1-2. (a) Ngapi omu mapangero gamwe ga rwanesa vantu vaJehova ntani ngapi omu gava kundama marwaneso ogo? (b) Morwasinke natu twikilira kukara noruhafo nampili kuna kutuhepeka? (Kumburura ko kefano lyopontunda.)

 NGESI sirugana setu kwa si silika ndi kwa si hagekesa po moyirongo yokupitakana po-30. Moyirongo yimwe, mapangero kwa tura vanavazinyetu modorongo. Epuko musinke va rugana? Jehova kutara vanavazinyetu owo asi kwato epuko eli va rugana. Nye eyi va rugana tupu kuna kara kuresa Bibeli nokuzilironga, kulihameka mokuzuvhisa ntani kuza komapongo. Awo hena kwa nyokera po kulihameka moupolitika. Nampili ngomu va ligwanekera nomarwaneso gomanene, vakareli ava vaKarunga kwa twikira kumulimburukwa * eyi kutanta asi kwa twikira kukarera Jehova. Eyi kuvahafesa sili!

² Twasihuguvara asi wa mona mafano govanavazinyetu vamwe ava va kara nouradi ntani wa dimbwilire asi awo va kara noyipara yoruhafo. Awo kwa kara noyipara yoruhafo morwa va yi diva asi Jehova kuvahafera kweyi ava twikire kumulimburukwa. (1 Hist. 29:17a) Jesus kwa uyungire asi: “Vantu woruhafo vaava ava hepere uhungami . . . Hafeni unene, yeeyi mfeto zeni nene meguru.”—Mat. 5:10-12.

3. Kuliza noYirugana 4:19, 20, yisinke varugene vapositoli apa va va hepekere ntani morwasinke va yi ruganene ngoso?

³ Vanavazinyetu kwakuligwanekera noukaro ngwendi ou va li gwanekerere nawo vapositoli mosiruwo sanare apa ngava va  hepeke morwa kuzuvhisa kuhamena Jesus. Yikando yoyinzi, vapanguli womosigongi somasimbi ‘kwa va pangerere asi va ha ronga medina lyaJesus.’ (Yirug. 4:18; 5:27, 28, 40) Yisinke va rugene ko vapositoli? (Resa Yirugana 4:19, 20.) Awo va yi divire asi ogu ga kara nononkondo dononene kwa va ‘pangerere va zuvhisire vantu navenye’ kuhamena Kristusa. (Yirug. 10:42) Yipo nye, vauyungili po wovapositoli, Peturusa naJohanesa kwa uyungire nouradi asi awo va hepa kulimburukwa Karunga mevango lyokulimburukwa vapanguli ntani awo kwa uyungire asi kapi ngava hageka kuzuvhisa kuhamena Jesus. Monkango zimwe, awo ngwendi kwa pulire vapanguli asi ‘one kuna kugazara asi nompangera deni da pitakana daKarunga ndi?’

4. Kuliza noYirugana 5:27-29, sihonena musinke va tulira po vapositoli Vakriste navenye wousili ntani ngapi natu va honena?

⁴ Vapositoli kwa tura po sihonena sosiwa esi va kwama Vakriste navenye wousili dogoro ngesi ‘pokulimburukwa Karunga ngomupangeli, nye kapisi vantu.’ (Resa Yirugana 5:27-29.) Konyima zokuvatoona morwa ulimburukwi, vapositoli yipo va tundire po posigongi somasimbi “awo vana hafa unene morwa kwa lizuvhire asi va fira kuvahepekera edina lyaJesus” ntani awo kwa twikilire kuzuvhisa.—Yirug. 5:40-42.

5. Mapuro musinke twa hepa kulimburura?

⁵ Sihonena esi va tulire po vapositoli kuretesa po mapuro gomanzi. Pasihonena, ngapi omu Vakriste va vhulire kulimburukwa Karunga mevango lyokulimburukwa vantu ntani posiruwo sooso hena va “limburukwe kepangero”? (Rom. 13:1) Ngapi omu natu ‘limburukwa komapangero’ ngwendi moomu ga yi uyungire Paurusa, posiruwo sooso hena tu limburukwe mupangeli gomunene po Karunga?—Tit. 3:1.

6. (a) Wolye va hamena ‘mepangero’ eli va tumbura moVaroma 13:1, ntani ngapi omu natu va tekura? (b) Nonkondo dokuhura kupi va kara nado vampitisili navenye?

⁶ Resa Varoma 13:1. Movelise ezi, nkango ‘epangero’ kwa tamba kovampitisili ava  va kara nononkondo ntani ava ava pangere vakwawo. Vakriste va hepa kulimburukwa komapangero. Vampitisili womapangero kuretesa po mbili ntani nokudivilisa asi vantu kuna kukwama veta ntani poyiruwo yimwe awo kupopera vantu vaJehova. (Ehor. 12:16) Yipo nye, twa hepa kufuta mutero nokuvapa efumadeko eli lyava fira. (Rom. 13:7) Nye nampili ngoso, mapangero ogo kwa kara tupu nononkondo morwa Jehova yige ga va pa nonkondo dokupangera. Jesus kwa zeresere sitwa oso apa ga mu puragerere nguuru goVaroma Pontiusi Piratusa. Apa Piratusa ga uyungire asi age kuvhura a tokore asi Jesus kuvhura va mu parure ndi kuvhura va mu dipage, makura Jesus yipo ga mu tanterere asi: “Ngano kapi va ku pa nonkondo keguru, ove ngano kwato nonkondo kwange.” (Joh. 19:11) Vampitisili womapangero ntani novanapolitika kapi va kara nononkondo dononene ngwendi moomu ga dilire kukara nado Piratusa.

7. Momaukaro musinke natu dira kulimburukwa vampitisili ntani yisinke va hepa kudiworoka?

⁷ Vakriste kulimburukwa komapangero momaukaro aga aga dili kulirwanesa nonoveta daKarunga. Nye kapisi tu limburukwe mapangero nsene kuna kutupura tu rugane yininke eyi ga silika Karunga ndi nsene kuna kutusilika tu dire kurugana yininke eyi ga tu tantera Karunga asi ngano twa hepa kuyirugana. Pasihonena, mapangero kuvhura ga ninke vadinkantu wovagara yipo va ka rwire po sirongo sawo moyita. * Ndi kuvhura va hagekese po Bibeli zetu noyimbapiratjangwa yetu ntani nokutusilika tu dire kuzuvhisa nokuponga kumwe. Apa vampitisili ava ruganesa nonkondo dawo mepuko, ngwendi pokuhepeka varongwa vaKristusa, awo ngava hepa kukayi fatwilira Karunga. Jehova kunomena eyi ava rugana.—Muud. 5:8.

8. Elisigo musinke lyakara po pokatji kaJehova novampitisili ntani morwasinke twa hepera kuyidiva eyi?

⁸ Mapangero ga kara nononkondo nye kapi ga kara nononkondo dononene. Jehova yige ga kara nononkondo dononene. Yikando yoyinzi moBibeli kumutumbura asi ‘Karunga gekeguru-guru ndi munankondo nadinye.’—Ndan. 7:18, 22, 25, 27.

9. Yisinke ga mwene muporofete Ndaniyera momamoneko?

⁹ Ndaniyera kwa mwene mamoneko aga ga likidire asi Jehova kwa kara nononkondo dononene kupitakana mapangero nagenye. Pomuhowo, Ndaniyera kwa mwene makasama gane aga ga fanekesa mapangero gononkondo gomosiruwo sanare nomosiruwo setu. Pasihonena epangero lyaBabironi, lyaPeresiya, lyaGereka, lyaRoma ntani epangero lyomosiruwo setu lyaAmerika naBritaniya. (Ndan. 7:1-3, 17) Makura Ndaniyera kwa mwene hena Jehova kuna hingire posipundi souhompa meguru. (Ndan. 7:9, 10) Yininke yokukwama ko eyi ga mwene muporofete ogu gomulimburukwi kugava erondoro kovampitisili womomazuva getu.

10. Kuliza naNdaniyera 7:13, 14, 27, wolye a pe Jehova nonkondo dokupangera pevhu ntani yisinke ayi likida eyi kumuhamena?

¹⁰ Resa Ndaniyera 7:13, 14, 27. Karunga ta gusa nonkondo nadinye komapangero noku di gava kwava da fira, kwava va kara nononkondo dononene. Kwalye va di geve nonkondo odo? Ado kwa di geve kwagumwe ogu ga ‘fana ngwendi muntu,’ Jesus Kristusa ntani ‘kovantu vaKarunga gemeguru-guru’ ava va  hamena mosivaro 144 000 ava ngava ka pangera “narunye-nanarunye.” (Ndan. 7:18) Eyi kulikida asi Jehova yige munankondo nadinye morwa yige gelike ga kara nononkondo mokuyirugana oyo.

11. Yisinke hena ga tjenge Ndaniyera eyi ayi likida asi Jehova ga kara nononkondo dononene kupitakana nomuhoko?

¹¹ Sihorokwa esi ga mwene Ndaniyera memoneko sa liza noyininke eyi ga uyungire pomuhowo. Ndaniyera kwa tente asi: ‘Karunga gemeguru, yige a tura ohompa koyipundi tava gusa ko hena.’ Age hena kwa tjenge asi: “Karunga gekeguru-guru ga kara nononkondo komauntungi govantu, age hena kuvhura kuvagava kwankenye ogu ana horowora.” (Ndan. 2:19-21; 4:17) Pwa horoka rumwe siruwo apa Jehova ga gusire ko vapanguli ntani nokuvatura ko hena ndi? Yimo.

12. Gava sihonena esi sina kulikida omu Jehova ga gusire vahompa poyipundi yawo youhompa. (Tara efano.)

¹² Jehova ga yi likida nawa-nawa asi age ga kara nononkondo unene ‘komapangero’ nagenye. Tutareni ko yihonena yitatu. Hompa gwaEgipite Farawo kwa tulire vantu vaKarunga mounkwate ntani yikando yoyinzi kwa nyokere kuvamangurura va ze. Nye Karunga ga va mangwilire ntani kwa zuguminine Farawo mefuta lyegeha. (Ex. 14:26-28; Epis. 136:15) Hompa Belisasara gwaBabironi kwa kere nosipito ntani kwa rugene “yokulilimba naHOMPA geguru” ntani kwa ‘fumadekere vakarunga wongorodo nosisiliveli’ mevango lyokufumadeka Jehova. (Ndan. 5:22, 23) Nye Karunga kwa tengekere mugara ogo gokulinenepeka. “Masiku googo,” Belisasara kwa mu dipagere ntani uhompa wendi kwa u geve koVamede noVaperesiya. (Ndan. 5:28, 30, 31) Hompa Herodesa Agilipa gokuhova gomoPalestina, kwa dipagesere mupositoli Jakopo ntani age kwa ya tulire mupositoli Peturusa modorongo nositambo asi va mu dipage nage. Nye Jehova kwa konderere Herodesa a dire kusikisa mo eyi ga here kurugana. ‘Muengeli gwaJehova kwa ninkire maginyo ga lye po Herodesa’ makura ta fu.—Yirug. 12:1-5, 21-23.

13. Gava sihonena esi sina kulikida omu Jehova ga fundire nombunga dovapangeli.

¹³ Jehova kwa likidire hena nonkondo dendi kovapangeli ava ngava ruganene kumwe. Age kwa rwililire po Vaisraeli nokuvavatera  va zonagure po vahompa woVakanani 31 ntani nokukagusa ruha rorunene roSirongo sEtumbwidiro. (Jos. 11:4-6, 20; 12:1, 7, 24) Jehova kwa vaterere hena Vaisraeli va funde hompa Benihadadi ntani novahompa 32 vaSiliya ava ngava rwanesa Vaisraeli.—1 Vah. 20:1, 26-29.

14-15. (a) Yisinke ga uyungire hompa Nebukadenesara nahompa Daliusi kuhamena upangeli waJehova? (b) Yisinke ga uyungire muEpisarome kuhamena Jehova ntani muhoko gwendi?

¹⁴ Jehova kwa yi likidire hena mwaza siruwo asi age ga kara nononkondo dononene. Apa hompa Nebukadenesara gwaBabironi ga linenepekere kuhamena nonkondo nefumano nouhompa wendi mevango lyokuyitambura asi Jehova yige lya wapera efumano, Karunga kwa mu ninkisire a zaruke. Konyima zapa ga verukire, Nebukadenesara kwa fumadekere “Karunga gekeguru-guru” ntani ga yi tambwire asi upangeli waJehova “wanarunye.” Age kwa tente hena asi: ‘Nagumwesi gokumukondera.’ (Ndan. 4:30, 33-35) Konyima zapa ulimburukwi waNdaniyera va u hetekere ntani konyima zapa Jehova ga mu parwire mekero lyovanyime, hompa Daliusi kwa tente asi: “Navenye womosirongo sange ava tjire oku tava fumadeke Karunga gwaNdaniyera. Age yige po Karunga gomwenyo, age nga pangera narunye. Sirongo sendi nokanunusi kusihanagura po, epangero lyendi ngali kara ko dogoro nokouhura.”—Ndan. 6:7-10, 19-22, 26, 27.

¹⁵ MuEpisarome kwa tjenge asi: “HOMPA kuzungurura yigongi yonomuhoko; ta haraganesa yigazo yonombunga.” Age hena kwa gwederere ko asi: “Za kara nerago mbunga ezi asi Karunga gwazo HOMPA; va kara nerago vantu ava ga horowora mwene!” (Epis. 33:10, 12) Ozo kuna kara konda zongwa zeyi natu twikilira kulimburukwa Jehova!

16. Ehuguvaro musinke twa hepa kukara nalyo kuhamena “udigu wounene” ntani morwasinke? (Tara efano.)

¹⁶ Ose tuna resa eyi ga rugene Jehova mosiruwo  sanare. Yisinke tuna kundindira eyi ngaka rugana ntaantani komeho? Ose kuvhura tu kare nehuguvaro asi Jehova nga popera vakareli vendi wovalimburukwi ‘poudigu wounene’ ou una kara pepi. (Mat. 24:21; Ndan. 12:1) Age ngayi rugana oyo apa mbunga zelipakerero zonomuhoko ezi ava tumbura asi Gogo zaMagogo ngazi homokera vakareli vaJehova wovalimburukwi mouzuni mudima. Nampili ngayi kare asi yirongo 193 eyi ya hamena mombunga zelipakerero zonomuhoko, ngayi lipakerera kumwe, ayo kapi ngayi vhura kurwanesa Jehova munankondo po gomunene kumwe novakwayita vendi vemeguru. Jehova kwa tumbwidira asi: “Monkedi ezi yimo ngani likidira nomuhoko nadinye asi ame ni munene, ame hena kwa pongoka. Makura ntani ngava diva asi ame nyame HOMPA.”—Hes. 38:14-16, 23; Epis. 46:10.

17. Yisinke za pumba Bibeli kuhamena vahompa vepevhu nalinye ntani kuhamena vantu ava ava twikire kulimburukwa Jehova?

¹⁷ Ehomono lyaGogo ngali twaredesa koyita yaHarumagedoni apa Jehova ngaya zonagura po “vahompa vepevhu nalinye.” (Ehor. 16:14, 16; 19:19-21) Nye “vantu wovahungami-vantuzuni-yiwo ngava kara omu mosirongo setu.”—Yis. 2:21.

18. Yisinke va tokomena sinzi soVakriste wousili ntani morwasinke? (Ndaniyera 3:28)

¹⁸ Kutunda kwanare, sinzi soVakriste wousili kwa tura umanguruki wawo mosiponga kukwatera mo nampili eparu lyawo morwa va hara Jehova mupanguli gouzuni. Vakriste owo kwa tokomena kulimburukwa Jehova, ngwendi Vahebeli vatatu ava va twikilire kulimburukwa munankondo po gomunene, Jehova ogu ga ya va parwire konyima mesuga lyomundiro.—Resa Ndaniyera 3:28.

19. Kuliza noyininke musinke Jehova nga pangura vantu vendi ntani yisinke twa hepa kurugana ngesi?

¹⁹ Muepisarome Ndafita kwa tjenge kuhamena mulyo gokutwikira kulimburukwa kwaKarunga asi: “HOMPA yige a pangura nombunga; HOMPA, pangura nge mokuliza nouhungami wange nomokuliza noupiranzo wange [ulimburukwi].” (Epis. 7:8) Ndafita kwa tjenge hena asi: “Ngano uwa [ulimburukwi] nouhungami tau gamene nge.” (Epis. 25:21) Nkedi zongwa po omu natu paruka kuna kara pokutwikira kulimburukwa Jehova yikare asi yinke tuna kuligwanekera nayo. Makura nose ngatu lizuvha ngwendi muEpisarome ogu ga tjenge asi: ‘Vantu woruhafo vaava ava twikire kulimburukwa Jehova, ogu a kara moomu za tanta Veta zaHOMPA.’—Epis. 119:1.