JEHOVA, Karunga gougavi. (Jakopo 1:17) Ose kumona ugavi wendi moyininke nayinye eyi ga sita. Age kwa zwida eguru nonombungururu, ano pevhu kwa tura po yimeno yoyiwa.—Episarome 65:12, 13; 147:7, 8; 148:3, 4.

Mutjangi gEpisarome 104 kwa likidire rupandu koyininke nayinye eyi ga sita Jehova, yipo ga tjenge rusumo mokumuhamberera. Apa o resa episarome olyo, nove kulikida rupandu ngwendi muepisarome ndi? Age kwa tente asi: “Ame kuna hara ni dimbire HOMPA ukaro wange naunye; ame kuna hara ni dimbire Karunga gwange epando siruwo esi na kara nomwenyo.” (Episarome 104:33) Nove ono hara kurugana yokulifana ndi?

Jehova kuna tu harere tu honene ugavi wendi. Ntani ga tu pa nokonda donongwa deyi natu karera nougavi. Age kwa gendesere mupositoli Paurusa a tjange asi: “O korangede vanangawo woyininke yomouzuni ou asi walye ava linenepeke ndi asi va ture nomutjima dawo memona eli lya hana mutompo, nye ava huguvare Karunga ogu a tu pe yininke yoyinzi yokutuhafesa. O va korangede ava rugane yoyiwa, va gawope moyirugana yoyiwa, va kare ugavi wokupa ko vakwaawo. Omu mwangesi tava lipungwire emonazuni, li kare etateko lyewa lyeyi yokomeho, nkumwe ngava gwane po mwenyo gwanarunye gosili.”—1 Timoteusa 6:17-19.

Mombilive zendi zauvali zokoVakolinte, Paurusa ga fatwilire sitambo seyi natu gavera kovakwetetu. Age kwa tente asi: “Nkenye muntu a gave moomu ana yi gazarere momwenyo gwendi, kapisi nomutjimakoka ndi asi yi tunde momusininko; yeeyi Karunga kwa hara ava ava gava neharo lyewa.” (2 Vakolinte 9:7) Wolye atu vatere nsene tu kara ugavi? Paurusa kwa tente asi ose kuvatera wopeke apa atu va pe eyi vana hepa, nye hena nose kulivatera nyamwetu morwa Jehova nga tu tungika.—2 Vakolinte 9:11-14.

Makura Paurusa yipo ga tumbwire umbangi wounene kuhamena ugavi waKarunga apa ga tente asi: “Tu pandureni Karunga morwauhwi wendi wokudira kuvhura kutanta!” (2 Vakolinte 9:15) ‘Uhwi’ waJehova kwa kwatera mo yininke yoyiwa eyi a tu pe kupitira mwaJesus Kristusa. Nokuvhura si kusingonona mulyo gouhwi owo!

Ngapi natu likida asi twa kara norupandu koyininke nayinye eyi ga tu ruganena Jehova naJesus ntani neyi ngava ka tu ruganena? Nkedi zimwe omu natu kara nougavi kuna kara pokuruganesa siruwo nononkondo noyiweka yetu mokukarera Jehova ntani nokuvatera wopeke va mu dive. Ose kuvhura kuyirugana eyi, yi kare asi ose nongawo ndi nohepwere.—1 Histoli 22:14; 29:3-5; Rukasa 21:1-4.