Kutunda tupu pesito lyovantu, Musiti gwetu kwa uyunga novantu kupitira movaengeli novaporofete. Ntani hena mbudi zendi nomatumbwidiro gendi kwa ga tjanga. Matumbwidiro gendi kukundama meho zetu. Kupi oku natu gwana matumbwidiro gaKarunga?

Mbudi zaKarunga kwa kara moMatjangwa gokupongoka. (2 Timoteusa 3:16) Ngapi Karunga ga ruganesere vaporofete mokutjangwa mbudi zendi? (2 Peturusa 1:21) Age kwa geve magano gendi kovatjangi va zi tjange. Yina lifana nanaina. Nsene muhona a ruganesa hamutjanga gwendi a tjange mbudi, ose natu tambura mbudi ozo asi kuna tundu komuhona. Mokulifana, nampili ngomu Karunga ga ruganesere vagara va tjange, magano ga kara moMatjangwa gokupongoka kuna kara gendi.

Mbudi zaKarunga mulyo, yiyo ana harere vantu navenye va zi rese nokuzikwata egano. ‘Mbudi zongwa zanarunye,’ kwa mangurukira ‘marudi nomaraka nonomuhoko nadinye.’ (Ehororo 14:6) Nevatero lyaKarunga, Matjangwa goKupongoka kwa ga tjangwa momaraka gokupitakana po 3 000 kupitakana nobuke nadinye mouzuni.