1-3. (a) Morwasinke magazaro gaKarunga neraka eli a uyunga ya pitakanena eraka lyovantu? (b) Yisinke natu ka lironga mosirongwa esi?

JEHOVA kwa hara wopeke nawo va hafere eparu, eyi yiyo ga sitira vaengeli novantu. (Episarome 36:9) Jehova pomuhowo kwa sitire ogu ga tumbura mupositoli Johanesa asi “Nkango.” (Johanesa 1:1; Ehororo 3:14) Jehova nga uyunga kumwe naJesus, ntani nga mu tantere magazaro nomalizuvho gendi. (Johanesa 1:14, 17; Vakorosi 1:15) Mupositoli Paurusa kwa tanta asi vaengeli nawo va kara neraka eli ava uyunga, eli lya lisiga neli lyovantu.—1 Vakolinte 13:1.

² Jehova ga diva nayinye kuhamena vaengeli ntani novantu. Age kupurakena komakanderero govantu wovanzi posiruwo simwe tupu, ntani kuzuvha makanderero gawo yi kare asi eraka musinke vana kuuyunga. Ngomu a purakene komakanderero ogo, Jehova kuuyunga hena novaengeli nokuvavyukisa. Mokuyirugana nayinye oyo, magazaro gaJehova ntani neraka eli a uyunga, kwa pitakana magazaro govantu ntani nomaraka aga ava uyunga. (Resa Jesaya 55:8, 9.) Yipo nye apa a  uyunga novantu, age kurerupika mbudi zendi yipo tu zi kwate egano.

³ Mosirongwa esi, tatu ka lironga omu Jehova a uyunga novantu monkedi zoureru. Natu ka dimburura omu a rundurura nkedi zokuuyunga novantu kuliza nomaukaro.

4. (a) Eraka musinke nga ruganesa Jehova apa nga uyunga naMosesa naSamwere ntani Ndafita? (b) Yisinke va tumbura moBibeli?

⁴ Apa ga uyungire nomugara gokuhova, Adamu, mosikunino saEdeni, Jehova nampo kwa ruganesere Ruhebeli rokuhova. Konyima, Jehova nga uyunga novagara ngwendi Mosesa, Samwere, ntani Ndafita. Nampili ngomu va tjenge nonkango davene moRuhebeli ntani nokuruganesa ntjangeseso zavene, awo kwa tjenge magano gaKarunga. Awo kwa tjenge nonkango dokutunda kwaJehova ntani kuhamena elikwatakano lyovantu naKarunga. Pasihonena, Bibeli kwa tumbura epuro neharo lyawo kwaKarunga ntani mapuko gawo nomu ngava dili kulimburukwa. Nombudi nadinye odo kwa di tjangera di tu ronge.—Varoma 15:4.

5. Ruhebeli rwelike nga ruganesa Karunga mokuuyunga novantu ndi? Faturura.

⁵ Jehova kapi nga uyunga nkenye apa novantu moRuhebeli. Apa Vaisraeli va tundire moBabironi, vamwe vawo nkenye ezuva ngava uyunga Ruarameya. Nampo eyi yiyo Ndaniyera naJeremiya ntani naEsira va tjangerere maruha goBibeli moRuarameya.—Esira 4:8; 7:12; Jeremiya 10:11; Ndaniyera 2:4.

6. Morwasinke Matjangwa goRuhebeli va ga torokerere moRugereka?

⁶ Arekisandera goMunene kwa ya pangerere yirongo yoyinzi, ano Rugereka kwa ya kere eraka eli ngava uyunga moyirongo oyo. Vajuda wovanzi kwa ya tamekere kuuyunga Rugereka, ano konyima Matjangwa goRuhebeli kwa ya ga torokere moRugereka. Etoroko eli ngava litumbura asi Sepetuagente. Alyo kwa kere etoroko lyokuhova lyoBibeli ntani lyomulyo po. Valirongi kwa yi kwatesa ko asi Sepetuagente kwa zi tjenge vatoroki 72. * Vamwe kwa torokere Matjangwa goRuhebeli tunda nkango zende nkango, ano vamwe kapisi yiyo va rugene. Vajuda noVakriste ava ngava uyunga Rugereka va yi pulire asi Sepetuagente, Nonkango daKarunga.

7. Eraka musinke nga uyunga Jesus apa nga rongo varongwa vendi?

⁷ Apa ga kere Jesus pevhu, nga uyunga Ruhebeli. (Johanesa 19:20; 20:16; Yirugana 26:14) Age nga ruganesa hena nonkango dimwe  doRuarameya edi ngava ruganesa posiruwo sina. Ntani ga divire hena Ruhebeli rwanare oru nga uyunga Mosesa novaporofete, ava va tjenge matjango aga ngava resa monosinagoge nkenye sivike. (Rukasa 4:17-19; 24:44, 45; Yirugana 15:21) Nampili ngomu Rugereka noRuratina ngava ru uyunga mosiruwo saJesus, Bibeli kapi za uyunga nsene asi Jesus nage nga uyunga maraka ogo.

8, 9. Morwasinke sinzi soVakriste ngava uyungire Rugereka, ntani yisinke ayi tu rongo kuhamena Jehova?

⁸ Vasikuli vaJesus wokuhova ngava uyunga Ruhebeli, nye konyima zonomfa dendi, varongwa vendi ngava uyunga maraka gapeke. (Resa Yirugana 6:1.) Ngomu za lihene mbudi zongwa, sinzi soVakriste ngava uyunga Rugereka kupitakana Ruhebeli. Morwa Rugereka ngava ru uyunga nkenye ezuva, buke zaMateusa nezi zaMarukasa nezi zaRukasa ntani zaJohanesa kwa ya di tjangwilire moRugereka. * Ntani, nombilive domupositoli Paurusa nonobuke dimwe domoBibeli kwa di tjenge moRugereka.

⁹ Ayo kutetukisa asi apa vatjangi woMatjangwa goRugereka goSikriste va temwininine Matjangwa goRuhebeli, awo kwa ruganesere Sepetuagente. Posiruwo oso, matemwinino ogo kwa ya lisigire kanunu nononkango doRuhebeli rokuhova. Yipo nye asi sirugana sovatoroki wokudira kusikilira mo kwa ya kundama Bibeli ezi tuna kara nazo naina. Eyi kuturonga asi Jehova kapi a tara mpo zimwe ndi eraka limwe asi mulyo kupitakana makwawo.—Resa Yirugana 10:34.

10. Yisinke tuna lirongere ko monkedi omu Jehova a uyunga novantu?

¹⁰ Ose tuna lirongo asi Jehova kuuyunga kumwe novantu kuliza nomaukaro. Age kapi a ndindire ko kwetu tu uyunge eraka lyongandi yipo tu mu dive ndi tu dive sitambo sendi. (Resa Sakaliya 8:23; Ehororo 7:9, 10.) Tuna lirongo hena asi Jehova yige ga gendesere vatjangi woBibeli, nye ga va pulisilire va tjange magano gendi mononkango davene.

11. Morwasinke ya dilira kukara udigu kwaJehova nampili ngomu vantu ava ruganesa maraka gokulisiga-siga?

¹¹ Vantu kuruganesa maraka gokulisiga-siga, nye kapi ya kara udigu kwaJehova. Ngapi omu twa yi diva? MoBibeli kwa kara mo nonkango dimwe daJesus edi ga uyungire meraka lyokuhova. (Mateusa 27:46; Marukusa 5:41; 7:34) Nye Jehova ga divilisire asi mbudi zaJesus va zi tjange ntani nokuzitoroka moRugereka, ano konyima momaraka gapeke. Ntani, morwa Vajuda noVakriste kwa tjangwilire Nonkango daKarunga yikando yoyinzi, yipo nye mbudi zaKarunga va hepere kuzipopera. Matjangururo  ogo kwa ya ga torokere momaraka gomanzi. Konyara nomvhura 400 da pitire po konyima zapa va hampurukire Kristusa, John Chrysostom kwa tente asi marongo gaJesus kwa ga torokere meraka lyoVasiliya neli lyoVaegipite neli lyoVaindia neli lyoVaperesiya neli lyoVaetiyopiya ntani novantu vamwe hena ngoso.

12. Ngapi omu Bibeli va zi homokerere?

¹² Mehistoli nalinye lyovantu, pwa kere mahomokero gomanzi gokurwanesa Bibeli ntani nava va zi torokere nokuzigavera. Konyara nomvhura 300 konyima zapa va hampurukire Jesus, mupangeli goVaroma Diocletian kwa pangerere asi matjangururo nagenye goBibeli va ga zonagure po. Konyima zonomvhura 1 200, William Tyndale kwa tamekere kutoroka Bibeli moRuingilisa. Age kwa tente asi nsene Karunga a mu pulisira a paruke siruwo sosire, age ngano nga divilisa asi nampili mumati gokofarama ngano nga diva nawa Bibeli kupitakana mupristeli. Morwa mahepeko, Tyndale ga hepere kutjwayuka mo moIngiranda yipo a ka toroke Bibeli zendi ntani nokuzinduruka. Nampili ngomu vampitisili womaukarelikarunga va hetekerere ko kuhwika matjangururo nagenye aga va vhulire kugwana, etoroko lyaTyndale kwa lihanenene kovantu wovanzi. Mouhura, Tyndale kwa ya mu menge kositji ntani nokumuhwika. Nye etoroko lyendi kwa lipoperere komahomokero govampitisili womaukarelikarunga, ntani kwa ya li ruganesere mokutoroka Bibeli ava tumbura asi King James Version.—Resa 2 Timoteusa 2:9.

13. Yisinke ali likida ekonakono lyomatjango ganare goBibeli?

¹³ Yimo, matjangururo gamwe ganare goBibeli, kwa kara mo mapukogona ntani malisigo. Nye, valirongi woBibeli kwa konakonene nawa matjango gomanzi nomaruha gago ntani nomatoroko ganare goBibeli. Konyima zokugahetakanesa, awo kwa gwene asi novelise tupu dononsesu da kara nomalisigo, ntani malisigo ogo manunu. Nye mbudi zomoBibeli kapi za runduruka. Makonakono gangoso, kwa vaterere valirongi woBibeli va pure asi awo kuna kara noNonkango edi ga tjanga Jehova.—Jesaya 40:8.

14. Momaraka gangapi zina kara Bibeli naina?

¹⁴ Kugusa ko mahomokero gokurwanesa  Bibeli, azo kwa zi toroka momaraka gokupitakana 2 800. Azo kwa pitakana nobuke dapeke. Nampili ngomu vantu wovanzi va dira kupura mwaKarunga, Nonkango dendi kuna kutwikira kulihanena mouzuni. Nampili ngomu matoroko gamwe goBibeli ga kara udigu kugaresa ndi kapi ga vyuka, sinzi sago kugava mbudi zehuguvaro ntani zomwenyo gwanarunye.

15. (a) Ngapi yimbapiratjangwa yoBibeli ya runduruka kutundilira mo-1919? (b) Morwasinke ava yi tjangere pomuhowo moRuingilisa?

¹⁵ Mo-1919, mbungagona zovalirongi woBibeli kwa zi horowere ‘ngomukareli gokulimburukwa gonondunge.’ Posiruwo sina, mukareli gokulimburukwa nga uyunga novantu vaKarunga moRuingilisa. (Mateusa 24:45) Nye naina, yimbapiratjangwa yoBibeli kuna kuyirugana momaraka gokupitakana 700. Ngwendi Rugereka mosiruwo sanare, Ruingilisa kuna kururuganesa monongesefa nemerongo ntani uzuni mudima. Eyi yiyo yimbapiratjangwa yetu ava yi tjangere pomuhowo moRuingilisa, ntani nokuyayitoroka momaraka gapeke.

16, 17. (a) Yisinke va hepere vantu vaKarunga? (b) Ngapi va yi sikisire mo oyo? (c) Yisinke sitambo samunazinyetu Knorr?

¹⁶ Yimbapiratjangwa yetu nayinye kwa demenena koBibeli. Pomuhowo, vantu vaKarunga ngava ruganesa Bibeli King James Version, ezi za ya pwire kutjanga mo-1611. Nampili ngoso, nonkango edi va ruganesa mo danare ntani udigu kudikwata egano. Edina lyaKarunga kwa li tumbura mo yikando yongandi, nampili ngomu matjango ganare ga li tumbura yikando yoyinzi. Bibeli ozo kapi va zi toroka nawa ntani kwa gweda mo novelise edi da dilire kukara momatjango ganare. Matoroko gamwe goBibeli goRuingilisa nago kwa kara noudigu wokulifana.

¹⁷ Yosili, vantu vaKarunga va hepere etoroko lyoBibeli lyokuvyuka ntani lyoureru kukwata egano. Yipo nye va tulisire po Komitiye zoBibeli New World Translation, ntani vanavazinyetu wokomitiye ozo kwa pwagesere maruha goBibeli kutundilira mo-1950 dogoro mo-1960. Maruha gokuhova ntazimwe kwa ga pwagesere posigongi esi sa kere momazuva 2 gaSiwogedi 1950. Posigongi  oso, munazinyetu Knorr kwa tente asi vantu vaKarunga va hepa etoroko lyepe lyoBibeli lyokuvyuka ntani lyoureru kukwata egano ntani eli nali va vatera va lironge usili. Awo va hepere etoroko lyoureru kuresa nokukwata egano ngwendi matjango gokuhova govarongwa vaKristusa. Sitambo samunazinyetu Knorr kwa kere asi New World Translation zi vatere vantu wovanzi va dive Jehova.

18. Yisinke ya vatera vatoroki woBibeli?

¹⁸ Sitambo samunazinyetu Knorr kwa ya sikire mo mo-1963. Bibeli New World Translation of the Christian Greek Scriptures kwa zi pwagesere moRuhoranda, moRufransa, moRundovesi, moRuitalia, moRuputu, ntani moRusipanye. Mo-1989, Mbungagendesi zoNombangi daJehova kwa tulisire po departemente zompe komberewa zonene mokuvatera vatoroki woBibeli. Mo-2005, kwa geve epulisiro lyokutoroka Bibeli momaraka aga aga toroka Ruhungu. Ngoyitundwamo, azo ngesi kuna kara momaraka gokupitakana 130.

19. Epongo musinke lyomulyo lya kere mo-2013, ntani yisinke ngatu ka lironga mosirongwa sokukwama ko?

¹⁹ Mokumona asi Ruingilisa kwa runduruka kutunda apa va hovere kupwagesa Bibeli New World Translation, eyi yiyo ya ninkisa va wapukurure nonkango damo. Mosikondovike somazuva 5 dogoro 6 Siwogedi 2013, vantu wokusika 1 413 676 womoyirongo 31 kwa kere pepongo lyo-129 lyankenye mvhura lyo-Watch Tower Bible and Tract Society of Pennsylvania. Gumwe gomoMbungagendesi kwa divisire epwageso lyewapukururo lyoRuingilisa lyoBibeli New World Translation. Vakalipo kwa hefe unene, ano wovanzi kwa lilire apa va gwene Bibeli ozo. Ngomu vauyungi va resere novelise moBibeli ozo, navenye va yi dimbwilire asi etoroko lyazo ureru kuliresa ntani kulikwata egano. Mosirongwa sokukwama ko, ngatu ka lironga yoyinzi kuhamena Bibeli ozo ntani nomu va zi toroka momaraka gamwe.