1. Ngapi omu Jesus ga tere sirugana sokuzuvhisa? Faturura.

JESUS kwa here kuuyunga kuhamena Uhompa waKarunga. Apa ga kere pevhu, nga uyunga unene kuhamena Uhompa kupitakana yapeke. Mosirugana sendi sokuzuvhisa, age kwa tumbwire Uhompa yikando yokupitakana 100. Uhompa kwa kere mulyo unene kwendi.—Resa Mateusa 12:34.

2. Vangapi va zuvhire mpangera zomwaMateusa 28:19, 20, ntani morwasinke tuna kuuyungira ngoso?

² Konyima tupu zevhumbuko lyendi, Jesus kwa monekerere varongwa wokupitakana 500. (1 Vakolinte 15:6) Nampo kwa kere apa ga geve mpangera zokuzuvhisira ‘nomuhoko nadinye.’ Aso kwa kere sirugana soudigu. * Age kwa va tanterere asi sirugana oso ngasi twikira siruwo sosire dogoro “nokouhura  wouzuni.” Apa o zuvhisa mbudi zongwa naina, ove ngoso kuna kusikisa mo uporofete owo.—Mateusa 28:19, 20.

3. Yininke musinke yitatu ya tu vatera mokuzuvhisa mbudi zongwa?

³ Konyima zapa Jesus ga geve mpangera zokuzuvhisa, age kwa tente asi: “Ame neni ngani kara.” (Mateusa 28:20) Jesus kwa tumbwidilire vasikuli vendi asi age nga va pitisira mosirugana sokuzuvhisa ntani nga va vatera va zuvhisire mouzuni mudima. Jehova nose ana kara. Age kwa tu pa “yininke nayinye yoyiwa” a tu vatere tu zuvhise. (Vahebeli 13:20, 21) Mosirongwa esi, natu ka zogera yininke yitatu yoyiwa: (1) yiruganeso eyi ga tu pa, (2) nonkedi edi twa ruganesa, ntani (3) edeuro eli twa gwana. Ngesi tatu ka zogera yiruganeso eyi twa ruganesa monomvhura 100 da ka pita.

4. Ngapi ya tu vatera yiruganeso yokulisiga-siga mosirugana sokuzuvhisa?

⁴ Jesus kwa fanekesere mbudi zoUhompa kombuto ezi va kunine mevhu lyokulisiga-siga. (Mateusa 13:18, 19) Munandima kuruganesa yiruganeso yokulisiga-siga mokuwapaika evhu. Mokulifana, Hompa gwetu kwa tu pa yiruganeso eyi natu ruganesa tu vatere vantu va tambure mbudi zongwa. Yiruganeso yimwe kwa yi ruganesere tupu siruwo sosisupi, nye yimwe simpe kuna kuyiruganesa naina. Yiruganeso nayinye kwa tu vatera tu kare vazuvhisi wovawa.

5. Ngapi sa kere sikarata soumbangi, ntani ngapi ngava si ruganesa?

⁵ Mo-1933, vazuvhisi kwa tamekere kuruganesa sikarata soumbangi, siruganeso esi sa vaterere wovanzi va zuvhise. Sikarata oso sinunu sa kere ntani kwa kere po mbudi zomoBibeli. Poyiruwo yimwe, ngava pwagesa sikarata sosipe nombudi zapeke. Munazinyetugara Erlenmeyer, sikando sendi sokuhova ga ruganesere sikarata soumbangi, age nomvhura dendi murongo. Age kwa tente asi: “Posikarata kwa tjenge po asi, ‘Kuvhura o rese sikarata esi ndi?’ Konyima zapa nga mana muntu kuresa sikarata, ngatu mu sigire yimbapiratjangwa makura tatu ka za.”

6. Ngapi sikarata soumbangi sa vaterere vazuvhisi?

⁶ Sikarata soumbangi kwa vaterere vazuvhisi mononkedi dokulisiga-siga. Pasihonena, vazuvhisi vamwe kwa kere nonomuga, nampili ngomu va here kuzuvhisa, nye kapi va divire eyi nava uyunga. Vazuvhisi vamwe kwa kere noupampi. Awo ngava tantere muntu ogu vana kuzuvhisira nayinye eyi va divire monominute dononsesu tupu, nye muntu kapi nga yi kwata egano. Sikarata soumbangi kwa vaterere vazuvhisi va gave mbudi monkedi zoureru ntani zokuzera.

7. Maudigu musinke va ligwanekerere nago pokuruganesa sikarata soumbangi?

⁷ Pwa kere maudigu gamwe hena. Munazinyetukadi Grace Estep kwa tente asi: “Poyiruwo yimwe ngava tu pura asi: ‘Yisinke va tjanga posikarata? Kuvhura mu tantere nge  tupu eyi va tjanga po ndi?’” Ntani vantu vamwe kapi va divire kuresa. Vamwe ngava gusa sikarata nokusilipungwira. Vamwe kapi va here mbudi zetu makura ngava tavagura sikarata. Nampili ngomu pwa kere maudigu ogo, nye sa vaterere vazuvhisi mokuzuvhisira wopeke ntani va va dimburure ngovazuvhisi woUhompa.

8. Ngapi ngava ruganesa ngaramafona? (Tara efano pepenuno 27.)

⁸ Siruganeso simwe ngatu ruganesa konyima zomvhura 1930 kwa kere ngaramafona. Vazuvhisi vamwe ngava tumbura siruganeso oso asi Arona, morwa ngasi va uyungire po. (Resa Exodus 4:14-16.) Apa nga purakene muntu, muzuvhisi nga tura po ekwateko lyesupi lyosiuyungwa soBibeli ano konyima nga sigire muntu yimbapiratjangwa. Poyiruwo yimwe, epata nalinye ngali purakene kosiuyungwa oso. Mo-1934, mbunga zaJehova kwa tamekere kupangera nongaramafona edi ngava ruganesa mokuzuvhisa. Konyima, vanavazinyetu kwa ya kwatekere yiuyungwa 92.

9. Ngapi ngaramafona za vaterere vantu?

⁹ Apa Hillary Goslin ga zuvhire yiuyungwa yimwe, age kwa hundilire ngaramafona sivike simwe yipo a ka purakene novakwawo. Ngoyitundwamo, vamwe owo va purakenene kwa tambwire usili nokugwana ekuho. Ntani vana vavali wovakadona vaGoslin kwa zire koSikora zaGiliyata nokuyakara vatumwa. Ngwendi sikarata soumbangi, ngaramafona za vaterere vazuvhisi wovanzi va zuvhise. Konyima, Hompa kwa ya dewire vantu vendi va kare varongi wovawa kupitira moSikora zoUkareli.

10, 11. Ngapi twa ruganesere nosaitunga noradio mokuzuvhisa, ntani morwasinke da karerere nonkedi donongwa?

¹⁰ Hompa gwetu, kwa pitisira vantu vaKarunga va ruganese nonkedi dokulisiga-siga mokuzuvhisira vantu wovanzi. Nonkedi odo kwa kere nomulyo posiruwo sina va kere vazuvhisi vasesu. (Resa Mateusa 9:37.) Pasihonena, nomvhura dononzi da ka pita nosaitunga ngava di ruganesa va zuvhise mbudi zongwa. Munazinyetu Russell nga tumu siuyungwa soBibeli nkenye sivike kwava ngava tjanga nosaitunga. Makura awo ngava tumu siuyungwa oso konosaitunga domoKanada nedi domoEuropa ntani domoAmerika. Mo-1913, yiuyungwa yaRussell kwa yi pwagesere monosaitunga 2 000 ano vantu wokusika po-15 000 000 yiwo ngava di resa.

¹¹ Radio nazo za vaterere vantu va zuvhise mbudi zongwa. Momazuva 16 Kudumogona 1922, munazinyetu Rutherford kwa geve siuyungwa sendi sokuhova kositasi soradio, ano vantu 50 000 kwa si purakenene. Konyima, twa ya tamekere kuruganesa sitasi sanyamwetu ava tumbura asi WBBR, ano  elikwamo lyokuhova kwa tamekere 24 Murongankuru 1924. Sifo soRuhungu 1 Sindimba 1924 kwa tente asi: “Radio kuna kara nkedi zombiliha ntani zongwa mokuhanesa usili.” Ngwendi nosaitunga, radio nazo kwa tu vaterere tu zuvhisire vantu wovanzi komavango oku kwa kere vazuvhisi wovasesu.

12. (a) Nonkedi musinke dokuzuvhisira moyitarata o hafere? (b) Yisinke nayi tu vatera tu funde po utjirwe wokuzuvhisira moyitarata?

¹² Kuzuvhisira moyitarata kuna kara nkedi zongwa vana kuruganesa naina mokugwana vantu. Vazuvhisi kwa litura mo mokuzuvhisira monombesa nomomahina gorutenda nopokusikamekera matuwa nopomarandesero ntani poyitanda. Kuzuvhisira moyitarata kukuninkisa o lizuvhe woma ndi? Nsene yimo, kanderera kwaJehova a ku vatere ntani koneka eyi ga uyungire Manera, mutareli gonombunga asi: “Ose kutara nonkedi donompe ngonkedi zokukarera Jehova, ntani zokulikida ulimburukwi wetu kwendi, ano twa liwapaikira kumulimburukwa mwanayinye.” Apa atu fundu po utjirwe nokuruganesa nonkedi donompe mokuzuvhisa, ose kunkondopeka ehuguvaro lyetu mwaJehova nokukara vazuvhisi wovawa.—Resa 2 Vakolinte 12:9, 10.

13. Morwasinke kuruganesa Intaneta mokuzuvhisa za karera nkedi zongwa, ntani yisinke wa limonena pokuziruganesa?

 ¹³ Sinzi sovazuvhisi kuhafera kutantera ko vantu kuhamena Intaneta zetu jw.org, oku nava vhura kuresa nokukwateka yimbapiratjangwa momaraka gokupitakana 700. Nkenye ezuva vantu wokupitakana pemiliyona 1,6 kuza koIntaneta zetu. Pwanare, kupitira moradio mbudi zongwa kwa sikire konomukunda dokoure. Eyi ya lifana noIntaneta zetu.

14. Edeuro musinke va hepere vazuvhisi, ntani sikora musinke za va vaterere va kare varongi wovawa?

¹⁴ Yiruganeso nononkedi tuna zogere, kwa reta yitundwamo yoyiwa. Nye vazuvhisi va hepere kuvadeura omu nava zuvhisa. Pasihonena, vantu pamwe kapi ngava kwatesa ko eyi ngava va zuvhisire kongaramafona. Ano vamwe kwa kere neharo ntani va here kudiva yoyinzi. Vazuvhisi va hepere kudiva omu nava funda po marwaneso monkedi zongwa ntani nokukara varongi wovawa. Nevatero lyompepo zokupongoka zaKarunga, munazinyetu Knorr ga dimbwilire mulyo gokudiva kuzuvhisa. Ketamekero lyomvhura 1943, nombungakriste kwa tamekere kuruganesa Sikora zoUkareli. Sikora ezi kwa vaterere navenye va kare varongi wovawa.

15. (a) Ngapi vamwe va lizuvhire pokugava siuyungwa moSikora zoUkareli? (b) Ngapi etumbwidiro lyaJehova lyemEpisarome 32:8 lya sika mo meparu lyoge?

¹⁵ Vazuvhisi wovanzi kapi va yikire kuuyunga komeho zovapurakeni. Munazinyetu Ramu kudiworoka siuyungwa sendi sokuhova mo-1944. Siuyungwa kwa hamenene kwagumwe gomoBibeli, Doyegi. Age kwa tente asi: “Nongoro nomawoko gange ntani nomazego gange kwa kankamene.” Age kwa gweda ko asi: “Oso kwa kere sikando sange sokuhova kuuyunga komeho zombunga, nye kapi na hagekere.” Nampili ngomu ya dilire kukara ureru, vanona nawo ngava gava yiuyungwa mosikora. Munazinyetu Manera kudiworoka eyi ya horokere pounona apa ga geve siuyungwa sendi sokuhova: “Age kwa kere nowoma tupu ga tamekere siuyungwa sendi, yipo ga tamekere kugegemena. Nye ga twikilire kugava, oku ta gegemene dogoro ta mana.” Nampo kapi o gava malimbururo komapongo ndi o lihameke mo morwa nomuga ndi woma. Nsene yimo, pura Jehova a ku vatere o funde po woma. Age nga ku vatera moomu ga vaterere varongwa vanare womoSikora zoUkareli.—Resa Episarome 32:8.

16. Yisinke sitambo soSikora zaGiliyata (a) mosiruwo sanare ntani (b) kutundilira mo-2011?

 ¹⁶ Mbunga zaJehova kwa gava hena edeuro kupitira moSikora zaGiliyata. Sitambo simwe sosikora ezi, sokuvatera varongwa va nkondopeke eharo lyawo lyokuzuvhisa mbudi zongwa. Azo kwa tamekere mo-1943, ano kutunda opo, varongwa 8 500 kwa va deura nokuvatuma koyirongo 170. Kutunda mo-2011, kosikora ezi kwa zigida ko vazuvhisi wosiruwo nasinye novatareli wokudingura noVabeteli ntani vatumwa ava simpe va dira kuza ko.

17. Ngapi Sikora zaGiliyata za reta yitundwamo yoyiwa?

¹⁷ Sikora zaGiliyata za reta yitundwamo yoyiwa ndi? Nhi. Koneka eyi ya horokere moYapani. MwaSiwogedi mo-1949, vazuvhisi mosirongo sina kapi va sikire komurongo. Nye kouhura womvhura ozo, vatumwa 13 ngava zuvhisa kumwe novazuvhisi womomukunda. Naina, vazuvhisi womoYapani kuna ka sika koyiha 216 000, ntani ukahe wawo kuna kara vazuvhisi wokukarerera!

18. Nosikora musinke dimwe twa kara nado?

¹⁸ Ose kwa kara nonosikora dimwe dononzi, ngwendi Sikora zoYirugana yoUhompa, Sikora zoVazuvhisi wokukarerera, Sikora zoVazuvhisi woUhompa, Sikora zoVatareli wonombunga novakadi vawo, Sikora zava womoKomitiye zoMutayi novakadi vawo. Nosikora edi kwa deura vanavazinyetugara nava wovakadi nokunkondopeka epuro lyawo. Eyi kulikida asi Jesus kuna kutwikira kudeura vantu wovanzi.

19. Yisinke munazinyetu Russell ga uyungire kuhamena sirugana sokuzuvhisa, ntani ngapi eyi ya sika mo?

¹⁹ Uhompa waKarunga kwa pangera nomvhura dokupitakana 100. Monomvhura odo, hompa gwetu, Jesus Kristusa, kwa gendesa sirugana sokuzuvhisa. Kutunda mo-1916, munazinyetu Russell ga yi divire asi sirugana sokuzuvhisa mbudi zongwa ngasi lihana uzuni mudima. Age kwa tente asi: “Sirugana kwa kugenderera unene, ntani ngasi twikira kuligwederera, morwa sa hepa kusirugana uzuni mudima mokudivisa ‘mbudi zouhompa.’” (Faith on the March, A. H. Macmillan, epenuno 69) Sirugana oso kuna kusirugana naina! Ose kupandura Jehova, Karunga gombili, ogu a tu pe nayinye eyi twa hepa mokurugana mpango zendi!