateusa 24:21; resa Jeremiya 25:32, 33.) Nye age nga popera vakareli vendi nokuvatwara mouzuni woupe morwa ga va hara. Ngomu ga yi tumbwidilire nomvhura 2 000 da ka pita, age “nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena.” Ove kuna kundindira nononkondo  mokukaparuka moParadisa apa ngava gusa po udona noruhepo ntani nonomfa ndi?—Ehororo 21:4.

14. Kupi lina huru emukurumbunga?

¹⁴ Ketamekero lyomazuva gopouhura mo-1914, vakareli vaKarunga kwa kere tupu wovasesu. Mbungagona ozo zovagwavekwa kwa zi tumangedere eharo lyokuhara vakwawo ntani nevatero lyompepo zaKarunga zokupongoka, zi zuvhise mbudi zongwa zoUhompa nampili momaudigu. Yitundwamo? Naina, emukurumbunga lyovantu ava va kara nehuguvaro lyepevhu kuna kulipongaika. Pana kara Nombangi dokusika konyara 8 000 000 edi da kara monombungakriste 115 400 mouzuni mudima, ntani sivaro sado kuna kuligwederera. Pasihonena, momvhura 2014 Nombangi dokupitakana 275 500 kwa gwene ekuho. Eyi kutanta asi nkenye sivike konyara vantu 5 300 kugwana ekuho.

15. Vantu vangapi vana kuzuvha mbudi zongwa naina?

¹⁵ Ayo kutetukisa mokumona asi vantu wovanzi kuna kuzuvha mbudi zongwa zoUhompa. Naina yimbapiratjangwa yetu kuyigwana momaraka gokupitakana 700. Ruhungu kuna kara sifo ava hanesa po unene mouzuni mudima. Yifo yokupitakana 52 000 000 kuyinduruka momaraka 247 nkenye kwedi. Ntani buke zetu zelirongo Yisinke azi rongo Bibeli sili? kwa zi nduruka momaraka gokupitakana 250. Enduruko lyazo kwa sika 200 000 000.

16. Morwasinke mbunga zaJehova zina kutwikilira kuligwederera?

¹⁶ Mbunga zetu kuna kutwikira kuligwederera morwa twa pura mwaKarunga ntani nokutambura Bibeli ngoNonkango dendi. (1 Vatesaronika 2:13) Ose kutwikira kuhafera matungiko gaJehova nampili ngomu Satana a tu rwanesa.—2 Vakolinte 4:4.

17, 18. Ngapi Jehova ga tu harera natu lizuvha kuhamena ava ava dili kumukarera?

¹⁷ Vantu kutambura mbudi zetu mononkedi dokulisiga-siga. Vamwe kuzipurakena, ano vamwe kuzinyoka. Ngapi Jehova ga tu harera natu lizuvha kuhamena ava ava dili kumukarera? Nampili ngomu vamwe ava dili kutambura mbudi zetu, ose kukwama epukururo lyomoBibeli. Azo kutanta asi: “Nonkango deni adi kare nkenye apa donongwa donontovara domungwa, asi mu dive kulimburura nkenye ogu ana kumupura.” (Vakorosi 4:6) Nkenye apa natu limburura ogu ana kutupura ehuguvaro lyetu, twa hepa kuyirugana “nombili nefumadeko” morwa twa hara vakwetu.—1 Peturusa 3:15, 16.

¹⁸ Nampili apa vantu ava handuka ndi ava nyoka mbudi zetu, ose simpe kulikida eharo kovakwetu ntani kukwama sihonena saJesus. Apa Jesus ‘ngava mu swaura, age kapi nga ninki asi nage a va swaure. Napa si ngava mu hepeke, kapi nga handuka.’ Nye Jesus kwa huguvarere mwaJehova. (1 Peturusa 2:23) Ose nkenye apa kulikida elinunupiko pokusikisa mo epukururo eli asi: “Walye omu lihokwa-hokwa moudona, ndi mu lituka-tuke. Nye pevega lyayo omu liswera-swere.”—1 Peturusa 3:8, 9.

19. Ngapi natu tekura nonkore detu?

¹⁹ Elinunupiko kutuvatera tu limburukwe mpango zomulyo ga tu pa Jesus. Age kwa  fatwilire asi: “One mwa zuvha sa omu va tanta asi, ‘O hare mukweni, to nyenge gonkore zoge.’ Nye ame tani mu tantere asi, omu hare wonkore zeni, omu va ruganene yoyiwa ava va mu nyenga, one tomu kandererere mo ava ava mu rundire oku tava mu hepeke, asi omu kare mu vana vaGuhyeni gemeguru. Age kupumisira ezuva vadona novawa, age hena kurokesera mvhura vahungami novanzoni.” (Mateusa 5:43-45) Ngovakareli vaKarunga, twa hepa kuhara nonkore detu yi kare asi ngapi omu dina kututekura.

20. Ngapi tuna yi diva asi vantu navenye ngava ka hara Jehova novakwawo? (Tara efano pepenuno 21.)

²⁰ Nkenye apa, twa hepa kulikida asi twa hara Jehova novakwetu. Nampili va tu rwanese ndi va rwanese mbudi zetu, twa hepa kuvavatera nsene vana hepa ekwafo. Mupositoli Paurusa kwa tjenge asi: “Walye omu kara nomakongo govantu, ntudi gaaga gokulihara-hara no. Yeeyi nkenye ogu ga hara mukwawo, Veta a sikisa mo. Yeeyi asi, ‘Walye o hondere, Walye o dipaga, Walye o vaka, Walye o dovaukire yuma,’ yipango eyi noyikwawo nayinye nkenye oku ya ka twa, kwa yi manga kumwe montanto ezi asi, ‘Hara mukweni moomu wa lihara nyamoge.’ Ogu ga hara mukwawo kapi a mu ruganene yoyidona. Yiyo nye asi eharo kusikisa mo Veta mudima.” (Varoma 13:8-10) Mouzuni womaligaunuko woudona wonyanya ou ana kupangera Satana, vakareli vaKarunga kulikida eharo lyousili kovakwawo. (1 Johanesa 5:19) Apa Jehova nga ka zonagura po Satana novaengeli vendi ntani nouzuni ou woudona, vantu vepevhu ngava ka lihara-hara. Ee, etungiko musi ngali ka kara apa vantu navenye ngava ka hara Jehova novakwawo!