Gazara tupu eparu pwa hana uzera ndi site? Ezuva kugava nonkondo koyitji yihoke mahako nokuyima nombya nenyango nonontanga. Alyo hena kuvatera yitji yikoke mema kupitira monondandani ga ze komahako moruhura mema taga zi mompepo.

Mvhura kuna kara uwhi wouwa wokutunda kwaKarunga, azo kuninkisa evhu li gave nondya. Karunga kurokesa mvhura nokutupa yinema yokulisiga-siga mokukulisa nondya yipo yihafese nomutjima detu.

Sinzi sovaguhya kukara nosinka sokugava nondya dokugwanena po noyidwara komapata gawo. Koneka eyi ga uyunga Matjangwa asi: “Komu tara si yidirara: ay okapi ayi kunu, kapi ayi zangura, hena kapi ai pongaikire moyihete, nye Guhyeni gemeguru ta yi rere. Nani one kapi mwa yi pitakana mefumano?”—Mateusa 6:25, 26.

“Komu tara si tupu nombya domosanzara, omu adi kuru . . . ; nye ame tani mu tantere asi, naSaromo si googu kai nga dwara mountungi wendi mudima, a fane po nampili mbya zimwe. Ano Karunga, ogu a dwareke wayi ou au kara po naina mosanzara, . . . omu na dira kumudwareka mu pitakane wayi?”—Mateusa 6:28-30.

Mokumona asi Karunga kutupa nondya noyidwara, kuvhura hena atu vatere tu gwane eyi tuna hepa meparu. Nsene tu sikisa mo mpango zendi, age nga tungika elituromo lyetu lyokukuna nombuto ndi tatu vatere tu gwane yirugana yipo tu rande eyi tuna hepa—Mateusa 6:32, 33.

Pokutara kezuva nomvhura zina kuroka, noyidira nonombya, yosili pana kara nokonda donongwa deyi natu harera Musiti gwetu. Sirongwa sokukwama ko ta si ka zogera omu Musiti gwetu a uyunga novantu.