Lirongera ko kononkango daKarunga

Ehuguvaro musinke twa kara nalyo kovafe?

Sirongwa esi kwa tumbura mapuro gamwe aga nampo wa lipura nokukakulikida asi kupi oku no vhura kuresa moBibeli zoge o gwane malimbururo. Nombangi daJehova nava ka yi hafera pokukazogera kumwe nove malimbururo ogo.

1. Ehuguvaro musinke twa kara nalyo kovafe?

Apa Jesus ga ka sikire koBetani pepi naJerusarema, kaume kendi Rasarusa ana fu apo pana piti mazuva gane. Jesus kwa zire kontoko naMalita naMariya, vampanza vanakufa. Mbunga zovantu nazo tazi ya pongo. Gazara tupu omu Malita naMariya va hefe apa Jesus ga vhumbwire Rasarusa.—Resa Johanesa 11:20-24, 38-44.

Malita kwa pulire asi vafe ngava va vhumbura. Vakareli vaJehova wovalimburukwi va yi diva asi komeho, Karunga nga ka vhumbura vafe va ka paruke hena pevhu.—Resa Joba 14:14, 15.

2. Yisinke ukaro wovafe?

Vantu kapi va kara nomwenyo gwa ha fu. (Muudisi 3:19; Genesis 7:21, 22) Ose kwa tu unga kombundu zevhu. (Genesis 2:7; 3:19) Apa au fu uruvi wetu, magazaro getu kuhaga. Apa Rasarusa va mu vhumbwire, age kwato eyi ga uyungire kuhamena nomfa dendi morwa vafe kutupu eyi va diva.—Resa Episarome 146:4; Muudisi 9:5, 10.

Vafe kapi ava hepa. Yipo nye, erongo eli asi Karunga kuhepeka vantu momundiro, epuko. Alyo kuswawisisa Karunga. Age kapi a kwatesa ko egano lyokuhepeka vantu momundiro.—Resa Jeremiya 7:31.

 3. Kuvhura tu uyunge novafe ndi?

Vafe kapi ava uyunga. (Episarome 115:17) Nye apa vaengeli wovadona ava uyungisa vantu, awo kulikisaukira ngwendi muntu ogu ana fu. (2 Peturusa 2:4) Jehova ga silika kuhetekera ko kuuyunga novafe.—Resa Deuteronomium 18:10, 11.

4. Wolye ngava ka vhumbura?

Mouzuni woupe, mamiliyona govantu ava vana kara monontoko ngava ka va vhumbwira keparu. Nampili vamwe ava va rugana yininke yoyidona morwa kudira kudiva Jehova ngava ka va vhumbura.—Resa Rukasa 23:43; Yirugana 24:15.

Ava ngava ka vhumbura ngava ka lironga usili kuhamena Karunga nokulikida epuro mwaJesus pokumulimburukwa. (Ehororo 20:11-13) Owo ngava ka vhumbura va ka rugane yoyiwa ngava ka hafera mwenyo gwanarunye. Nye, owo ngava ka twikira kukarugana yoyidona, evhumbuko lyawo ngali ka kara “mpanguro.”—Resa Johanesa 5:28, 29.

5. Yisinke ali tu rongo evhumbuko kuhamena Jehova?

Evhumbuko yiko ngali ka kara morwa Karunga ga tumine Munwendi a ya tu fire. Azo kuna kara nkedi zaJehova zokutulikida eharo nonkenda.—Resa Johanesa 3:16; Varoma 6:23.

[Efano lyepepenuno 27]

Komauzera gomanzi, tara egaununo 6 ntani 7 mobuke ezi Yinke azi rongo Bibeli sili?, va nduruka Nombangi daJehova.

[Efano lyepepenuno 26]

Adamu kwa mu ungire kombundu zevhu