1. Ehuguvaro musinke ga tu pa Jehova?

 JEHOVA kwa tu pa ehuguvaro lyewa lyokukagwana mwenyo gwanarunye. Vamwe kwa kara nehuguvaro lyokukaparukira narunye meguru ngoyisitwa yopampepo. (1 Kol. 15:50, 53) Nye nampili ngoso, sinzi sovantu kwa kara nehuguvaro lyokukaparukira narunye pevhu, omu ngava ka kara noukanguki wouwa noruhafo. (Ehor. 21:3, 4) Yikare asi ose kuna kundindira nononkondo mokukaparukira narunye meguru ndi pevhu, ehuguvaro lyetu kwa kara nomulyo unene.

2. Kosinke lya korera ehuguvaro lyetu ntani morwasinke tuna kuuyungira ngoso?

² Nkango “ehuguvaro” ezi va ruganesa moBibeli kutanta asi “endindiro lyoyininke yoyiwa eyi ngayi vhura kuhoroka komeho.” Ehuguvaro lyetu lyokomeho ngali ka sika mo morwa alyo kwa tunda kwaJehova. (Rom. 15:13) Ose twa diva eyi ga tumbwidira ntani twa yi diva asi age nkenye apa kusikisa mo matumbwidiro gendi. (Num. 23:19) Ose twa kara nehuguvaro asi Jehova ga kara neharo ntani nononkondo dokukasikisa mo nayinye eyi ga uyunga asi ngaka yi rugana. Yipo nye, ehuguvaro lyetu kapi lya korera kweyi atu gazara ndi koyininke eyi tuna hara yihoroke, nye alyo kwa korera koyininke eyi twa diva asi ayo usili.

3. Yisinke natu ka zogera mosirongwa esi? (Episarome 27:14)

³ Guhyetu gemeguru ga tu hara ntani ana hara tu huguvare mwendi. (Resa Episarome 27:14.) Nsene ehuguvaro lyetu mwaJehova lipama, ose ngatu lididimikira maudigu ntani ngatu kara nouradi noruhafo, yikare asi maudigu musinke ngatu ligwanekera nago komeho. Tu zeni tu ka zogere omu ehuguvaro lyetu a li tu popere. Pomuhowo tatu ka zogera omu ehuguvaro lyakara ngwendi sisikameso ntani ngwendi ekoli. Ano konyima natu ka zogera omu natu nkondopeka ehuguvaro lyetu.

4. Ngapi omu ehuguvaro lya fana ngwendi sisikameso? (Vahebeli 6:19)

⁴ Mombilive zomupositoli Paurusa ezi ga tjangerere koVahebeli, age kwa fanekesere ehuguvaro lyetu kosisikameso. (Resa Vahebeli 6:19.) Rorunzi age nga gendi mefuta. Yipo nye, Paurusa gayi divire asi yisikameso ngayi vatere sikepa yipo si dire kupupa. Sikando simwe, age kwa kere mosikepa, apa ekundungu lyenene lya horokere. Apa lya horokere ekundungu olyo, age kwa mwene vanasikepa omu vana kuzugumina yisikameso momema yipo yi vatere sikepa si dire kupupa ntani noku kalitoona momamanya. (Yirug. 27:29, 39-41) Ngwendi sisikameso asi vatere sisikameso si dire kupupa, ehuguvaro lyetu kuvhura kutuvatera yipo tu dire kuhageka kukarera Jehova nsene kuna kuligwanekera nomaudigu gomanene. Ehuguvaro lyetu kutuvatera tu twikire kukara tuna litura apa atu ligwanekere nomaudigu morwa twa yi diva asi yininke ngayi wapa tupu. Diworoka asi Jesus kwa rondwere asi ngava tu hepeka. (Joh. 15:20) Yipo nye, pokuteda ko kweyi ga tu tumbwidira Jehova, ayo kutuvatera yipo tutwikire kumukarera.

5. Ngapi omu ehuguvaro lya vaterere Jesus nampili ngomu gayi divire asi ta ka fa?

⁵ Koneka omu ehuguvaro lya vaterere Jesus nampili ngomu gayi divire asi tava ka mu dipaga monkedi zokukoresa unene. PoPentekoste, momvhura 33, mupositoli Peturusa kwa temwinine nonkango douporofete demEpisarome edi da faturura kuhamena omu Jesus ga kere ana litura ntani nokukara nehuguvaro. Edi adi tanta asi: “Ame ngani huguvara moge morwa kapi ngo sigilira nge moMayendo, ndi asi o sigilire mukareli goge gomulimburukwi a wore. . . . Ngo zwida mutjima gwange ruhafo komeho zoge.” (Yirug. 2:25-28; Epis. 16:8-11) Nampili ngomu Jesus gayi divire asi ta ka fa, age kwa kere nehuguvaro lyenene mwaKarunga asi na mu vhumbura ntani ga kere hena nehuguvaro asi nga ka kara hena kumwe noGuhwe meguru.—Heb. 12:2, 3.

6. Yisinke ga uyungire munazinyetu gumwe gomugara kuhamena ehuguvaro?

⁶ Ehuguvaro lyokomeho eli twa kara nalyo kwa vatera vanavazinyetu wovanzi yipo va lididimikire maudigu. Tu zeni tu ka tare sihonena samunazinyetu gomugara gomulimburukwi Leonard Chinn ogu ga tungire moIngiranda. Age kwa mu tulire modorongo poyita yokuhova youzuni mudima morwa kwa nyokere kukara mukwayita. Age kwa mu tulire mokanzugo ka gelike ure womakwedi gavali, ano konyima kwa ya mu sininikire a rugane yirugana youdigu. Age kwa tjenge asi: “Ukaro ou na pitire kwa vaterere nge ni dimburure asi twa hepa ehuguvaro yipo tu lididimikire.” MoBibeli kwa kara mo sihonena saJesus, sovapositoli novaporofete ntani nomatumbwidiro gomawa. Yininke nayinye eyi kutuvatera tu kare nehuguvaro lyokupama lyokomeho ntani kutuvatera yipo tu lididimikire maudigu. Ehuguvaro kwa fene ngwendi sisikameso kwaLeonard ntani alyo kuvhura hena kukara ngwendi sisikameso kwetu.

7. Mauwa musinke atu gwanene mo apa atu ligwanekere nomaudigu? (Varoma 5:3-5; Jakopo 1:12)

⁷ Ehuguvaro lyetu kuya pama konyima zapa atu piti momaudigu ntani apa atu limonene omu Jehova a tu vatere noku tu hafera. (Resa Varoma 5:3-5; Jakopo 1:12.) Yipo nye, ose ngesi twa kara nehuguvaro lyokupama kupitakana ehuguvaro eli twa kere nalyo pomuhowo apa twa tambwire mbudi zongwa. Satana kuna tu harere tu lizuvhe asi maudigu gana tu vhukire, nye nevatero lyaJehova, ayo kuvhura kututompoka tu ga lididimikire nagenye.

8. Ngapi omu ehuguvaro lya fana ngwendi ekoli? (1 Vatesaronika 5:8)

⁸ Bibeli kwa hetakanesa hena ehuguvaro lyetu kekoli. (Resa 1 Vatesaronika 5:8.) Mukwayita kudwara ekoli eli ali popere mutwe  gwendi koyikutji eyi adi ponyo nonkore dendi. Mokumona asi ose kurwa yita yopampepo naSatana, twa hepa kupopera nondunge detu komahomokero gaSatana. Age kuruganesa maheteko ntani nomagano gokulisiga-siga yipo a pukise magazaro getu. Ngwendi moomu tupu ekoli ali popere mutwe gomukwayita, ehuguvaro lyetu kupopera magazaro getu yipo tu karere Jehova noulimburukwi.

9. Yisinke ayi horoka apa vantu ava dili kukara nehuguvaro?

⁹ Ehuguvaro lyetu lyomwenyo gwanarunye kutuvatera tu rugane younongo ntani tu ture po matokoro gomawa. Ano koruha rumwe, nsene ehuguvaro lyetu li dira kupama, ose ngatu tameka kugazara yininke eyi twa hara ntani noku divara kuhamena ehuguvaro lyetu lyomwenyo gwanarunye. Tu zeni tu ka tare ukaro umwe ou wa horokerere Vakriste vamwe womosiruwo sanare ava va tungire moKolinte. Awo kwa zumbanesere epuro metumbwidiro lyaKarunga lyomulyo, kutanta asi ehuguvaro lyevhumbuko. (1 Kol. 15:12) Paurusa kwa tjenge asi ava va dira kupura mevhumbuko, awo kuparuka tupu yipo va hafese madowo gawo. (1 Kol. 15:32) Neina sinzi sava va dira kukara nehuguvaro momatumbwidiro gaKarunga kurugana nkenye eyi moomu va vhulira yipo va hafere eparu. Nye nampili ngoso, ose twa lisiga nawo morwa twa huguvara momatumbwidiro aga ga tumbwidira Karunga. Ehuguvaro lyetu kwa fana ngwendi ekoli eli ali popere magazaro getu ntani nokutuvatera tu dire kuligazara nyamwetu morwa kuvhura ngayi zonagure elikwatakano lyetu naJehova.—1 Kol. 15:33, 34

10. Ngapi omu ehuguvaro nali tu popera komagano gepuko?

¹⁰ Ehuguvaro lyetu kutupopera yipo tu dire kukara nomagazaro aga ngaga tu ninkisa tu lizuvhe asi kapi ngatu vhura kuhafesa Jehova. Pasihonena, vamwe kuvhura va gave konda asi: ‘Ame kapi ngani ka hamena kovantu ava ngava ka paruka narunye. Kapi tani yi vhuru. Kapi tani yi vhuru kuparuka kuliza nonompango daJehova.’ Diworoka asi kaume kaJoba Elifasa nage kwa geve nokonda dokulifana. Elifasa kwa tente asi: “Muntu nye kuvhura sili a kuhukilire po ndi?” Age hena kwa uyungire kuhamena Karunga asi: “Karunga yinke ga dilira kuhuguvara novaengeli vendi vaava, nawo si kwendi age kapi va kuhuka.” (Joba 15:14, 15) Ayo kwa kere yipempa. Diworoka asi Satana yige ana hara o gazare monkedi zangoso. Age gayi diva asi nsene o twikira kugazara monkedi zangoso, ove ngo zumbanesa ehuguvaro lyoge. Yipo nye, nyokera po yipempa yokukara ngoso ntani demenena komatumbwidiro gaJehova. Kapisi o kare nomasinganyeko, age kuna kuharere o ka paruke narunye ntani nga ku vatera o ka sikise mo sitambo oso.—1 Tim. 2:3, 4.

11. Morwasinke natu karera nelididimiko ngomu tuna kundindira ehuguvaro lyetu ngali ka sike mo?

¹¹ Ayo kapisi ureru kunkondopeka ehuguvaro lyetu. Ngomu tuna kundindira Karunga yipo ngaka sikise mo matumbwidiro gendi, ose nampo kuvhura tu yi mone ngwendi kuna kugusa siruwo sosire. Nye nampili ngoso, Jehova age Karunga gwanarunye ntani monkedi omu a tara siruwo kwalisiga nomu atu si tara. (2 Pet. 3:8, 9) Age nga rugana eyi ga tumbwidira monkedi zongwa. Nye nampo kapi ngayi rugana posiruwo esi tuna yi harere. Yisinke nayi tuvatera tu twikire kunkondopeka ehuguvaro lyetu ngomu tuna kundindira nelididimiko yipo Jehova ngaka sikise mo matumbwidiro gendi?—Jak. 5:7, 8.

12. Kuliza noVahebeli 11:1, 6, ngapi omu ehuguvaro lya likwatakana nepuro?

¹² Ose ngatu twikira kunkondopeka ehuguvaro lyetu nsene tu kara pepi naJehova ogu ga tu pa ehuguvaro olyo. Mokuninka asi tu kare nehuguvaro, twa hepa kukara nepuro asi Jehova yipo ga kara ntani asi “yige a futu ava ava mu papara nelituromo.” (Resa Vahebeli 11:1, 6.) Nsene tu yi pura nawa-nawa asi Jehova yipo ga kara, ayo ngayi tu vatera tu yi pure asi age ngaka sikisa mo matumbwidiro gendi nagenye. Tu zeni tu ka tare  nonkedi dimwe edi nadi tuvatera tu nkondopeke elikwatakano lyetu naJehova ntani nokukara nehuguvaro lyokupama.

13. Ngapi omu natu hedera Karunga pepi?

¹³ Kanderera kwaJehova ntani resa Nonkango dendi Bibeli. Ose kuvhura kuhedera Jehova pepi nampili ngomu atu dili kumumona. Ose kuvhura kumuuyungisa kupitira mekanderero nokukara nehuguvaro asi ngatu purakena. (Jer. 29:11, 12) Ose kuvhura kupurakena kezwi lyaKarunga pokuresa Nonkango dendi nokuteda ko. Ngomu atu resa kuhamena omu Jehova nga pakere mbili vakareli vendi womosiruwo sanare, ehuguvaro lyetu ngali nkondopara. Yininke nayinye eyi ya kara moNonkango daKarunga “kwa yi tjangera yipo yi tu ronge ntani ose twa kara nehuguvaro morwa Matjangwa kutunkondopeka noku tu vatera tu lididimike.”—Rom. 15:4.

14. Morwasinke natu gazadarera ko komatumbwidiro aga ga sikisa mo Jehova?

¹⁴ Teda ko kuhamena omu Jehova ga sikisa mo matumbwidiro gendi. Tu tareni eyi Karunga ga ruganene Abirahamu naSara. Awo kwa sikire ponomvhura edi ngano va dilire kureta vana. Nye nampili ngoso, Karunga kwava tumbwidilire asi ngava kara nomuna. (Gen. 18:10) Ngapi omu ya mu kundamene Abirahamu? Bibeli kuuyunga asi: “Age kwa yi pulire asi nga kara guhya gonomuhoko dononzi.” (Rom. 4:18) Nampili ngomu Abirahamu ga dilire kudiva asi ngapi omu etumbwidiro lyaKarunga ngali sika mo, nye age ga kere nehuguvaro asi Jehova nga sikisa mo etumbwidiro lyendi. Mugara ogo gomulimburukwi ga mwene omu etumbwidiro lyaKarunga lya sikire mo lyokumupa muna. (Rom. 4:19-21) Yihorokwa yangoso kutuvatera tu kare nehuguvaro asi Jehova kusikisa mo matumbwidiro gendi nagenye nampili yi moneke ngwendi kapi ngayi kasika mo.

15. Morwasinke ya karera nomulyo tu gazadare ko kweyi ga tu ruganena Karunga?

¹⁵ Gazadara ko kweyi ga kuruganena Jehova. Gazadara ko omu wa gwanena mo mauwa momatumbwidiro gaKarunga aga ga sika mo, ga  kara moNonkango dendi. Pasihonena, Jesus kwa tumbwidilire asi oGuhwe ngava kupa yihepwa yoge yemeparu. (Mat. 6:32, 33) Jesus ga ku tumbwidira hena asi Jehova ngaku pa mpepo zendi zokupongoka nsene o zi hundira. (Ruk. 11:13) Jehova ga sikisa mo matumbwidiro ogo. Ove kuvhura o gazadare ko komatumbwidiro aga ga ku tumbwidira aga ga sika mo. Pasihonena, age kwa ku tumbwidira asi nga ku gusira po, nga ku hengagwida ntani nga ku pa nkenye eyi wa hepa yipo ngo kare pepi nendi. (Mat. 6:14; 24:45; 2 Kol. 1:3) Nsene o teda ko kweyi ga kuruganena Karunga, ove ngo nkondopeka ehuguvaro lyoge kweyi nga ka kuruganena komeho.

16. Morwasinke ehuguvaro lyakarera uhwi womulyo po?

¹⁶ Ehuguvaro lyetu lyomwenyo gwanarunye kuna kara uhwi womulyo wokutunda kwaKarunga. Ose kwakundindira nononkondo meho zongwa ezi tuna diva nawa-nawa asi ngazi ka sika mo. Meho zetu zongwa kwa fana ngwendi sisikameso setu. Azo kutupa nonkondo yipo tu lididimikire maudigu nomahepeko ntani nampili nomfa. Meho zetu zongwa kwa fana ngwendi ekoli. Azo kupopera magazaro getu yipo tu nyokere po yininke yoyidona nokurugana yininke yoyiwa. Ehuguvaro eli atu gwana moBibeli kutuvatera tu hedere pepi naKarunga ntani kulikida asi age ga tu hara unene. Ose kugwanena mo mauwa gomanzi, apa atu kara nehuguvaro lyokupama.

17. Morwasinke ehuguvaro lyetu ali twaredesere koruhafo?

¹⁷ Mombilive ezi ga tjenge mupositoli Paurusa koVaroma, age kwa va korangedere asi “hafeni mehuguvaro.” (Rom. 12:12) Paurusa ga vhulire kuhafa morwa ga yi divire asi nsene a twikira kulimburukwa, ngaka gwana mwenyo gwanarunye meguru. Nose kuvhura tu hafe mehuguvaro lyetu morwa twayi diva asi Jehova nga sikisa mo matumbwidiro gendi. Ngwendi moomu tupu muepisarome ga tjenge asi: “Gerago muntu ogu . . . ga huguvara HOMPA Karunga gwendi, . . . Age kusikisa mo nkenye apa matumbwidiro gendi.”—Epis. 146:5, 6.