Muporofete Mosesa kwa uyungire asi nsene tu limburukwa yipango yaKarunga, age ngatu tungika. (Deutoronomium 10:13; 11:27) Kapisi tu limburukwe Karunga morwa kutjira kututengeka. Nye yikara yoyiwa yaKarunga yi tu tumangede tu mu limburukwe morwa twa mu hara ntani kapi tuna hara kurugana eyi nayi mu guvisa. “Eharo lyetu lyokuhara Karunga lyeli asi, ose atu sikise mo yipango yendi.” 1 Johanesa 5:3.

Matungiko musinke natu gwana pokulimburukwa Karunga? Tara mauwa gavali

“Ame nyame HOMPA Karunga goge, ogu ga hara kukuronga morwauwa waamogea ku likide nzira ezi no genda.”—JESAYA 48:17.

Musiti gwetu Jehova Karunga, ga tu diva ntani kutupa mavyukiso aga tuna hepa. Nsene tuna hara marongo gendi ga tu vatere tu ture po matokoro gomawa, twa hepa kulironga moMatjangwa goKupongoka tu dive eyi ana tu harere tu rugane nokutura pasirugana eyi tuna kulironga.

“Ava ava zuvhu nonkango daKarunga nye tava di pungura, yiwo po verago.”—RUKASA 11:28.

Mamiliyona govantu ava vana kusikisa mo Nonkango daKarunga kuna kugwana ruhafo rosili. Pasihonena, mugara gomoSipanye kwa kere muntu gonyanya gougara, ntani nga hepeke mukadendi. Ezuva limwe ta resa nonkango domuporofete Moses kuhamena nkareso zougomoki zaJosefa, munwaJakopo. Josefa kwa mu randesere koupika nokukamutura modorongo ga hana unzone, nye age ga kere nonkareso zougomoki zombili nokudira nkoko. (Genesis, egaununo 37-45) Mugara gomoSipanye kwa tanta asi: “Pokuteda ko kosihonena saJosefa ya tumangedere nge ni tunge po yikara ngwendi ugomoki nombili nelipangero. Ngesi ame na gwana ruhafo meparu.”

Matjangwa goKupongoka kugava mavyukiso omu natu litekura-tekura. Tara sirongwa sokukwama ko mavyukiso gamwe ogo.