Mbilive zokutunda koMadagascar

Kwa zuvhikire ngwendi musika gomuwa

NAME namugara gwange kwa zire kosirugana setu soutumwa posirudi saMadagascar. Tatu lirekere nekoro novakaume vetu nokuhetekera ko kukara nouradi, pokuhuguvara asi Jehova nga ka tu vatera yi ka tu tompoke.

Kapi ngatu divara epongo lyetu lyokuhova moMadagascar. Munazinyetu ogu ga pitisilire elirongo lyoRuhungu kwa kere ngwendi kuna kupitisira vantu vana kudimba. Kapi twa divire nawa eraka olyo, kwetu kwa zuvhikire ngwendi musika gomuwa. Kwa gusire siruwo mokukwata egano eyi va uyungire.

Posikando sokuhova apa na kwete egano epuro, haruka ko tupu mevango lyokulilimburura momutjima gwange, tani ziguruka. Owo va hingilire pepi name va li zuvhire, tani zoro nye tani likwata kokana. Na lifire nomuga nye na hefe morwa na kwete egano epuro eli va pulire!

Mevango lyokutulisa po sihonena moyirugana yokuzuvhisa, ame kwa lizuvhire asi nyame na hepere evatero. Vanavazinyetu wokuhara kwa tanterere nge omu nani ka uyunga nawa moyirugana yokuzuvhisa, pokulikida nge eyi nani ka uyunga netjangwa eli nani ka ruganesa.

Ezuva limwe apa na pwege moyirugana yokuzuvhisa, munona ta zigire asi: “Vazaha! Vazaha!” Meraka lyoRumalagasi kutanta asi “munayirongo.” Tatu genderere yipo vanona vamwe va dire kuzigira yokulifana. Mumati gumwe ta handukire ogu ga zigilire. Age kwa tente asi: “Age kapisi munayirongo, age kuuyunga eraka lyetu!” Munazinyetukadi ogu na zire nendi ta torokere nge eyi va uyungire morwa awo kwa uyungire kugenderera, kapi na yi kwete egano. Nye na hefe morwa na lizuvhire asi kuna kutura po ezokomeho. Na lizuvhire asi Madagascar kuna kara ngwendi sirongo setu.

Poyiruwo yoyinzi apa ngani lizuvhu mukuma, ngayi korangeda nge apa vadinkantu ngava yi likida asi va hara nge nampili ngomu  ngani dili kuuyunga nawo nawa. Vadinkantu womombungakriste awo matungiko gokutunda kwaJehova. Munazinyetukadi gumwe gomudinkantu gedina Hasina, yige nga torokere nge. Nampili vapeke kapi vana kukwata egano eyi nina kuuyunga, age nga yi kwata egano. Nkenye apa age kuvatera nge nsene tani zogere novakaume vange mombungakriste, nokuvafatwilira eyi nina tamba.

Name namugara gwange kwa kere mombungakriste ezi va hepere kugaununa. Kutanta asi varongwa vamwe va hepere kuvagava morwa ava ngava lirongo nawo kwa kere mombungakriste zompe. Munazinyetukadi gumwe kwa korangedere nge ni lironge nagumwe govarongwa vendi. Na kere nowoma tani mu tantere asi kapi tani yi vhuru, nye age ta tumangeda nge. Ta korangeda nge asi nevatero lyaJehova tani yi sikisa mo. Nougomoki ta ruganesa nonkango doureru, ta tantere nge asi ntaantani ngani ronge vantu monkedi omu nina yi harere. Nonkango odo kwa korangedere nge unene.

Murongwa ogo ga tura po ezokomeho lyewa. Ezuva limwe apa na kere ponze, tani mu zuvhu kuna kuzigida edina lyange. Nage namugara gwendi kwa kere monzira zokukatura nonkwara dawo paveta. Ngesi mugara nage ga tameka kulironga, ano vana kara noyitambo yopampepo eyi vana hara kusikisa mo, kukwatera mo kugwana ekuho. Oyo kwa reterere nge ruhafo, morwa na yi diva asi Jehova yige a koko vantu kwendi.

Twa lironga yininke yoyinzi mosirugana setu soutumwa. Nampili ngomu atu rongora vakaume nekoro lyetu, ose kulizuvha ngwendi asi kumwe nawo tuna kara. Ose kutantera ko vanavazinyetu kuvahamena, ano awo ngesi kuvapura omu vana karere. Ose kuna kundindira siruwo apa epata lyetu neli lyopampepo ngali ka kara mouumwe nokulidiva-diva.

Apa vantu ava uyunga, kwange kuzuvhika simpe ngwendi kuna kudimba. Nye ngesi kuna kukwata egano nonkango. Ame kuna kundindira nononkondo apa ngani vhura kuuyunga nawa eraka olyo. Jesus kwa tente asi: “Yipo nye nomu dilira kulipakera sinka kweyi yomungura, yeeyi olyo lyomungura nalyo nayalyo.” (Mateusa 6:34) Ose kuna kutwikira kulironga nonkango donompe nkenye siruwo. Ano ngesi, ame ngani twikira kulironga kupurakena nawa yipo name ngani vhure kuuyunga nawa eraka eli ngwendi vanavazinyetu womoMadagascar.

[Efano lyepepenuno 25]

Kuna kuzuvhisa naHasina