Omu natu hara vakwetu
Natuvenye vepata limwe, morwa kwa tunda mwaAdamu. Nampili ngomu ya kara asi vemepata va hepa kulihara nokulifumadeka, udigu kugwana eharo lyangoso. Kapisi yimo ana yi harere Karunga gwetu geharo.
EYI GA UYUNGA KO MATJANGWA GOKUPONGOKA KUHAMENA EHARO
“Hareni vakweneni moomu mwa lihara nyamweni.”—LEVITICUS 19:18
“Omu hare wonkore zeni.”—MATEUSA 5:44.
EYI AYI TANTA KUHARA VAKWETU
Koneka omu Karunga ga singonona eharo moNonkango dendi mo-1 Vakolinte 13:4-7:
“Eharo kwata nedidimiko nounambili.”
Pasihonena: Ngapi o lizuvhu apa vakweni ava lididimike nokukulikida mbili ntani kapi ava handuka apa o tura mapuko?
“Eharo kapi lya paka mfudu.”
Pasihonena: Ngapi o lizuvhu apa vakweni ava kugazarere yininke ndi va kufire mfudu?
Eharo “kapi ali papara yeeyi lya hara lyene.”
Pasihonena: Ngapi o lizuvhu apa vakweni ava fumadeke magano goge ntani kapi ava kusininike nkenye apa nomagano gawo?
Eharo “kapi lya paka nkoko.”
Pasihonena: Karunga ga kara neharo lyokudongwenena po owo ava litezurura konzo dawo. “ Kapi a tatagana nkenye apa; kapi a handuka narunye.” (Episarome 103:9) Ayo kutuhafesa apa gumwe tuna zonene atu gusire po. Yipo nye, twa hepa kugusira po vakwetu nsene vana tu zonene. Episarome—86:5.
Eharo “kapi ali hafere udona.”
Pasihonena: Apa ayi tu horokere yininke yoyidona kapi twa hara vakwetu va hafere udona ou tuna kupita. Yipo nye, kapisi tu hafe nsene vakwetu kuna kupita momaudigu yi kare asi awo kwa tu tekwire momudona.
Mokuninka asi Karunga atu tungike, twa hepa kuhara vakwetu mononkedi edi yi kare asi awo worudi musinke. Nkedi zimwe natu yi rugana pokuvatera owo vana kuhepa.
