Hedera Karunga pepi

Ehengagwido kwava wokudompa nomutjima

MUNAZINYETUKADI gumwe ogu ga guvire unene kwa tente asi: ‘Jehova kapi ga hara nge.’ Age kwa lizuvhire asi Jehova ure nendi ga kara. Jehova sili kwa kara ure novakareli vendi ava ava dompo nomutjima ndi? Elimbururo lyokuhengagwida kuligwana mononkango daNdafita mEpisarome 34:18.

Ndafita ga divire omu ruguwo rorunene aru vhuru kukundama vakareli wovalimburukwi waJehova. Ngomudinkantu, Ndafita kwa kere mutjwayuki, kwa tjilire hompa Sauru ogu ga here kumudipaga. Ndafita kwa ka paparere uvando kevango oku ga gazarere asi Sauru kapi na za ko, kositata saGata momukunda goVafilisiti, nonkore doVaisraeli. Apa va mu dimbwilire Vafilisti, Ndafita ga lininkisire asi ana zaruka, yipo va dilire kumudipaga. Ndafita kwa yererepekere Karunga mokumuzowora, morwa sihorokwa esi, yipo ga tjenge Episarome 34.

Ndafita ngoso ga gazarere asi Karunga kwa kara ure nava ava dompo nomutjima ndi kapi a va nongonona ndi? Ndafita kwa tjenge asi: ‘HOMPA kukara pepi nava vana dompo nomutjima; age kuparura ava lina pu ehuguvaro.’ (Velise 18) Tu zeni tu tare nonkango odo omu adi gava ehengagwido nehuguvaro.

“HOMPA kukara pepi.” Bukenkango zimwe kwa tanta asi ntanto ozo kulikida asi “Hompa age kulitura mo ndi kutakamesa, ntani age ga liwapaikira nkenye apa mokuvatera nokupopera vantu vendi.” Ayo kugava ehuguvaro mokudiva asi Jehova kutakamesa vantu vendi. Age kumona maudigu aga vana kuligwanekera nago ‘moyiruwo eyi yoyidigu,’ ntani ga diva malizuvho gawo gomomutjima.—2 Timoteusa 3:1; Yirugana 17:27.

‘Ava vana dompo nomutjima.’ Mulirongi gumwe kwa tanta asi nonkango odo domuepisarome kwa tamba “kokulira ndi keguwo.” Yimo, nampili vakareli vaKarunga wovalimburukwi poyiruwo yimwe nawo kuligwanekera nomaudigu aga aga va guvisa.

“Ava lina pu ehuguvaro.” Vantu ava ava dompo nomutjima kuguva unene dogoro tava zumbanesere mo ehuguvaro. Buke ezi ava ruganesa vatoroki woBibeli kwa tanta asi nonkango odo kutanta asi “owo va dira kukara nehuguvaro.”

Ngapi omu Jehova a tara ava ava ‘dompo nomutjima’ ntani “ava lina pu ehuguvaro”? Age kukara ure nawo pokulizuvha asi kapi va fira eharo nelituromo lyendi ndi? Hawe! Ngwendi mukurona geharo ogu a kwaterere nokuhengagwida munwendi ogu ana guwu, Jehova kukara pepi novakareli vendi ava ava kugu evatero kwendi. Age ga kara neharo lyokuhengagwida wokudompa nomutjima nava lina pu ehuguvaro. Age kuvhura kuvapa unongo nononkondo edi va hepa yipo va lididimikire maudigu aga vana kuligwanekera nago.—2 Vakolinte 4:7; Jakopo 1:5.

Papara nonkedi omu no vhura kuhedera Jehova pepi. Karunga ogu gonkenda kwa tumbwidira asi: “Ame . . . kukara novantu ava ava linunupike nava ava litezurura asi ame ni wapeke ehuguvaro nendindiro lyawo.”—Jesaya 57:15.