1, 2. Yisinke ga rugene Karunga pwanare, ntani yisinke nampo vamwe nava lipura nsene kuna kuvera?

NSENE wa verere rumwe, nampo wa lipulire asi: ‘Ngani veruka ndi?’ Ndi nampo ekoro lyoge ndi kaume koge kuna kuvera, kuvhura o lipure nsene asi nga veruka. Kapi ya kara epuko kuliharera ukanguki wouwa ntani novantu ava twa hara. MoBibeli, kwa tumbura mo vamwe ava va vere ntani va here kudiva nsene ngava veruka. Pasihonena, hompa Ahasiya, munwaAhaba naJesebeli, ga lipulire nsene asi nga veruka kouvera wendi. Ano konyima, hompa Benihadadi gwaAsiliya kwa verere ntani ga pulire nsene kuvhura nga veruke.—2 Vahompa 1:2; 8:7, 8.

² Bibeli nazo kututantera asi pwanare, Jehova poyiruwo yimwe nga verura vantu pasitetu ntani nga ruganesa vaporofete vendi mokuvhumbura vamwe ava va fire. (1 Vahompa 17:17-24; 2 Vahompa 4:17-20, 32-35) Naina, vantu vamwe ava  vana kuvera kuvhura va lipure nsene asi Karunga nga rugana ko yuma mokuvavatera va veruke.

3-5. Yisinke Jehova naJesus nava vhura kurugana, ntani mapuro musinke natu ka zogera?

³ Jehova kwa kara nononkondo edi nadi kundama ukanguki wovantu. Age kwa tengekere vamwe nouvera, ngwendi Farawo posiruwo saAbirahamu, ntani konyima Miriyama, mukurwaMosesa. (Genesis 12:17; Numeri 12:9, 10; 2 Samwere 24:15) Ntani age kwa futisire Vaisraeli apa va dilire kumulimburukwa. (Deuteronomium 28:58-61) Poyiruwo yimwe, Jehova nga popere vantu vendi kouvera. (Exodus 23:25; Deuteronomium 7:15) Ntani pamwe nga verura vamwe. Pasihonena, age kwa verwire Joba ogu ga verere unene ntani ga karerere mokufa.—Joba 2:7; 3:11-13; 42:10, 16.

⁴ Ose twa yi diva asi Jehova ga kara nononkondo dokuverura vaveli. Jesus nage kuvhura kuverura vaveli. Apa ga kere pevhu, age kwa verwire ava va kere nomahamba ngwendi yingondwe ngoso. Age ga verwire vatwiku ntani noyirema. (Resa Mateusa 4:23, 24; Johanesa 9:1-7) Yitetu oyo kutuvatera tu ndindire nononkondo yininke yoyiwa eyi nga ka rugana Jesus mouzuni woupe. Posiruwo oso, “nagumwe si gomosirongo esi twa kara nga sivana asi ta vere.”—Jesaya 33:24.

⁵ Nye nsene tu vera unene, kuvhura tu ndindire Jehova ndi Jesus asi a tu verure pasitetu ndi? Ntani yisinke twa hepa kugazadara ko kuhamena kuhorowora uhaku?

6. Yisinke za uyunga ko Bibeli kuhamena yitetu eyi ngava rugana Vakriste wokuhova?

⁶ Pwanare, Jehova ga gwavekere Vakriste nompepo zokupongoka ntani nokupa vamwe uhwi wokurugana yitetu. (Yirugana 3:2-7; 9:36-42) Pasihonena, awo ngava vhuru kuverura vantu nokuuyunga maraka peke-peke. (1 Vakolinte 12:4-11) Nye konyima yitetu oyo kwa ya hege, ngamoomu za yi uyungire Bibeli. (1 Vakolinte 13:8) Yipo nye naina kapi tatu vhuru kundindira Karunga mokutuverura pasitetu.

7. Ngapi Episarome 41:3 ali tu korangeda?

⁷ Nye nsene kuna kuvera, Jehova nga ku hengagwida ntani nokukuvatera, ngamoomu ga yi rugene kovakareli vendi vanare. Hompa Ndafita kwa tjenge asi: “Gerago googu a tara muhepwe eho; HOMPA nga mu kwafa ezuva eli nga kara moudigu. HOMPA nga mu popera, ta mu ninki a kare nomwenyo.” (Episarome 41:1, 2) Yimo, Ndafita kapi ga tembe asi muntu gomuwa ogu nga  tara muhepwe eho kapi nga fa. Ngapi Jehova nga kwafa muntu gomuwa? Ndafita kwa fatwilire asi: “HOMPA nga mu kwafa, nsene ta vere nga mu ninka ta kanguka.” (Episarome 41:3) Jehova ga diva nawa-nawa eyi vana kupita vakareli vendi, ntani kapi a va divara. Age kuvhura kuvapa uradi nounongo. Jehova kwa sita rutu romuntu monkedi omu naru vhura kuliverura rwene.

8. Kuliza nEpisarome 41:4, yisinke Ndafita ga pulire Jehova apa ga verere unene?

⁸ MEpisarome 41, Ndafita kututantera kuhamena apa ga verere unene nokulizuvha eroroko ntani nokukara nosinka. Ayo kulikida asi posiruwo simwe, munwendi Abisaromo kwa here kuhokona uhompa koguhwe. Ndafita kwa verere yiyo ga dilire kuvhura kuhagekesa Abisaromo. Age ga yi divire asi udigu wemepata lyendi kwa u retesere po apa ga honderere naBateseba. (2 Samwere 12:7-14) Yisinke ga rugene? Age kwa kanderere asi: “Fira nge nkenda, HOMPA, verura nge yeeyi ame kwa zona koge!” (Episarome 41:4) Ndafita ga divire asi Jehova ga mu gusilire po, ntani age kwa huguvarere mwendi a mu vatere kouvera wendi. Ndafita kwa ndindilire sitetu kwaJehova ndi?

9. (a) Yisinke ga rugene Jehova kwahompa Hisikiya? (b) Yisinke Ndafita ga ndindilire kwaJehova?

⁹ Usili, poyiruwo yimwe Karunga nga verura vantu. Pasihonena, apa hompa Hisikiya ga karerere mokufa, Jehova ga mu verwire. Hisikiya ga parukire ko hena nomvhura 15. (2 Vahompa 20:1-6) Ndafita kapi ga ndindilire sitetu. Nye age kwa ndindilire Karunga a mu vatere monkedi zokulifana nezi Karunga ga vhulire kukwafa ogu “a tara muhepwe eho.” Ndafita ga kere nelikwatakano naJehova, yipo nye ga pulire Jehova a mu hengagwide nokumufira sinka mosiruwo souvera wendi. Age ga hundilire hena asi rutu rwendi ngano ru veruke. Nose kuvhura kuhundira Jehova a tu vatere monkedi zokulifana.—Episarome 103:3.

10. Yisinke ya horokerere Torofimusi naEpafuraditusa, ntani yisinke yina kuturonga?

¹⁰ Pwanare, kapisi Vakriste navenye ngava va verura kupitira moyitetu nampili ngomu mupositoli Paurusa navamwe va vhulire kuverura vaveli. (Resa Yirugana 14:8-10.) Mupositoli Paurusa kwa verwire guhyaPubeliusi ogu ga verere yikunkira nezimo lyokupwaga-pwaga. Paurusa ga mana “kukanderera, ta mu kambeke mawoko, makura ta mu verura.” (Yirugana 28:8) Nye Paurusa kapi ga verwire navenye ava ga divire. Kaume kendi Torofimusi kwa zire nage morugendo routumwa. (Yirugana 20:3-5, 22; 21:29) Apa Torofimusi ga verere, Paurusa kapi ga mu verwire. Torofimusi ga hepere kusiga Paurusa ntani nokukara moMirete a veruke. (2 Timoteusa 4:20) Kaume gumwe gwaPaurusa Epafuraditusa, nage kwa verere ntani mokufa ga karerere. Nye Bibeli kapi za uyunga asi Paurusa ga mu verwire.—Vafilipi 2:25-27, 30.

11, 12. Yisinke twa diva kuhamena Rukasa, ntani ngapi ga vaterere Paurusa?

¹¹ Rukasa kwa kere ndokotora, ntani ga zire naPaurusa. (Yirugana 16:10-12; 20:5, 6;  Vakorosi 4:14) Age ga vaterere Paurusa ntani navamwe apa ngava vere morugendo rwawo routumwa. (Vagarata 4:13) Moomu tupu ga uyungire Jesus asi “vaveli” yiwo va hepa muhakuli.—Rukasa 5:31.

¹² Rukasa kapisi muntu tupu ogu ga here kugava mapukururo kuhamena uhaku. Age kwa gwene edeuro lyokukara ndokotora. Bibeli kapi za tumbura evega ndi siruwo esi ga gwene edeuro. Nye azo kutanta asi Paurusa kwa tanterere Vakorosi asi Rukasa ana va kundisire po. Kuvhura yi kare asi Rukasa kwa gwene edeuro lyendi kosure zouhaku moRawodikeya, sitata sopopepi naKorosi. Ntani, apa Rukasa ga tjenge Evangeli lyendi ntani nobuke zoYirugana, age kwa ruganesere nonkango douhaku. Morwa kwa kere ndokotora, age kwa hamesere mo yihorokwa yoyinzi omu Jesus nga verura vantu.

13. Yisinke twa hepa kudiworoka komeho zokugava ndi zokutambura epukururo kuhamena uhaku?

¹³ Naina, kwato vanavazinyetu wokurugana yitetu ntani nokutuverura. Nye morwa vana hara kutuvatera, vamwe kuvhura va tu pe mapukururo nampili kapi tuna ga va pura. Yimo, magano gamwe mawa. Pasihonena, Paurusa kwa geve egano asi Timoteusa a makere ko vhinyu. Timoteusa nga kora-kora mezimo, nampo morwa nga nu mema gokunyata. * (Resa 1 Timoteusa 5:23.) Nye twa hepa kutakamesa. Munazinyetu kuvhura a hetekere ko kutusininika tu ruganese nomutji dongandi ndi tu lye nondya dongandi ndi tu di nyokere po. Nampo kuvhura a tu tantere asi ya vatera gumwe gemepata lyawo ogu ga kere noudigu wokulifana. Eyi kapi yina kutanta asi nose tayi tu vatere. Twa hepa kudiworoka asi nampili yi kare asi vantu vanzi ava ruganesa mutji ndi uhaku wongandi, simpe kuvhura kukara siponga.—Resa Yisewe 27:12.

14, 15. (a) Vantu musinke twa hepa kutakamesa? (b) Yisinke tuna lirongere mo moYisewe 14:15?

¹⁴ Natuvenye tuna hara kukanguka yipo tu hafere eparu ntani nokuruganena Jehova. Kapi twa sikilira mo, nokuvhura si kunyokera po mauvera nagenye. Nsene tatu vere, pwa kara mauhaku gokulisiga-siga, ntani twa kara nononkondo dokutokora uhaku ou natu ruganesa. Vantu vamwe ntani nonokampani dimwe kutanta asi va gwana uhaku ou ngau verura mauvera getu. Awo kuyiruganena oyo morwa kugwanena mo yimaliwa yoyinzi. Kuvhura va tante asi vantu wovanzi va ruganesa uhaku owo va veruka. Ano nsene tatu vere, kuvhura tu hare kuheteka nkenye eyi nayi tu vatera tu veruke nokuparuka siruwo sosire. Nye twa ha divara epukururo lyomoNonkango daKarunga edi asi: “Mugova  kupura nkenye eyi, nye vanandunge kutakamesa nontambo dawo.”—Yisewe 14:15.

¹⁵ Nsene ose vanandunge, ngatu takamesa kuhamena eyi natu pura unene po nsene muntu ogu ana kutupukurura kapi ga gwana edeuro lyouhunga. Ngatu lipura asi: ‘Age kuna uyunga asi novitamine edi ndi nomutji edi ndi nondya edi kwa vatera vantu, nye ngapi nina yi diva asi da va vatera sili? Nampili yi kare asi kwa vatera wopeke, ngapi nina yi diva asi name nga di vatera nge? Nina hepa kurugana mapaparo ntani nokuzogera navamwe ava va gwana edeuro lyouhunga kouvera wange ndi?’—Deuteronomium 17:6.

16. Yisinke twa hepa kukonakona nsene tatu tura po matokoro kuhamena uhaku?

¹⁶ Nsene tatu tokora kuhamena ekonakono ndi uhaku ou tuna hara kuruganesa, twa hepa ‘kulipangera’ ndi kuruganesa nondunge. (Titusa 2:12) Eyi mulyo, unene po nsene ekonakono ndi uhaku owo kapi wa divikwa. Muntu ogu tuna pura kuvhura a faturure omu ekonakono ndi uhaku owo au rugana ndi? Efatururo olyo epe ndi? Vandokotora wovanzi kukwatesa ko ekonakono ndi uhaku owo asi kuvhura kuverura vantu ndi? (Yisewe 22:29) Nampo vamwe tava ku tantere asi uhaku woupe va u gwana ntani vandokotora simpe kapi vana u diva. Nye pana  kara umbangi una kulikida asi pouli uhaku wangoso ndi? Vamwe kuvhura va ku pe uhaku ou wa kara noyininke eyi ya dira kudivikwa ndi ya likwatakana nonompepo. Eyi kuvhura kukara siponga. Diworoka asi Karunga kuturondora tu nyokere po nompepo ndi umpure.—Deuteronomium 18:10-12; Jesaya 1:13.

17. Yisinke twa hepa kunyokera po?

¹⁷ Mbungagendesi zomomazuva govapositoli kwa tumine mbilive kovapuli vakwawo womonombungakriste mokuvatantera yininke yimwe eyi va hepa kunyokera po. Kehagero lyombilive ozo, mbungagendesi kwa tjenge asi: “Nsene mu yi nyoka eyi ngano nawa. Mbaa’a!” (Yirugana 15:29) Nampili ngomu nkango zokuhulilira kwa kere nkedi zimwe zokurekera, ayo kutudiworokesa asi ya wapa kukara noukanguki wouwa.

18, 19. Yisinke tuna kundindira nononkondo mouzuni woupe?

¹⁸ Morwa kapi twa sikilira mo, kapi tatu vhuru kuhenduka mauvera nagenye. Apa atu vere, kapi atu ndindire asi Jehova a tu verure pasitetu. Ose kundindira nononkondo asi komeho Karunga nga ka tu verura. MEhororo 22:1, 2, mupositoli Johanesa kwa uyungire kuhamena ‘mema gomwenyo’ ntani “sitji somwenyo” esi ngasi verura navenye. Eyi kapi ya tamba konomutji dimwe dokoyitji edi natu vhura kuruganesa ngesi yipo tu veruke ndi mouzuni woupe. Nye kwa tamba kwanayinye eyi nga ka rugana Jehova naJesus yipo tu ka paruke narunye.—Jesaya 35:5, 6.

¹⁹ Ose kuna kundindira siruwo oso. Nye posiruwo esi, twa yi diva asi Jehova ga tu hara ntani kukwata egano omu atu lizuvhu apa atu vere. Ngwendi Ndafita, twa kara nehuguvaro asi nsene tu vera, Jehova kapi nga tu sigilira. Age nkenye apa kupakera mbili ava ava mu limburukwa.—Episarome 41:12.