Ngomu vazuvhisi va li gwederere, va hepere kunduruka yimbapiratjangwa yoyinzi. Nampili ngomu vanavazinyetu womoBeteli zaBrooklyn ngava nduruka yifo, awo simpe ngava ruganesa nokampani di va ndurukire nobuke. Konyima zapa nobuke va dilire ku di nduruka ure womakwedi gongandi, ayo kwa ninkisire sirugana sokuzuvhisa si tengure monyima, makura munazinyetu Rutherford yipo ga pulire Robert Martin mukurona gofabrika nsene kuvhura va tameke kunduruka nobuke.

Munazinyetu Martin kwa tente asi: “Alyo kwa kere egano lyewa lyokupaturura fabrika zokunduruka nobuke.” Vanavazinyetu kwa hilire evango moBrooklyn eli ava tumbura asi 18 Concord Street ntani va gwene yiruganeso eyi va hepere.

Vamwe kapi yava hafesere kweyi vanavazinyetu va ndurukire nobuke davene. Mukurona ogu nga pitisire kampani ezi ngazi nduruka nobuke detu, kwa wizire a ya tare fabrika ozo zompe. Age kwa uyungire asi: “Mwa kara nehina lyewa lyokundurukisa, nye kwato gumwe gweni ga diva kuliruganesa. Yiruganeso yeni ngayi zonauka momakwedi ntazimwe.”

Munazinyetu Martin kwa uyunga asi: “Ayo kwa zuvhikire ngwendi usili, nye ose twa yi divire asi Jehova nga tu vatera, ano oyo yiyo sili ya horokere.” Munazinyetu Martin mouhunga ga kere. Konyima tupu zosiruwo, ehina olyo lyepe kwa ndurukire nobuke dokusika po-2 000 nkenye ezuva.

Kugusa ko kunduruka nobuke dimwe pwanyamwawo, vantu vaJehova kwa tamekere kuruganesa nkedi zompe zokuzuvhisa mbudi zongwa kupitira koradiyo. MoSondaha kositenguko, mo-26 Murongankuru 1922, munazinyetu Rutherford kwa uyungire koradiyo sikando sendi sokuhova. Age kwa uyungire koradiyo kositasi sedina KOG moLos Angeles, moCalifornia, moAmerika. Age kwa geve siuyungwa sosiparatjangwa asi: “Mamiliyona  govantu ava vana kuparuka ngesi kapi ngava fa.”

Vantu wokusika po-25 000 kwa purakenene kelikwamo. Vamwe kwa tumine nombilive kwamunazinyetu Rutherford, mokumupandura kelikwamo olyo. Gumwe govantu ava va tjenge nombilive odo kwa kere Willard Ashford ogu ga tungire moSanta Ana, California. Age kwa pandwire munazinyetu Rutherford kweyi ga geve siuyungwa sosiwa. Age kwa uyungire hena asi: “Membo lyetu kwa kara mo vantu vatatu wokuvera, yipo nye ngano kapi yina tu tompoka kuza nokukapurakena kosiuyungwa oso nampili ngano asi ove kuna si gavere pepi nose.”

Moyivike eyi ya kweme ko, koradiyo kwa pitilire ko malikwamo gomanzi goyiuyungwa. Kehagero lyomvhura, Ruhungu kwa tente asi: “Vantu wokusika po 300 000 kwa purakenene koyiuyungwa kupitira koradiyo.”

Nombilive dorupandu edi va gwene valirongi woBibeli kwa va tumangedere va tulise po sitasi soradiyo moStaten Island, pepi noBeteli zaBrooklyn. Monomvhura edi da ya kweme ko, valirongi woBibeli kwa ruganesere sitasi esi ngava tumbura asi WBBR, yipo va zuvhise unene mbudi zoUhompa.

Ruhungu romo-15 Pembagona 1922 kwa divisire asi mo-5 dogoro 13 Sitarara 1922, ngaku kara ko sigongi moCedar Point, Ohio. Valirongi woBibeli kwa hefe unene apa va ka sikire moCedar Point.

Munazinyetu Rutherford kwa tanterere vapurakeni mosiuyungwa sendi sokuhova asi: “Na sihuguvara nawa-nawa asi Hompa na tungika sigongi esi nokudivilisa asi umbangi va u divise unene kupitakana nare.” Vauyungi woposigongi oso kwa korangedere vanavazinyetu va zuvhise.

MoUtano mo-8 Sitarara, vakalimo wokusika po 8 000 kwa hwililire mosala ntani awo kwa ndindilire nononkondo siuyungwa samunazinyetu Rutherford. Awo kwa gazarere asi age na ya faturura eyi adi tanta nonkango “ADV,” edi va tjenge poyipepa yawo yezigido. Apa va hingilire, sinzi sawo kwa mwene eborde lyenene eli lya kere keguru lyositantara. Arthur Claus ogu ga tundire koTulsa, Oklahoma, moAmerika a wize kosigongi, kwa hingilire sipundi sokomeho a purakene nawa yiuyungwa.  Ayo kapi ya kere ureru kugwana sipundi sokomeho morwa posiruwo sina kapi pwa kere yikwamambako.

Mokudivilisa asi pa dire kukara madonganeso, munasipundi kwa geve madiviso asi ava nava hulilira kapi nava va pulisira va hwilire mosala posiruwo esi munazinyetu Rutherford ga geve siuyungwa. Povili zo–9:30 kongura-ngura, munazinyetu Rutherford kwa tamekere nononkango edi ga uyungire Jesus edi da kara mwaMateusa 4:17, edi da tanta asi: “Uhompa wemeguru pepi una kara.” Apa ga uyungire omu vantu ngava tambura Uhompa ou, age kwa tente asi: “Jesus mwene kwa uyungire asi posiruwo sekaro po lyendi age nga ya pongaika vantu vendi wousili nava wokulimburukwa.”

Munazinyetu Claus ogu ga hingilire mosala zonene kwa tanta asi: “Ose kwa purakenene nawa.” Nye konyima tupu zosiruwo, ta tameke kuvera makura ta tundu mo mosala nampili ngomu ga dilire kuhara kutunda mo morwa ga yi divire asi kapi tava ya mu pulisire kuhwilira mo mokuyapurakena kosiuyungwa.

Konyima zonominute dongandi, yipo ga tamekere kulizuvha ko hansa. Age kwa uyunga asi ngomu ga gendere a tengwire kosala, age kwa zuvhire vantu omu vana kusakerera unene. Age kwa hefe apa ga zuvhire esakerero olyo. Age kwa tokwere asi nsene na ronda peguru lyosala, nayi mu vatera a zuvhe nawa siuyungwa sosiwa. Munazinyetu Claus ogu ga kere nonomvhura 23 posiruwo sina, ya mu tompokere kuronda keguru lyetungo. Makende gekeguru kwa zegurukire, ntani age kwa uyungire asi: “Ngomu ga hederere pepi nomakende, age kwa zuvhire nawa siuyungwa oso.”

Munazinyetu Arthur kapisi gelike ga kere ko keguru. Vakaume vendi vamwe nawo kwa kere keguru. Kaume kendi gumwe Frank Johnson kwa mu dukilire nokuyamupura asi: “Ono kara ko nokambere ndi?”

Munazinyetu Arthur yipo ga limbwilire asi: “Nhi, kozili.”

 Frank yipo ga limbwilire asi: “Ose kuna kanderere asi tu gwane ko ogu ana kara ko nombere. Ono limono eli eborde? Alyo kuna kara eborde lyosidiviso ntani kuna li manga konombohwa edi ono kumona. Purakena nawa komupanguli. * Apa na uyunga asi ‘diviseni, diviseni,’ makura teta nongodi ne edi vana li mangesa.”

Arthur kwa kwaterere mbere ntani nage novakwawo kwa ndindilire munazinyetu Rutherford a uyunge nonkango edi da kere sidiviso asi kuvhura va tete nongodi dekeborde. Ano ngesi munazinyetu Rutherford ana siki posiruwo sosidiviso esi sa likidire asi kuvhura va tete nongodi. Munazinyetu Rutherford kwa hefe ntani kwa kere nouradi apa ga uyungire nezwi lyenene nonkango edi asi: “Kareni noulimburukwi ntani kareni nombangi dousili daHompa. Twikireni kurwa dogoro apa Babironi zonene ngava zi zonagura po. Zuvhisireni nakunye. Yipo uzuni nga u dive asi Jehova yige Karunga ano Jesus Kristusa yige Hompa govahompa. Esi kuna kara siruwo somulyo unene mouzuni mudima. Zuvhiseni asi Hompa kuna kupangera! One mwa kara nositumbukira sokuzuvhisira nkenye ogu kuhamena mbudi ezi. Yipo nye, diviseni, diviseni, diviseni, kuhamena Hompa noUhompa wendi!”

Arthur kwa uyunga asi nage novakwawo kwa tetere nongodi, ano eborde yipo lya gonyonokere nakauke-nakauke. Nkango “ADV” kwa kere esupipiko lyonkango “diviseni” zomoRuhingilisa ezi za tamba “kokuzuvhisa” ndi “kugavera umbangi.”

Sigongi esi sa karerere moCedar Point kwa vaterere vanavazinyetu va demenene kosirugana somulyo po sokuzuvhisa kuhamena Uhompa ntani vantu ava va kere neharo kwa hefe mokulihameka mo. Muzuvhisi gokukarerera gomoOklahoma moAmerika kwa tente asi: “Ose kwa zuvhisilire kevango oku sinzi sovantu ngava rugana monomina ntani awo kwa kere nohepwe.” Age kwa tente asi rorunzi “vantu ngava lili” apa ngava zuvhu mbudi ezi za kere mosifo the Golden Age. Age kwa hagesa nononkango edi asi: “Ayo kwa tu hafesere mokuvahengagwida.”

Valirongi woBibeli va mwene mulyo gononkango daJesus edi da kara mwaRukasa 10:2, edi adi tanta asi: “Muzangu munzi, nye varugani vasesu.” Ngomu mvhura za ya hege, awo kwa tokomenene kuzuvhisa mbudi zoUhompa mouzuni mudima.