1. Ngapi omu ruhafo rwetu rwa korera mokudiva Karunga nokumukarera?

 RUHAFO rwene-rwene kapisi ruhafo ropokaruwogona tupu, nye aro ruhafo rokukarerera. Ngwendi ngapi? Jesus kwa fatwilire pEudiso lyendi lyopoNdundu asi: “Vantu woruhafo vaava ava dimburura asi va hepa Karunga.” (Mat. 5:3) Jesus ga yi divire asi vantu kwa va sita neharo lyokudiva Musiti gwawo Jehova ntani nokumukarera. Mokumona asi Jehova kuna kara “Karunga goruhafo,” ava ava mu karere nawo kuvhura kukara noruhafo.—1 Tim. 1:11.

2-3. (a) Kuliza nononkango edi ga uyungire Jesus, vantu musinke ava nawo nava vhura kukara noruhafo? (b) Yisinke natu ka zogera mosirongwa esi ntani morwasinke yina karere nomulyo?

² Ngoso ose kuvhura kukara tupu noruhafo nsene kapi tuna kuligwanekera nomaudigu ndi? Hawe. Koyili yininke yimwe yokutetukisa eyi ga uyungire Jesus pEudiso lyendi lyopoNdundu. Vantu ‘woruguwo’ nawo kuvhura kukara noruhafo nampili yi kare asi awo kulizuvha unzoni kononzo dawo ndi nampo va kara nomaudigu gomanene. Jesus kwa uyungire hena asi: ‘Ava ava hepere uhungami ndi ava ava lididimikire maswauro’ morwa kukara varongwa vaKristusa, nawo kuvhura kukara noruhafo. (Mat. 5:4, 10, 11) Nye ngapi omu muntu na vhura kukara noruhafo rwene-rwene momaukaro gangoso?

³ Jesus kwa rongere asi ruhafo rwene-rwene kapi aru tundu moyininke eyi yina kututompoka meparu nye aro kurugwana pokudiva Karunga nokumuhedera pepi. (Jak. 4:8) Ngapi omu natu yi rugana oyo? Mosirongwa esi, tatu ka zogera yitwa yitatu eyi ayi twaredesa koruhafo rwene-rwene.

4. Sininke musinke sokuhova twa hepa kurugana yipo tu gwane ruhafo rwene-rwene? (Episarome 1:1-3)

⁴ SITWA SOKUHOVA: Mokuninka asi tu kare noruhafo rwene-rwene, ntudi twa hepa kuresa nokulironga Nonkango daKarunga. Jesus kwa hetakanesere Nonkango daKarunga konondya. Vantu noyikorama kwa hepa nondya yipo va paruke. Nye nampili ngoso, vantu yiwo velike tupu wokuvhura kuresa Nonkango daKarunga ntani va hepa kuyirugana. Eyi yiyo nye Jesus ga uyungilire asi: “Muntu kapi a paruka komboroto zelike, nye kuparuka kwankenye nkango ezi azi tundu mokana kaJehova.” (Mat. 4:4) Yipo nye, kapisi tu pitise po ezuva limwe twa hana kuresa Nonkango daKarunga. MuEpisarome kwa tjenge asi: ‘Muntu goruhafo kwa tokomena kuresa Veta zaHOMPA, oku ta zi konakona mutenya nomasiku.’—Resa Episarome 1:1-3.

5-6. (a) Yisinke natu vhura kulironga mo moBibeli? (b) Mononkedi musinke nazi tu vatera Bibeli nsene tu zi resa?

⁵ Mokumona asi Jehova ga tu hara, age kwa tu likida moBibeli eyi twa hepa kurugana yipo tu kare noruhafo meparu. MoBibeli, ose kulironga mo asi yisinke sitambo sendi keparu. Ose kulironga mo omu natu mu hedera pepi ntani neyi natu rugana yipo a tu gusire po nonzo detu. Ntani ose kulironga mo ehuguvaro lyewa lyokomeho eli ga tu tumbwidira. (Jer. 29:11) Yininke oyo atu lirongo moBibeli kutuhafesa unene.

⁶ Ngomu twa yi diva, moBibeli kwa kara mo mavyukiso gomanzi aga naga vhura kutuvatera meparu lyetu nkenye ezuva. Apa atu kwama mavyukiso ogo, ose kuvhura kugwana ruhafo. Nkenye apa ngo lizuvha asi ono dompo mutjima morwa maudigu gemeparu, litulira po siruwo sosinzi o rese Nonkango daKarunga nokuteda  ko. Jesus kwa uyungire asi: “Vantu woruhafo, vaava ava zuvhu nonkango daKarunga nokudisikisa mo!”—Ruk. 11:28.

7. Yisinke nayi kuvatera o gwanene mo uwa nsene kuna kuresa Nonkango daKarunga?

⁷ Ngomu ono kuresa Bibeli, hafera eyi ono kuresa mo. Mokuyifanekesa, nove wa ligwanekera noukaro ou una kukwama ko ndi? Tu tante asi gumwe ta tereke nondya edi wa hara unene. Nye nampo morwa ono kara mongenderera ndi kuna kugazara yininke yoyinzi, makura to li usimbu-simbu wa hana kuliwora yipo o zuvhe utovara wonondya edi ono kulya. Konyima zokumana kulya, ove no dimburura asi ono genderere kulya ntani nokugazara asi ngano kani liwora yipo ni hafere nondya odo. Ayo kuvhura kulifana nomu atu resa Bibeli, poyiruwo yimwe ose kuresa kugenderesa, twa hana kuhafera mbudi ezi atu gwana mo. Liwora kuresa Nonkango daKarunga yipo o di hafere, mona yihorokwa eyi ono kuresa momagano goge, gazadara ko komazwi govantu ava ono kuresa ntani gazadara ko hena kuhamena eyi ono resa. Nsene o yi rugana eyi, ove ngo hafa unene.

8. Ngapi omu “mukareli gokulimburukwa gonondunge” ana kusikisa mo sirugana sendi? (Tara hena nonkango dokonhi.)

⁸ Jesus kwa horowora “mukareli gokulimburukwa gonondunge” yipo a tu pe nondya dopampepo posiruwo souhunga ntani ose kugwana nondya dononzi. * (Mat. 24:45) Mukareli gokulimburukwa kuruganesa unene po Matjangwa yipo a tu pe nondya dopampepo. (1 Tes. 2:13) Nondya odo dopampepo kutuvatera yipo tu dive magazaro gaJehova aga ga tu horwera moBibeli. Eyi yiyo nye atu resere maRuhungu nonoAwake! ntani noyirongwa eyi ya kara ko jw.org. Ose kuliwapaikira mapongo gomokatji kosivike ntani naga gomosikondovike. Ntani ose kutarera elikwamo lyankenye kwedi lyo JW Broadcasting^®. Nsene tu twikira kuresa nokulironga Bibeli, ayo ngayi tu vatera tu rugane sininke sauvali esi twa hepa kurugana yipo tu gwane ruhafo rwene-rwene.

9. Sitwa musinke sauvali esi asi twaredesa koruhafo rwene-rwene?

⁹ SITWA SAUVALI: Mokuninka asi tu kare noruhafo rwene-rwene twa hepa kusikisa mo nompango daJehova. MuEpisarome kwa tjenge asi: “Verago [vehafo] vava ava tjira HOMPA, ava va liza ukaro wawo nonompangera dendi!” (Epis. 128:1) Kutjira Jehova kutanta asi twa hepa kumufumadeka ntani nokunyokera po nkenye eyi nayi mu guvisa. (Yis. 16:6) Yipo nye, ose kurugana paapa twa hulira pokutwikira kukwama nompango daJehova edi da kara moBibeli. (2 Kol. 7:1) Ose ngatu kara noruhafo nsene tu rugana yininke eyi ga hara Jehova nokunyokera po yininke eyi ga nyenga.—Epis. 37:27; 97:10; Rom. 12:9.

10. Kuliza noVaroma 12:2, situmbukira musinke twa kara naso?

¹⁰ Resa Varoma 12:2. Muntu kuvhura a dive asi Jehova ga kara nononkondo dokutokora kuhamena yininke youhunga neyi yepuko, nye muntu mwene ga hepa kutokora nsene asi ta kwama nompango daJehova. Pasihonena, muntu kuvhura a dive asi epangero lya kara nononkondo dokutulisa po noveta domositaura. Nye age nampo kapi ana hara kulimburukwa konoveta odo. Ngoyitundwamo, age ta tokora kusinga unene. Ose kuyilikida nawa-nawa moyirugana yetu asi twa yi pura asi kukwama nompango daJehova kuna kara nkedi zongwa po meparu. (Yis. 12:28) Ndafita nage yimo ga lizuvhire ngoso. Ano eyi yiyo ya mu ninkisire a uyunge kuhamena Jehova asi: “Ove ngo likida nge nzira zomwenyo; kosipara soge kwa zura ehafo; ehafo lyoge kuretera nge ehafo narunye, korulyo roge uwa wanarunye wa kara ko.”—Epis. 16:11.

11-12. (a) Yisinke twa hepa kutakamesa apa atu kara nosinka ndi apa atu guwu? (b) Ngapi omu nonkango domoVafilipi 4:8 nadi tu vatera nsene kuna kuhorowora yilihafeso?

 ¹¹ Apa atu kara nosinka ndi apa atu guwu, ose nampo kuvhura tu hetekere ko kurugana yuma eyi nayi tu vatera tu hageke kukara nosinka. Ayo kapisi epuko kuyirugana ngoso, nye twa hepa kutakamesa yipo tu dire kurugana yininke eyi ga nyenga Jehova.—Efe. 5:10-12, 15-17.

¹² Mombilive zomupositoli Paurusa ezi ga tjangerere Vakriste womoFilipi, age kwava korangedere va twikire kurugana ‘yininke youhunga, yokukuhuka, yeharo, ntani yininke eyi ava fumadeke.’ (Resa Vafilipi 4:8.) Nampili ngomu Paurusa ga dilire kutumbura kuhamena yilihafeso, nye eyi ga tjenge kuvhura kutuvatera kuhamena yilihafeso eyi atu horowora. Heteka eyi: nkenye apa nkango ezi “yininke” azi moneka movelise, zi pinganesera po nonkango ngwendi “marusumo” “nomuvi” “masimwititi” ndi “maudano gonovidiyo.” Pokuyirugana eyi, ayo ngayi kuvatera o dive yilihafeso eyi a hafere Karunga neyi a dili kuhafera. Ose tuna hara kukwama nompango daJehova dokuzeruka. (Epis. 119:1-3) Nsene tu yi rugana eyi, ose ngatu rugana sitwa sokukwama ko esi asi twaredesa koruhafo rwene-rwene.—Yirug. 23:1.

13. Sitwa musinke sautatu esi asi twaredesa koruhafo rwene-rwene? (Johanesa 4:23, 24)

¹³ SITWA SAUTATU: Divilisa asi ove kuna kutura muhowo ukareli waJehova meparu lyoge. Mokumona asi Jehova yige ga tu sita, ayo ya mu fira tu mu karere. (Ehor. 4:11; 14:6, 7) Yipo nye, sininke somulyo po unene meparu lyetu esi twa hepa kurugana kuna kara kukarera Jehova monkedi ezi ana hara tu mu karere, eyi kutanta asi kumukarera “mompepo nomousili.” (Resa Johanesa 4:23, 24.) Ose tuna hara mpepo zokupongoka zi pitisire ukareli wetu yipo u li ze nomausili aga atu gwana moNonkango dendi Bibeli. Ukareli wetu wa hepa kukara muhowo meparu lyetu, nampili yikare asi ose kwa kara mosirongo esi va hagekesa sirugana setu. Ngesi vanavazinyetu wokupitakana po-100 kwava tura modorongo morwa yeeyi va kara Nombangi daJehova. * Nye nampili ngoso, awo kurugana noruhafo mwankenye eyi ava vhuru kurugana, pasihonena pokukanderera, pokulironga ntani pokutantera ko wopeke kuhamena Karunga ntani noUhompa wendi. Apa vantu ava tu rwanesa ndi ava tu hepeke, ose kuhafa pokudiva asi Jehova kutuvatera yipo tu lididimikire ntani ose kuhafa pokudiva asi age nga ka tu futa.—Jas. 1:12; 1 Pet. 4:14.

14. Yisinke ya horokerere munazinyetu gomugara gomudinkantu gomoTajikistan ntani morwasinke?

¹⁴ Yihonena yovanavazinyetu kulikida asi yitwa yitatu eyi tuna zogere kutwaredesa koruhafo rwene-rwene, yikare asi maudigu musinke tuna kuligwanekera nago. Tu tareni eyi ya horokerere munazinyetu gomugara Jovidon Bobojonov gonomvhura 19 ogu ga tunga moTajikistan apa ga nyokere kukara mukwayita. Mo-4 Sikukutu 2019, kwa mu gusire mo membo lyendi noku ka mu tura modorongo makwedi gongandi ntani kwa ka mu tekwire ngwendi mukorokotji. Sihorokwa esi kwa si rapotere kombudi moyirongo yimwe. Erapoto olyo kwa kere asi age kwa mu toonene nokumusininika a gane mugano goukwayita ntani yipo a dware mudwaro govakwayita. Konyima zoyo, hofa kwa mu gwene unzoni ntani kwa mu tumine kokamba zovarugani dogoro apa presidente gomosirongo sawo ga mu gusilire po unzoni wendi nokugava mpangera va mu guse mo modorongo. Mosiruwo nasinye oso, Jovidon kwa twikilire kulimburukwa nokukara noruhafo. Ngapi  omu ga yi rugene? Pokulitura mo nkenye apa moyininke yopampepo.

15. Ngapi omu munazinyetu Jovidon ga twikilire kulironga kuhamena Jehova apa ga kere modorongo?

¹⁵ Apa Jovidon ga kere modorongo, age kwa twikilire kulironga kuhamena Jehova, nampili ngomu ga dilire kukara noBibeli ndi nankenye yimbapiratjangwa yetu. Ngapi omu ya mu tompokere? Vanavazinyetu ngava mu twarere nondya ntani ngava mu tjangere etjangwa lyankenye ezuva poyiplastika eyi ngava mu tulire nondya. Yipo nye, age ga vhulire kuresa Bibeli ntani nokuteda ko nkenye ezuva. Konyima zapa va mu pwagesere modorongo, age kwa tantera ava va dira kuligwanekera nomaudigu gomanene asi: “Ayo ya kara nomulyo mu ruganese umanguruki weni yipo mu dive unene Jehova pokuresa Nonkango dendi ntani noyimbapiratjangwa yetu.”

16. Koyininke musinke a demenene Jovidon?

¹⁶ Munaziyetu Jovidon nga sikisa mo nompango daJehova. Mevango lyokudemenena komadowo gomadona ntani koyirugana yoyidona, age nga demenene kwaJehova ntani koyininke eyi a tara Jehova asi mulyo. Jovidon nga hafere kutara unsitwe. Nkenye ngurangura apa nga pinduka, nga zuvhu yidira yina kudimba. Ano masiku age nga tara kokakwedi ntani nombungururu. Age kwa tanta asi: “Yininke oyo yokulisiga-siga  ga sita Jehova, ngayi hafesa nge ntani ngayi korangeda nge.” Apa atu kara norupandu koyininke nayinye yopanyama ntani komavyukiso gomoBibeli aga atu pe Jehova, ose ngatu hafa ntani ruhafo oro kuvhura kutuvatera tu lididimikire maudigu.

17. Ngapi omu nonkango edi da kara mwa 1 Peturusa 1:6, 7 nadi vatera muntu ogu nampo ana kara moukaro ngwendi wamunazinyetu Jovidon?

¹⁷ Jovidon kwa tulire hena muhowo ukareli waJehova. Age ga divire mulyo gokutwikira kulimburukwa Karunga gosili. Jesus kwa tente asi: “O tongamene Jehova Karunga goge oku to mu karere gelike makura.” (Ruk. 4:8) Vampitisili wovakwayita ntani novakwayita kwa here asi Jovidon a hageke kukara Mbangi zaJehova. Nye nampili ngoso, age nga kanderere nelituromo nkenye ezuva nomasiku nokupura Jehova a mu vatere a twikire kulimburukwa. Nampili ngomu va mu tekwire momudona, Jovidon kwa twikilire kukara mulimburukwi. Ngoyitundwamo, age ngesi ana hafa unene morwa ga gwanena mo yitundwamo yoyiwa konyima zapa va mu kwete nokumutoona ntani nokumutura modorongo. Age ngesi ana kara nepuro lyokupama morwa epuro lyendi kwaliheteka.—Resa 1 Peturusa 1:6, 7.

18. Yisinke nayi tu vatera tu twikire kukara noruhafo?

¹⁸ Jehova ga diva eyi twa hepa yipo tu kare noruhafo rwene-rwene. Nsene o sikisa mo yitwa yitatu eyi ayi twaredesa koruhafo rwene-rwene, ove ngo hafa yikare asi maudigu musinke ngoligwanekera nago. Makura nove kuvhura ngo uyunge asi: “Gerago muhoko ogu gwa kara naKarunga HOMPA!”—Epis. 144:15.