Hedera Karunga pepi

Apa vakurupe ngava ka tengwira hena koudinkantu

YILYE ogu a hafere ukurupe, sipapa kuligonyangera nokumona si nawa nokuzuvha si ntani nokuvhura si kugenda? Kuvhura o lipure asi: ‘Morwasinke Karunga ga tu sitira neharo lyokuhafera nonkondo doudinkantu nye moruhura tu ka kare vakurupe?’ Mbudi zongwa kuna kara asi eyi kapisi yiyo ga tu harere Karunga. Nye age ga kara nositambo sokukatumangurura mo moukurupe. Koneka nonkango edi lya uyungire esimbi Joba, atu gwana mwaJoba 33:24, 25.

Tarurura sihorokwa saJoba, mugara gomulimburukwi ogu Jehova ga here. Joba ga hana kuyidivira, Satana kwa homwene ulimburukwi wendi pokutanta asi age kukarera tupu Karunga morwa yeeyi a gwanene mo mauwa. Jehova kwa pulisilire Satana a heteke Joba morwa kwa mu huguvarere, ntani ga kara nononkondo dokuwapukurura nkenye udona ou na retesa po Satana. Makura Satana “ta zuguma Joba masina gomadona morutu rwendi narunye.” (Joba 2:7) Rutu rwaJoba kwa zulire maginyo, ano sipapa sendi kwa si kudumikire makaka nokusovagana nokupya koyikunkira. (Joba 7:5; 30:17, 30) Kuvhura o gazadare ko kukora oku ga lizuvhire ndi? Nye Joba ga kere ngorooro noulimburukwi, pokutanta asi: “Ame ngani kara ngorooro mokupira unzoni wange dogoro kezuva lyonomfa dange.”—Joba 27:5.

Nye, Joba ga tulire epuko lyenene. Apa ga mwene asi ta hara kufa, age kwa kere sosinka sokulihungameka mwene ‘pokulimona uhungami a pe Karunga usima.’ (Joba 32:2) Elihu, ogu ga uyungilire po Karunga, kwa pukwilire Joba. Nye Elihu hena kwa geve mbudi zongwa kwaJoba zokutunda kwaKarunga asi: ‘Mu mangurureni mo Joba! Kapisi yige gokuza mosirongo sovafe sizoweseso sesi sokumumangwilisa. Rutu rwendi taru tengwire udinkantu ru kare hena nononkondo.’ (Joba 33:24, 25) Nonkango odo da pere Joba ehuguvaro. Age ga divire asi kapi ta hepa dogoro konomfa dendi. Nsene ta litezurura, Karunga ngano nga hafera mokutambura sizoweseso nokumumangurura komaudigu gendi. *

Nelinunupiko, Joba ga tambwire evyukiso ntani ga litezwilire. (Joba 42:6) Jehova ga tambwire sizoweseso saJoba, pokusipulisira si kudumike epuko lyendi nokupa mpito Karunga a mu wapukurure nokumutungika. Jehova ‘ta tungike ukaro wokuhulilira waJoba kupitakana omu ga mu tungikire muhowo.’ (Joba 42:12-17) Matungiko kwa kwaterere mo everuko ntani rutu rwendi kwa ‘tengwire koudinkantu,’ nayinye eyi ya reterere Joba ruhafo rorunene!

Sizoweseso esi ga tambwire Karunga mevango lyaJoba kwa kere nomulyo gomasesu, morwa Joba ga kere ngorooro gokudira kusikilira mo ano konyima ga ya fire. Ose kwa gwana sizoweseso somulyo po unene. Neharo, Jehova kwa geve Munwendi, Jesus, ngosizoweseso setu. (Mateusa 20:28; Johanesa 3:16) Navenye ava ava tura epuro mosizoweseso oso va kara nehuguvaro lyokukaparuka narunye moparadisa apa pevhu. Ano mouzuni woupe una kuwiza, Karunga nga ka mangurura vantu wovalimburukwi koukurupe. Morwasinke no dilira kulironga yoyinzi kuhamena omu no paruka yipo ngo ka mone omu ‘marutu govakurupe gana kutengwira koudinkantu’?

[Nondanda dokonhi]