Karunga kwa tumbwidilire muporofete Abirahamu asi gumwe gomoruvharo rwendi nga retera matungiko “nombunga nadinye domouzuni.” (Genesis 22:18) Yilye muntu ogo?

Konyara nomvhura 2 000 da ka pita, Karunga kwa pere Jesus gomoruvharo gwaAbirahamu nonkondo dokurugana yitetu yoyinene. Yitetu oyo kwa likidire asi etumbwidiro eli va geve kwa Abirahamu eli ngava gwana vantu ngali sika mo kupitira mwaJesus.—Vagarata 3:14.

Yitetu eyi ga rugene Jesus kwa vaterere vantu va mu dimburure asi yige nga ruganesa Karunga mokutungika vantu. Ntani yitetu oyo kwa likidire omu Karunga nga mu ruganesa mokutungika vantu narunye. Koneka yikara eyi ga likidire Jesus apa ga rugene yitetu?

Ugomoki—Jesus ga verwire vaveli.

Munayingondwe gumwe kwa likwamberere Jesus a mu verure. Jesus ta mu gumu ta uyunga asi: “Nina yi panga.” Naruvalisi yingondwe ta yi mu tundu.—Marukusa 1:40-42.

Ugavi—Jesus ga kutikire wonzara

Jesus kapi ga here vantu va ze nonzara. Yikando yivali, ga kutikire pasitetu mayovi govantu nonomboroto nonomfi dongandi. (Mateusa 14:17-21; 15:32-38) Apa va mene kulya, navenye kwa kutire ntani pwa hupire nondya dononzi.

Nkenda—Jesus kwa pindwire vafe koufe.

Morwa “nkenda” Jesus kwa pindwire koufe muna gomugara ogu ozina va kere mufisayendi ano velike va hupire po.—Rukasa 7:12-15.