Karunga kwa tu sita nevhuliko lyokuuyunga nage tu mu pwagesere malizuvho getu mekanderero. Muporofete Ndafita kwa kandererere asi: “Ove kuzuvha makanderero. Vantu mudima ngava wiza koge.” (Episarome 65:2) Nye ngapi omu natu kanderera yipo Karunga atu zuvhe nokututungika?

Apa o kanderere ove ‘kutantera Karunga maudigu goge nagenye.’ (Episarome 62:8) Munankondo nadinye kuhafera makanderero gokutunda komutjima.

Nampili ngomu Karunga ga kara noyitumbwisiso, age ga kara nedina. “Ame nyame Jehova. Olyo yilyo edina lyange.” (Jesaya 42:8, NW) Edina Jehova kwa moneka moMatjanwa gokupongoka konyara yikando 7 000. Vaporofete wovanzi ga va mu tumbura Karunga kedina lyendi. Abirahamu kwa uyungire asi:”Jehova, . . . ame kuna hara simpe kuuyunga nove.” (Genesis 18:30) Nose nsene tatu kanderere twa hepa kuruganesa edina lyaKarunga, Jehova.

Karunga kukwata egano magazaro nomalizuvho getu mwankenye eraka tuna kuuyunga. Nonkango dendi kutupamukumo asi: “Karunga kapi ga paka mpongo, nye mwankenye muhoko nkenye ogu a mu tjira, nye ta rugana youhunga, ta mu tambura.” Yirugana 10:34, 35.

Nampili ngoso, mokuninka asi Karunga a tu tungike, yinzi ya hamena mo kugusa ko tupu kukanderera. Sirongwa sina kukwama ko nasi ka tu vatera eyi twa hepa kurugana.