ONANE kwa pulire nge asi: “Morwasinke ntaantani ono kudilira kukarera vadimu? Kapi wa yi diva asi eparu lyoge kwa korera mwawo ndi? Ngoso kapi no va fumadeka ndi? Ngapi omu no nyokera po nompo edi da kara po nare? Kunyoka kufumadeka vadimu vetu ta yi likida asi ukareli wetu kutupu sikwafa.” Tupu va mene kuuyunga, onane yipo va tamekere kulira.

Makwedi gongandi komeho yi ka horoke oyo, Nombangi daJehova kwa here kulironga Bibeli nonane. Onane kapi va here kulironga, yipo va tanterere Nombangi di lironge name. Ano apa ngesi kwa va guvisire morwa awo kwa divire nge asi ame muntu gokuvalimburukwa nkenye apa. Nye morwa na here kuhafesa Jehova, posikando esi kapi na va limburukwire. Kapi ya kere ureru, nye Jehova ga nkondopekere nge.

Epata lyetu kwa kere Vabuda, ngwendi sinzi sovantu womoYapani. Nye konyima zomakwedi gavali gokulironga noNombangi daJehova, ame kwa ya yi pulire asi Bibeli usili. Apa na lirongere asi twa kara naGuhyetu gemeguru, ame na here kumudiva. Pomuhowo, name nonane ngatu hafere kuzogera kuhamena eyi ngani lirongo. Yipo na tamekere kuza komapongo gomoSondaha koSinyanga soUhompa. Ngomu na lirongere yoyinzi, na tanterere onane asi ame tani hageke kulihameka moyipito yonompo doVabuda. Hararasi, nkareso zonane tazi litjindji. Tava tanta asi: “Kukara nagumwe mepata ogu a dili kulikida eharo kovadimu vetu ayo kuswaukisa.” Awo kwa pangerere nge asi ni hageke kulironga Bibeli nokuza komapongo. Kapi na gazarere asi onane kuvhura va uyunge yininke yangoso. Onane kwa ya litjindjire.

Otate va kwatesere ko onane. Ame na ya lirongere moVaefeso egaununo 6 asi Jehova kwa harera nge ni limburukwe vakurona vange. Ame kwa here epata lyetu li kare mombili, ntani kwa gazarere asi nsene ni va purakena, nawo kuvhura ngava purakene nge. Posiruwo oso, ame na kere nekonakono kosure, makura momakwedi gatatu ogo ame kwa kwatesere ko eyi va uyungire vakurona vange. Nye na tumbwidilire Jehova asi ngani za hena komapongo apa ngasi moneka siruwo.

Etokoro lyange kwa kere lyedona. Ame kwa gazarere asi konyima zomakwedi gatatu ngani kara simpe neharo lyenene lyokukarera Jehova. Nye na ya tamekere kuzumbanesa elikwatakano lyange naJehova. Ntani onane notate kwa kondjere unene mokuhagekesa nge kukarera Jehova.

KoSinyanga soUhompa, na ligwene noNombangi edi da ligwanekerere nomarwaneso gemepata. Awo kwa tanterere nge asi Jehova nga nkondopeka nge. (Mateusa 10:34-37) Awo va fatwilire nge asi nsene ni twikira kulimburukwa Jehova, epata lyetu ngali lironga kumuhamena. Ame na here kuhuguvara mwaJehova, yipo na tamekere kukanderera unene.

Epata lyetu kwa rwanesere nge mononkedi dokulisiga-siga. Onane kwa likwamberere nge ni hageke kulironga ntani va hetekerere ko kufatwilira nge. Rorunzi, ame ngani mwena. Apa ngani limburura, ngatu tameke kulitangwisa morwa nkenye ogu ga here kulikida asi mouhunga ana kara. Ngesi na yi dimburura asi ngano ngani fumadeke malizuvho nepuliro lyonane, ngano kapi ngatu litangwisa. Vakurona vange ngava pe nge yirugana yoyinzi yemembo. Poyiruwo yimwe, ngava paterere nge ponze ndi ngava zumine nge nondya.

Onane kwa pulire wopeke mokuvavatera yipo va hagekese nge. Awo kwa zogerere namitili gwange, nye kapi ya tompokere. Onane kwa twere nge komuhona gwawo yipo a zede nge ni pure asi maukarelikarunga nagenye kwato mulyo. Ntani hena kwa toonenene ngodi vekoro lyetu oku tava lili nokuvalikwambera va va vatere. Eyi kwa guvisire nge unene. Nye komapongo, vakuronambunga ngava tantere nge asi apa onane ngava uyunga nava wopeke kuhamena ukaro wetu, awo ngava gava umbangi.

Vakurona vange kwa harerere nge ni ze kounivesiti yipo ngani ka gwane yirugana yoyiwa. Natuvenye kwa tu guvisire pokuzogera yuma oyo monkedi zongwa, yipo na va tjangerere nombilive mokuvafatwilira yitambo yange. Otate kwa va handukisire nokuuyunga asi: “Nsene  kuna kugazara asi kuvhura o gwane yirugana, yi gwana lyeeli lyomungura ndi to tundu mo omu membo.” Tani kanderere kwaJehova nokumupura a vatere nge. Ezuva lyokukwama ko, apa na kere mokuzuvhisa, vanavazinyetukadi vavali tava pe nge sirugana sokuronga vana vawo. Nye otate kapi va yi haferere, yipo va hagekere kuuyunga name. Onane kwa tente asi hansa ni kare mukorokotji kupitakana kukara Mbangi zaJehova.

Poyiruwo yimwe na kere nomasinganyeko nsene Jehova kwa harerere nge ni rwanese vakurona vange monkedi zangoso. Yipo ngani kanderere kwaJehova nokuteda ko kweyi za uyunga ko Bibeli kuhamena eharo lyendi. Eyi ya vaterere nge ni liture ntani ni kwate egano asi eyi vana kurwanesera nge vakurona vange morwa kuna kara nosinka kuhamena nge. Jehova ga vaterere nge mokuvyukisa magazaro gange nokudiva eyi nani rugana. Moomu ngani zuvhisa unene, yimo hena ngani yi hafere. Ame na here kukara muzuvhisi gokukarerera.

Apa vanavazinyetukadi vamwe va zuvhire asi nina hara kukara muzuvhisi gokukarerera, kwa tanterere nge asi na hepa kundindira vakurona vange va liture. Ame na hundilire unongo nokurugana mapaparo, nokugazadara nokonda deyi na harerere kukara muzuvhisi gokukarerera, ntani na uyungire novanavazinyetu ava va kura pampepo. Yipo na tokwere asi nina hara kuhafesa Jehova. Ntani na yi kwete egano asi nampili ngano na ndindilire komeho zokutameka uzuvhisi wokukarerera, simpe vakurona vange ngano va rwanesere nge.

Tupu na mene sure yipo na tamekere uzuvhisi wokukarerera. Apa na kere muzuvhisi gokukarerera, na here kuza komukunda oku kwa hepere vazuvhisi. Nye onane notate kapi va here asi ni tunde mo membo. Yipo na ndindilire dogoro apa na kere nonomvhura 20. Makura tani hundire komberewa zomutayi ni ka zuvhisire pepi nekoro lyange koMbindakano zaYapani yipo onane va dire kukara nosinka.

Apa na kere mosirugana oso, ame kwa hefe mokumona varongwa vange woBibeli kuna kugwana ekuho. Na tamekere kulironga Ruingilisa morwa na here kurugana unene mokuzuvhisa. Apa na mwene upampi wovazuvhisi vavali wosiruwo nasinye womombungakriste zetu nomu ngava vatere vakwawo, name na tokwere kukara muzuvhisi gosiruwo nasinye. Posiruwo oso, onane ngava vere unene, poyiruwo nayinye oyo na tengwire kembo ni ka va vatere. Eyi ya va tetukisire, ntani va tamekere kukara name nombili.

Konyima zonomvhura ntambali, Atsushi, gumwe govazuvhisi wosiruwo nasinye ava na uyungire nawo pomuhowo, ta tumine nge mbilive. Age kwa here kukwara ntani kwa pulire nge omu na lizuvhire kumuhamena. Ame kapi na kere rumwe nomalizuvho gangoso kwaAtsushi, ntani kapi na gazarere asi nage ga kere neharo lyangoso kwange. Konyima zokwedi kumwe, yipo na limbwilire asi name nina hara kumudiva nawa. Ose twa ya yi dimbwilire asi twa kara noyitambo yokulifana. Twa here kutwikira mosirugana sosiruwo nasinye ntani twa here kutambura nkenye situmbukira. Makura, yipo twa likwere. Ame na hefe asi onane notate ntani navamwe vekoro lyange kwa wizire kekwareko lyetu.

Konyima tupu zoyo, ngomu twa kere vazuvhisi wokukarerera, Atsushi ta va mu horowora a kare mukwatelimo gomutareli gonombunga. Konyima, tava tu ninki tu kare vazuvhisi wosiruwo nasinye nokututuma mosirugana soutareli. Apa twa mene kudingura nombungakriste  nadinye domosirongo setu sikando sokuhova, mberewa zomutayi yipo za tu toonenene ngodi. Azo kwa tu hundilire nsene kuvhura tu ze koNepal nokukatwikira sirugana soutareli.

Ame na kere nosinka omu nayi kundama vakurona vange kuhamena ediruko olyo. Apa na va toonenene ngodi, otate kwa limbwilire asi: “Ove kuna kuza kevango lyewa sili.” Gumwe govakaume wotate kwa va pere buke zokuhamena mukunda gwaNepal, ntani otate kwa gazarere asi alyo evango lyewa kukadingura.

Ose kwa hefe mokukakara novantu wombili moNepal. Konyima, mukunda gwaBangladesh nago kwa gu tu pere tu gu dingure. Nampili ngomu gwa likundamene nogu gwaNepal, ado kwa lisigire. Ose ngatu rugana novantu wokulisiga-siga mosirugana setu sokuzuvhisa. Konyima zonomvhura ntano, ose kwa tu tumine koYapani, oku ngesi tuna kuhafera sirugana soutareli.

Ame na lironga yoyinzi kuhamena Jehova ngomu twa zuvhisira moYapani, nomoNepal, ntani moBangladesh. Vantu womoyirongo oyo kwa lisiga momapuliro nomonompo ntani nomomparukiso. Ntani nkenye muntu kwa likarera. Ame na limonena omu Jehova a pakere mbili vantu nokuvatambura nokuvavatera ntani nokuvatungika.

Yininke yinzi eyi nani vhura kupandwira Jehova. Age kwa vatera nge ni mu dive nokurugana sirugana sendi ntani nokupa nge mugara gomuwa. Karunga kwa vatera nge ni ture po matokoro gomawa, ano ngesi nina kara nelikwatakano lyewa nendi ntani nepata lyetu. Tani pandura Jehova, morwa name nonane ngesi vakaume wovawa. Ame nina hafa unene asi nina kara nombili naKarunga ntani nonane.